الشهيدة بربارة حسب روايات تاريخ الكنيسة
المرجع: قاموس آباء الكنيسة وقديسيها للقمص/ تادرس يعقوب ملطى
نالت شهرة فائقة في الشرق والغرب. احتملت الكثير من أجل إيمانها، وبسبب ثباتها آمنت يوليانة بالسيد المسيح بل وتقدمت للاستشهاد. تعيد لهما الكنيسة القبطية في 8 كيهك، وتعيد لهما الكنيسة الغربية واليونانية في 4 ديسمبر. نشأتها وُلدت في قرية جاميس التابعة لمدينة ليئوبوليس بنيقوميدية، في أوائل القرن الثالث في عهد الملك مكسيمانوس الذي تولى الملك سنة 236 م، وكان والدها ديسقورس شديد التمسك بالوثنية ويكره المسيحيين.
لما شبت بربارة خاف عليها والدها من مفاسد العصر نظرًا لما كانت تتصف به من جمال فتان، ووضعها في قصر يحيط به العسكر ملأه بالأصنام، وجعل فيه كل أنواع التسلية. كانت بربارة تتلقي أرفع العلوم، محبة للتأمل، إذ اعتادت أن ترفع نظرها نحو السماء تتأمل الشمس والقمر والنجوم، تناجي الخالق الذي أوجد الأرض وكل ما عليها لأجل الإنسان. أرشدها بعض خدامها من المسيحيين إلى العلامة أوريجينوس فاشتاقت أن تلتقي به. وبالفعل إذ زار تلك البلاد التقت به فحدثها عن الإنجيل، فتعلق قلبها بالسيد المسيح، ونالت المعمودية دون أن تفاتح والدها في الأمر. التهب قلبها بمحبة الله فنذرت حياتها له، واشتهت أن تعيش بتولاً تكرس حياتها للعبادة.
تقدم لها كثيرون من بينهم شاب غني ابن أحد أمراء المنطقة ففاتحها والدها في الأمر حاسبًا انه يبهج قلبها بهذا النبأ السعيد، أما هي فبحكمة اعتذرت عن الزواج. وإذ كان والدها مسافرًا لقضاء عمل ما أرجأ الأمر إلى حين عودته لعلها تكون قد استقرت في تفكيرها. طلبت منه أن يبني لها حمامًا قبل سفره، فلبَّى طلبتها، وفتح لها نافذتين لزيادة الإضاءة، أما هي فحولت الحمّام إلى بيت صلاة، متعبدة لله بصلواتٍ وأسهارٍ وأصوامٍ بلا انقطاع. حطمت كل الأوثان، وأقامت صليبًا على الحمام وعلى أعلى القصر، كما فتحت نافذة ثالثة، وكما جاء في الذكصولوجية (تمجيد) الخاصة بها: "نور الثالوث القدوس أشرق على هذه العذراء القديسة بربارة عروس المسيح". أمام قسوة والدها إذ رجع والدها لاحظ هذا التغيير الواضح، فسألها عن سبب ذلك. صارت تكرز له بالإيمان بالثالوث، كيف يجب أن نؤمن بالله الواحد المثلث الأقانيم، فاستشاط غضبًا وأخذ يوبخها بصرامة، أما هي فلم تبالِ بل في صراحة ووضوح كانت تتحدث معه عن إيمانها وبتوليتها، فثار الوالد وانقض عليها وجذبها من شعرها وهمّ ليضربها بالسيف، فهربت من أمام وجهه وانطلقت من باب القصر، وكان أبوها يركض وراءها. قيل أن صخرة عاقتها في الطريق لكن سرعان ما انشقت الصخرة لتعبر في وسطها، ثم عادت الصخرة إلى حالها الأول. أما والدها إذ رأى ذلك لم يلن قلبه الصخري بل صار يدور حول الصخرة حتى وجدها مختبئة في مغارة، فوثب عليها كذئب على حمل، وصار يضربها بعنفٍ، ورجع بها إلى بيته. هناك وضعها في قبوٍ مظلم كما في سجن.
أمام مرقيان الحاكم روي ديسقورس للحاكم ما جرى وطلب منه أن يعذبها، لكن إذ رآها مرقيان تعلق قلبه بها جدًا وصار يوبخ والدها على قساوته ويلاطفها ويعدها بكرامات كثيرة إن أطاعت أمر الملك وسجدت للأوثان، أما هي ففي شجاعة تحدثت معه عن إيمانها بالسيد المسيح. جُلدت القديسة بربارة حتى سالت منها الدماء، كما كانوا يمزقون جسدها بمخارز مسننة بينما هي صامتة تصلي.
ألبسوها مسحًا خشنة على جسدها الممزق بالجراحات، وألقوها في سجنٍ مظلمٍ. إذ كانت تشعر بثقل الآلام ظهر لها السيد المسيح نفسه وعزاها كما شفاها من جراحاتها، ففرحت وتهللت نفسها. استدعاها الحاكم في اليوم التالي ففوجئ بها فرحة متهللة، لا يظهر على جسدها أثر للجراحات فازداد عنفًا، وطلب من الجلادين تعذيبها، فكانوا يمشطون جسدها بأمشاط حديدية، كما وضعوا مشاعل متقدة عند جنبيها، وقطعوا ثدييها؛ ثم أمر الوالي في دنائة أن تساق عارية في الشوارع. صرخت إلى الرب أن يستر جسدها فلا يُخدش حيائها، فسمع الرب طلبتها وكساها بثوب نوراني.
رأتها يوليانة وسط العذبات محتملة الآلام فصارت تبكي بمرارة، وإذ شاهدها الحاكم أمر بتعذيبها مع القديسة بربارة، وبإلقائها في السجن، فصارتا تسبحان الله طول الليل. استشهادهما أمر مرقيان الحاكم بقطع رأسيهما بحد السيف، فأخذوهما إلى الجبل خارج المدينة وكانتا تصليان في الطريق. وإذ بلغتا موضع استشهادهما طلب ديسقورس أن يضرب هو بسيفه رقبة ابنته فسُمح له بذلك، ونالت مع القديسة يوليانة إكليل الاستشهاد. جسد القديسة بربارة موجود حاليًا في كنيسة باسمها بمصر القديمة. وقد رأى بعض المؤرخين انها استشهدت بهليوبوليس بمصر.
صلاتها تكون معنا أجمعين
قد نكون احتجنا لبعض الفروض فى العلاقات بين أفراد القصة لم ترد بالقصة الحقيقية الواردة بالسنكسار وكتب هذه السيرة الطاهرة أثناء كتابة الحبكة الدرامية. لكننا حرصنا –قدر الإمكان- على تدوين جميع الأحداث والشخصيات التي وردت بكتب هذه السيرة العطرة. إذكرونى صلواتكم … إيليا سمير
الشخصيات
1- السيد المسيح
2- بربارة
3- يوليانة
4- دوريس
5- إلكترا
6- أركاديوس
7- ديسقوروس
8- مرقيانوس
9- أوكتافيوس
10- الشيطان
11- حارس 1
12- حارس 2
13- حارس 3
الفصل الأول
(ستار) المنظر الحجرة العلوية لبرج بربارة، عبارة عن كرسي عريض أو كنبة أمامها مائدة صغيرة تفتح الحجرة على باب للداخل وآخر مقابل له مؤدى إلى الخارج، بعض التماثيل اليونانية، طست ماء وإبريق على أحد الجوانب. وستائر رومانية على الشرفات –إن أمكن- وعمودان رخاميان على جانبي الشرفة الرئيسية المطلة على المدينة أو حديقة القصر.
(تظهر إلكترا وهى تنظف أثاث المنزل)
إلكترا: (تغنى) نيقوميديا يا بلـد الجمال حسن بناتك ده مـنـيـن
زينا فـ الدنيا مـحـال وحياة فينوس ست الحلوين
دوريس: (تدخل) إيه ده ياإلكترا لسه مخلصتيش نظافة هنا .. طب دي ستى بربارة جاية تفطر هنا
إلكترا: طبعاً يا ستى .. ما احنا وصلنا خلاص
دوريس: قصدك ايه
إلكترا: لأ أبداً يعنى حقصد ايه .. مادام إنتى وست القصر الأمورة بربارة بقيتوا أصحاب طبعاً لازم تتأمرى علينا وتبقى ريستنا.
يوليانة: (تدخل) (تتجه نحو دوريس) هو انتى شرفتى .. ما كان لسه بدرى ياختى.
إلكترا: محدش يكلمها .. دى بقت صاحبة الأمورة بربارة صاحبة القصر.. وبتقعد معاها في أوضتها .. ويسهروا للصبح .. .. أنا مش عارفة سيدى ديسقوروس رأيه إيه في الموضوع ده.
يوليانة: بقى شوفى يا بت إنتى .. لازم تعرفى إنى هنا رئيسة الوصيفات غصب عن عين التخينة فيكم .. لأن اللى معيينى هنا سيدى ديسقوروس نفسه.. ومهما اتصاحبتى على بنته بربارة، مش ممكن تاخدى مكانى أبداً .. انتى فاهمة.
إلكترا: اللى غايظنى ياريسة .. إنها فاكرة نفسها بنت ناس قوى .. عشان كدة بتقعد مع اسيادها.
دوريس: أنا عمرى ما نسيت إنى خدامه .. لكن على ايه الكلام ده كله .. أنا مكنتش عايزه أقعد معاها لكن هيه اللى طلبت منى كده .. ستى بربارة تعبانة قوى ودماغها فيها ستين سؤال محتاجين إجابة.
يوليانة: ستين سؤال .. وانتى بقى اللى الإله زيوس اداكى الحكمة وحتجاوبى على أسئلتها؟!
دوريس: على قد ما أقدر .. واللى يعرف يساعد حد لازم يساعده وإلا تبقى خطية عليه.
يوليانة: بقولك ايه يا بت انتى .. الكلام ده بتاع أتباع المصلوب مش عايزة أسمعه .. وكفاية انى مقولتش لحد دلوقت لمولاى ديسقوروس إنك مسيحية .. عشان يطردك.
إلكترا: يطردها بس .. ده يمكن كمان يسلمها للوالى مركيانوس علشان يقتلها.
دوريس: لي الحياة هي المسيح .. والموت ربح لي .. أنا مبخافش من الموت .. بالعكس، ده أنا مش حنسالكم الجميل ده لو قلتم لمولاى ديسقوروس إنى مسيحية.
يوليانة: إنتى عايزه تشلينى .. طب أنا حأقول حالاً لمولانا ديسقوروس إنك من أتباع الراجل المصلوب اللى الوالى ديسقوروس بيكرهم.(تهم بالخروج)
إلكترا: استنى بس يا يوليانة (همساً) ما تنسيش انها لو مشيت أو ماتت حنرجع احنا نعمل الشغل بتاعنا تانى .. دأحنا ما صدقنا ما لقينا واحدة زى دى تعمل كل الشغل ونتأمر عليها ونذلها زى ما احنا عايزين.
يوليانة: (همسا) عندك حق .. (بصوت مرتفع) طب علشانك يا إلكترا حسامحها المره دى كمان.
إلكترا: تعيشى يا ريسة .. طول عمرك قلبك حنين.
يوليانة: آه بس اللى يقدّر
أركاديوس: (يدخل فتضطرب دوريس وتخرج بمجرد أن تراه) أسعدت الآلهة صباح أحلى الوصيفات
يوليانة: أهلاً .. حضرتك شرفت .. كنت فين من الصبح؟!
أركاديوس: (نظره متعلق بالباب الذي خرجت منه دوريس) كنت بألف حوالين أسوار القصر .. لحسن يكون حد كده ولا كده بيحوم حوالين قصر الجميلة بربارة .. وبالمرة وقفت شوية تحت شباك دوريس..
يوليانة: مفيش فايده في أركاديوس .. حارس قصر شجاع .. لكن قدام البنت المفعوصة دوريس قطه صغيرة..
أركاديوس: (يشهر سيفه) بقولك ايه يا جارية.. كلمة تانية ومش حتلاقى راسك في كتفك ..
يوليانة: هه .. مش بقولك يا أركاديوس إن مفيش فايدة منك .. مش عايز تفهم إنها طول ما هيه بتعبد المصلوب ده يبقى مش حتقدر تتجوزها ..
أركاديوس: مسيرى في يوم حاقدر أخليها تنساه .. يإما بالذوق .. (يهز سيفه) أو بالعافية .. (يعيد سيفه بمجرد سماع صوت ديسقورس)
ديسقورس: (صوته يأتى من الخارج) الحارس ده لازم يتجلد .. أنا مش بأدفعلهم فلوس عشان يناموا..
إلكترا: خلو بالكم سيدى ديسقورس جاى ..
ديسقورس: (يدخل ثائراً فيشاهد أركاديوس) .. انت هنا .. ازاي تسيب العسكرى ينام عند البوابة، لدرجة إنى دخلت من غير مايحس بوجودى؟!
أركاديوس: إزاي ده حصل .. وحق أبوللون لأجلده قدام كل الحرس .. معلهش.. حقك عليا .. إحنا كلنا عبيدك ورهن إشارتك يا مولاى ديسقورس.
يسقورس: لازم تفهم يا أركاديوس إن بنتى بربارة دى بنتى الوحيدة.. هيه اللى النعمة والعزاء اللى قدمتهملى الآلهة .. وعشان كده الآلهة سكبت فيها الجمال النورانى.. فمن خوفى عليها من مجون روما، وفساد نيقوميديا بنيت لها القصر ده بنيت القصر ده وعينتك انت رئيس الحرس عشان أنا عراف شجاعتك وإخلاصك.
أركاديوس: (يجثو على ركبتيه) مولاى ديسقوروس.. ثفتك دى شرف كبير أوعدك أنى أكون قدها.
إلكترا : (تدخل حاملة الطعام)
ديسقورس: استنى .. الأكل ده لمين؟!
إلكترا: لستى بربارة يا مولاى
ديسقورس: هه.. وهيه متعوده انها تاخد الفطار بره أوضتها وسط الخدم على طول
إلكترا: أ أ أبداً يامولاى..
بربارة: (تدخل) أهلاً والدى .. (تقبل يده)
ديسقورس: (بجفاف) أهلاً يا بنتى .. أركاديوس .. طلّع دول بره وأخرج انت كمان..
أركاديوس: أمرك يامولاى .. (يقوم بإخراج الوصيفة ويخرج)
ديسقورس: (يطمئن لخروجهم) (بصوت جهورى) بربارة .. (تفزع بربارة) .. إيه اللى انتى بتعمليه ده .. ازاى تاكلى وسط الخدم كده .. وإيه اللى بسمعه عن انك بتقعدى معاهم بالساعات..
بربارة: أبداً ياوالدى .. كل الحكاية إنى زهقت من الحبسة لوحدى .. حاسة إن الكل بيخاف منى .. نفسى حد يحبنى من غير ما يخاف منى ..
ديسقورس: ليه هو أن بخاف منك يابنت؟!
بربارة: مش قصدى انت يا بابا.. انت بتيجى كل يوم الصبح وأحياناً مره في الليل .. لكن أنا طول اليوم لوحدى .. انا كده حأتجنن.
ديسقورس: اخرسى .. انتى عايزه ايه .. عايزه تنزلى الشارع زى بنات السوق تتاجرى وتشترى وتبيعى .. انتى عايزه أمراء نيقوميديا اللى بقوا يستنوا عيد أبوللون من السنة للسنة علشان يشوفوكى .. يشوفوكى فى شوارع المدينة .. وتبقى زيك زى أي بنت عادية من باقى الشعب؟!
بربارة: لكن أنا…
ديسقورس: (مقاطعاً) انتى بنتى الوحيدة .. بنت ديسقورس أعظم تجار نيقوميديا .. مش بس كده .. (ملاطفاً) انتى تميمة الحظ اللى أهداهانى أبوللون .. من يوم ما ماتت أمك وأنت صغيره .. وأنا واخد على نفسى عهد إنى أرعاكى لحد ما أجوزك لأعظم راجل في نيقوميديا .. لأحسن راجل في الإمبراطورية الرومانية بحالها .. ..وانتى بتسمحى لنفسك انك تقعدى مع العبيد..
بربارة: يا والدي أنا مأنكرش محبتك لىّ .. لكن أنا زهقت من القعده لوحدى..
ديسقورس: أنا مش عايز أزعق أكتر من كده لإنى رايح النهارده أقدم ذبيحة الشكر لأبولون عشان التجارة بتاعتى رجعت سليمة من الشرق، وعايزك تيجى معايا.
بربارة: معلهش .. سيبنى المرة دى لإنى تعبانة شوية..
ديسقورس: إزاي .. أبوللون حيغضب عليا لو مجيتيش معايا .. لإنك هديته ليّا، ولازم يشوفك في كل مرة أروح فيها .. انتى عايزة أبولون يغضب علينا .. ده ممكن ياخدك منى.
بربارة: يا والدى، رئيس الكهنة اللى فهمك كده لو اديته خروف زياده حيطلب من أبولون أنه ميزعلش مننا.
ديسقورس: كده، طيب يابنتى حسيبك على راحتك المرة دى .. (باسماً) وحلال على رئيس الكهنة الخروف .. أركاديوس (يدخل أركاديوس) طلّع الخيل وابعت معايا حارس لحد هيكل أبولون وارجع انت لحراستك .. وخليك صاحى..
أركاديوس: أمرك يامولاى.
بربارة: (فترة صمت) (موسيقى) بربارة ايه اللى بيحصلك ده .. ايه اللى مخلينى تعبانه كده .. ياه .. أنا حاسة أن روحى بتهرب منى .. حتى السجود قدام أبولون معدش يريحنى .. ايه الحكاية .. انا حاسة إن قوة الآلهة بتدفعنى لمصير مجهول .. أسود .. مرعب .. الحته دى واقعة
(يظهر الشيطان وتتغير الإضاءة لتناسب حضوره)
الشيطان: بربارة .. بربارة .. بربارة .. ياجميلة نيقوميديا .. مالك .. زعلانه ليه .. خايفه ليه..
بربارة: هه .. أأأ أنت مين .. انت مين؟!
الشيطان: مالك مرعوبة ليه .. أنتي متعرفينيش .. أنا .. (بعظمة) .. أنا أبولون..
بربارة: أبولون .. إلهي؟!
الشيطان: آه أبولون .. هاهاهاهاها .. مالك يا حلوه .. انتى خايفه منى؟ .. أنا جيت لما لقيتك تعبانه وبتفكرى كتير..
بربارة: صحيح انك .. انك .. غضبان على عبدتك بربارة، علشان مرحتش المعبد مع والدى وقدمتلك ذبحية الشكر؟
الشيطان: هو صحيح إني زعلان منك، .. لكن مش بسبب انك مرحتيش المعبد بتاعى .. إنما علشان مش بتسمعى كلامى.
بربارة: إزاى؟!
إبليس: أنا مبحبش البنت اللى اسمها دوريس .. كل الآلهة غضبانين عليها .. متقعديش معاها .. متكليميهاش .. أطرديها .. أطرديها .. أطرديها وأنا حأخرجك كل ليله من القصر .. حأوديكى كل حانات نيقوميديا .. وروما حأخليكى تعملى كل اللى انت عايزاه .. بس اطرديها..
بربارة: (تقترب منه) لكن أنت مش أبولون .. أنت مش شبه أبولون .. ابولون شكله حلو .. انت مين .. (برعب) انت مين ..
إبليس: ها ها ها ها .. (بعظمة وصوت عميق) أنا إله الآلهة .. أنا خالق كل الآلهة .. أنا اللى روحك حتبقى ملكه .. أنا ملك الأرض .. أنا إله كل الأرض .. ها ها ها ها ..
بربارة: هه هه .. الحقونى .. دوريس .. دوريس .. (تصرخ) دوريس .. (يغيب إبليس وتعود الإضاءة)
دوريس: (تدخل) ستى بربارة .. مالك .. ستى بربارة..
بربارة: هه دوريس .. انتى هنا .. أشكرك .. انتى دايماً اللى .. (تنظر إليها بغضب) انتى ايه اللى جابك ..
دوريس: (متعجبة) انتى يا مولاتى ناديتى عليا وكنتى بنصرخى .. جيت جرى لقيتك واقعة على الأرض.
بربارة: أنا ناديتك ..
دوريس: أيوه يامولاتى ..
بربارة: أيوه صحيح .. لكن ايه اللى خلانى أناديكى .. مكنش يصح أناديكى .. إمشى ياللا من هنا .. أخرجى بره.
بربارة (تتعجب) حاضر .. حاضر يامولاتى (تهم بالخروج)
برباره دوريس .. استنى يا دوريس .. متزعليش منى .. أنا بعمل كده غصب عنى .. إنتى صديقتى الوحيدة .. علشان كده ناديت عليكى من غير ما أشعر ..
دوريس أنا تحت أمرك يا مولاتي.
برباره لكن غلط إنى أناديكى .. لإن الآلهة غضبانه عليكي .. لازم تستغفري الآلهة عشان ترضى عنك وأقدر أصاحبك.
دوريس (تضحك) أنا عارفه إنها غضبانه عليا ..
بربارة وساكته ؟ !
دوريس وسعيده جداً كمان يامولاتى .. إن ده معناه إنى ماشيه صح.
بربارة إنتى بتقولي إيه .. يبقى إله الآلهة عنده حق .. إنتى سبب لعنتى .. إنتى ساحرة.
دوريس إنتى تعرفى إله الآلهة يامولاتى؟!
بربارة أيوه ظهر لي وكان غضبان جداً وعينيه بتطق شرار.
دوريس وهوه اللي قالك إنه إله الآلهة ؟!
بربارة أيوه .. إيه حتقوليلى إن ده مش إله الآلهة كمان .. ده قاللي إنه يبقى إله أبولون نفسه .. دوريس هيه الآلهة ليها آلهة؟!
دوريس: كل الآلهة اللى بتعبدوها ليها إله واحد هو الشيطان الشرير وأصل كل الشرور في العالم .. لكن الشيطان نفسه مش إله.
بربارة: مش إله .. أنا مش فاهمه حاجة.
دوريس: يامولاتى اللى ظهر لك هو الشيطان .. والشيطان مجرد عبد أو جندى متمرد عند إله الآلهة وخالق كل شيء ..الإله الحقيقي.
بربارة: لكن ده كان شكله مرعب جداً .. ماشفتش حد زيه.
بربارة: لو الإله الحقيقى هوه اللى ظهرلك مكنش يملاكى بالخوف كده .. إنما يملاكى بالسلام والفرح والراحة.
بربارة: دوريس .. أنا مش فاهمة حاجة منك .. لكن أنا حاسه إنك كفرتى بآلهتنا .. ده صحيح؟ .. يعنى سكتى .. يبقى إله الآلهة عنده حق .. إزاى بعد ما كنتى بتكلمينى عن جمال الكون وجمال الخليقة وإن خالقها إله عظيم تكفرى بيه.
دوريس: يامولاتى أنا مكفرتش بيه .. بالعكس أنا آمنت بيه .. أنا بأعبد يسوع المسيح الإله الحقيقى .. اللى عشانى نزل من السما وجه على الأرض .. وفدانى بدمه .. وملاء قلبى بالسلام والفرح.
بربارة: أنا مش فاهمه حاجة .. مين هو يسوع المسيح ..
دوريس: أطلبى يامولاتى من خالق الكون أنه يهديكى ليه وانت حتعرفى مين هو يسوع المسيح .. بعد إذنك يامولاتى. (تهم بالخروج).
بربارة: استنى يادوريس .. أنا مخلستش كلامى.
دوريس: بعدين يامولاتى .. أسيبك دلوقتى تفكرى شوية .. وإذا اتأكدتى من إن أبولون وغيره من الأوثان مش ممكن يكونوا آلهة .. دوّرى على الإله الحقيقي وانتى حتلاقيه على طول.. بعد إذن مولاتى (تخرج).
بربارة: دوريس استنى يا دوريس ..(تخفت الإضاءة مع موسيقى مناسبة) ليه كده يادوريس .. هوه أنا ناقصة حيرة
إبليس: بربارة محتارة ليه؟
بربارة: هه .. مين هوه الإله الحقيقي اللى بتحكى عنه دوريس .. ليه مقالتليش عليه على طول
إبليس: وليه تسألي دوريس؟
بربارة: أمال أسأل مين؟!
إبليس: اسألي نفسك!
بربارة: أسأل نفسي؟!
إبليس: بصى على الدنيا حواليكى فيها خير وفيها شر .. يبقى فيه إله للخير وإله للشر .. فيها زرع يبقى فيه إله للزرع .. فيها سما وفيها أرض .. يبقى فيه إله للسما وإله للأرض .. فيها شهوه وفيها موت .. كل حاجة ليها إله ..
بربارة: طب ليه دوريس بتقول إن فيه إله واحد بس.
إبليس: متسمعيش كلام البنت دى .. دى آخر مره بحذرك .. بعد كده حيكون غضبى عليكى شديد .. فاهمه .. ابعدى عن دوريس .. ابعدى عن دوريس.
بربارة: انت مين
إبليس: أنا إله الأرض ورئيس هذا العالم .. أنا إله الظلمة .. أنا الإله اللى حتكون روحك في ايده .. اسمعى كلامى يا بربارة .. اسمعى كلامى يا بربارة.
بربارة: (بفزع) حاضر حاضر .. حاسمع كلامك .. (تردد) كل حاجه في الدنيا ليها إله بيحكمها .. الشمس ليها إله .. القمر له إله .. الأرض ليها إله .. السما إله .. الخير إله .. الشر إله .. الجبال إله .. الزرع إله .. الحب إله .. لأ مش قادره أصدق مش قادره .. (تنادى) دوريس دوريس .. لأ بلاش دوريس .. يا إله الشمس أنا بحب الشمس لكن بحب القمر كمان .. يا إله الجمال أنا بحب الجمال .. لكن خايفه لو عبدتك إله الخير يغضب عليا .. ولو عبدت إله الخير .. إله الشر مش حيرحمنى .. ولو عبدت إله الشر .. إله الرحمة مش حيسامحنى .. ولو عبدت .. ولو.. .. .. آه أنا تعبانه .. مش قادرة أفكر .. دوريس (تهوى على الأرض من الإعياء).. دوريس.
دوريس: (تدخل) مولاتى .. مالك يا مولاتى.
بربارة: مش قادرة أصدق إن كل شيء في الدنيا له إله .. دوريس .. ايه الصح وايه الغلط .. مين هو الإله الحقيقى.. إله الشر ولاّ إله الخير .. إله الشمس ولاّ إله القمر .. مين هو اإله الكون .. واحد ولاّ أكتر .. أبولون في روما ولا أرطاميس في أفسس ولا زيوس في أثينا .. ولاّ واحد تانى غير دول.. هو مين .. هو مين
دوريس: (تبتسم في حنان وترشم ذاتها بعلامة الصليب) .. يامولاتى لو بيصيتى حواليكى حتلاقى الدنيا كلها ماشية بنظام واحد .. الشمس تظهر القمر يختفى .. المطر ينزل الميه الحلوه في النهر تزيد .. النبات يكبر .. الحيوان ياكل النبات ويكبر احنا نتغذى على الحيوان والنبات .. كل المخلوقات تعيش فترة طفولة وشباب وشيخوخة .. عمر يامولاتى ما حاجة اتأخرت عن ميعادها .. ولا خالفت النظام الموضوع ليها .. كل ده لأن اللى بيحركها هو إله واحد .. خالق كل شيء .. خلق النبات والحيوان والسما والأرض وزيّن خليقته بالإنسان .. إله الخير والمحبة وكل شيء جميل.
بربارة: وهو برضه إله الشر والظلم والخوف؟!
دوريس: أبداً الشر والظلم والخوف وكل حاجة وحشة تيجى لما منسمعش كلامه ونبعد عن حضنه .. ونسمع كلام الشيطان عدو الخير .. الشيطان اللى كان خادم من خدام ربنا.. لكن بسبب كبرياءه ربنا بعده عنه عشان كده الشيطان عايز يبعدنا عن نور ربنا زى ما هو بعد.
بربارة: يبقى اللى سمعت صوته ده كان الشيطان.
دوريس: مفيش حاجة بتعذب الشيطان قد ما يلاقى انسان حيسيبه ويرجع لربنا .. عشان كده بيحاربنا بكل قوة عشان نفضل أسري تحت إيده.. الشيطان يا مولاتى كل هدفه أنه يبعدنا عن حضن الإله الحقيقى الحنون اللى خلقنا كلنا وبيحبنا كلنا.
برباره: بيحبكم كلكم .. يا بختكم بإلهكم.
دوريس: يامولاتى وبيحبك انتى كمان.
بربارة: بيحبنى .. طب ازاى وأنا مش من عبيده؟!
دوريس: لكن من خليقته .. هوه اللى خلقك .. انتى من صنع ايده زى ما كل شيء جميل جواليكى من صنعه.. علشان كده هوه بيحبك وبيحب كل الناس حتى اللى بيحاربوه لأنه خالقهم كلهم.
بربارة: مش عارفه .. كلامك ده بيريحنى، بيفرحنى.. على الرغم من إنى معرفهوش لكن حاسة إنى بحبه .. كل ما تكلمينى عنه أحس بحبه عمال يكبر جوايا.. دوريس .. أنا عايزة أقدم له ذبيحة كبيرة تعبر له عن حبى..
دوريس: يامولاتى إلهنا مش محتاج لذبائح علشان نظهر له حبنا .. لأنه هو نفسه الذبيحة اللى اندبحت عننا .. ومات على الصليب علشانا.
برباره: مات .. يعنى إيه .. يعنى هو إله الموت .. ولا عايزانى أعبد إله ميت؟!
دوريس: لأ .. لكن الحكاية محتاجة قعدة طويلة .. إسمعى يامولاتى .. فيه راجل جه من مصر، من اسكندرية .. إسمه أوريجانوس .. الراجل ده ممكن يفهمك كل حاجة ويجاوبك على كل أسئلتك.
برباره: طب وحيخش إزاى .. القصر حواليه حرس بيسألوا الهوا إنت رايح فين.
دوريس سيبى الموضوع ده عليا .. أنا حقولك على طريقة (تهمس فى أذنها).
برباره طيب أنا حطلع أوضتى دلوقت، وأول ما يوصل إدينى خبر.
دوريس حاضر يامولاتى. (تخرج بربارة)
أركاديوس (يدخل) دوريس .. دوريس
دوريس أركاديوس.. إيه اللى جابك هنا .. (تخفى اضطرابها) .. المفروض إنك دلوقت قاعد تحت السور
أركاديوس المفروض دلقت إنك تسمعينى .. أنا ما صدقت لقيتك لوحدك من غير بربارة ولا جوز العقارب الوصيفات.
دوريس عايز منى إيه يا أركاديوس؟!
أركاديوس عايزك إنتى .. عايز قلبك.
دوريس قلتلك قبل كده إنى كلّى ملك إلهى ومش حأكون لإنسان تانى.
أركاديوس إلهك .. اللى مات .. ومات ملعون .. ده يبقى إله .. واحد ميت ينافسنى على حبك؟! هو فين دلوقتى .. هو فين عاشان أهزمه بصوبع رجلى .. وساعتها مش حيكون فيه غير أركاديوس.
دوريس إخرس .. إلهى هو اللى حيهزمك .. حيكسر غرورك وكبريائك.
أركاديوس كده طيب .. حنشوف مين فينا اللى حيخرس .. (تتركه دوريس وتخرج)
(تدخل الجاريتان إلكترا ويوليانة وهما وتضحكان) .. إنتو هنا ..؟!
يوليانة ولا يهمك .. متزعلش .. طول ما هى مصاحبة بربارة يبقى لا زم تكون مناخيرها فى السما.
أركاديوس أنا مستعد أقتل بربارة لو ده حيرجعلى دوريس.
إلكترا لأ مش كده .. متنساش إن مولانا ديسقوروس مش حيرحمك.
يوليانة ياعينى على الحب .. الراجل حيودى نفسه فى داهية عشان البت المفعوصة دى.
أركاديوس إخرسى .. متنسيش إن أنا لسة أركاديوس .. أقوى فرسان نيقوميديا وأسيا الصغرى بحالها.
إلكترا شوف يا بطل .. إحنا لازم نوقع بين بربارة و دوريس عشان نقدر نجيب دوريس للنقطة اللى متقدرش
أركاديوس (مقاطعاً) شوفوا إنتوا الإتنين .. إسلوب الحيل القذرة والدسائس ده تعملوه إنتو .. لإنه يناسبكم .. أما الفرسان ليهم أخلاق تانية .. إللى عايزه آخده بدراعى .. وإلا مستحقهوش.
يوليانة بقى كده .. طيب ورينا حتاخد بربارة إزاى من غير مساعدتنا..
إلكترا بكره حترجعلنا وتطلب مشورتنا .. وساعتها..
يوليانة (تتدخل) وساعتها برضه حنساعدك .. مش عشان خاطرك .. إنما عشان مصلحتنا واحدة.
أركاديوس (بإستغراب) وانتو إيه مصلحتكم فى إن أنا أتجوز دوريس
إلكترا احنا وانت فى مركب واحدة .. وعايزين نوصل لنتيجة واحده .. لكن الفرق هو إن كل واحد عايز يوصل لهدف مختلف.
يوليانة يعنى لازم نتحد ..
إلكترا ونحط إيدنا فى إيد بعض
يوليانة إيه رأيك
أركاديوس رأيى .. (يستل سيفه) رأيي أنكم لو فضلتم هنا شوية حتندموا طول عمركم .. ده إذا كان حيبقالكم عمر
برباره (تدخل فجاءة) أركايوس .. فيه إيه .. (يسود وجوم) .. إيه مالكم أنا جيت فى وقت مش مناسب ولا إيه .. رافع سيفك عليهم ليه يا أركاديوس.
إلكترا أبداً يامولاتى ده أركاديوس كان بيورينا سيفه الجديد .. مش كده يا أركاديوس؟
أركاديوس (كاظماً غيظه) كده يا إلكترا..
برباره واللى يجيب سيف جديد يبقى مكشر كده .. ياللا أفرحوا واضحكو .. أنا سعيده جداً النهاردة ..
يوليانة أبولون إله الآلهة يسعد أيام مولاتى أكتر وأكتر.
إلكترا وأفروديت إلهة الجمال تزيد جمالها كمان وكمان.
برباره بس أنا خايفة .. مش .. مش عارفة مالى .. أنا النهاردة حالى .. النهاردة .. مش عارفة .. النهاردة يوم مش عادى مش عارفة ليه (وفى هذه الأثناء تظهر الحيرة على الجاريتان ثم يظهر صوت المنادى شيئاً فشيئاً)
أوريجانوس (صوت خارجي) أكشف الطالع وأبين سر الأيام .. وأحكى على المسامع أحلى حكايات وكلام .. (يكرر الجملة)
إلكترا أيه رأيك يا مولاتي لو ناديتلك على العراف ده؟
برباره (يظهر عليها ارتباك الفرح والقلق) أيوه العراف .. نادى عليه .. ولا أقولك .. لأ أستنى .. طيب نادى عليه.
إلكترا يا عم يا عراف اطلع القصر .. سيبوه يا حراس .. مولاتي بربارة عايزاه.
أركاديوس إزاى .. هيه الحكاية بالساهل .. راجل يقابل مولاتي بربارة .. أنا لازم أنزل أفتشه..
إلكترا (تضحك) بس ده راجل عجوز قوى!
أركاديوس ولو (يخرج)
برباره أنا طبعاً مش حقابله لوحدى .. دوريس
دوريس (تدخل) أمر مولاتى.
برباره العراف جه .. قصدى (تتصنع العظمة) فيه عراف جاى دلوقتى يقرالى الطالع .. خليكى هنا لحد ما يمشى..
دوريس أمر مولاتي
برباره وانتو ياللا روحوا شوفوا شغلكم.
الحاريتان (تتغامزان) أمر مولاتى (تخرجان)
أوريجانوس (يدخل مع أركاديوس) يابنى بالراحة شوية أنا راجل تعبان .. هو انت مش فتشتنى..
أركاديوس ايوه وملقيتش معاك غير كتاب السحر الكبير وشوية الحاجات بتاعت العرافين .. لكن لازم تفهم إن مقابلة بنت ديسقوروس أعظم تجار نيقوميديا مش بالساهل.
برباره (بغضب) أركاديوس .. سيبه بقى وانزل للحرس بتوعك..
أركاديوس أمر مولاتى (يخرج بعد أن يلقى على دوريس نظرة ذات معنى)
دوريس (تجرى وتنحنى أمام أوريجانوس وتقبل يده) .. معلمنا أوريجانوس .. أشكرك لإنك قبلت الدعوة وعرضت نفسك للمخاطر.
أوريجانوس أنا يا بنتى معملتش حاجة .. فيه ناس كتير أنا مستحقش أنطق إسمهم لأنهم ضحوا بحياتهم ودمهم علشان خاطر الإيمان .. أنا مقدرش أتأخر عن حد عايز يعرف المسيح..
برباره أنت اللي حا تحكيلى عن يسوع ؟
أوريجانوس ايوه يابنتى بنعمة ربنا.
برباره ياه أخيراً حأقدر أعرف كل حاجة عنه .. أنا مش عارفة أشكرك إزاى يا دوريس .. فعلاً كانت خدعة ذكية إنه يلبس ملابس العرافين..
أوريجانوس أنا يابنتى مكدبتش .. أنا قلت أبين سر الأيام وأحكى أجمل حكايات .. ولو كان ربنا أراد إن حد تانى يطلبنى كنت حأكلمه برضه عن سر الأيام .. عن سر تجسد ربنا .. وسر ألوهيته .. وأحكيله أجمل حكايات عن معجزاته وفداءه لينا ..
دوريس أبونا العلامة أوريجانوس يا مولاتي من إسكندرية وواحد من أكبر علماء المسيحية..
برباره أهلاً بيك .. متتصورش قد إيه أنا متشوقة إنى أعرف كل حاجة عن يسوع .. هوه صحيح إله الآلهة .. ولا ابنه .. هوه صحيح مات علشان يفدينا .. طب يفدينا من إيه .. احكيلى إزاى بقى إله .. احكيلى إزاى مات.. .. إزاى قام .. إزاى ساب عرشه واتنازل عن ألوهيته .. و
أوريجانوس (مقاطعاً) على مهلك يابنتى على مهلك وأنا حأحكيلك كل حاجة (تنزل ترنيمة قصة الحب العجيب) (سيلويت)
دوريس (إضاءة) ستى دوريس بتبكى ليه؟!
برباره مش قادرة أصدق إن ربنا يحب العالم الحب ده .. والعالم بعيد عنه .. ليه سايبنا نبعد عنه كده .. ليه يختار إنه يقدم الحب لناس متعرفهوش .. ليه أعداءه أكتر من أحبائه ..؟!
أوريجانوس يابنتى ربنا خلقنا لنا إرادة .. وبإرادتنا دخلت الخطية العالم .. ودفع هو التمن .. علشان اللى عايز يرجعله بإرادته يلاقى باب التوبة والرحمة مفتوحين .. لكن الشيطان استغل ضعف الإنسان وخّلا إرادته تتجه للشر وزاد الشر فى العالم.
دوريس يا مولاتي .. ربنا حط جوانا روحه القدوس .. علشان كده حنفضل قلقانين وتعبانين طول ما إحنا بعاد عنه لحد ما نستريح فى حضنه .. زى ما حصل معاكى .. فضلت روحه جواكى قلقانة لحد ما لقيتيه.
برباره واستريحت فى حضنه .. ودلوقت يا أبونا أوريجانوس أنا عاوزة أتعمد .. دوريس من فضلك جهزيلى أى حاجة تنفع جرن للمعمودية .. (تتجه بعينيها للسماء) أشكرك يا إلهي لإنك ما سبتنيش بعيده عنك أكتر من كده .. أرجوك يا إلهي الحقيقي إدينى القدرة إني أبشر باسمك قدام الناس .. علشان كل الناس يحسوا بالراحة والفرح اللى أنا عايشاهم دلوقت معاك.. (ترنيمة) (بلاكة)
أوريجانوس (المنظر سيلويت) (صوت من الخارج) أعمدك يا بربارة باسم الآب والإبن والروح القدس.. (يدخل) .. يا بربارة حاولى تخلى موضوع إيمانك ده سر .. لحد ما يريد ربنا.
برباره أهرب من الاعتراف بالمسيح؟!
أوريجانوس ده مش هروب .. إنتى لسه جديدة فى الإيمان وفترة الهدوء دى حتديكى فرصة تفربى من ربنا أكتر وتثبتى فيه أكتر .. علشان لو جت عواصف ما تزعزعش إيمانك ..
برباره حاضر يا أبي.
أوريجانوس ودلوقتى لازم أمشى لإن فيه حاجات تانيه كتير لازم أعملها فى آسيا الصغرى .. ربنا يكون معاكم ويحميكم .. سلام ربنا يملا نفوسكم .. سلام
دوريس سلام يا أبي.
برباره إلكترا .. يوليانة .. تعالوا .. يا أركاديوس تعال .. أنا مبسوطة قوى النهاردة .. أركاديوس .. عايزه العمال يفتحوا طاقة تالته هنا.
أركاديوس ليه يا مولاتى
برباره على مثال الثالوث الإقدس.
أركاديوس نعم؟!
دوريس أ أ مولاتى قصدها عشان النور حيدخل أكتر لما يبقى فيه 3 شبابيك .. معلش مولاتى متلخبطة .. أصل العراف قال لها أخبار حلوه قوى..
يوليانة أسعدت الآلهة كل أيام مولاتنا الجميلة.
إلكترا وتبعد عنها ولاد الشر وأعداء الألهة (تنظر إلى دوريس ثم تتبادل النظر مع يوليانة ثم تخرجان)
برباره أشكرك يارب لآنك منحتني نعمة معرفتك.
دوريس أشكرك ياربى لأنك نورت قلب بنتك بربارة .. خليها نور ينور للبعاد عنك طريقهم إليك.
برباره أنا لك يا يسوع .. أنا صنعة يديك .. أنا بنتك .. (موسيقى) .. أنا مستحقش كل الحب اللى حبتهولى حتى قبل ما أعرفك .. أشكرك إزاى يا إلهي .. مهما قلت أو عملت مش حيوفيك .. لكن أرجوك ياربى اسمح إني أبشر باسمك .. علشان كل اخواتى فى البشرية يتمتعوا بالفرح والسلام اللى أنا عايشه فيه دلوقت .. أرجوك ياربى استلم حياتى .. أرجوك يارب اسندنى وساعدني .. أرجوك يا إلهي ادينى إى أبشر باسمك.. (ستار)
الفصل الثانى
(الإضاءة تبدأ من السيلويت أو يفتح الستار على الظلام، على المسرح ديسقوروس ويوليانة وإلكترا)
ديسقوروس (صوت قوى فى الإظلام) اخرسي .. (إضاءة) أنا مشغلكم هنا علشان تخدموا بنتى .. تقوموا تطلعوا عليها الكلام الفارغ .. وقدامى .. انتم ملكمش قعاد هنا .. ياللا بره.
إلكترا يا مولاى حلمك علينا .. احنا بنحب ستنا بربارة جداً.
يوليانة وعلشان كده مش هاين علينا انه ينضحك عليها وتكفر بالآلهة ..
ديسقوروس بربارة بنتى .. هدية أبولون ليّا تكفر .. تكفر بأبولون .. مستحيل .. عمرها ما قالتلتى كلام زى ده أبداً.
إلكترا لأن مولاى عمره ما سألها .. أبداً.
ديسقوروس قصدك إيه؟!
يوليانة قصدها إنك تسألها ..
إلكترا بلاش .. إعرض عليها مرة تانية العريس اللى متقدملها ومولانا موافق عليه.
ديسقوروس ابن الأمير مرقيان.
يوليانة ابن الأمير مرقيان .. والى المدينة
ديسقوروس (يفكر لحظة) طيب سيبونى دلوقت .. (تهمان بالخروج) يوليانة .. (بعظمة) نادى على مولاتك بربارة.
يوليانة أمر مولاى
ديسقوروس أركاديوس
أركاديوس (يدخل) أمر مولاى
ديسقوروس هات الكرباج بتاعك وأخرج بره.
أركاديوس ليه يامولاى .. فيه إيه؟!
ديسقوروس انت بتقولى ليه .. (بعصبية شديدة) هات الكرباج واخرج بره.
أركاديوس (متعجباً) أمر مولاى (يهم بالخروج)
ديسقوروس أركاديوس
أركاديوس أمر مولاى
ديسقوروس هات السيف كمان
أركاديوس مولاى .. إذا كان فيه خطر على مولاي أو على مولاتى بربارة، فأسمحلى أعرف .. ده واجبى.
ديسقوروس مفيش يا أركاديوس .. هات السيف .. أتمنى إن الآلهة متخلنيش أستخدمه
(يخرج أركاديوس وتدخل بربارة يبدو عليها الفرح والسرور)
برباره أهلاً والدى .. أشكر ربنا على رجوعك بالسلامة
ديسقوروس أشكر ربنا؟! .. إزيك يا بربارة .. عامله إيه يا بنتى .. لسه زهقانة من وجودك فى القصر لوحدك.
برباره أبداً أبداً .. دا أنا مبسوطه هنا قوى ونفسى أقضى فيه بقية عمرى.
ديسقوروس وده معقول برضه .. كلها كام يوم وعريسك ياخدك.
برباره برضه ابن الأمير تانى .. ياوالدى أنا مش سبق وقلتلك إنى عايزه أقعد أخدمك .. إنت كبرت ومن واجبى إنى أراعيك وأخدمك.
ديسقوروس بربارة (فى حزم) ده أمر .. إنتى حتتجوزى ابن الأمير مرقيان .. الكلام ده مفهوش نقاش .. (يستجمع هدوءه) .. ولاّ مش عايزه أبوكى يفرح بيكى فى آخر أيامه؟
برباره لكن يا والدى أنا مقدرش أتجوزه أو أتجوز غيره
ديسقوروس يعنى إيه الكلام ده .. قصدك إيه؟
برباره يا والدي أنا.. أنا .. أنا مخطوبة
ديسقوروس إيه .. مخطوبة .. إزاى ومين .. مين اللى جه هنا وشافك وخطبك من غير ما أشوفه؟! .. إزاى ده حصل .. اسمه إيه .. مين هو علشان أقتله؟
برباره (موسيقى) .. اسمه يسوع .. ساكن فى قلبي .. وموجود فى كل الدنيا .. جه علشانى .. نزل من السما علشان يخلصنى .. هو إلهى .. اللى خلقنى .. وهو عريسى وحبيبى اللى مليش غيره .. من كتر حبه ليّا جه على الأرض ومات مصلوب .. ومن كتر حبى ليه نذرت أنى أعيش الباقى من عمرى علشانه .. أعبده وأشهد لأسمه..
ديسقوروس يبقى كلام الجواري صحيح .. بربارة بنتى .. بنت الآلهة كفرت بيهم وآمنت بأكتر ناس بأكرهم وبيكرهم الوالى والملك .. بقت مسيحية .. بقت من أتباع المصلوب!!
برباره يا والدي .. المصلوب ده هو اللى خلقنى وخلقك .. إلهي وإلهك.
ديسقوروس (ثورة عارمة) إخرسى .. (يصفعها على وجهها).. أنا مليش إله غير إله الملك مكسيميانوس .. أقول إيه للملك دلوقتى .. الوالي حيقول عليا إيه .. أكبر تجار نيقوميديا وصديق الملك مكسيميانوسيميانوس بنته بقت مسيحية؟! .. طبعاً مرقيان مش يلاقى فرصة أحسن من كده علشان يوقع بينى وبين الملك .. لكن لأ مش حأديه الفرصة دى أبداً .. (يصرخ بشدة) بربارة .. بربارة يابنتى إعقلى .. لأنى مش حأرحمك لو كفرتى.
برباره يا والدي .. يا أغلى الناس عندي .. الرحمة كلها أنا أخذتها من المسيح .. ومفيش أحن ولا أرحم من يسوع .. علشان كده مش حأبيع حبه ورحمته بأى تمن .. وياريت تجرب إنك تسمع بهدوء عن حبه وأنا واثقة إنك حتكسر آلهة الملك بإيدك.
ديسقوروس بس .. كفاية .. كفاية .. مش عايز أسمع .. مش قادر أشوف بنتى بتحطم كل اللى بنيته عشانها .. أنا حأقتلك يإيدى لو مرجعتيش لعقلك (تهرب من أمامه إلى خارج المسرح وهو يجرى ورائها حتى يخرجان .. وبمجرد يدخل أركاديوس ويوليانة وألكترا ودوريس.)
دوريس حد يلحقها ده حيقتلها
يوليانة انتى مالك .. دى حاجة تغيظ .. عقبال ما يقتلك انتى ونرتاح منك.
أركاديوس يوليانة .. حافظى على لسانك جوه بقك .. إلا إذا كنتى مستغنية عنه
الكترا جرى ايه يا يوليانة انتى بتزعقى لمولاتنا دوريس قدام مولانا أركاديوس .. ده حتى يبقى عيب..
أركاديوس أنا معنديش وقت ليكم دلوقتى .. لكن حسابكم بعدين .. أنا نازل ألحق مولاى ديسقوروس قبل ما يقتله بنته.
دوريس ياربى إنقذها .. يارب انجدها .. دى مالهاش غيرك ياربى .. بين لها قوتك ومجدك علشان تثبت إيمانها .. انقذها علشان تعرف أنها آمنت بإله قوى.
إلكترا البت دى بتبرطم بإيه
يوليانة هه .. تلاقيها تعويذة سحر .. علشان تنقذ صاحبتها
إلكترا ولا يمكن علشان مايجيش عليها الدور هيه كمان (تضحكان)
أركاديوس (يدخل لاهثاً) اختفوا من هنا دلوقت .. يالا ..
إلكترا ليه ايه اللى حصل
أركاديوس قعد يجرى ورا بنته لحد ما وصلت لصخرة قافلة الطريق عليها .. وفجاءة الصخرة انشقت نصين وبربارة دخلت فيها ورجعت قفلت تانى.
دوريس أشكرك يا ربى .. أشكرك
يوليانة مش معقول .. يعنى هيه جوه الصخرة دلوقتى
أركاديوس لاء عدت منها .. واستخبت جوه مغارة .. لكن ديسقوروس لف حوالين الصخرة ومسكها .. وجاي بيها على هنا.
إلكترا شوفتى .. يبقى الصخرة اتفتحت ساعت ما البنت دى كانت بتقول التعاويذ.
ديسقوروس (يدخل دافعاً بربارة أمامه ويتحدث لاهثاً) أركاديوس .. أركاديوس .. يوليانة .. ألكترا .. دوريس.
أركاديوس أمر مولاى
الجوارى سيدى
ديسقوروس فى أعلى أوضة فى برج القصر .. لأ فوق الصارى اللى على البرج .. أربطوا بنتى وامنعوا عنها الأكل والشرب .. وسيبوها مربوطة لحد ما تلعن المصلوب وتطلب إنها تقدم ذبيحة وبخور لأبولون إله الآلهة .. إله الملك مكسيميانوس.
أركاديوس أمر مولاى
ديسقوروس دوريس .. خديها وأربطيها فى صاري البرج.
دوريس (تجر رجليها فى بكاء شديد نحو بربارة) أنا أعمل كده فيكى .. لأ مش حأقدر .. أنا حأعترف بمسيحيتى ..
برباره دوريس .. إحنا اتفقنا على إيه .. مش قلتلك خليكى بعيد علشان تصليلى لحسن أضعف .. ياللا اعملى اللى قالولك عليه لحسن ياخدوا بالهم. وانتى إرجعى اوضتك وصليلى.
دوريس مولاتى .. واختى .. وحبيبتى
برباره (تبتسم فى هدوء) يالا يا دوريس .. حد يطول إنه يصلى وهو واقف فى مكان عالى محدش سامعه غير ربنا؟
ديسقوروس دوريس .. مش عارفة تجريها .. ولا مش عايزة؟
يوليانة بعد إذن مولاى .. أنا وإلكترا حنقوم بالمهمة دى.
ديسقوروس بسرعة .. (تمسكان بربارة وتخرجان) .. أركاديوس .. أوامرى واضحة؟
أركاديوس واضحة يامولاى
ديسقوروس مش عايز حد منكم تصعب عليه وينزلها خصوصاً البنت دى (يشير إلى دوريس).
أركاديوس أمر مولاى.
ديسقوروس دى مسئوليتك أنت .. أنت فاهم (يخرج).
أركاديوس أمر مولاى (يلتفت إلى دوريس الغارقة فى دموعها) .. دوريس .. دوريس .. مبترديش ليه؟
دوريس عايز إيه .. ليه ما قلتلهوش إنى مسيحية .. ليه
أركاديوس عايزه تموتى نفسك؟!
دوريس الموت .. الموت هوه الخوف .. لكن الشجاعة حياه .. وأولاد المسيح أولاد شجعان عمرهم ما خافوا حتى من الموت.
أركاديوس دوريس .. (ملاطفاً) سيبك من المسيح بتاعك ده وتعالى.
دوريس أركاديوس .. أرجوك سيبنى .. أو بلغ عنى مولاك ديسقوروس أنا نفسى أحصّل مولاتى بربارة.
أركاديوس كده .. طيب .. حتحصليها يا دوريس .. حتحصليها.. (يخرج)
دوريس اسندها يا إلهي .. ساعدها يا يسوع .. كمل جهادها .. يارب متحرمنيش من إنى آخد إكليلي معاها .. أرجوك يارب .. عايزة إكليل معاها .. عايزة إكليل معاها .. عايزة إكليل معاها.. (ترنيمة) (بلاكة)
(إضاءة) على المسرح أركاديوس والجاريتان
أركاديوس يعنى الحكاية طولت
إلكترا أنا مش فاهمة إزاى بنت رقيقة زى بربارة تقدر تستحمل أكتر من أسبوع وهيّه مربوطة فى قمة البرج لا أكل ولا شرب.
أركاديوس إزاى مستحملة برد الليل.
يوليانة أكيد سحر .. أكيد البنت دوريس علملتها سحر فمش حاسة بحاجة.
أركاديوس (بحدة) .. دوريس مش ساحرة
يوليانة مفيش فايدة أبداً يا أركاديوس .. مش عايز تنسى البنت دى؟!
أركاديوس مش حتكون لغيرى أبداً مهما حصل .. أنا الأقوى وبدراعى ده حاخد اللى عاوزة.
إلكترا هه .. انت الأقوى .. يمكن تكون قوى .. يمكن تكون أقوى راجل فى نيقوميديا .. لكن متنساش إنك عبد.
يوليانة وسيدك مهما كان ضعيف يقدر يعمل فيك كل اللى هو عايزه ..
إلكترا والقانون يديله الحق ده.
يوليانة عيل صغير ممكن يجلدك يا قوى .. وفى ساعة غضب ممكن يحكم عليك بالموت.
إلكترا أنت بالنسبة له رخيص .. لأنه ممكن يشترى غيرك.
يوليانة هوه السيد وأنت العبد .. أنت بالنسبة له بكل قوتك .. زى الحصان اللي بيجر عربيته ..
إلكترا ولو زالت قوتك أو تعبت، تفتكر إنه حيساعدك .. حيرميك بره ويشترى واحد تانى .. علشان كده لازم تساعدنا .. لإن مصلحتنا واحدة.
أركاديوس بس كفاية .. كفاية
ديسقوروس (يدخل) أنت هنا يا أركاديوس .. مفيش مرة آجى ألاقيك مكانك .. أنا بأدفعلك الدهب ده كله وعاملك قيمة وكرامة عشان تقف تتسامر مع الجواري ..
أركاديوس يامولاى أنا شايف شغلى كويس وبعمل اللي عليا.
ديسقوروس إيه .. هيه حصلت ترد عليا .. أنت نسيت نفسك ولا إيه .. إنت عارف لو حاكمتك على إنك عبد عاصي حيحصلك إيه؟! .. طيب .. أنا حعرفك مقامك كويس بس أخلص من حكاية المصلوب دى .. (يلتفت إلي الجواري) .. لسه برضه مصممة على رأيها.
يوليانة لسه يامولاي.
ديسقوروس فكوها وهاتوها هنا .. استنوا .. أنا طالع معاكم .. عايز أشوفها وهى بتتعذب. (يخرج مع الجاريتان)
دوريس (تدخل حزينة وهى تتابع ببصرها مكان خروج ديسقوروس والجواري)
أركاديوس دوريس
دوريس عايز إيه ..
أركاديوس (متودداً) مش حتسيبك من المصلوب ده وترجعيلى؟.
دوريس أرجع للعبودية تانى
أركاديوس العبودية .. إنتى نسيتى إنك جارية ولا إيه؟! .. زى ما أنا عبد.
دوريس أبداً أبداً .. أنا حرة.
أركاديوس حره ؟ !
دوريس صدقنى يا أركاديوس .. (موسيقى) .. المسيح مات علشانى وعشانك .. ولو تبعته حتشعر بالحرية .. حبه كبير حيملا حياتك .. وصاياه سهله .. كلامه جميل حيشبعك .. لا أعود أسميكم عبيداً بل أحباء .. لأنكم اشتريتم بثمن فلا تصيروا عبيداً للناس (1كو7: ) .. حيث روح الرب هناك الحرية (2كو3:17) .. لا أتركك لا أهملك .. إن نسيت الأم رضيعها أنا لا أنساكم .. محبة أبدية أحببتك من أجل ذلك أدمت لك الرحمة .. تعالوا إلي يا جميع المتعبين وثقيلي الأحمال وأنا أريحكم..
أركاديوس (مقاطعاً) كلام كلام كلام .. كله كلام .. لكن مفيش إله يقدر يعمل كده .. إنما راحتنا وحريتنا إحنا اللي نقدر نعملها بإيدنا.
دوريس جرب يا أركاديوس .. أطلبه فى وقت شدتك .. جرب وأنت حتعرف بنفسك.
أركاديوس طول عمر الآلهة بتاخد تعبنا وعرقنا .. وما بتديناش حاجة .. اشمعنى إلهك إنتى هو اللى حيكون مختلف
دوريس (تقطع حديثه عندما تشاهد ديسقوروس يدخل ويجر برباره ) مولاتي (تجرى نحوها) .. مولاتى بربارة .. حرام عليك يامولاي دى بنتك.
ديسقوروس اخرسي .. أنا حأقتلك معاها ..
يوليانة يا مولاتي ارحمي نفسك واسمعي كلام مولانا ديسقوروس .. ده أبوكى وبيحبك ويهمه مصلحتك أكتر من أي حد تاني
برباره مش ممكن أرجع للضلمه والحيرة تانى .. إلهي هو يسوع مهما حصل ..
ديسقوروس إلهك هو اللي يقول عليه الملك إنه إله.
برباره إلهى هو يسوع اللى فدانى .. اللى خلقنى وخلق الكون كله.
ديسقوروس كده .. أركاديوس
أركاديوس مولاي
ديسقوروس ابعت معايا أقوى اتنين من حراسنا يجلدوا بربارة فى ساحة المدينة .. وأنا حأجرها بإيدى لحد قصر الوالي.
أركاديوس أمر مولاي..
ديسقوروس تعالي .. (يسحب بربارة من شعرها ويخرج بها من الصالة وسط الجمهور، بينما يقوم الحارسان بجلدها) (تدخل ترنيمة) (هيا يا آلام) أو تلحن الأبيات التالية:-
هاج الشيطان ساد الظلام وانتشر
سرق الحنان من قلوبكم يابشر .
اصحوا ياناس اصحوا ياعالم يابشر .
(عندما يغيب موكب برباره تدخل موسيقى هادئة تناسب موقف تردد أركاديوس فى قبوله الإيمان)
أركاديوس مش حيأس يا دوريس .. ومش حتكونى لغيري.
دوريس (صوت) .. أنا ملك إلهي .. ومش حكون لحد تاني.
أركاديوس ضحكوا عليكى بكلام فارغ عشان يبعدوكى عنى .. لكن أنا مش حسيبك، حأخلصك من سحر المصلوب وأتباعه .. حأخدك غصب عنهم وغصب عن ديسقوروس .. ديسقوروس .. حتى ديسقوروس حيجى يوم وأتخلص منه، وأبقى سيد نفسى .. لكن إزاى .. إزاى.
يوليانة متنساش إنك عبد.
إلكترا مهما كان سيدك ضعيف يقدر يعمل فيك اللى هو عاوزه
دوريس لا أعود أسميكم عبيداً بل أحباء.
يوليانة فى ساعة غضب ممكن يحكم عليك بالموت.
دوريس المسيح مات علشانك وعشانى.
يوليانة إنت بالنسبة له رخيص .. بفلوسه ممكن يشترى غيرك
بول لأنكم اشتريتم بثمن فلا تصيروا عبيداً للناس (1كو7: )
إلكترا سيدك مهما كان ضعيف يقدر يعمل فيك الله هو عاوزه .. لإنك ملكه
دوريس حيث روح الرب هناك الحرية (2كو3:17)
يوليانة لو زالت قوتك أو تعبت .. حيرميك بره ويشترى غيرك
دوريس لا أتركك لا أهملك .. إن نسيت الأم رضيعها أنا لا أنساكم ..
أركاديوس كفايه .. كفايه حرام عليكم .. أنا تعبان .. أنا تعبان يا دوريس ..
دوريس تعالو إلى ياجميع المتعبين وثقيلي الأحمال وأنا أريحكم.
أركاديوس أروحله.. أروحله إزاي وفين .. هو فين إلهك ده .. فى أنهو معبد .. فين تمثاله..
(تتغير الإضاءة والموسيقى لتناسب حضور السيد المسيح)
السيد المسيح أركاديوس .. أركاديوس .. لا تبحث عنى بعيداً أنا هنا معك .. وبداخلك
أركاديوس (فزع) هه .. مين .. إنت مين .. انت فين؟!
السيد المسيح أنا يسوع الذى أنت تضطهده
أركاديوس إنت إله برباره و دوريس ؟ .. إنت اللي حتقدر تمنحنى الحرية..
السيد المسيح إن حرركم الابن فبالحقيقة تكون حراً.
أركاديوس إنت اللي حتقدر تدينى السلام؟
السيد المسيح أنا هو ملك السلام .. سلامي أعطيك .. سلامي أترك لك.
أركاديوس إنت إله عظيم .. مفيش إله شفته بالبهاء والقوة دى .. أنا أؤمن أنك الإله الحي الحقيقى والوحيد .. أنت إلهى وأنا عبدك .. عبدك وحدك .. أنا ملك إيدك .. تأمرني فأطيعك .. أقترب إليك فتعطينى الراحة والسلام والفرح.
السيد المسيح اتبعنى يا أركاديوس .. اشهد باسمي أمام الوالي .. اتبعني يا أركاديوس .. اتبعنى يا أركاديوس .. اتبعنى يا أركاديوس (يغيب منظر السيد المسيح)
أركاديوس حأ
المرجع: قاموس آباء الكنيسة وقديسيها للقمص/ تادرس يعقوب ملطى
نالت شهرة فائقة في الشرق والغرب. احتملت الكثير من أجل إيمانها، وبسبب ثباتها آمنت يوليانة بالسيد المسيح بل وتقدمت للاستشهاد. تعيد لهما الكنيسة القبطية في 8 كيهك، وتعيد لهما الكنيسة الغربية واليونانية في 4 ديسمبر. نشأتها وُلدت في قرية جاميس التابعة لمدينة ليئوبوليس بنيقوميدية، في أوائل القرن الثالث في عهد الملك مكسيمانوس الذي تولى الملك سنة 236 م، وكان والدها ديسقورس شديد التمسك بالوثنية ويكره المسيحيين.
لما شبت بربارة خاف عليها والدها من مفاسد العصر نظرًا لما كانت تتصف به من جمال فتان، ووضعها في قصر يحيط به العسكر ملأه بالأصنام، وجعل فيه كل أنواع التسلية. كانت بربارة تتلقي أرفع العلوم، محبة للتأمل، إذ اعتادت أن ترفع نظرها نحو السماء تتأمل الشمس والقمر والنجوم، تناجي الخالق الذي أوجد الأرض وكل ما عليها لأجل الإنسان. أرشدها بعض خدامها من المسيحيين إلى العلامة أوريجينوس فاشتاقت أن تلتقي به. وبالفعل إذ زار تلك البلاد التقت به فحدثها عن الإنجيل، فتعلق قلبها بالسيد المسيح، ونالت المعمودية دون أن تفاتح والدها في الأمر. التهب قلبها بمحبة الله فنذرت حياتها له، واشتهت أن تعيش بتولاً تكرس حياتها للعبادة.
تقدم لها كثيرون من بينهم شاب غني ابن أحد أمراء المنطقة ففاتحها والدها في الأمر حاسبًا انه يبهج قلبها بهذا النبأ السعيد، أما هي فبحكمة اعتذرت عن الزواج. وإذ كان والدها مسافرًا لقضاء عمل ما أرجأ الأمر إلى حين عودته لعلها تكون قد استقرت في تفكيرها. طلبت منه أن يبني لها حمامًا قبل سفره، فلبَّى طلبتها، وفتح لها نافذتين لزيادة الإضاءة، أما هي فحولت الحمّام إلى بيت صلاة، متعبدة لله بصلواتٍ وأسهارٍ وأصوامٍ بلا انقطاع. حطمت كل الأوثان، وأقامت صليبًا على الحمام وعلى أعلى القصر، كما فتحت نافذة ثالثة، وكما جاء في الذكصولوجية (تمجيد) الخاصة بها: "نور الثالوث القدوس أشرق على هذه العذراء القديسة بربارة عروس المسيح". أمام قسوة والدها إذ رجع والدها لاحظ هذا التغيير الواضح، فسألها عن سبب ذلك. صارت تكرز له بالإيمان بالثالوث، كيف يجب أن نؤمن بالله الواحد المثلث الأقانيم، فاستشاط غضبًا وأخذ يوبخها بصرامة، أما هي فلم تبالِ بل في صراحة ووضوح كانت تتحدث معه عن إيمانها وبتوليتها، فثار الوالد وانقض عليها وجذبها من شعرها وهمّ ليضربها بالسيف، فهربت من أمام وجهه وانطلقت من باب القصر، وكان أبوها يركض وراءها. قيل أن صخرة عاقتها في الطريق لكن سرعان ما انشقت الصخرة لتعبر في وسطها، ثم عادت الصخرة إلى حالها الأول. أما والدها إذ رأى ذلك لم يلن قلبه الصخري بل صار يدور حول الصخرة حتى وجدها مختبئة في مغارة، فوثب عليها كذئب على حمل، وصار يضربها بعنفٍ، ورجع بها إلى بيته. هناك وضعها في قبوٍ مظلم كما في سجن.
أمام مرقيان الحاكم روي ديسقورس للحاكم ما جرى وطلب منه أن يعذبها، لكن إذ رآها مرقيان تعلق قلبه بها جدًا وصار يوبخ والدها على قساوته ويلاطفها ويعدها بكرامات كثيرة إن أطاعت أمر الملك وسجدت للأوثان، أما هي ففي شجاعة تحدثت معه عن إيمانها بالسيد المسيح. جُلدت القديسة بربارة حتى سالت منها الدماء، كما كانوا يمزقون جسدها بمخارز مسننة بينما هي صامتة تصلي.
ألبسوها مسحًا خشنة على جسدها الممزق بالجراحات، وألقوها في سجنٍ مظلمٍ. إذ كانت تشعر بثقل الآلام ظهر لها السيد المسيح نفسه وعزاها كما شفاها من جراحاتها، ففرحت وتهللت نفسها. استدعاها الحاكم في اليوم التالي ففوجئ بها فرحة متهللة، لا يظهر على جسدها أثر للجراحات فازداد عنفًا، وطلب من الجلادين تعذيبها، فكانوا يمشطون جسدها بأمشاط حديدية، كما وضعوا مشاعل متقدة عند جنبيها، وقطعوا ثدييها؛ ثم أمر الوالي في دنائة أن تساق عارية في الشوارع. صرخت إلى الرب أن يستر جسدها فلا يُخدش حيائها، فسمع الرب طلبتها وكساها بثوب نوراني.
رأتها يوليانة وسط العذبات محتملة الآلام فصارت تبكي بمرارة، وإذ شاهدها الحاكم أمر بتعذيبها مع القديسة بربارة، وبإلقائها في السجن، فصارتا تسبحان الله طول الليل. استشهادهما أمر مرقيان الحاكم بقطع رأسيهما بحد السيف، فأخذوهما إلى الجبل خارج المدينة وكانتا تصليان في الطريق. وإذ بلغتا موضع استشهادهما طلب ديسقورس أن يضرب هو بسيفه رقبة ابنته فسُمح له بذلك، ونالت مع القديسة يوليانة إكليل الاستشهاد. جسد القديسة بربارة موجود حاليًا في كنيسة باسمها بمصر القديمة. وقد رأى بعض المؤرخين انها استشهدت بهليوبوليس بمصر.
صلاتها تكون معنا أجمعين
قد نكون احتجنا لبعض الفروض فى العلاقات بين أفراد القصة لم ترد بالقصة الحقيقية الواردة بالسنكسار وكتب هذه السيرة الطاهرة أثناء كتابة الحبكة الدرامية. لكننا حرصنا –قدر الإمكان- على تدوين جميع الأحداث والشخصيات التي وردت بكتب هذه السيرة العطرة. إذكرونى صلواتكم … إيليا سمير
الشخصيات
1- السيد المسيح
2- بربارة
3- يوليانة
4- دوريس
5- إلكترا
6- أركاديوس
7- ديسقوروس
8- مرقيانوس
9- أوكتافيوس
10- الشيطان
11- حارس 1
12- حارس 2
13- حارس 3
الفصل الأول
(ستار) المنظر الحجرة العلوية لبرج بربارة، عبارة عن كرسي عريض أو كنبة أمامها مائدة صغيرة تفتح الحجرة على باب للداخل وآخر مقابل له مؤدى إلى الخارج، بعض التماثيل اليونانية، طست ماء وإبريق على أحد الجوانب. وستائر رومانية على الشرفات –إن أمكن- وعمودان رخاميان على جانبي الشرفة الرئيسية المطلة على المدينة أو حديقة القصر.
(تظهر إلكترا وهى تنظف أثاث المنزل)
إلكترا: (تغنى) نيقوميديا يا بلـد الجمال حسن بناتك ده مـنـيـن
زينا فـ الدنيا مـحـال وحياة فينوس ست الحلوين
دوريس: (تدخل) إيه ده ياإلكترا لسه مخلصتيش نظافة هنا .. طب دي ستى بربارة جاية تفطر هنا
إلكترا: طبعاً يا ستى .. ما احنا وصلنا خلاص
دوريس: قصدك ايه
إلكترا: لأ أبداً يعنى حقصد ايه .. مادام إنتى وست القصر الأمورة بربارة بقيتوا أصحاب طبعاً لازم تتأمرى علينا وتبقى ريستنا.
يوليانة: (تدخل) (تتجه نحو دوريس) هو انتى شرفتى .. ما كان لسه بدرى ياختى.
إلكترا: محدش يكلمها .. دى بقت صاحبة الأمورة بربارة صاحبة القصر.. وبتقعد معاها في أوضتها .. ويسهروا للصبح .. .. أنا مش عارفة سيدى ديسقوروس رأيه إيه في الموضوع ده.
يوليانة: بقى شوفى يا بت إنتى .. لازم تعرفى إنى هنا رئيسة الوصيفات غصب عن عين التخينة فيكم .. لأن اللى معيينى هنا سيدى ديسقوروس نفسه.. ومهما اتصاحبتى على بنته بربارة، مش ممكن تاخدى مكانى أبداً .. انتى فاهمة.
إلكترا: اللى غايظنى ياريسة .. إنها فاكرة نفسها بنت ناس قوى .. عشان كدة بتقعد مع اسيادها.
دوريس: أنا عمرى ما نسيت إنى خدامه .. لكن على ايه الكلام ده كله .. أنا مكنتش عايزه أقعد معاها لكن هيه اللى طلبت منى كده .. ستى بربارة تعبانة قوى ودماغها فيها ستين سؤال محتاجين إجابة.
يوليانة: ستين سؤال .. وانتى بقى اللى الإله زيوس اداكى الحكمة وحتجاوبى على أسئلتها؟!
دوريس: على قد ما أقدر .. واللى يعرف يساعد حد لازم يساعده وإلا تبقى خطية عليه.
يوليانة: بقولك ايه يا بت انتى .. الكلام ده بتاع أتباع المصلوب مش عايزة أسمعه .. وكفاية انى مقولتش لحد دلوقت لمولاى ديسقوروس إنك مسيحية .. عشان يطردك.
إلكترا: يطردها بس .. ده يمكن كمان يسلمها للوالى مركيانوس علشان يقتلها.
دوريس: لي الحياة هي المسيح .. والموت ربح لي .. أنا مبخافش من الموت .. بالعكس، ده أنا مش حنسالكم الجميل ده لو قلتم لمولاى ديسقوروس إنى مسيحية.
يوليانة: إنتى عايزه تشلينى .. طب أنا حأقول حالاً لمولانا ديسقوروس إنك من أتباع الراجل المصلوب اللى الوالى ديسقوروس بيكرهم.(تهم بالخروج)
إلكترا: استنى بس يا يوليانة (همساً) ما تنسيش انها لو مشيت أو ماتت حنرجع احنا نعمل الشغل بتاعنا تانى .. دأحنا ما صدقنا ما لقينا واحدة زى دى تعمل كل الشغل ونتأمر عليها ونذلها زى ما احنا عايزين.
يوليانة: (همسا) عندك حق .. (بصوت مرتفع) طب علشانك يا إلكترا حسامحها المره دى كمان.
إلكترا: تعيشى يا ريسة .. طول عمرك قلبك حنين.
يوليانة: آه بس اللى يقدّر
أركاديوس: (يدخل فتضطرب دوريس وتخرج بمجرد أن تراه) أسعدت الآلهة صباح أحلى الوصيفات
يوليانة: أهلاً .. حضرتك شرفت .. كنت فين من الصبح؟!
أركاديوس: (نظره متعلق بالباب الذي خرجت منه دوريس) كنت بألف حوالين أسوار القصر .. لحسن يكون حد كده ولا كده بيحوم حوالين قصر الجميلة بربارة .. وبالمرة وقفت شوية تحت شباك دوريس..
يوليانة: مفيش فايده في أركاديوس .. حارس قصر شجاع .. لكن قدام البنت المفعوصة دوريس قطه صغيرة..
أركاديوس: (يشهر سيفه) بقولك ايه يا جارية.. كلمة تانية ومش حتلاقى راسك في كتفك ..
يوليانة: هه .. مش بقولك يا أركاديوس إن مفيش فايدة منك .. مش عايز تفهم إنها طول ما هيه بتعبد المصلوب ده يبقى مش حتقدر تتجوزها ..
أركاديوس: مسيرى في يوم حاقدر أخليها تنساه .. يإما بالذوق .. (يهز سيفه) أو بالعافية .. (يعيد سيفه بمجرد سماع صوت ديسقورس)
ديسقورس: (صوته يأتى من الخارج) الحارس ده لازم يتجلد .. أنا مش بأدفعلهم فلوس عشان يناموا..
إلكترا: خلو بالكم سيدى ديسقورس جاى ..
ديسقورس: (يدخل ثائراً فيشاهد أركاديوس) .. انت هنا .. ازاي تسيب العسكرى ينام عند البوابة، لدرجة إنى دخلت من غير مايحس بوجودى؟!
أركاديوس: إزاي ده حصل .. وحق أبوللون لأجلده قدام كل الحرس .. معلهش.. حقك عليا .. إحنا كلنا عبيدك ورهن إشارتك يا مولاى ديسقورس.
يسقورس: لازم تفهم يا أركاديوس إن بنتى بربارة دى بنتى الوحيدة.. هيه اللى النعمة والعزاء اللى قدمتهملى الآلهة .. وعشان كده الآلهة سكبت فيها الجمال النورانى.. فمن خوفى عليها من مجون روما، وفساد نيقوميديا بنيت لها القصر ده بنيت القصر ده وعينتك انت رئيس الحرس عشان أنا عراف شجاعتك وإخلاصك.
أركاديوس: (يجثو على ركبتيه) مولاى ديسقوروس.. ثفتك دى شرف كبير أوعدك أنى أكون قدها.
إلكترا : (تدخل حاملة الطعام)
ديسقورس: استنى .. الأكل ده لمين؟!
إلكترا: لستى بربارة يا مولاى
ديسقورس: هه.. وهيه متعوده انها تاخد الفطار بره أوضتها وسط الخدم على طول
إلكترا: أ أ أبداً يامولاى..
بربارة: (تدخل) أهلاً والدى .. (تقبل يده)
ديسقورس: (بجفاف) أهلاً يا بنتى .. أركاديوس .. طلّع دول بره وأخرج انت كمان..
أركاديوس: أمرك يامولاى .. (يقوم بإخراج الوصيفة ويخرج)
ديسقورس: (يطمئن لخروجهم) (بصوت جهورى) بربارة .. (تفزع بربارة) .. إيه اللى انتى بتعمليه ده .. ازاى تاكلى وسط الخدم كده .. وإيه اللى بسمعه عن انك بتقعدى معاهم بالساعات..
بربارة: أبداً ياوالدى .. كل الحكاية إنى زهقت من الحبسة لوحدى .. حاسة إن الكل بيخاف منى .. نفسى حد يحبنى من غير ما يخاف منى ..
ديسقورس: ليه هو أن بخاف منك يابنت؟!
بربارة: مش قصدى انت يا بابا.. انت بتيجى كل يوم الصبح وأحياناً مره في الليل .. لكن أنا طول اليوم لوحدى .. انا كده حأتجنن.
ديسقورس: اخرسى .. انتى عايزه ايه .. عايزه تنزلى الشارع زى بنات السوق تتاجرى وتشترى وتبيعى .. انتى عايزه أمراء نيقوميديا اللى بقوا يستنوا عيد أبوللون من السنة للسنة علشان يشوفوكى .. يشوفوكى فى شوارع المدينة .. وتبقى زيك زى أي بنت عادية من باقى الشعب؟!
بربارة: لكن أنا…
ديسقورس: (مقاطعاً) انتى بنتى الوحيدة .. بنت ديسقورس أعظم تجار نيقوميديا .. مش بس كده .. (ملاطفاً) انتى تميمة الحظ اللى أهداهانى أبوللون .. من يوم ما ماتت أمك وأنت صغيره .. وأنا واخد على نفسى عهد إنى أرعاكى لحد ما أجوزك لأعظم راجل في نيقوميديا .. لأحسن راجل في الإمبراطورية الرومانية بحالها .. ..وانتى بتسمحى لنفسك انك تقعدى مع العبيد..
بربارة: يا والدي أنا مأنكرش محبتك لىّ .. لكن أنا زهقت من القعده لوحدى..
ديسقورس: أنا مش عايز أزعق أكتر من كده لإنى رايح النهارده أقدم ذبيحة الشكر لأبولون عشان التجارة بتاعتى رجعت سليمة من الشرق، وعايزك تيجى معايا.
بربارة: معلهش .. سيبنى المرة دى لإنى تعبانة شوية..
ديسقورس: إزاي .. أبوللون حيغضب عليا لو مجيتيش معايا .. لإنك هديته ليّا، ولازم يشوفك في كل مرة أروح فيها .. انتى عايزة أبولون يغضب علينا .. ده ممكن ياخدك منى.
بربارة: يا والدى، رئيس الكهنة اللى فهمك كده لو اديته خروف زياده حيطلب من أبولون أنه ميزعلش مننا.
ديسقورس: كده، طيب يابنتى حسيبك على راحتك المرة دى .. (باسماً) وحلال على رئيس الكهنة الخروف .. أركاديوس (يدخل أركاديوس) طلّع الخيل وابعت معايا حارس لحد هيكل أبولون وارجع انت لحراستك .. وخليك صاحى..
أركاديوس: أمرك يامولاى.
بربارة: (فترة صمت) (موسيقى) بربارة ايه اللى بيحصلك ده .. ايه اللى مخلينى تعبانه كده .. ياه .. أنا حاسة أن روحى بتهرب منى .. حتى السجود قدام أبولون معدش يريحنى .. ايه الحكاية .. انا حاسة إن قوة الآلهة بتدفعنى لمصير مجهول .. أسود .. مرعب .. الحته دى واقعة
(يظهر الشيطان وتتغير الإضاءة لتناسب حضوره)
الشيطان: بربارة .. بربارة .. بربارة .. ياجميلة نيقوميديا .. مالك .. زعلانه ليه .. خايفه ليه..
بربارة: هه .. أأأ أنت مين .. انت مين؟!
الشيطان: مالك مرعوبة ليه .. أنتي متعرفينيش .. أنا .. (بعظمة) .. أنا أبولون..
بربارة: أبولون .. إلهي؟!
الشيطان: آه أبولون .. هاهاهاهاها .. مالك يا حلوه .. انتى خايفه منى؟ .. أنا جيت لما لقيتك تعبانه وبتفكرى كتير..
بربارة: صحيح انك .. انك .. غضبان على عبدتك بربارة، علشان مرحتش المعبد مع والدى وقدمتلك ذبحية الشكر؟
الشيطان: هو صحيح إني زعلان منك، .. لكن مش بسبب انك مرحتيش المعبد بتاعى .. إنما علشان مش بتسمعى كلامى.
بربارة: إزاى؟!
إبليس: أنا مبحبش البنت اللى اسمها دوريس .. كل الآلهة غضبانين عليها .. متقعديش معاها .. متكليميهاش .. أطرديها .. أطرديها .. أطرديها وأنا حأخرجك كل ليله من القصر .. حأوديكى كل حانات نيقوميديا .. وروما حأخليكى تعملى كل اللى انت عايزاه .. بس اطرديها..
بربارة: (تقترب منه) لكن أنت مش أبولون .. أنت مش شبه أبولون .. ابولون شكله حلو .. انت مين .. (برعب) انت مين ..
إبليس: ها ها ها ها .. (بعظمة وصوت عميق) أنا إله الآلهة .. أنا خالق كل الآلهة .. أنا اللى روحك حتبقى ملكه .. أنا ملك الأرض .. أنا إله كل الأرض .. ها ها ها ها ..
بربارة: هه هه .. الحقونى .. دوريس .. دوريس .. (تصرخ) دوريس .. (يغيب إبليس وتعود الإضاءة)
دوريس: (تدخل) ستى بربارة .. مالك .. ستى بربارة..
بربارة: هه دوريس .. انتى هنا .. أشكرك .. انتى دايماً اللى .. (تنظر إليها بغضب) انتى ايه اللى جابك ..
دوريس: (متعجبة) انتى يا مولاتى ناديتى عليا وكنتى بنصرخى .. جيت جرى لقيتك واقعة على الأرض.
بربارة: أنا ناديتك ..
دوريس: أيوه يامولاتى ..
بربارة: أيوه صحيح .. لكن ايه اللى خلانى أناديكى .. مكنش يصح أناديكى .. إمشى ياللا من هنا .. أخرجى بره.
بربارة (تتعجب) حاضر .. حاضر يامولاتى (تهم بالخروج)
برباره دوريس .. استنى يا دوريس .. متزعليش منى .. أنا بعمل كده غصب عنى .. إنتى صديقتى الوحيدة .. علشان كده ناديت عليكى من غير ما أشعر ..
دوريس أنا تحت أمرك يا مولاتي.
برباره لكن غلط إنى أناديكى .. لإن الآلهة غضبانه عليكي .. لازم تستغفري الآلهة عشان ترضى عنك وأقدر أصاحبك.
دوريس (تضحك) أنا عارفه إنها غضبانه عليا ..
بربارة وساكته ؟ !
دوريس وسعيده جداً كمان يامولاتى .. إن ده معناه إنى ماشيه صح.
بربارة إنتى بتقولي إيه .. يبقى إله الآلهة عنده حق .. إنتى سبب لعنتى .. إنتى ساحرة.
دوريس إنتى تعرفى إله الآلهة يامولاتى؟!
بربارة أيوه ظهر لي وكان غضبان جداً وعينيه بتطق شرار.
دوريس وهوه اللي قالك إنه إله الآلهة ؟!
بربارة أيوه .. إيه حتقوليلى إن ده مش إله الآلهة كمان .. ده قاللي إنه يبقى إله أبولون نفسه .. دوريس هيه الآلهة ليها آلهة؟!
دوريس: كل الآلهة اللى بتعبدوها ليها إله واحد هو الشيطان الشرير وأصل كل الشرور في العالم .. لكن الشيطان نفسه مش إله.
بربارة: مش إله .. أنا مش فاهمه حاجة.
دوريس: يامولاتى اللى ظهر لك هو الشيطان .. والشيطان مجرد عبد أو جندى متمرد عند إله الآلهة وخالق كل شيء ..الإله الحقيقي.
بربارة: لكن ده كان شكله مرعب جداً .. ماشفتش حد زيه.
بربارة: لو الإله الحقيقى هوه اللى ظهرلك مكنش يملاكى بالخوف كده .. إنما يملاكى بالسلام والفرح والراحة.
بربارة: دوريس .. أنا مش فاهمة حاجة منك .. لكن أنا حاسه إنك كفرتى بآلهتنا .. ده صحيح؟ .. يعنى سكتى .. يبقى إله الآلهة عنده حق .. إزاى بعد ما كنتى بتكلمينى عن جمال الكون وجمال الخليقة وإن خالقها إله عظيم تكفرى بيه.
دوريس: يامولاتى أنا مكفرتش بيه .. بالعكس أنا آمنت بيه .. أنا بأعبد يسوع المسيح الإله الحقيقى .. اللى عشانى نزل من السما وجه على الأرض .. وفدانى بدمه .. وملاء قلبى بالسلام والفرح.
بربارة: أنا مش فاهمه حاجة .. مين هو يسوع المسيح ..
دوريس: أطلبى يامولاتى من خالق الكون أنه يهديكى ليه وانت حتعرفى مين هو يسوع المسيح .. بعد إذنك يامولاتى. (تهم بالخروج).
بربارة: استنى يادوريس .. أنا مخلستش كلامى.
دوريس: بعدين يامولاتى .. أسيبك دلوقتى تفكرى شوية .. وإذا اتأكدتى من إن أبولون وغيره من الأوثان مش ممكن يكونوا آلهة .. دوّرى على الإله الحقيقي وانتى حتلاقيه على طول.. بعد إذن مولاتى (تخرج).
بربارة: دوريس استنى يا دوريس ..(تخفت الإضاءة مع موسيقى مناسبة) ليه كده يادوريس .. هوه أنا ناقصة حيرة
إبليس: بربارة محتارة ليه؟
بربارة: هه .. مين هوه الإله الحقيقي اللى بتحكى عنه دوريس .. ليه مقالتليش عليه على طول
إبليس: وليه تسألي دوريس؟
بربارة: أمال أسأل مين؟!
إبليس: اسألي نفسك!
بربارة: أسأل نفسي؟!
إبليس: بصى على الدنيا حواليكى فيها خير وفيها شر .. يبقى فيه إله للخير وإله للشر .. فيها زرع يبقى فيه إله للزرع .. فيها سما وفيها أرض .. يبقى فيه إله للسما وإله للأرض .. فيها شهوه وفيها موت .. كل حاجة ليها إله ..
بربارة: طب ليه دوريس بتقول إن فيه إله واحد بس.
إبليس: متسمعيش كلام البنت دى .. دى آخر مره بحذرك .. بعد كده حيكون غضبى عليكى شديد .. فاهمه .. ابعدى عن دوريس .. ابعدى عن دوريس.
بربارة: انت مين
إبليس: أنا إله الأرض ورئيس هذا العالم .. أنا إله الظلمة .. أنا الإله اللى حتكون روحك في ايده .. اسمعى كلامى يا بربارة .. اسمعى كلامى يا بربارة.
بربارة: (بفزع) حاضر حاضر .. حاسمع كلامك .. (تردد) كل حاجه في الدنيا ليها إله بيحكمها .. الشمس ليها إله .. القمر له إله .. الأرض ليها إله .. السما إله .. الخير إله .. الشر إله .. الجبال إله .. الزرع إله .. الحب إله .. لأ مش قادره أصدق مش قادره .. (تنادى) دوريس دوريس .. لأ بلاش دوريس .. يا إله الشمس أنا بحب الشمس لكن بحب القمر كمان .. يا إله الجمال أنا بحب الجمال .. لكن خايفه لو عبدتك إله الخير يغضب عليا .. ولو عبدت إله الخير .. إله الشر مش حيرحمنى .. ولو عبدت إله الشر .. إله الرحمة مش حيسامحنى .. ولو عبدت .. ولو.. .. .. آه أنا تعبانه .. مش قادرة أفكر .. دوريس (تهوى على الأرض من الإعياء).. دوريس.
دوريس: (تدخل) مولاتى .. مالك يا مولاتى.
بربارة: مش قادرة أصدق إن كل شيء في الدنيا له إله .. دوريس .. ايه الصح وايه الغلط .. مين هو الإله الحقيقى.. إله الشر ولاّ إله الخير .. إله الشمس ولاّ إله القمر .. مين هو اإله الكون .. واحد ولاّ أكتر .. أبولون في روما ولا أرطاميس في أفسس ولا زيوس في أثينا .. ولاّ واحد تانى غير دول.. هو مين .. هو مين
دوريس: (تبتسم في حنان وترشم ذاتها بعلامة الصليب) .. يامولاتى لو بيصيتى حواليكى حتلاقى الدنيا كلها ماشية بنظام واحد .. الشمس تظهر القمر يختفى .. المطر ينزل الميه الحلوه في النهر تزيد .. النبات يكبر .. الحيوان ياكل النبات ويكبر احنا نتغذى على الحيوان والنبات .. كل المخلوقات تعيش فترة طفولة وشباب وشيخوخة .. عمر يامولاتى ما حاجة اتأخرت عن ميعادها .. ولا خالفت النظام الموضوع ليها .. كل ده لأن اللى بيحركها هو إله واحد .. خالق كل شيء .. خلق النبات والحيوان والسما والأرض وزيّن خليقته بالإنسان .. إله الخير والمحبة وكل شيء جميل.
بربارة: وهو برضه إله الشر والظلم والخوف؟!
دوريس: أبداً الشر والظلم والخوف وكل حاجة وحشة تيجى لما منسمعش كلامه ونبعد عن حضنه .. ونسمع كلام الشيطان عدو الخير .. الشيطان اللى كان خادم من خدام ربنا.. لكن بسبب كبرياءه ربنا بعده عنه عشان كده الشيطان عايز يبعدنا عن نور ربنا زى ما هو بعد.
بربارة: يبقى اللى سمعت صوته ده كان الشيطان.
دوريس: مفيش حاجة بتعذب الشيطان قد ما يلاقى انسان حيسيبه ويرجع لربنا .. عشان كده بيحاربنا بكل قوة عشان نفضل أسري تحت إيده.. الشيطان يا مولاتى كل هدفه أنه يبعدنا عن حضن الإله الحقيقى الحنون اللى خلقنا كلنا وبيحبنا كلنا.
برباره: بيحبكم كلكم .. يا بختكم بإلهكم.
دوريس: يامولاتى وبيحبك انتى كمان.
بربارة: بيحبنى .. طب ازاى وأنا مش من عبيده؟!
دوريس: لكن من خليقته .. هوه اللى خلقك .. انتى من صنع ايده زى ما كل شيء جميل جواليكى من صنعه.. علشان كده هوه بيحبك وبيحب كل الناس حتى اللى بيحاربوه لأنه خالقهم كلهم.
بربارة: مش عارفه .. كلامك ده بيريحنى، بيفرحنى.. على الرغم من إنى معرفهوش لكن حاسة إنى بحبه .. كل ما تكلمينى عنه أحس بحبه عمال يكبر جوايا.. دوريس .. أنا عايزة أقدم له ذبيحة كبيرة تعبر له عن حبى..
دوريس: يامولاتى إلهنا مش محتاج لذبائح علشان نظهر له حبنا .. لأنه هو نفسه الذبيحة اللى اندبحت عننا .. ومات على الصليب علشانا.
برباره: مات .. يعنى إيه .. يعنى هو إله الموت .. ولا عايزانى أعبد إله ميت؟!
دوريس: لأ .. لكن الحكاية محتاجة قعدة طويلة .. إسمعى يامولاتى .. فيه راجل جه من مصر، من اسكندرية .. إسمه أوريجانوس .. الراجل ده ممكن يفهمك كل حاجة ويجاوبك على كل أسئلتك.
برباره: طب وحيخش إزاى .. القصر حواليه حرس بيسألوا الهوا إنت رايح فين.
دوريس سيبى الموضوع ده عليا .. أنا حقولك على طريقة (تهمس فى أذنها).
برباره طيب أنا حطلع أوضتى دلوقت، وأول ما يوصل إدينى خبر.
دوريس حاضر يامولاتى. (تخرج بربارة)
أركاديوس (يدخل) دوريس .. دوريس
دوريس أركاديوس.. إيه اللى جابك هنا .. (تخفى اضطرابها) .. المفروض إنك دلوقت قاعد تحت السور
أركاديوس المفروض دلقت إنك تسمعينى .. أنا ما صدقت لقيتك لوحدك من غير بربارة ولا جوز العقارب الوصيفات.
دوريس عايز منى إيه يا أركاديوس؟!
أركاديوس عايزك إنتى .. عايز قلبك.
دوريس قلتلك قبل كده إنى كلّى ملك إلهى ومش حأكون لإنسان تانى.
أركاديوس إلهك .. اللى مات .. ومات ملعون .. ده يبقى إله .. واحد ميت ينافسنى على حبك؟! هو فين دلوقتى .. هو فين عاشان أهزمه بصوبع رجلى .. وساعتها مش حيكون فيه غير أركاديوس.
دوريس إخرس .. إلهى هو اللى حيهزمك .. حيكسر غرورك وكبريائك.
أركاديوس كده طيب .. حنشوف مين فينا اللى حيخرس .. (تتركه دوريس وتخرج)
(تدخل الجاريتان إلكترا ويوليانة وهما وتضحكان) .. إنتو هنا ..؟!
يوليانة ولا يهمك .. متزعلش .. طول ما هى مصاحبة بربارة يبقى لا زم تكون مناخيرها فى السما.
أركاديوس أنا مستعد أقتل بربارة لو ده حيرجعلى دوريس.
إلكترا لأ مش كده .. متنساش إن مولانا ديسقوروس مش حيرحمك.
يوليانة ياعينى على الحب .. الراجل حيودى نفسه فى داهية عشان البت المفعوصة دى.
أركاديوس إخرسى .. متنسيش إن أنا لسة أركاديوس .. أقوى فرسان نيقوميديا وأسيا الصغرى بحالها.
إلكترا شوف يا بطل .. إحنا لازم نوقع بين بربارة و دوريس عشان نقدر نجيب دوريس للنقطة اللى متقدرش
أركاديوس (مقاطعاً) شوفوا إنتوا الإتنين .. إسلوب الحيل القذرة والدسائس ده تعملوه إنتو .. لإنه يناسبكم .. أما الفرسان ليهم أخلاق تانية .. إللى عايزه آخده بدراعى .. وإلا مستحقهوش.
يوليانة بقى كده .. طيب ورينا حتاخد بربارة إزاى من غير مساعدتنا..
إلكترا بكره حترجعلنا وتطلب مشورتنا .. وساعتها..
يوليانة (تتدخل) وساعتها برضه حنساعدك .. مش عشان خاطرك .. إنما عشان مصلحتنا واحدة.
أركاديوس (بإستغراب) وانتو إيه مصلحتكم فى إن أنا أتجوز دوريس
إلكترا احنا وانت فى مركب واحدة .. وعايزين نوصل لنتيجة واحده .. لكن الفرق هو إن كل واحد عايز يوصل لهدف مختلف.
يوليانة يعنى لازم نتحد ..
إلكترا ونحط إيدنا فى إيد بعض
يوليانة إيه رأيك
أركاديوس رأيى .. (يستل سيفه) رأيي أنكم لو فضلتم هنا شوية حتندموا طول عمركم .. ده إذا كان حيبقالكم عمر
برباره (تدخل فجاءة) أركايوس .. فيه إيه .. (يسود وجوم) .. إيه مالكم أنا جيت فى وقت مش مناسب ولا إيه .. رافع سيفك عليهم ليه يا أركاديوس.
إلكترا أبداً يامولاتى ده أركاديوس كان بيورينا سيفه الجديد .. مش كده يا أركاديوس؟
أركاديوس (كاظماً غيظه) كده يا إلكترا..
برباره واللى يجيب سيف جديد يبقى مكشر كده .. ياللا أفرحوا واضحكو .. أنا سعيده جداً النهاردة ..
يوليانة أبولون إله الآلهة يسعد أيام مولاتى أكتر وأكتر.
إلكترا وأفروديت إلهة الجمال تزيد جمالها كمان وكمان.
برباره بس أنا خايفة .. مش .. مش عارفة مالى .. أنا النهاردة حالى .. النهاردة .. مش عارفة .. النهاردة يوم مش عادى مش عارفة ليه (وفى هذه الأثناء تظهر الحيرة على الجاريتان ثم يظهر صوت المنادى شيئاً فشيئاً)
أوريجانوس (صوت خارجي) أكشف الطالع وأبين سر الأيام .. وأحكى على المسامع أحلى حكايات وكلام .. (يكرر الجملة)
إلكترا أيه رأيك يا مولاتي لو ناديتلك على العراف ده؟
برباره (يظهر عليها ارتباك الفرح والقلق) أيوه العراف .. نادى عليه .. ولا أقولك .. لأ أستنى .. طيب نادى عليه.
إلكترا يا عم يا عراف اطلع القصر .. سيبوه يا حراس .. مولاتي بربارة عايزاه.
أركاديوس إزاى .. هيه الحكاية بالساهل .. راجل يقابل مولاتي بربارة .. أنا لازم أنزل أفتشه..
إلكترا (تضحك) بس ده راجل عجوز قوى!
أركاديوس ولو (يخرج)
برباره أنا طبعاً مش حقابله لوحدى .. دوريس
دوريس (تدخل) أمر مولاتى.
برباره العراف جه .. قصدى (تتصنع العظمة) فيه عراف جاى دلوقتى يقرالى الطالع .. خليكى هنا لحد ما يمشى..
دوريس أمر مولاتي
برباره وانتو ياللا روحوا شوفوا شغلكم.
الحاريتان (تتغامزان) أمر مولاتى (تخرجان)
أوريجانوس (يدخل مع أركاديوس) يابنى بالراحة شوية أنا راجل تعبان .. هو انت مش فتشتنى..
أركاديوس ايوه وملقيتش معاك غير كتاب السحر الكبير وشوية الحاجات بتاعت العرافين .. لكن لازم تفهم إن مقابلة بنت ديسقوروس أعظم تجار نيقوميديا مش بالساهل.
برباره (بغضب) أركاديوس .. سيبه بقى وانزل للحرس بتوعك..
أركاديوس أمر مولاتى (يخرج بعد أن يلقى على دوريس نظرة ذات معنى)
دوريس (تجرى وتنحنى أمام أوريجانوس وتقبل يده) .. معلمنا أوريجانوس .. أشكرك لإنك قبلت الدعوة وعرضت نفسك للمخاطر.
أوريجانوس أنا يا بنتى معملتش حاجة .. فيه ناس كتير أنا مستحقش أنطق إسمهم لأنهم ضحوا بحياتهم ودمهم علشان خاطر الإيمان .. أنا مقدرش أتأخر عن حد عايز يعرف المسيح..
برباره أنت اللي حا تحكيلى عن يسوع ؟
أوريجانوس ايوه يابنتى بنعمة ربنا.
برباره ياه أخيراً حأقدر أعرف كل حاجة عنه .. أنا مش عارفة أشكرك إزاى يا دوريس .. فعلاً كانت خدعة ذكية إنه يلبس ملابس العرافين..
أوريجانوس أنا يابنتى مكدبتش .. أنا قلت أبين سر الأيام وأحكى أجمل حكايات .. ولو كان ربنا أراد إن حد تانى يطلبنى كنت حأكلمه برضه عن سر الأيام .. عن سر تجسد ربنا .. وسر ألوهيته .. وأحكيله أجمل حكايات عن معجزاته وفداءه لينا ..
دوريس أبونا العلامة أوريجانوس يا مولاتي من إسكندرية وواحد من أكبر علماء المسيحية..
برباره أهلاً بيك .. متتصورش قد إيه أنا متشوقة إنى أعرف كل حاجة عن يسوع .. هوه صحيح إله الآلهة .. ولا ابنه .. هوه صحيح مات علشان يفدينا .. طب يفدينا من إيه .. احكيلى إزاى بقى إله .. احكيلى إزاى مات.. .. إزاى قام .. إزاى ساب عرشه واتنازل عن ألوهيته .. و
أوريجانوس (مقاطعاً) على مهلك يابنتى على مهلك وأنا حأحكيلك كل حاجة (تنزل ترنيمة قصة الحب العجيب) (سيلويت)
دوريس (إضاءة) ستى دوريس بتبكى ليه؟!
برباره مش قادرة أصدق إن ربنا يحب العالم الحب ده .. والعالم بعيد عنه .. ليه سايبنا نبعد عنه كده .. ليه يختار إنه يقدم الحب لناس متعرفهوش .. ليه أعداءه أكتر من أحبائه ..؟!
أوريجانوس يابنتى ربنا خلقنا لنا إرادة .. وبإرادتنا دخلت الخطية العالم .. ودفع هو التمن .. علشان اللى عايز يرجعله بإرادته يلاقى باب التوبة والرحمة مفتوحين .. لكن الشيطان استغل ضعف الإنسان وخّلا إرادته تتجه للشر وزاد الشر فى العالم.
دوريس يا مولاتي .. ربنا حط جوانا روحه القدوس .. علشان كده حنفضل قلقانين وتعبانين طول ما إحنا بعاد عنه لحد ما نستريح فى حضنه .. زى ما حصل معاكى .. فضلت روحه جواكى قلقانة لحد ما لقيتيه.
برباره واستريحت فى حضنه .. ودلوقت يا أبونا أوريجانوس أنا عاوزة أتعمد .. دوريس من فضلك جهزيلى أى حاجة تنفع جرن للمعمودية .. (تتجه بعينيها للسماء) أشكرك يا إلهي لإنك ما سبتنيش بعيده عنك أكتر من كده .. أرجوك يا إلهي الحقيقي إدينى القدرة إني أبشر باسمك قدام الناس .. علشان كل الناس يحسوا بالراحة والفرح اللى أنا عايشاهم دلوقت معاك.. (ترنيمة) (بلاكة)
أوريجانوس (المنظر سيلويت) (صوت من الخارج) أعمدك يا بربارة باسم الآب والإبن والروح القدس.. (يدخل) .. يا بربارة حاولى تخلى موضوع إيمانك ده سر .. لحد ما يريد ربنا.
برباره أهرب من الاعتراف بالمسيح؟!
أوريجانوس ده مش هروب .. إنتى لسه جديدة فى الإيمان وفترة الهدوء دى حتديكى فرصة تفربى من ربنا أكتر وتثبتى فيه أكتر .. علشان لو جت عواصف ما تزعزعش إيمانك ..
برباره حاضر يا أبي.
أوريجانوس ودلوقتى لازم أمشى لإن فيه حاجات تانيه كتير لازم أعملها فى آسيا الصغرى .. ربنا يكون معاكم ويحميكم .. سلام ربنا يملا نفوسكم .. سلام
دوريس سلام يا أبي.
برباره إلكترا .. يوليانة .. تعالوا .. يا أركاديوس تعال .. أنا مبسوطة قوى النهاردة .. أركاديوس .. عايزه العمال يفتحوا طاقة تالته هنا.
أركاديوس ليه يا مولاتى
برباره على مثال الثالوث الإقدس.
أركاديوس نعم؟!
دوريس أ أ مولاتى قصدها عشان النور حيدخل أكتر لما يبقى فيه 3 شبابيك .. معلش مولاتى متلخبطة .. أصل العراف قال لها أخبار حلوه قوى..
يوليانة أسعدت الآلهة كل أيام مولاتنا الجميلة.
إلكترا وتبعد عنها ولاد الشر وأعداء الألهة (تنظر إلى دوريس ثم تتبادل النظر مع يوليانة ثم تخرجان)
برباره أشكرك يارب لآنك منحتني نعمة معرفتك.
دوريس أشكرك ياربى لأنك نورت قلب بنتك بربارة .. خليها نور ينور للبعاد عنك طريقهم إليك.
برباره أنا لك يا يسوع .. أنا صنعة يديك .. أنا بنتك .. (موسيقى) .. أنا مستحقش كل الحب اللى حبتهولى حتى قبل ما أعرفك .. أشكرك إزاى يا إلهي .. مهما قلت أو عملت مش حيوفيك .. لكن أرجوك ياربى اسمح إني أبشر باسمك .. علشان كل اخواتى فى البشرية يتمتعوا بالفرح والسلام اللى أنا عايشه فيه دلوقت .. أرجوك ياربى استلم حياتى .. أرجوك يارب اسندنى وساعدني .. أرجوك يا إلهي ادينى إى أبشر باسمك.. (ستار)
الفصل الثانى
(الإضاءة تبدأ من السيلويت أو يفتح الستار على الظلام، على المسرح ديسقوروس ويوليانة وإلكترا)
ديسقوروس (صوت قوى فى الإظلام) اخرسي .. (إضاءة) أنا مشغلكم هنا علشان تخدموا بنتى .. تقوموا تطلعوا عليها الكلام الفارغ .. وقدامى .. انتم ملكمش قعاد هنا .. ياللا بره.
إلكترا يا مولاى حلمك علينا .. احنا بنحب ستنا بربارة جداً.
يوليانة وعلشان كده مش هاين علينا انه ينضحك عليها وتكفر بالآلهة ..
ديسقوروس بربارة بنتى .. هدية أبولون ليّا تكفر .. تكفر بأبولون .. مستحيل .. عمرها ما قالتلتى كلام زى ده أبداً.
إلكترا لأن مولاى عمره ما سألها .. أبداً.
ديسقوروس قصدك إيه؟!
يوليانة قصدها إنك تسألها ..
إلكترا بلاش .. إعرض عليها مرة تانية العريس اللى متقدملها ومولانا موافق عليه.
ديسقوروس ابن الأمير مرقيان.
يوليانة ابن الأمير مرقيان .. والى المدينة
ديسقوروس (يفكر لحظة) طيب سيبونى دلوقت .. (تهمان بالخروج) يوليانة .. (بعظمة) نادى على مولاتك بربارة.
يوليانة أمر مولاى
ديسقوروس أركاديوس
أركاديوس (يدخل) أمر مولاى
ديسقوروس هات الكرباج بتاعك وأخرج بره.
أركاديوس ليه يامولاى .. فيه إيه؟!
ديسقوروس انت بتقولى ليه .. (بعصبية شديدة) هات الكرباج واخرج بره.
أركاديوس (متعجباً) أمر مولاى (يهم بالخروج)
ديسقوروس أركاديوس
أركاديوس أمر مولاى
ديسقوروس هات السيف كمان
أركاديوس مولاى .. إذا كان فيه خطر على مولاي أو على مولاتى بربارة، فأسمحلى أعرف .. ده واجبى.
ديسقوروس مفيش يا أركاديوس .. هات السيف .. أتمنى إن الآلهة متخلنيش أستخدمه
(يخرج أركاديوس وتدخل بربارة يبدو عليها الفرح والسرور)
برباره أهلاً والدى .. أشكر ربنا على رجوعك بالسلامة
ديسقوروس أشكر ربنا؟! .. إزيك يا بربارة .. عامله إيه يا بنتى .. لسه زهقانة من وجودك فى القصر لوحدك.
برباره أبداً أبداً .. دا أنا مبسوطه هنا قوى ونفسى أقضى فيه بقية عمرى.
ديسقوروس وده معقول برضه .. كلها كام يوم وعريسك ياخدك.
برباره برضه ابن الأمير تانى .. ياوالدى أنا مش سبق وقلتلك إنى عايزه أقعد أخدمك .. إنت كبرت ومن واجبى إنى أراعيك وأخدمك.
ديسقوروس بربارة (فى حزم) ده أمر .. إنتى حتتجوزى ابن الأمير مرقيان .. الكلام ده مفهوش نقاش .. (يستجمع هدوءه) .. ولاّ مش عايزه أبوكى يفرح بيكى فى آخر أيامه؟
برباره لكن يا والدى أنا مقدرش أتجوزه أو أتجوز غيره
ديسقوروس يعنى إيه الكلام ده .. قصدك إيه؟
برباره يا والدي أنا.. أنا .. أنا مخطوبة
ديسقوروس إيه .. مخطوبة .. إزاى ومين .. مين اللى جه هنا وشافك وخطبك من غير ما أشوفه؟! .. إزاى ده حصل .. اسمه إيه .. مين هو علشان أقتله؟
برباره (موسيقى) .. اسمه يسوع .. ساكن فى قلبي .. وموجود فى كل الدنيا .. جه علشانى .. نزل من السما علشان يخلصنى .. هو إلهى .. اللى خلقنى .. وهو عريسى وحبيبى اللى مليش غيره .. من كتر حبه ليّا جه على الأرض ومات مصلوب .. ومن كتر حبى ليه نذرت أنى أعيش الباقى من عمرى علشانه .. أعبده وأشهد لأسمه..
ديسقوروس يبقى كلام الجواري صحيح .. بربارة بنتى .. بنت الآلهة كفرت بيهم وآمنت بأكتر ناس بأكرهم وبيكرهم الوالى والملك .. بقت مسيحية .. بقت من أتباع المصلوب!!
برباره يا والدي .. المصلوب ده هو اللى خلقنى وخلقك .. إلهي وإلهك.
ديسقوروس (ثورة عارمة) إخرسى .. (يصفعها على وجهها).. أنا مليش إله غير إله الملك مكسيميانوس .. أقول إيه للملك دلوقتى .. الوالي حيقول عليا إيه .. أكبر تجار نيقوميديا وصديق الملك مكسيميانوسيميانوس بنته بقت مسيحية؟! .. طبعاً مرقيان مش يلاقى فرصة أحسن من كده علشان يوقع بينى وبين الملك .. لكن لأ مش حأديه الفرصة دى أبداً .. (يصرخ بشدة) بربارة .. بربارة يابنتى إعقلى .. لأنى مش حأرحمك لو كفرتى.
برباره يا والدي .. يا أغلى الناس عندي .. الرحمة كلها أنا أخذتها من المسيح .. ومفيش أحن ولا أرحم من يسوع .. علشان كده مش حأبيع حبه ورحمته بأى تمن .. وياريت تجرب إنك تسمع بهدوء عن حبه وأنا واثقة إنك حتكسر آلهة الملك بإيدك.
ديسقوروس بس .. كفاية .. كفاية .. مش عايز أسمع .. مش قادر أشوف بنتى بتحطم كل اللى بنيته عشانها .. أنا حأقتلك يإيدى لو مرجعتيش لعقلك (تهرب من أمامه إلى خارج المسرح وهو يجرى ورائها حتى يخرجان .. وبمجرد يدخل أركاديوس ويوليانة وألكترا ودوريس.)
دوريس حد يلحقها ده حيقتلها
يوليانة انتى مالك .. دى حاجة تغيظ .. عقبال ما يقتلك انتى ونرتاح منك.
أركاديوس يوليانة .. حافظى على لسانك جوه بقك .. إلا إذا كنتى مستغنية عنه
الكترا جرى ايه يا يوليانة انتى بتزعقى لمولاتنا دوريس قدام مولانا أركاديوس .. ده حتى يبقى عيب..
أركاديوس أنا معنديش وقت ليكم دلوقتى .. لكن حسابكم بعدين .. أنا نازل ألحق مولاى ديسقوروس قبل ما يقتله بنته.
دوريس ياربى إنقذها .. يارب انجدها .. دى مالهاش غيرك ياربى .. بين لها قوتك ومجدك علشان تثبت إيمانها .. انقذها علشان تعرف أنها آمنت بإله قوى.
إلكترا البت دى بتبرطم بإيه
يوليانة هه .. تلاقيها تعويذة سحر .. علشان تنقذ صاحبتها
إلكترا ولا يمكن علشان مايجيش عليها الدور هيه كمان (تضحكان)
أركاديوس (يدخل لاهثاً) اختفوا من هنا دلوقت .. يالا ..
إلكترا ليه ايه اللى حصل
أركاديوس قعد يجرى ورا بنته لحد ما وصلت لصخرة قافلة الطريق عليها .. وفجاءة الصخرة انشقت نصين وبربارة دخلت فيها ورجعت قفلت تانى.
دوريس أشكرك يا ربى .. أشكرك
يوليانة مش معقول .. يعنى هيه جوه الصخرة دلوقتى
أركاديوس لاء عدت منها .. واستخبت جوه مغارة .. لكن ديسقوروس لف حوالين الصخرة ومسكها .. وجاي بيها على هنا.
إلكترا شوفتى .. يبقى الصخرة اتفتحت ساعت ما البنت دى كانت بتقول التعاويذ.
ديسقوروس (يدخل دافعاً بربارة أمامه ويتحدث لاهثاً) أركاديوس .. أركاديوس .. يوليانة .. ألكترا .. دوريس.
أركاديوس أمر مولاى
الجوارى سيدى
ديسقوروس فى أعلى أوضة فى برج القصر .. لأ فوق الصارى اللى على البرج .. أربطوا بنتى وامنعوا عنها الأكل والشرب .. وسيبوها مربوطة لحد ما تلعن المصلوب وتطلب إنها تقدم ذبيحة وبخور لأبولون إله الآلهة .. إله الملك مكسيميانوس.
أركاديوس أمر مولاى
ديسقوروس دوريس .. خديها وأربطيها فى صاري البرج.
دوريس (تجر رجليها فى بكاء شديد نحو بربارة) أنا أعمل كده فيكى .. لأ مش حأقدر .. أنا حأعترف بمسيحيتى ..
برباره دوريس .. إحنا اتفقنا على إيه .. مش قلتلك خليكى بعيد علشان تصليلى لحسن أضعف .. ياللا اعملى اللى قالولك عليه لحسن ياخدوا بالهم. وانتى إرجعى اوضتك وصليلى.
دوريس مولاتى .. واختى .. وحبيبتى
برباره (تبتسم فى هدوء) يالا يا دوريس .. حد يطول إنه يصلى وهو واقف فى مكان عالى محدش سامعه غير ربنا؟
ديسقوروس دوريس .. مش عارفة تجريها .. ولا مش عايزة؟
يوليانة بعد إذن مولاى .. أنا وإلكترا حنقوم بالمهمة دى.
ديسقوروس بسرعة .. (تمسكان بربارة وتخرجان) .. أركاديوس .. أوامرى واضحة؟
أركاديوس واضحة يامولاى
ديسقوروس مش عايز حد منكم تصعب عليه وينزلها خصوصاً البنت دى (يشير إلى دوريس).
أركاديوس أمر مولاى.
ديسقوروس دى مسئوليتك أنت .. أنت فاهم (يخرج).
أركاديوس أمر مولاى (يلتفت إلى دوريس الغارقة فى دموعها) .. دوريس .. دوريس .. مبترديش ليه؟
دوريس عايز إيه .. ليه ما قلتلهوش إنى مسيحية .. ليه
أركاديوس عايزه تموتى نفسك؟!
دوريس الموت .. الموت هوه الخوف .. لكن الشجاعة حياه .. وأولاد المسيح أولاد شجعان عمرهم ما خافوا حتى من الموت.
أركاديوس دوريس .. (ملاطفاً) سيبك من المسيح بتاعك ده وتعالى.
دوريس أركاديوس .. أرجوك سيبنى .. أو بلغ عنى مولاك ديسقوروس أنا نفسى أحصّل مولاتى بربارة.
أركاديوس كده .. طيب .. حتحصليها يا دوريس .. حتحصليها.. (يخرج)
دوريس اسندها يا إلهي .. ساعدها يا يسوع .. كمل جهادها .. يارب متحرمنيش من إنى آخد إكليلي معاها .. أرجوك يارب .. عايزة إكليل معاها .. عايزة إكليل معاها .. عايزة إكليل معاها.. (ترنيمة) (بلاكة)
(إضاءة) على المسرح أركاديوس والجاريتان
أركاديوس يعنى الحكاية طولت
إلكترا أنا مش فاهمة إزاى بنت رقيقة زى بربارة تقدر تستحمل أكتر من أسبوع وهيّه مربوطة فى قمة البرج لا أكل ولا شرب.
أركاديوس إزاى مستحملة برد الليل.
يوليانة أكيد سحر .. أكيد البنت دوريس علملتها سحر فمش حاسة بحاجة.
أركاديوس (بحدة) .. دوريس مش ساحرة
يوليانة مفيش فايدة أبداً يا أركاديوس .. مش عايز تنسى البنت دى؟!
أركاديوس مش حتكون لغيرى أبداً مهما حصل .. أنا الأقوى وبدراعى ده حاخد اللى عاوزة.
إلكترا هه .. انت الأقوى .. يمكن تكون قوى .. يمكن تكون أقوى راجل فى نيقوميديا .. لكن متنساش إنك عبد.
يوليانة وسيدك مهما كان ضعيف يقدر يعمل فيك كل اللى هو عايزه ..
إلكترا والقانون يديله الحق ده.
يوليانة عيل صغير ممكن يجلدك يا قوى .. وفى ساعة غضب ممكن يحكم عليك بالموت.
إلكترا أنت بالنسبة له رخيص .. لأنه ممكن يشترى غيرك.
يوليانة هوه السيد وأنت العبد .. أنت بالنسبة له بكل قوتك .. زى الحصان اللي بيجر عربيته ..
إلكترا ولو زالت قوتك أو تعبت، تفتكر إنه حيساعدك .. حيرميك بره ويشترى واحد تانى .. علشان كده لازم تساعدنا .. لإن مصلحتنا واحدة.
أركاديوس بس كفاية .. كفاية
ديسقوروس (يدخل) أنت هنا يا أركاديوس .. مفيش مرة آجى ألاقيك مكانك .. أنا بأدفعلك الدهب ده كله وعاملك قيمة وكرامة عشان تقف تتسامر مع الجواري ..
أركاديوس يامولاى أنا شايف شغلى كويس وبعمل اللي عليا.
ديسقوروس إيه .. هيه حصلت ترد عليا .. أنت نسيت نفسك ولا إيه .. إنت عارف لو حاكمتك على إنك عبد عاصي حيحصلك إيه؟! .. طيب .. أنا حعرفك مقامك كويس بس أخلص من حكاية المصلوب دى .. (يلتفت إلي الجواري) .. لسه برضه مصممة على رأيها.
يوليانة لسه يامولاي.
ديسقوروس فكوها وهاتوها هنا .. استنوا .. أنا طالع معاكم .. عايز أشوفها وهى بتتعذب. (يخرج مع الجاريتان)
دوريس (تدخل حزينة وهى تتابع ببصرها مكان خروج ديسقوروس والجواري)
أركاديوس دوريس
دوريس عايز إيه ..
أركاديوس (متودداً) مش حتسيبك من المصلوب ده وترجعيلى؟.
دوريس أرجع للعبودية تانى
أركاديوس العبودية .. إنتى نسيتى إنك جارية ولا إيه؟! .. زى ما أنا عبد.
دوريس أبداً أبداً .. أنا حرة.
أركاديوس حره ؟ !
دوريس صدقنى يا أركاديوس .. (موسيقى) .. المسيح مات علشانى وعشانك .. ولو تبعته حتشعر بالحرية .. حبه كبير حيملا حياتك .. وصاياه سهله .. كلامه جميل حيشبعك .. لا أعود أسميكم عبيداً بل أحباء .. لأنكم اشتريتم بثمن فلا تصيروا عبيداً للناس (1كو7: ) .. حيث روح الرب هناك الحرية (2كو3:17) .. لا أتركك لا أهملك .. إن نسيت الأم رضيعها أنا لا أنساكم .. محبة أبدية أحببتك من أجل ذلك أدمت لك الرحمة .. تعالوا إلي يا جميع المتعبين وثقيلي الأحمال وأنا أريحكم..
أركاديوس (مقاطعاً) كلام كلام كلام .. كله كلام .. لكن مفيش إله يقدر يعمل كده .. إنما راحتنا وحريتنا إحنا اللي نقدر نعملها بإيدنا.
دوريس جرب يا أركاديوس .. أطلبه فى وقت شدتك .. جرب وأنت حتعرف بنفسك.
أركاديوس طول عمر الآلهة بتاخد تعبنا وعرقنا .. وما بتديناش حاجة .. اشمعنى إلهك إنتى هو اللى حيكون مختلف
دوريس (تقطع حديثه عندما تشاهد ديسقوروس يدخل ويجر برباره ) مولاتي (تجرى نحوها) .. مولاتى بربارة .. حرام عليك يامولاي دى بنتك.
ديسقوروس اخرسي .. أنا حأقتلك معاها ..
يوليانة يا مولاتي ارحمي نفسك واسمعي كلام مولانا ديسقوروس .. ده أبوكى وبيحبك ويهمه مصلحتك أكتر من أي حد تاني
برباره مش ممكن أرجع للضلمه والحيرة تانى .. إلهي هو يسوع مهما حصل ..
ديسقوروس إلهك هو اللي يقول عليه الملك إنه إله.
برباره إلهى هو يسوع اللى فدانى .. اللى خلقنى وخلق الكون كله.
ديسقوروس كده .. أركاديوس
أركاديوس مولاي
ديسقوروس ابعت معايا أقوى اتنين من حراسنا يجلدوا بربارة فى ساحة المدينة .. وأنا حأجرها بإيدى لحد قصر الوالي.
أركاديوس أمر مولاي..
ديسقوروس تعالي .. (يسحب بربارة من شعرها ويخرج بها من الصالة وسط الجمهور، بينما يقوم الحارسان بجلدها) (تدخل ترنيمة) (هيا يا آلام) أو تلحن الأبيات التالية:-
هاج الشيطان ساد الظلام وانتشر
سرق الحنان من قلوبكم يابشر .
اصحوا ياناس اصحوا ياعالم يابشر .
(عندما يغيب موكب برباره تدخل موسيقى هادئة تناسب موقف تردد أركاديوس فى قبوله الإيمان)
أركاديوس مش حيأس يا دوريس .. ومش حتكونى لغيري.
دوريس (صوت) .. أنا ملك إلهي .. ومش حكون لحد تاني.
أركاديوس ضحكوا عليكى بكلام فارغ عشان يبعدوكى عنى .. لكن أنا مش حسيبك، حأخلصك من سحر المصلوب وأتباعه .. حأخدك غصب عنهم وغصب عن ديسقوروس .. ديسقوروس .. حتى ديسقوروس حيجى يوم وأتخلص منه، وأبقى سيد نفسى .. لكن إزاى .. إزاى.
يوليانة متنساش إنك عبد.
إلكترا مهما كان سيدك ضعيف يقدر يعمل فيك اللى هو عاوزه
دوريس لا أعود أسميكم عبيداً بل أحباء.
يوليانة فى ساعة غضب ممكن يحكم عليك بالموت.
دوريس المسيح مات علشانك وعشانى.
يوليانة إنت بالنسبة له رخيص .. بفلوسه ممكن يشترى غيرك
بول لأنكم اشتريتم بثمن فلا تصيروا عبيداً للناس (1كو7: )
إلكترا سيدك مهما كان ضعيف يقدر يعمل فيك الله هو عاوزه .. لإنك ملكه
دوريس حيث روح الرب هناك الحرية (2كو3:17)
يوليانة لو زالت قوتك أو تعبت .. حيرميك بره ويشترى غيرك
دوريس لا أتركك لا أهملك .. إن نسيت الأم رضيعها أنا لا أنساكم ..
أركاديوس كفايه .. كفايه حرام عليكم .. أنا تعبان .. أنا تعبان يا دوريس ..
دوريس تعالو إلى ياجميع المتعبين وثقيلي الأحمال وأنا أريحكم.
أركاديوس أروحله.. أروحله إزاي وفين .. هو فين إلهك ده .. فى أنهو معبد .. فين تمثاله..
(تتغير الإضاءة والموسيقى لتناسب حضور السيد المسيح)
السيد المسيح أركاديوس .. أركاديوس .. لا تبحث عنى بعيداً أنا هنا معك .. وبداخلك
أركاديوس (فزع) هه .. مين .. إنت مين .. انت فين؟!
السيد المسيح أنا يسوع الذى أنت تضطهده
أركاديوس إنت إله برباره و دوريس ؟ .. إنت اللي حتقدر تمنحنى الحرية..
السيد المسيح إن حرركم الابن فبالحقيقة تكون حراً.
أركاديوس إنت اللي حتقدر تدينى السلام؟
السيد المسيح أنا هو ملك السلام .. سلامي أعطيك .. سلامي أترك لك.
أركاديوس إنت إله عظيم .. مفيش إله شفته بالبهاء والقوة دى .. أنا أؤمن أنك الإله الحي الحقيقى والوحيد .. أنت إلهى وأنا عبدك .. عبدك وحدك .. أنا ملك إيدك .. تأمرني فأطيعك .. أقترب إليك فتعطينى الراحة والسلام والفرح.
السيد المسيح اتبعنى يا أركاديوس .. اشهد باسمي أمام الوالي .. اتبعني يا أركاديوس .. اتبعنى يا أركاديوس .. اتبعنى يا أركاديوس (يغيب منظر السيد المسيح)
أركاديوس حأ
