بسم الاب والابن والروح القدس اله واحد امين
مسرحية
امراة غلبت رجال
عن قصة القديسة اليهودية
حسنة
مثال الطهارة والعفة
- المسرحية ماخوذة غن قصة تاريخية اجتماعية تمت احداثها فى العصر اليهودى قبل ظهور المسيحية لقديسة يهودية اسمها حسنة جاهدت بكل طاقتها للحفاظ على طهارتها وكان نصيبها ان لاقت متاعب وضيقات كثيرة الا انها فى النهاية نالت مجد وكرامة عظيمة.
- ونرى ايضا فى القصة كيف ان فى العالم سيكون لنا ضيق ولكن ثقتنا فى الله وايماننا به تجعلنا نتغلب على جميع الضيقات.
- وفى القصة ايضا اظهار انه وان بدا الشر قد ساد وانتصر وتعاظم الا ان الخير لابد فى النهاية ان يظهر ويغلب.
مراجع المسرحية :- بستان القديسات الجزء 2 اصدار مطرانية جرجا مراجعة نيافة الانبا مينا قاموس اباء الكنيسة وقديسيها حرف الحاء القمص تادرس يعقوب ملطى انظر ايضا المواقع التالية :-
http://www.st-mina.com/main/Coptic-Stories/saint/840.asp
http://popekirillos.net/ar/fathersdictionary/read.php?id=862
مع ملاحظة انه قد تم تغيير بعض المواقف لتناسب ظروف العرض داخل الكنيسة .
المشهد الاول
1- الحكم على حسنة بالرجم
تعليق الراوى قبل بداية المشهد:-
- حكايتنا النهارده حكاية قديسة عاشت فى العهد القديم حسنة هو اسمها والجمال فى رسمها وفى الطهارة مثل عظيم.
- قديستنا قديسة يهودية...قبل المسيح...قبل ظهور المسيحية.
- زوجها كان تاجر بيسافر بعيد...علشان امواله وتجارته تكبر وتزيد.
- سافرفى يوم ...والعمر فات... طال غيابه...قالوا ده مات.
- اخو زوجها كان فكره شرير ...اشتهى حسنه ودبر لها امر خطير.
-اما ان تفعل معه الشر او انه يحول حياتها مر.
-وبكل اصرار رفضت العفيفة وكانت للشرير صدمه عنيفة.
- قرر بعدها ان ينتقم...راح للقاضى...ولمراة اخوة يتهم.
- خد معاه شهود زور...وعلى القاضى راح يلف ويدور.
- اتهموا حسنه العفيفة بالزنا...وقالوا الخاين مالهوش مكان وسطنا.
- وصدق القاضى الكلام اللى اتقال وحكم على حسنة بلرجم فى الحال.
*الشخصيات فى المشهد الاول:- قاضى+القديسة+اخو زوجها+2شهود.
(يدخل القاضى وخلفه حسنة واخو زوجها).
القاضى:- فين المتهم وايه تهمته ؟
اخو الزوج:- يا سعادة القاضى ..الست دى..مسكناها فى خطية زنا.
حسنة:- انا..حرام عليك.
القاضى:- استنى لما يجى دورك فى الكلام.
وانت اسمك ايه؟ وتعرف المتهمة منين ؟
اخو الزوج:- انا اسمى اسحق وبكل اسف ابقى اخو زوجها.
القاضى:- اخو زوجها..وفين المتهم معاها بالخطية.
اخو الزوج:- ده كان عبد من العبيد فى البيت وهرب.
القاضى:- وانت قاعد مع المتهمة فى نفس البيت ؟
اخو الزوج:- ايوه يا سعادة القاضى..انا قاعد انا واخويا فى بيت واحد ..اخويا سافر للتجاره وساب مراته دى امانة فى رقبتى.
القاضى:- يعنى انت بتتهم مراة اخوك بالزنا.
حسنة :- بريئة يا حضرة القاضى ..واحلف باسم رب المجد بريئة.
القاضى :- قلتلك استنى لما يجى دورك فى الكلام.(ويوجه كلامه لاسحق) انت عارف ايه معنى كلامك ده . حسب شريعتنا اليهودية ..وحسب تشريع الله فى اسفار موسى.. الحكم على مراة اخوك هيكون الرجم .
اخو الزوج:- عارف يا سعادة القاضى ..وانا جاى مخصوص علشان كده.. اقصد يعنى علشان ربنا ميغضبش علينا.. ومتاكد من الكلام اللى باقوله.
القاضى :- طيب نسمع دفاع المتهمة عن الكلام ده ..
حسنة :- بريئة ياسعادة القاضى ..وخالق السما والارض بريئة.
القاضى :- اسمك ايه ؟ وزوجك فين ؟
حسنة :- انا اسمى حسنة ..وزوجى بيسافر بلاد بعيدة علشان التجارة ..ومن 3 سنين سافر ومرجعش ..ومفيش اى اخبار عنه ..ومن شهر جانى اخو زوجى ده وقالى ان زوجى مات ومفيش امل من رجوعه.
اخو الزوج :- كدابة يا حضرة القاضى .
القاضى :- استنى انت ....كملى.
حسنة :- بعديها جه قاللى ..يا حسنة دلوقتى زوجك مات يعنى مينفعش تقعدى وحدك فى البيت كده ..وعرض علي الزواج .وانا رفضت وقلتله انا واثقه ان زوجى عايش وهيرجع ومش ممكن اكون لحد غيره .
اخو الزوج :- بتكذب يا حضرة القاضى بتكذب .
القاضى :- قلتلك استنى ... وبعدين .
حسنة :- ولما فشلت حيلته ..حاول يعمل معايا الخطية لكن انا رفضت وهربت منه .. وجاى دلوقتى يتهمنى بالزنا علشان يخلص منى .. انا مظلومة يا حضرة القاضى مظلومة.
اخو الزوج:- دى كدابة يا حضرة القاضى .. ما هي لازم تقول كده علشان تدافع عن نفسها بعد ما سوأت سمعتنا وسمعة اخويا فى البلد كلها .. دى لازم تموت يا حضرة القاضى.. لازم.
القاضى :- وايه اللى يضمنلى ان انت برضه مش كذاب ؟
اخو الزوج :- احلف يا حضرة القاضى .
القاضى :- مش كفاية ممكن تحلف كدب.
اخو الزوج :- طيب عندى شاهد على كلامى .
القاضى :- نسمع كلام الشاهد وبعدين نحكم.. هات الشاهد بتاعك نسمع هيقول ايه .
+يخرج اسحق ليحضر الشاهد وفى اثناء ذلك تقول حسنة بصوت منخفض مظلومة يا حضرة القاضى والقاضى لا يرد عليها+
+يدخل اسحق ومعه الشاهد الاول .
القاضى :- انت تعرف الست دى والراجل ده .
الشاهد1 :- ايوه يا حضرة القاضى الست دى حسنة مراة ابراهيم التاجر وده اسحق اخو زوجها تاجر معروف وبنتعامل معاه فى التجارة.
حسنة :- انا معرفوش يا حضرة القاضى.. دى اول مرة اشوفه.
(يرفع القاضى يده لحسنة بما معناه ان تسكت)
القاضى :- قبل ما تقول الشهادة بتاعتك عارف عقوبةشهادةالزور ايه ؟
الشاهد :- عارف يا حضرة القاضى.
القاضى :- لو ثبت ان الشهادة زور ينطبق عليك نفس الحكم اللى ينطبق على المتهم ..احلف باسم رب الجنود قبل ما تقول الشهادة .
الشاهد1:- بأسم رب الجنود خالق السماء والارض اقول الحق... انا شفت حسنة اما تعمل الخطية مع واحد من العبيد .
حسنة :- (بصوت عالى) محصلش .
القاضى :- وشفت الكلام ده فين ؟
الشاهد1 :- فى بيتها يا سعادة القاضى .
القاضى :- وانت ايه اللى وداك بيتها ؟
الشاهد1 :- انا كنت رايح لاسحق اخو زوجها ده علشان اديله باقى فلوس التجارة .
القاضى :- وراح فين العبد ده ؟
الشاهد1 :- هرب يا سعادة القاضى .
اخو الزوج :- صدقت كلامى ياسعادة القاضى ..دى لازم تموت علشان نخلص من عارها .
القاضى :- ايوه ..بس الشريعة بتقول "لا يقوم شامد واحد على انسان فى ذنب اوخطية ,على فم شاهدين او ثلاثة يقوم الامر .
اخو الزوج :- عندى شاهد تانى .
القاضى :- هاته نسمع شهادته .
+يخرج اسحق ليحضر الشاهد الثانى وفى اثناء ذلك تقول حسنة للقاضى: مفيش حاجة من دى حصلت... انا مظلومة يا حضرة القاضى ... والقاضى لا يرد .
+يدخل اسحق والشاهد الثانى
القاضى :- احلف بأسم رب الجنود انك تقول الحق .
الشاهد2 :- بأسم رب الجنود اقول الحق ... انا شفت حسنة دى وهى اما تعمل الخطية مع واحد من العبيد .
القاضى ::- وشفت فين الكلام ده ؟
الشاهد2 :- فى بيتها يا سعادة القاضى .
القاضى :- وكنت فى بيتها بتعمل ايه ؟
الشاهد2 :- انا كنت رايح لاسحق اخو زوجها ده علشان اديله باقى فلوس التجارة .
القاضى :- انت كمان !!! والعبد راح فين ؟
الشاهد2 :- رب يا سعادة القاضى .
القاضى :- (يوجه كلامه لحسنة ) اية رايك فى كلام الشهود
حسنة :- مفيش حاجة حصلي من دى ...وانا معرفش مين دول .اول مرة اشوفهم ...والحقيقة انا قلتها يا سعادة القاضى .
القاضى :- عندك شهود على كلامك ؟
حسنة :- شهود .....الشاهد هو ربنا .
القاضى :- يبقى خلاص الشريعة بتقول على فم شاهدين او ثلاثة يقوم الامر ..
حسنة :- مظلومة يا حضرة القاضى ...مظلومة
القاضى :- ده شرع ربنا ... والل معندهوش ظلم .
اخو الزوج:- الخاين لازم يموت (بصوت عالى)
القاضى :- (بصوت عالى) حسب ديانتنا اليهودية .. وحسب تشريع الله فى كتابه ..وكما جاء فى سفر التثنية"اذا وجد رجل مضجع مع امراة زوجة بعل فانه يقتل الاثنان الرجل والمراة ...تخرجوها الى باب المدينة وترجموها فتنزع الشر من اسرائيل " ..وحسب كلام الشهود احكم انا قاضى البلاد على حسنة بالرجم .
حسنة :- مظلومة يا حضرة القاضى ..مظلومة يا ناس ..مظلومة.
القاضى :- تاخدوها بره البلد ويجتمع كل الناس وترجموها وترموا جثتها للكلاب تاكلها ..لانها صارت نجسه وسط شعب الله .
حسنة :-حرام ...حرام... مظلومة .
يخرج القاضى ويجر اسحق حسنة ويخرج ورائه .ويبقى على المسرح الشاهدان .
الشاهد1 :- تفتكر اللى عملناه ده حرام .
الشاهد2 :- ياعمى بلا حرام بلا حلال ...اهم حاجة الفلوس .
الشاهد1 :- حسنة دى كانت طاهرة وعفيفة والناس كلها عارفة اخلاقها وسلوكها .
الشاهد2 :- ياعمى واحنا مالنا ... احنا عبيد المامور ..اخو زوجها عايز كدة احنا مالنا ؟
(يدخل اخو الزوج وهو مبسوط )
اخو الزوج :- يا سلام ..برافو عليكم .
الشاهد1 :- عجبناك ؟
اخو الزوج :- ده انتوا كنتوا ممتازين ..مثلتوا الدور تمام ده انا كنت خلاص هاصدق الحكاية .
الشاهد2 :- ايدك بقى على الفلوس .
اخو الزوج :- خد يا سيدى (وهو يخرجله بعض الاومال).
الشاهد2 :- لا يا حلو شخلل جيبك ..ده احنا لو كنا اتكشفنا كان زمانا بنترجم مكانها .
اخو الزوج :- خد ياسيدى مش خسارة فيكم .
الشاهد1 :- ممكن اسأل سؤال ؟ هو انت ليه عملت فيها كده ؟
اخو الزوج :- اصلها مبتسمعش الكلام ...عاملالى فيها طاهرة وشريفة حاولت معاها بكل الطرق ومش نافع ..ورفضتنى انا يبقى تستاهل ولا لا .
الشاهد :- طبعا تستاهل .
اخو الزوج :- طيب يللا بينا نتفرج عليهم وهم بيرجموها .
ويخرج الجميع ....................ستارة
=====================================
المشهد الثانى
حياة حسنة الجديدة
تعليق :-
- وطلع اهل البلد كلها يرجموا حسنة لحد لما سال دمها
- ولما كان داخل عليهم يوم السبت استعجلوا فى رجم القديسة .
- وتركوها بين حية وميتة وقالوا نسيبها للكلاب والدياب والطيور الجارحة تخلص منها .
- لكن الله الذى عيناه تخترقان الظلام ..كان شايف حسنة وحاسس بالامها وظلمها.
- ودبر صانع الخيرات .. يمر عليها راجل اعرابى عايش فى بلد جنب بلدها .
- شاف حسنة قرب منها لقيها لسة عايشة اتحنن عليها وخدها عنده يداويها .
- وكتب ربنا لحسنة عمر جديد وعاشت عند الرجل د تشتغل خدامة .
- لكن مراة الرجل ده مكانتش بتحب حسنة وحصل بينهم مشاكل كتير .
تعالوا نشوف اي اللى حصل مع قديستنا .
يدخل الرجل الاعرابى وزوجته والخدامة
الزوجة :- خدى يا بت مفتاح الاوضة بتاعتى ...عايزاكى تنضفيها كويس ...وهتلاقى تمثال دهب كبير عايزاكى تلمعيه وتوضبي وتحطيه مكانه . بلا بسرعة .
الخدامة :-حاضر يا ستى (وتخرج)
الزوجة :- بت يا حسنة ..انتى يا بت . (بصوت عالى)
حسنة :- ايوه .. نعم يا ستى .
الزوجة انت يا بت طرشة مبتسمعيش ..انا مش اما انده عليكى من بدرى ..
حسنة :- ابدا يا ستى ...انا اول ما سمعت جيت على طول .
الزوجة :- وكمان بتقاوحى ..طيب ...تروحى دلوقتى توكلى الغنم وتسقى المواشى ..وتكنسى الزريبة ..وترجعى تكملى الغسيل وتكنسى البيت .. وتغسلى الاطباق وتجهزى الاكل يللا بسرعة مستنية ايه .
حسنة :- حاضر يا ستى (وتخرج).
الزوج :- يا شيخة حرام عليكى انتى عايزة تموتى البت .
الزوجة :- ما هو شوف البت حسنة دى مش نازلالى من زور من ساعة ما انت جبتها وانا مش مستريحالها .
الزوج :- حرام عليكى ..دى بنت اخر احترام واخر ادب واخلاق ومن ساعة ما دخلت البيت وهى مش مخلياكى محتاجة حاجة ،وشايلاكى على كفوف الراحة . عمرنا ما شفناها طلعت كلمة وحشة او عملت حاجة غلط زى باقى الخدامين .
الزوجة :- اهى مش عجبانى كده وخلاص ..اللى ما عارفالها اصل ولا فصل ولا عارفة انت جبتها منين !
الزوج :- ماانا حكيتلك الحكاية بدل المرة عشرين ومعذلك احكيا للمرة الواحد والعشرين ..كان ياما كان فى يوم من الايام وانا مروح من الغيط ومعايا البمواشى والاغنام بصيت على اول البلد اللى جنبنا لقيت البت يا حبة عينى مرمية على الطريق وغرقانة فى دمها ..تبصيلها يصعب عليكى .
الزوجة :- (بتريقة) اسمالله !!
الزوج :-فكرتها ميتة قربت منها لقيت لسة فيها النفس ولقيتها بتقولى اعمل معروف خدنى وداوينى وانا اعيش لك خدامة طول عمرى ...انا قلت ميضرش خدامة ببلاش ..غلطت انا ؟
الزوجة :-(بتريقة) لا عداك العيب !!فكرك يعنى الحكاية دى هتخيل على .
الزوج :- انا قلتلك اللى حصلعايزة تصدقى صدقى مش عايزة يبقى انت حرة .
الزوجة :- ما هو بالعقل كدة واحدة زى دى مرمية فى الشارع وغرقانة فى دمها ..لازم يكون فى الموضوع سر .
الزوج :- ما انا قلتلك قبل كدة ان القاضى بتاع البلد امر انها تترجم واهل البلد اللى رجموها ..فكروها ماتت سبوها مرمية للكلاب تنهش فى لحمها ..وى كان لسة فيها النفس .
الزوجة :- والقاضى يامر برجمها ليه اكيد عملت عملة منيلة بنيلة .
الزوج :- حرام عليكى متظنيش فى البت البت عمرنا ما شونا منها حاجة وحشة ...امانة وادب واخلاق .
الزوجة :- بلا ادب بلا اخلاق .. انا بصراحة مش عايزاها فى البيت وخلاص .
الزوج :- قولى ان انت غيرانة منها !!
الزوجة :- انا اغير من واحدة خدامة زى دى ... ليه هي احسن منى ...قول ان انت ميال ليها وبتلف وتدور عليها .
الزوج :- يا ولية حرام عليكى ...دى زى بنتى .
الزوجة :- ياانا يا هي فى البيت ده .. اختارلك حل من الاتنين .
الزوج :- للدرجة دى !! انا نفسى تمسكى عليها غلطة .
+تدخل الخادمة مسرعة .
الخادمة :- ستى يا ستى .
الزوجة :- فيه ايه يابت انت كمان .
الخادمة :- التمثال الدهب يا ستى .
الزوجة :- ماله يا بت .
الخادمة :- مش فى مكانة يا ستى .
الزوجة :- نهارك اسود ...تروحى تقلبى الدنيا عليه .
الخادمة :- ماانا لقيته يا ستى .
الزوجة :- ولما انتى لقيتيه يا مقصوفة الرقبة جاية وعاملة الهيصه دى ليه .
الخادمة :- اصل انا ملقيتهوش فى الاوضة يا ستى .
الزوجة :- ملقيتهوش فى الاوضة .. امال لقيتيه فين .
( تصمت الخادمة )
الزوجة :- متنطقى يا بت لقيتيه فين ؟
الخادمة :- مش هاقدر اقول يا ستى .
الزوجة :- ليه يا ختى ان شاء الله ؟
الخادمة :- اصل انا متعوتش افتن على حد .
الزوجة :- ماتقولى يا بت كان فين ؟
الخادمة :- كان ...كان فى اوضة حسنة يا ستى .
الزوجة :- فين ؟ فى اوضة حسنة .(توجه كلامها لزوجها ) جالك كلامى اهى طلعت حرامية كمان .
الزوج :- انت متاكدة يا بت من الكلام ده ؟
الخادمة :- ايوة يا سيدى .
الزوج :- طيب نستنى نجيب حسنة ونعرف منها الحقيقة .
الزوجة :- ولا حقيقة ولا غيره ... ان ماكنتش تطرد البت دى زى ما جبتها... انا هجيبلك خبرها ...قدامى يا بت لما نشوف المصيبة دى .(وتخرج هى والخادمة )
- يبقى الزوج بمفرده يكلم نفسه
الزوج :- حسنة مش ممكن تعمل كده انا عارفها كويس ...ده اكيد حد من الخدامين عمل معاها كده ...اعمل ايه انا دلوقتى لو خليت حسنة فى البيت مراتى ممكن تموتا ...ولو مشيتها حرام علي .ملهاش حد (ويصمت) حسنة ...يا حسنة . تحضر حسنة مسرعة .
حسنة :- تحت امرك يا سيدى .
الزوج :- صحيح يا حسنة انت اللى سرقتى التمثال .
حسنة :- تمثال !! تمثال ايه يا سيدى .
الزوج :- التمثال بتاع ستك .
حسنة :- انا يا سيدى ... ولا اعرف عنه حاجة .
الزوج :- انا عارف يا حسنة انك عمرك ما تعملى كده . وعارف كمان ان الخدامين فى البيت بيغيروا منك ...وهما اللى دبروا العملية دى علشان نطردك من البيت .
حسنة :- طيب ليه ؟ انا عمرى ما عملت معاهم حاجة وحشة .
الزوج :- انا عارف يا حسنة ... اسمعى يا حسنة ...انا ساعة ما جبتك البيت هنا ...كنت فاكر انى هاساعدك واعمل معاكى معروف ...لكن الظاهر ان قعادك هنا فيه خطورة عليكى ... لو قعدتى هنا مراتى ممكن تموتك .
حسنة :- امال اروح فين ؟ انا مليش حد فى الدنيا دى ... انا ماصدقت لقيت بيت اقعد فيه .
الزوج :- بلاد الله واسعة يا حسنة ... وربنا عمره ما بينسى حد .خدى الفلوس دى وابعدى عن البلد دى خالص دول 30 دينار تقدرى تركبى بيهم سفينة وتسافرى لاى بلد ...يالا معايا دلوقتى تلمى حاجتك قبل ما ستك تيجى ...احسن دى ناويالك على شر .
ويخرجان................................................ستارة
====================================
المشهد الثالث
احزان جديدة
تعليق :-
- وطردوا حسنة من البيت وبقت مش عارفة تعمل ايه ملهاش اهل ولا سكن ولا مال
- ولتانى مرة تحس بالظلم من غير سبب
- ولتانى مرة تحس ان ربنا تركها وان الشر عليها بيزيد .
- وفضلت حسنة ماشية حزينة ...رايحة تركب سفينة ...تاخدها ...تبعدها لمكان بعيد يكون فيه راحة وسلام .
- لكن كانت المشاكل لسة مخلصتش . وكان فى طريق حسنة مشكلة جديدة .
- تعالوا نشوف طريق الالام وصل لغاية فين .
تدخل حسنة الى المسرح بهدوء وتحدث نفسها + موسيقى حزينة .
اروح فين واجى منين ياربى دلوقتى ...مليش بيت ... مليش اهل ... مليش حد يسال علي ...اعمل ايه ياربى دلوقتى ... انا لي بيحصلى ده كله !! ... ايه الذنب اللى عملته علشان يحصلى كده... كل اللى انا عملته انى عايزه اعيش لك يارب عيشة طاهرة ... كل اللى انا عملته انى مش عايزة اغضبك فى اى حاجة ...ليه يحصلى ده ! ليه اللى يعيش معاك دايما يبقى تعبان ، وليه الشرير دايما مطمن ومرتاح البال ... انا لو كنت عملت الشر دلوقتى كان زمانى قاعدة فى بيتى متهنية بدل البهدلة الللى انا فيها دى ... لكن انا مش عايزة كدة ... انا عايزة اعيش حسب وصاياك . مش عايزاك تغضب علي فى اى شيء ... يبقى يحصل كده ! .. ليه يارب ... الى متى يارب تنسانى ... اعيش ازاى واكل منين واسكن فين كل اللى معايا 30 دينار يا دوبك يكفوا اجرة السفر . دبرها يارب انت من عندك ... انا مش هاعول الهم .انا واثقة ان انت ليك حكمة من كل اللى بيحصلى ده ... انت اللى دايما تقول " ادعونى فى يوم الضيق انقذك فتمجدنى " مفيشضيقة اكتر من كده ... دبرها يارب من عندك .. انما الله انتظرى يا نفسى لان من قبله رجائى ... هو صخرتى وخلاصى فلا اتزعزع .
(يدخل رجلان وهما يمسكان رجل مديون ويضربانه )
الرجل :- ها تدفع الفلوس اللى عليك ولا لأ .
المديون :- صدقونى مش معايا ... ارحمونى .
الرجل :- يبقى هنجلدك وبعدين نصلبك يا لص .
المديون :- آه ... حرام عليكم ... طيب ادونى فرصة تانية .
الرجل :- دى تالت فرصة يا حرامى وانت مش عايز تدفع .
+ حسنة تنظر باستغراب وتتقدم لتسأل الرجل +
حسنة :- حرام عليكم اللى بتعملوه د .
الرجل :- وانت مالك انت تحبى تتجلدى مكانه .
حسنة :- وهو عمل ايه علشان ده كله .
الرجل :- عليه فلوس ومش عايز يدفعها .
حسنة :- وعلشان خاطر الفلوس تعملوا فيه كده !!
الرجل :- ان مكانش عاجبك ادفعيم واحنا نسيبه .
حسنة :- هو عليه كام .
الرجل :- عليه 30 دينار ...(وهو يستمر فى ضربه والمديون يتألم)
حسنة :- ( تكلم نفسها ) 30 دينار دى هي اللى حيلتى .ثمن اجرة السفر لو دفعتهم مش هيبقى حيلتى ولا دينار ولا هاعرف اسافر ولا حتى اشترى رغيف عيش ... بس حرام الراجل كده هيموتوه ... انا ادفعهم وربن يدبر (توجه كلامها للرجل) خلاص .. خلاص.سبوه . انا هادفع الفلوس .
الرجل :- طلعى الفلوس الاول .
حسنة :- (تخرج الفلوس) اتفضل .
الرجل :- لولا الست الطيبة دى ...كان زمانك دلوقتى مصلوب . ثم يخرج
المديون :- (يحاول ان يقوم بصعوبة) آه ... آه ... (يتجه لحسنة ويحاول ان يقبل يدها وهي ترفض) انتى انسانه عظيمة ... انتى انقذتى حياتى من الموت ... جميلك ده دين فى رقبتى ... ربنا يساعدنى واردهلك .
حسنة :- انا معملتش حاجة ... لكن هما ليه عملوا معاك كد ه ؟
المديون :- انا تاجر عبيد ...من زمان وانا شغال الشغلانة دى ...الف البلاد اشترى العبيد وابيعهم لتجار تانى ...ودول ناس اشتريت منهم عبيد وبقيتلهم فلوس ... واتعذرت فيها . لكن انت ايه اللى يخليكى تدفعيلى فلوس وانتى متعرفينيش .
حسنة :- ربنا بيقول طوبى لمن يتعطف على المسكين فى يوم الشر ينجيه الرب ... وقال تانى سعيد هو الرجل الذى يتراءف ويقرض ... صدقنى الفلوس اللى انا دفعتهم دول كانوا اخ فلوس معايا وكنت هاسافر بيهم ... لكن انا واثقة ان ربنا هيدبر.
المديون :- يعنى انت دلوقتى معكيش ولا دينار .
حسنة :- خالص .
المديون :- امال هتسافرى ازاى ؟
حسنة :- مش عارفة ربنا يدبر ...
المديون :-(يفكر قليلا) طيب اسمعى ... صاحب السفينة ده راجل معرفة انا ممكن اكلمهلك يوديكى المكان اللى انت عايزاه من غير ما ياخد فلوس .
حسنة :- ده يبقى جميل عمرى ماهانساه ابدا .
المديون :- لأ جميل ايه ... ده جزء من الدين اللى علي .
المديون :- (يشاور لها بعيد) شايفة الراجل اللى جاى هناك ده ..
حسنة :- ايوه .
المديون :- اهه هو ده صاحب السفينة روحى انت اقعدى بعيد وسيبينى معاه اكلمه انا بمعرفتى .
حسنة :- انا مش عارفة اشكرك ازاى !
المديون :- لا تشكرينى ايه ... لا شكر على واجب (وتخرج حسنة)
المديون :-(يكلم نفسه) ده انتى باين عليكى طيبة وعلى نياتك قال اكلملها صاحب السفينة ... ده انا لازم استغل الفرصة ايوه ... الفرصة متجيش غير مرة واحدة بس ... وده رزق جانى لغاية عندى ... يعنى حرام ارفس النعمة ... البت جميلة وهادية يعنى لو اتباعت عبده هتجيب فلوس كتير ... (يدخل صاحب السفينة)
المديون :- صباح الخير يا امير .
صاحب السفينة :- خير ايه يا ابو وش فقرى ... انت بيجى من وراك خير .
المديون :- ليه بس كده يا امير ده انا حتى جايبلك رزق حلو .
صاحب السفينة :- انت بيجى منك حاجة حلوة ابدا .
المديون :- معايا حتة خدامة انما ايه 100\100 ...جمال وادب واخلاق وهادية ومطيعة .
صاحب السفينة :- وجبتها منين يا ابو وش سمح .
المديون :- دى بينى وبينك الخدامة بتاعتى ...اديلها 13 سنة بتخدم عندى ... دى طالعة من عيني والله .
صاحب السفينة :- وها تبيعها ليه يا مرزق ؟
المديون :- معذور ... وربنا ميوقعكش فى ضيقة ...قلت ايه هاتشترى ولا لأ قبل ما السفينة تطلع .
صاحبالسفينة :-مش لما اشوف البضاعة الاول ... اشوف وبعدين احكم .
المديون :- مش هينفع تشوف ؟
صاحب السفينة :- ليه ان شاء الله .
المديون :- اصل انت مش واخد بالك ... البت لو عرفت انى هابيعها مش هتتحمل الصدمة ... ويمكن تروح فيها .
صاحب السفينة :- يا سلام .
المديون :- امال ايه ! اصل انت متعرفش دى بتعزنى قد ايه ... دى 13 سنة ... يعنى عشرة عمر .
صاحب السفينة :- امال هشتريها ازاى انا دلوقتى ؟
المديون :- انا هشاورلك عليها من بعيد كده ... وبعد ما تشتريها هابقى افهمها انا بمعرفتى علشان الصدمة تبقى خفيفة عليها .
صاحب السفينة :- وهي فين ؟
المديون :- (يشاور بعيد) شايف البت اللى قاعدة هناك دى .
صاحب السفينة :- هي دى ؟ انت متاكد ... دى جميلة جدا وباين عليك انك كنت معيشها فى عز . خلاص على بركة الله ... عايز فيها كام دى .
المديون :- من الاخر كده ومن غير فصال وعشان خاطرك عايز 1000 دينار .
صاحب السفينة :- 1000 دينار !! مش كتير
المديون :- كتير ايه يا راجل يا بركة ... ده انا حتى عاملك تخفيض .
صاحب السفينة :- بينى وبينك البت تستاهل ... خد يا سيدى الالف دينار ...ياللا خليها تركب السفينة علشان هنطلع بعد شوية .
المديون :- حاضر بس سيبنى معاها شويه اودعها وافهمها بمعرفتى لحسن دى صعبانة علي قوى .
صاحب السفينة :- ماشى يا عم ... دى عشرة 13 سنة .
(يخرج صاحب السفينة وبعد قليل تدخل حسنة)
حسنة :- هه عملت ايه ؟ كلمته ؟
المديون :- ايوة طبعا كلمته ووافق على طول ... اصله ميقدرش يرفضلى طلب .
حسنة :- انا متشكره ... انا مش عارفة اقولك ايه .
المديون :- لا تقولى ولا تعملى ...انتى عملتى معايا معروف وانا عملت معروف يبقى خالصين ... شوفى يا ستى انا هامشى دلوقتى وانت هاتقعدى هنا فى السفينة دى ... السفينة هتطلع بعد شوية ... عايزك كل اللى يقولك عليه صاحب السفينة تنفذيه بالحرف الواحد ... فاهمة .
حسنة :- حاضر ... ربنا يعوضك ويديك على قد نيتك .
المديون :- مابلاش النية دى ... يالا امش انا بقى ... سلام .
حسنة :- مع الف سلامة ... يا سلام لسة الدنيا فيها ناس طيبين .... اقعد هنا استنى على ما تطلع السفينة .
(تجلس حسنة على اخر المسرح ... وبدخل صاحب السفينة وينده بصوت عال)
صاحب السفينة :- ياللا كل الركاب والعبيد يطلعوا السفينة هنطلع دلوقتى ... ياللا يا بنى انت وهو شدوا الشراع ...واضربوا النفير علشان الناس تركب (صوت النفير + امواج)
(ينظر صاحب السفينة لحسنة ويتجه نحوها فتقف)
صاحب السفينة :- ازيك يا حلوة ... اسمك ايه ؟
حسنة :- اسمى حسنة .
صاحب السفينة :- يا سلام اسم على مسمى يا ترى ابو وش سمح فهمك على كل حاجة .
حسنة :- ايوة فهمنى وقالى لازم تسمعى كلام صاحب السفينة بالحرف الواحد .
صاحب السفينة :- برافو عليكى ... انتى باين تستاهلى الفلوس اللى دفعتها فيكى .
حسنة :- فلوس !! فلوس ايه ؟
صاحب السفينة :- انت عارفة سيدك باعك بكام ؟
حسنة :- سيدى مين ؟ انا حرة مش عبدة .
صاحب السفينة :- (بصوت عالى) حرة ازاى ! ده انا دافع فيكى 1000دينار .
حسنة :- مين اللى خدهم منك .. مين اللى باعنى .
صاحب السفينة :- التاجر اللى كان معاكى ... اللى قضيتى معاه 13 سنة .
حسنة :- مش ممكن ... الراجل ده انا معرفوش ... انا اتعرفت عليه من شويه ... كان مديون ب30 دينار والتجار كانوا بيضربوا فيه ... دفعتله الفلوس ومكانش معايا غيرهم اسافر بيهم قالى متخافيش انا هاكلم صاحب السفينة علشان يوديكى البلد اللى عايزاها من غير فلوس .
صاحب السفينة :- عملها معاكى الندل ... انتى تفكى اسره وهو يبيعك عبده .
حسنة :-(تبكى) ليه يارب كده ... ليه كده ... انا قلت خلاص جه الفرج من عندك ... قوم تزود علي المصايب ... ليه يارب كده ليه ... وانا اللى عطفت عليه وفكرته طيب ... اتارى الدنيا مفهاش طيبين ... انا عملت ايه لده كله ياربى (تبكى).
صاحب السفينة :- بس كفاية يا بنتى متبكيش ... الدنيا لسه بخير ... انت من دلوقتى حرة زى ماانت وربنا يعوض علي فى فلوسى .
حسنة :- (وهى تمسح دموعها ) متشكرة يا عم .
صاحب السفينة :- لكن انتى رايحه فين يا بنتى ؟
حسنة :- اى بلد قريبة الاقى فيها لقمة عيش .
صاحب السفينة :- يعنى انت ملكيش حد تروحيله .
حسنة :- انا مقطوعة من شجرة ومليش حد خالص .
صاحب السفينة :- خلاص يا بنتى ... البلد اللى جاية دى اللى هتقف عليها السفينة تنزلى فيها ... على اول البلد هتلاقى قصر كبير فيه ست طيبة بتعطف على الغلابة والمساكين روحيلها يمكن تقدر تساعدك .
حسنة :- انا مش عارفة اشكرك ازاى ... ربنا يعوضك ويكتر رزقك .
صاحب السفينة :- ربنا يحافظ عليكى ويحميكى يا بنتى ..........................ستارة
===================================
المشهد الرابع
داخل القصر
تعليق :-
- ونزلت حسنة من السفينة تدور على صاحبة القصر يمكن تقدر تساعدها وتخفف عنها احزانها.
- ووصلت حسنة للقصر ... لكن خجلها وعزة نفسها منعتها انها تطلب احسان من حد .
- وفضلت حسنة قاعدة على باب القصر لغاية لما شافتها صاحبة القصر وطلبت تشوفها .
- وفى داخل القصر حصلت احداث عجيبة نكمل ونشوف قصة حسنة وصلت لغاية فين .
+تدخل صاحبة القصر وهى تتوكأ على عكاز وبعدها تدخل الخادمة+
استير الخادمة :- صباح الخير يا ستى ... ازاى صحتك دلوقتى ؟
صاحبة القصر :- صباح الخير يا استير ... الحمد لله ... نشكر ربنا على كل حال ... كل اللى يسمح بيه ربنا كويس ... دى تجربة بسيطة من ربنا علشان يختبر ايمانى ... انا حاسة ان ربنا سمح لي بالمرض ده علشان يختبر ايمانى ... انا حاسة ان ربنا سمح ليه بالمرض ده مخصوص علشان يعلمنى ازاى اتكل عليه هو وحده مش على حاجة تانية... اديكى شايفة انا ساكنة فى قصر كبير قد ايه وعندى اموال وخيرات ملهاش حد لكن الاموال دى منفعتنيش بحاجة ولا خففت امراضى .الحاجة الوحيدة اللى مزعلانى انى مبقتش اقدر زى الاول انزل اشوف الفقراء والالمساكين واقضى حاجتهم .
استير :- ده من ساعة ما انتى تعبتى يا ستى والفقراء والمساكين كل شوية بيجوا يسألوا عليكى .
صاحبة القصر :- فيهم الخير يا استير ... اوعى تكونى زعلتى حد منهم .
استير :- لا ابدا يا ستى ... ده حتى النهارده الصبح كان فيه مجموعة كبيرة من الفقرا على باب القصر ... والا عايزين يقابلوكى وانا اقولهم مينفعش دى تعبانة ونايمة ... ابدا .
صاحبة القصر :- وعملتى معاهم ايه .
استير :- عملت زى ما انت علمتينى بالظبط ... شفت احتياجات كل واحد ايه من اكل وشرب ولبس وخليت الخدامين يودوا الحاجات لكل بيت .
صاحبة القصر :- برافو عليكى يا استير ... اوعى تزعلى حد منهم يا استير ... وافتكرى كويس كل ما ندى اكتر كل ما ربنا يزود خيراته لينا . اللا قوليلى يا استير فيه واحدة قاعدة على باب القصر كل ما ابص من الشباك اشوفها .
استير :- ايوه يا ستى دى بنت غلبانة ... باين عليها غريبة عن البلد .
صاحبة القصر :- انا حاسة ان البنت دى وراها سر غريب .
استير :- دى مجرد شحاتة عادية .
صاحبة القصر :- الشحاتة اللى بتقولى عليها دى بتقعد الليل كله تصلى بقالها دلوقتى 3 ايام ... كل يوم اشوفها بتصلى . بقولك ايه يا استير روحى قوليلها انى انا عايزه اقابلها ... خلينا نعرف حكايتها يمكن نقدر نساعدها .
استير :- اجيبها هنا يا ستى .
صاحبة القصر :- ايوة يا استير .
استير :- حاضر يا ستى . ثم تخرج
+ تدخل استير ومعها حسنة +
استير :- اتفلضى تعالى .
صاحبة القصر :- انت اسمك ايه ؟ وايه حكايتك ؟ (تصمت حسنة) احكيلى متخافيش يمكن اقدر اساعدك. (تنظر حسنة الى استير) طيب اتفضلى انت يا استير انتى حضرى الغدا .(تخرج استير) يلا بقى احكيلى حكايتك بالتفصيل .
حسنة :-انا اسمى حسنة وحكايتى حكاية بسيطة انا انسانة عادية ... عايزة اعيش مع ربنا لكن مش لاقية مكان .
صاحبة القصر :- ربنا ملهوش مكان ... مالك السما والارض .
حسنة :- انا اقصد انى كل ما احاول اعيش مع ربنا الاقى حروب ومشاكل كتيرة من كل ناحية ... عايزة اعيش فى مكان اعبد فيه ربنا من غير مشاكل .
صاحبة القصر :- مش هتلاقى المكان ده ... لازم اللى يعيش مع ربنا هيقابله مشاكل ... لكن عناية ربنا ورعايته مش ممكن تسيبه .
حسنة :- الناس حياتها شريرة ... صعب نعيش وسطيهم من غير ما نتاثر بيهم .
صاحبة القصر :- ابونا يوسف لما كان فى مصرمكانش غيره اللى يعرف ربنا لكن قدر انه يعيش لربنا من غير ما يتاثر بحياة البشر الشريرة . وابونا لوط فى سدوم وعمورة وغيرهم كتير ... اللى عايز يعيش مع ربنا ميهموش اى شىء تانى . انت منين يا بنتى مليه اللى جابك هنا .
حسنة :- انا جاية من بلاد بعيدة ... ومليش حد يسال عنى ، وجوزى سافر واتقطعت اخباره وقالوا انه مات ... واهل بلدى رجمونى لكن ربنا انقذنى ونجانى ... ودلوقتى انا مليش مكان .
صاحبة القصر :- اعتبرى القصر ده قصرك ... انتى من النهارده واحدة من العيلة ... تقدرى تقعدى هنا وتصلى وتعيشى مع ربنا زى ما انت عايزه .
حسنة :- بس ده كتير علي .
صاحبة القصر :- ولا كتير ولا حاجة ... انا ربنا حرمنى من الخلفة .. كان نفسى يكون عندى ابن او بنت زيك الاقيه جنبى بعد ما كبرت وعجزت ... اعتبرى نفسك زى بنتى تمام .
(تبتسم حسنة وتقبل يدها )=تدخل استير .
استير :- الاكل جاهز يا ستى .
صاحبة القصر :- اكيد انتى هتموتى من الجوع ... بقالك 3 ايام معرفش بتاكلى ازاى .
حسنة :-ربنا مبينساش حد .
صاحبة القصر :-طيب ياللا ساعدينى علشان نروح نتغدى .
تتجه حسنة لتحاول ان تقيمها تحس صاحبة القصر بالم شديد...تجرى استير الخادمة نحوها بسرعة .
استير :- ستى ... ستى ... مالك يا ستى .
حسنة :- اشفيها يارب ... اشفيها يارب .
استير :- للاسف مفيش طبيب قريب ... وصحتها متتحملش السفر .
حسنة :-لأ فيه طبيب دايما قريب وهو موجود على طول .
استير :- الحقينا بيه الله يخليكى .
تقف حسنة للصلاة فى صمت +موسيقى .
ويظهر على صاحبة القصر الالم .
بعد ختام الصلاة تشعر بالشفاء وتقف بدون مساعدة.
استير :- مش ممكن ... مش معقول ... ربنا سمع صلاتك انتى قديسة عظيمة .
صاحبة القصر :- انت ربنا بيحبك ... انت بركة كبيرة يا حسنة . انتى من النهارده بنتى وقصرى واملاكى هى املاكك ... وانا هاكتبلك تعهد بكل املاكى واموالى تكون ملك ليكى بعد موتى .
حسنة :- ربنا يديكى الصحة ويطول عمرك .
صاحبة القصر :- ودلوقتى يللا نتغدى وتحكيلنا حكايتك بالتفصيل .
ويخرج الجميع....................................................ستارة
========================================
المشهد الخامس
رجوع الغائب
- وفعلا كتبت صاحبة القصر كل املاكها لحسنة .
- وماتت صاحبة القصر واصبحت حسنة تملك كل الاموال والاملاك بعد ما كانت مش لاقية مكان يآويها .
- واشتهرت حسنة بحبها للفقراء والمساكين .
- وعلشان حبها لربنا وطاعتها ليه . اداها ربنا موهبة الشفاء .وصنع المعجزات .
- وكان قصر حسنة مقصد لكل مريض وتعبان علشان تصليله القديسة ويخف فى الحال .
- وتمر الايام وتشتهر حسنة فى كل البلاد بانها القديسة اللى بتعمل المعجزات .
- وتمر الايام ... ويرجع زوجها من السفر زوجها اللى غيابه طال وقالوا عليه ده مات .
- رجع بيته يدور على حسنة ملقيش حسنة ولقى اخوه اصبح ضرير وكانت الصدمة .
تعالوا نشوف ايه اللى حصل
يدخل ابراهيم زوج القديسة يحمل احمالا تشير الى انه اتى من سفر .
زوج القديسة :- حسنة ... يل حسنة ... يا زوجتى العزيزة . انا رجعت يا حسنة (ينزل الاحمال عن ظهره) ياه 5 سنين ... 5 سنين مشفتش فيهم البيت ده . مشفتش مراتى واخويا ...كان لازم اسافر علشان لقمة العيش ... الحياة بفيت صعبة والبلد هنا مفيهاش رزق ... صحيح انا طولت فى غيابى شوية ... لكن اعمل ايه لازم كده علشان اضمن عيشة كويسة انا ومراتى ... وباذن الله دى تكون اخر سفرية لي . - الله هو مفيش حد منهم هنا ولا ايه ... لا حسنة ولا اخويا اسحق ... لما اروح اشوفهم راحوا فين .
يخرج وهو ينادى يا حسنة يا اسحق يا اخويا
"يدخل بعده اخو الزوج "اسحق" بعد ان صار كفيف"
اخو الزوج :- ايه اللى انا سامعه ده ... مش ممكن ... معقولة يكون هو ... لأ لأ لأ مش هو ... انا باين لى بخرف ... لأ بخرف ازاى ده هو ... معقولة دى ... اخويا رجع ... بعد 5 سنين واحنا اللى كنا فاكرينه مات او مش هيرجع تانى ... صحيح مسير الحى يتلاقى ... بس انا هاعمل ايه دلوقتى لو سالنى حسنة فين هاقوله ايه ... افهمه ازاى ... مش هيصدق كلامى ... ده لو عرف الحقيقة ممكن يموتنى ... انا استاهل كل اللى يجرالى ... ربنا عمانى علشان ذنب المسكينة اللى رجمناها ... اعمل ايه يارب دلوقتى .
يدخل ابراهيم وهو يتجه نحو اخوه الكفيف ليقبله
زوج القديسة :- اخويا حبيبى انت كنت فين انا بادور عليك من بدرى .
اخو الزوج :- اهلا يا خويا حمدا لله على سلامتك ... ايه الغيبة الطويلة دى .
زوج القديسة :- (بعد ان تنبه الى ان اخوه صار اعمى) ايه ده يا خويا مالها عينيك .
اخو الزوج :- دى تجربة من عند ربنا ... ربنا اخد بصرى .
زوج القديسة :- ازاى ده ... مش ممكن ... من امتى الكلام ده .
اخو الزوج :- من سنتين .
زوج القديسة :- متخافش يا خويا انا جاى ومعاى فلوس كتير وهاوديك عند اعظم الاطباء ... وهترجع تشوف تانى .
اخو الزوج :- متتعبش نفسك ... كل الاطباء قالوا مفيش امل .زوج القديسة :- مفيش امل ازاى ... مش ممكن ... انت لازم تشوف . (يصمت قليلا) طب اسمع ... وانا جاى فى السفينة سمعت ناس كانت بتتكلم عن واحدة قديسة ساكنة فى قصر فى بلد جنبينا ... قالوا عليها انها بتعمل معجزاتعظيمة والناس كلها بتطلب صلواتها ... ايه رايك لو آخدك اوديك عندها ... وربنا يشفيك بصلواتها .
اخو الزوج :- ياريت يا خويا ... ده يبقى جميل مش هانساه طول عمرى .
زوج القديسة :- عيب تقول كده يا اسحق يا اخويا ... جميل ايه ... انت متعرفش معزتك عندى قد ايه ... ده كفاية ان انت 5 سنين كاملة متحمل مسؤلية البيت ومسؤلية مراتى حسنة ... امال فين حسنة ... راحت فين .
اخو الزوج :- حسنة .
زوج القديسة :- ايه فيه ايه مالها حسنة ... انت فيه حاجة مخبيها علي ؟
اخو الزوج :- بصراحة يا خويا انا مش عارف اقولك ايه .
زوج القديسة :- ما تقول فيه ايه ... مالها حسنة ؟
اخو الزوج :- حسنة خدت جزاءها .
زوج القديسة :- يعنى ايه خدت جزاءها .
اخو الزوج :- انا عارف انها صدمة عليك لما تعرف ... لكن لازم تعرف .
زوج القديسة :- (بنرفزة) قول .
اخو الزوج :- بصراحة احنا مسكنا حسنة فى خطية زنا .
زوج القديسة :- مستحيل ... حسنة ... مش ممكن ... دى مراتى وانا عارفها ... دى متعرفش حاجة غير ربنا والصلاة ... حتى الكلمة الوحشة مبتطلعهاش طول حياتها عبادة وصوم وعطف على المساكين ... حسنة... زنا... مستحيل .
اخو الزوج :- هو ده اللى حصل ... والقاضى ...القاضى حكم عليها بالرجم .
زوج القديسة :- (بنرفزة) رجموا حسنة ... (موسيقى حزينة) يعنى ايه خلاص البيت اتخرب ... وانا اللى ضيعت عمرى فى الغربة 5 سنين... عشان ايه ... مش عشانها وعشانى ... علشان نعيش عيشة كويسة ... خلاص ... ضاعت كل حاجة ! حسنة ... مش ممكن انت اكيد بتهزر .
اخو الزوج :- صدقنى يل خويا هو ده اللى حصل ولو مش مصدق ممكن تسال اهل البلد او تسال القاضى .
زوج القديسة :- حسنة الملاك ... تعمل كده ؟
اخو الزوج :- بس يا خويا متزعلش نفسك ... الشخص اللى يخونك ميستاهلش تزعل عليه لحظة واحدة .
زوج القديسة :- متقولش عليها كده ... انا مش مصدق ... انا عمرى ما شفت منها حاجة وحشة ... ده انا لما كنت اسافر ... كانت تفضل طول سفرى تصلى وتصوم لغاية ما ارجع .
اخو الزوج :- يا خويا متعملش فى نفسك كده ... خلاص انسى اللى فات بص لحياتك ... بص لتجارتك ...بص لبيتك .
زوج القديسة :- بيتى !! ما خلاص راح البيت ... مفيش غيرك انت اللى باقيلى فى الدنيا ... اخويا حبيبى .
( ياخده بالاحضان ويبكى + موسيقى ناى حزينة )
زوج القديسة :- انا فعلا لازم انسى ... ولازم اخد بالى من بيتى ومنك يا خويا ... انت لازم ترجع تشوف تانى ... انا لازم اعوضك عن سنين الفقر والحرمان والعار اللى انت عشت فيها ... من بكره هنسافر وهاوديك عند القديسة اللى فى القصر ده ... وهترجع تشوف تانى ... ونبدا حيلتنا من جديد ... وننسى اللى فات .
اخو الزوج :- انت فعلا اخ عظيم .
زوج القديسة :- احنا دلوقتى ملناش غير بعض ... انا مش هاسيبك ابدا .
اخو الزوج :- ياللا تعالى ارتاح من السفر ... وبكره يحلها ربنا .
زوج القديسة :- ياللا يا خويا .
ويخرجان.........................................................ستارة
========================================
المشهد السادس
ليس خفى الا ويستعلن
تعليق :-
- ليس خفى الا ويستعلن .... والشر مهما زاد و طال لازم الخير يظهر وينتصر .
- وراح ابراهيم زوج حسنة واخوه للقصر اللى فيه القديسة اللى بتعمل معجزاتوهو مش عارف انه راح يقابل مفاجاة عظيمة .
- اتقابل ابراهيم واخوه مع شخص تانى هتشوفوه هتعرفوه على طول وهتعرفوا هو جاى ليه .
- وقابلتهم القديسة وهى مغطية وشها هى شايفاهم وعرفاهم وهما مش عارفين غير انها قديسة .
- وكان لقاء مليان بمشاعر الحزن والفرح الحزن على العمر اللى فات فى الظلم والالام والفرح للعمر اللى جاى فى سعادة وسلام ...............................تعالوا نكمل .
يدخل زوج القديسة ومعه اخوه الى القصر
زوج القديسة :- تعالى يا خويا ... ادخل على مهلك ... ادينا وصلنا القصر .
اخو الزوج :- هو القصر ده .
زوج القديسة :- ايوه هوه .
اخو الزوج :- امال مفيش حد هنا ولا ايه .
زوج القديسة :- مش عارف ... لما ننده ونشوف ... يا اهل الله ياللى هنا ... يا اهل الدار .
تدخل استير الخادمة
الخادمة :- ايوة عايزين مين .
زوج القديسة :- احنا جايين من بلد بعيدة ... قالولنا ان فيه هنا واحدة قديسة ساكنة فى القصر ده ... قالوا انها بتعمل معجزات بقوة الله ... صح هو ده العنوان ولا احنا تهنا فى العنوان .
الخادمة :- لا هو العنوان مظبوط ... بس القديسة اللى انت بتقول عليها مش هتقابل حد النهارده ... لانها معتكفة فى الاوضة بتاعتها بتصلى ومش هتطلع منها خالص .
زوج القديسة :- اعملى معروف ان احنا جايين من بلد بعيدة واخويا المسكين ده فقد بصره والاطباء احتاروا فى علاجه وقالوا ان مفيش امل ... لكن احنا املنا كبير ان ربنا يتمجد على ايدين القديسة دى ويفتح عنين اخويا ... اعملى معروف قوليلها كده يمكن تحن علينا وتقابلنا .
الخادمة :- حاضر ... انا هاديلها خبر وياريت توافق ...اتفضلوا استريحوا لغاية لما اقولها .
(ثم يقعد هو واخوه على اخر المسرح)
زوج القديسة :- اقعد يا خويا اقعد ... يا سلام شايف القصر جميل ازاى ؟
اخو الزوج :- لأ مش شايف ... (ويضحك)
زوج القديسة :- بقوة رب الجنود هتشوف وهترجع احسن من الاول .
* يدخل عليهم رجل اعرج وهو نفس الرجل الذى دفعت له القديسة 30 دينار وباعها هو كعبده *.
الاعرج :- سلام .
زوج القديسة :- سلام .
الاعرج :- اللا قولى يا اخ ... امال فين القديسة اللى هنا اللى بيقولوا عليها .
زوج القديسة :- انت كمان عايزها .
الاعرج :- هو انتم برضه مستنينها .
زوج القديسة :- ايوه اخويا مريض وجايين علشان تصليله . لكن انت عرفت المكان ده ازاى .
الاعرج :- يوه ... دى سيرة القديسة على كل لسان ... والناس كلها مفيش حكاية عندها غير القديسة اللى بتعمل معجزات وقاعدة فى القصر .
زوج القديسة :- دى باين عليها قديسة عظيمة .
الاعرج :- امال هى فين .
زوج القديسة :- زمانها جايه ... اقعد استريح معانا لغاية ما تيجى .
الاعرج :- وآدى قعده (يجلس الثلاثة على اخر المسرح)
* تدخل حسنة من الناحية التانية للمسرح وتقف تكلم نفسها دون ان يراها احد من الثلاثة *
حسنة :- مين ده ... مش ممكن ... ده حلم ولا علم ... ده جوزى ابراهيم واخوه ... انا كنت واثقة انه هيرجع ... وده مين ده ... ده الراجل اللى انا اقذته وباعنى عبده ... يا ترى عرفوا حكايتى ؟ ... يا ترى عايزين منى ايه . انا هغطى وشى علشان ميعرفونيش ... لما نشوف ايه الحكاية ... (وتغطى وجهها) .
تتقدم القديسة الى منتصف المسرح فيتقدمون نحوها .
زوج القديسة :- اهلا بالقديسة العظيمة . يقبل يدها وكذلك الاعرج .
حسنة :- خير ايه اللى ممكن اقدمهولكم .
زوج القديسة :- اخويا ... اخويا ده فقد بصره والاطباء احتاروا فى علاجه ... مالوش لا طب ولا دوا ... طالبين صلواتك ربنا يتحنن عليه ويشفيه .
الاعرج :- وانا كمان رجلى دى ... مش قادر احركها خالص والاطباء قالولى علاجها الوحيد انها تتبتر عشان متأثرش على باقى جسمى ... لا عارف امشى ولا اشتغل ولا اعمل حاجة .
( تصمت القديسة والكل ينظرلها )
حسنة :- انتوا عايزين ربنا يشفيكم ؟
اخو الزوج + الاعرج :- يا ريت .
حسنة :- يبقى لازم تعترفوا .
اخو الزوج :- نعترف بايه ؟
حسنة :- تعترفوا لربنا بخطاياكم ... كل واحد فيكم عمل خطية كبيرة ... والامراض اللى عندكم دى بسبب خطاياكم ...ولما تعترفوا بيها ربنا هيسامحكم ويشفيكم .
اخو الزوج :- بس انا مش فاكر انى عملت حاجة تغضب ربنا .
حسنة :- لأ افتكر كويس ... زمان ... من 5 سنين .
اخو الزوج :- ياه ... من 5 سنين ... يعنى من ساعة ما سافرت يا ابراهيم يا خويا ... ايوه ايوه افتكرت . بس مقدرش اعترف ... مقدرش .
حسنة :- يبقى مش هتخف .
اخو الزوج :- لأ عايز اشوف .
حسنة :- يبقى لازم تعترف ... العمى اللى عندك نتيجة خطيتك ولازم تعترف .
اخو الزوج :- بس مينفعش... مينفعش اعترف واخويا موجود .
زوج القديسة :- متتكسفش يا خويا ... اعترف علشان ترجع تشوف .
اخو الزوج :- يعنى لو اعترفت هتسامحنى يا خويا .
زوج القديسة :- طبعا هسامحك .
اخو الزوج :- يعنى مش هتزعل ؟
زوج القديسة :- وانا ايه اللى هيزعلنى بس .
اخو الزوج :- طيب انا هعترف بس توعدنى انك متغضبش .
زوج القديسة :- اوعدك يا سيدى ... ياللا اعترف بقى علشان تخف .
اخو الزوج :- فاكر من 5 سنين لما انت سافرت وسبتنى فى البيت مع مراتك .
زوج القديسة :- مراتى الله يرحمها ويسامحها .
اخو الزوج :- مراتك بريئة يا خويا . (موسيقى سريعة---صدمة)
زوج القديسة :- بريئة ... ازاى ؟
اخو الزوج :- (بصوت عالى) سامحنى يارب ... سامحنى يا خويا ... لما يا خويا غيابك طال ... فهمت مراتك انك مت ومش راجع تانى وعرضت عليها الزواج لكن هي كانت امينة ليك وقالت ها ستناه العمر كله ... حاولت اعمل معاها الخطية اكتر من مرة لكنها كانت طاهره وعفيفة ... الشيطان لعب فى دماغى ... رحت خليت شهود زور يشهدوا معايا عند القاضى انهم شافوها بتعمل الخطية ... وفعلا القاضى صدقهم ورجموها .
زوج القديسة :- انت يا خويا تعمل كده ... حرام عليك ... حرام عليك .
اخو الزوج :- سامحنى يا خويا سامحنى ... سامحنى ابوس ايدك ويبكى .
زوج القديسة :- حرام عليك ... انا كنت واثق ان مراتى بريئة .
حسنة :- علشان اعترفت باللى انت عملته ... ربنا يشفيك .
اخو الزوج :- (يحرك يده امام عينه) ايه ده ... انا بشوف ... انا بشوف ... انا بشوف يا خويا ... شكرا ليكى يا قديسة يا عظيمة .
مسرحية
امراة غلبت رجال
عن قصة القديسة اليهودية
حسنة
مثال الطهارة والعفة
- المسرحية ماخوذة غن قصة تاريخية اجتماعية تمت احداثها فى العصر اليهودى قبل ظهور المسيحية لقديسة يهودية اسمها حسنة جاهدت بكل طاقتها للحفاظ على طهارتها وكان نصيبها ان لاقت متاعب وضيقات كثيرة الا انها فى النهاية نالت مجد وكرامة عظيمة.
- ونرى ايضا فى القصة كيف ان فى العالم سيكون لنا ضيق ولكن ثقتنا فى الله وايماننا به تجعلنا نتغلب على جميع الضيقات.
- وفى القصة ايضا اظهار انه وان بدا الشر قد ساد وانتصر وتعاظم الا ان الخير لابد فى النهاية ان يظهر ويغلب.
مراجع المسرحية :- بستان القديسات الجزء 2 اصدار مطرانية جرجا مراجعة نيافة الانبا مينا قاموس اباء الكنيسة وقديسيها حرف الحاء القمص تادرس يعقوب ملطى انظر ايضا المواقع التالية :-
http://www.st-mina.com/main/Coptic-Stories/saint/840.asp
http://popekirillos.net/ar/fathersdictionary/read.php?id=862
مع ملاحظة انه قد تم تغيير بعض المواقف لتناسب ظروف العرض داخل الكنيسة .
المشهد الاول
1- الحكم على حسنة بالرجم
تعليق الراوى قبل بداية المشهد:-
- حكايتنا النهارده حكاية قديسة عاشت فى العهد القديم حسنة هو اسمها والجمال فى رسمها وفى الطهارة مثل عظيم.
- قديستنا قديسة يهودية...قبل المسيح...قبل ظهور المسيحية.
- زوجها كان تاجر بيسافر بعيد...علشان امواله وتجارته تكبر وتزيد.
- سافرفى يوم ...والعمر فات... طال غيابه...قالوا ده مات.
- اخو زوجها كان فكره شرير ...اشتهى حسنه ودبر لها امر خطير.
-اما ان تفعل معه الشر او انه يحول حياتها مر.
-وبكل اصرار رفضت العفيفة وكانت للشرير صدمه عنيفة.
- قرر بعدها ان ينتقم...راح للقاضى...ولمراة اخوة يتهم.
- خد معاه شهود زور...وعلى القاضى راح يلف ويدور.
- اتهموا حسنه العفيفة بالزنا...وقالوا الخاين مالهوش مكان وسطنا.
- وصدق القاضى الكلام اللى اتقال وحكم على حسنة بلرجم فى الحال.
*الشخصيات فى المشهد الاول:- قاضى+القديسة+اخو زوجها+2شهود.
(يدخل القاضى وخلفه حسنة واخو زوجها).
القاضى:- فين المتهم وايه تهمته ؟
اخو الزوج:- يا سعادة القاضى ..الست دى..مسكناها فى خطية زنا.
حسنة:- انا..حرام عليك.
القاضى:- استنى لما يجى دورك فى الكلام.
وانت اسمك ايه؟ وتعرف المتهمة منين ؟
اخو الزوج:- انا اسمى اسحق وبكل اسف ابقى اخو زوجها.
القاضى:- اخو زوجها..وفين المتهم معاها بالخطية.
اخو الزوج:- ده كان عبد من العبيد فى البيت وهرب.
القاضى:- وانت قاعد مع المتهمة فى نفس البيت ؟
اخو الزوج:- ايوه يا سعادة القاضى..انا قاعد انا واخويا فى بيت واحد ..اخويا سافر للتجاره وساب مراته دى امانة فى رقبتى.
القاضى:- يعنى انت بتتهم مراة اخوك بالزنا.
حسنة :- بريئة يا حضرة القاضى ..واحلف باسم رب المجد بريئة.
القاضى :- قلتلك استنى لما يجى دورك فى الكلام.(ويوجه كلامه لاسحق) انت عارف ايه معنى كلامك ده . حسب شريعتنا اليهودية ..وحسب تشريع الله فى اسفار موسى.. الحكم على مراة اخوك هيكون الرجم .
اخو الزوج:- عارف يا سعادة القاضى ..وانا جاى مخصوص علشان كده.. اقصد يعنى علشان ربنا ميغضبش علينا.. ومتاكد من الكلام اللى باقوله.
القاضى :- طيب نسمع دفاع المتهمة عن الكلام ده ..
حسنة :- بريئة ياسعادة القاضى ..وخالق السما والارض بريئة.
القاضى :- اسمك ايه ؟ وزوجك فين ؟
حسنة :- انا اسمى حسنة ..وزوجى بيسافر بلاد بعيدة علشان التجارة ..ومن 3 سنين سافر ومرجعش ..ومفيش اى اخبار عنه ..ومن شهر جانى اخو زوجى ده وقالى ان زوجى مات ومفيش امل من رجوعه.
اخو الزوج :- كدابة يا حضرة القاضى .
القاضى :- استنى انت ....كملى.
حسنة :- بعديها جه قاللى ..يا حسنة دلوقتى زوجك مات يعنى مينفعش تقعدى وحدك فى البيت كده ..وعرض علي الزواج .وانا رفضت وقلتله انا واثقه ان زوجى عايش وهيرجع ومش ممكن اكون لحد غيره .
اخو الزوج :- بتكذب يا حضرة القاضى بتكذب .
القاضى :- قلتلك استنى ... وبعدين .
حسنة :- ولما فشلت حيلته ..حاول يعمل معايا الخطية لكن انا رفضت وهربت منه .. وجاى دلوقتى يتهمنى بالزنا علشان يخلص منى .. انا مظلومة يا حضرة القاضى مظلومة.
اخو الزوج:- دى كدابة يا حضرة القاضى .. ما هي لازم تقول كده علشان تدافع عن نفسها بعد ما سوأت سمعتنا وسمعة اخويا فى البلد كلها .. دى لازم تموت يا حضرة القاضى.. لازم.
القاضى :- وايه اللى يضمنلى ان انت برضه مش كذاب ؟
اخو الزوج :- احلف يا حضرة القاضى .
القاضى :- مش كفاية ممكن تحلف كدب.
اخو الزوج :- طيب عندى شاهد على كلامى .
القاضى :- نسمع كلام الشاهد وبعدين نحكم.. هات الشاهد بتاعك نسمع هيقول ايه .
+يخرج اسحق ليحضر الشاهد وفى اثناء ذلك تقول حسنة بصوت منخفض مظلومة يا حضرة القاضى والقاضى لا يرد عليها+
+يدخل اسحق ومعه الشاهد الاول .
القاضى :- انت تعرف الست دى والراجل ده .
الشاهد1 :- ايوه يا حضرة القاضى الست دى حسنة مراة ابراهيم التاجر وده اسحق اخو زوجها تاجر معروف وبنتعامل معاه فى التجارة.
حسنة :- انا معرفوش يا حضرة القاضى.. دى اول مرة اشوفه.
(يرفع القاضى يده لحسنة بما معناه ان تسكت)
القاضى :- قبل ما تقول الشهادة بتاعتك عارف عقوبةشهادةالزور ايه ؟
الشاهد :- عارف يا حضرة القاضى.
القاضى :- لو ثبت ان الشهادة زور ينطبق عليك نفس الحكم اللى ينطبق على المتهم ..احلف باسم رب الجنود قبل ما تقول الشهادة .
الشاهد1:- بأسم رب الجنود خالق السماء والارض اقول الحق... انا شفت حسنة اما تعمل الخطية مع واحد من العبيد .
حسنة :- (بصوت عالى) محصلش .
القاضى :- وشفت الكلام ده فين ؟
الشاهد1 :- فى بيتها يا سعادة القاضى .
القاضى :- وانت ايه اللى وداك بيتها ؟
الشاهد1 :- انا كنت رايح لاسحق اخو زوجها ده علشان اديله باقى فلوس التجارة .
القاضى :- وراح فين العبد ده ؟
الشاهد1 :- هرب يا سعادة القاضى .
اخو الزوج :- صدقت كلامى ياسعادة القاضى ..دى لازم تموت علشان نخلص من عارها .
القاضى :- ايوه ..بس الشريعة بتقول "لا يقوم شامد واحد على انسان فى ذنب اوخطية ,على فم شاهدين او ثلاثة يقوم الامر .
اخو الزوج :- عندى شاهد تانى .
القاضى :- هاته نسمع شهادته .
+يخرج اسحق ليحضر الشاهد الثانى وفى اثناء ذلك تقول حسنة للقاضى: مفيش حاجة من دى حصلت... انا مظلومة يا حضرة القاضى ... والقاضى لا يرد .
+يدخل اسحق والشاهد الثانى
القاضى :- احلف بأسم رب الجنود انك تقول الحق .
الشاهد2 :- بأسم رب الجنود اقول الحق ... انا شفت حسنة دى وهى اما تعمل الخطية مع واحد من العبيد .
القاضى ::- وشفت فين الكلام ده ؟
الشاهد2 :- فى بيتها يا سعادة القاضى .
القاضى :- وكنت فى بيتها بتعمل ايه ؟
الشاهد2 :- انا كنت رايح لاسحق اخو زوجها ده علشان اديله باقى فلوس التجارة .
القاضى :- انت كمان !!! والعبد راح فين ؟
الشاهد2 :- رب يا سعادة القاضى .
القاضى :- (يوجه كلامه لحسنة ) اية رايك فى كلام الشهود
حسنة :- مفيش حاجة حصلي من دى ...وانا معرفش مين دول .اول مرة اشوفهم ...والحقيقة انا قلتها يا سعادة القاضى .
القاضى :- عندك شهود على كلامك ؟
حسنة :- شهود .....الشاهد هو ربنا .
القاضى :- يبقى خلاص الشريعة بتقول على فم شاهدين او ثلاثة يقوم الامر ..
حسنة :- مظلومة يا حضرة القاضى ...مظلومة
القاضى :- ده شرع ربنا ... والل معندهوش ظلم .
اخو الزوج:- الخاين لازم يموت (بصوت عالى)
القاضى :- (بصوت عالى) حسب ديانتنا اليهودية .. وحسب تشريع الله فى كتابه ..وكما جاء فى سفر التثنية"اذا وجد رجل مضجع مع امراة زوجة بعل فانه يقتل الاثنان الرجل والمراة ...تخرجوها الى باب المدينة وترجموها فتنزع الشر من اسرائيل " ..وحسب كلام الشهود احكم انا قاضى البلاد على حسنة بالرجم .
حسنة :- مظلومة يا حضرة القاضى ..مظلومة يا ناس ..مظلومة.
القاضى :- تاخدوها بره البلد ويجتمع كل الناس وترجموها وترموا جثتها للكلاب تاكلها ..لانها صارت نجسه وسط شعب الله .
حسنة :-حرام ...حرام... مظلومة .
يخرج القاضى ويجر اسحق حسنة ويخرج ورائه .ويبقى على المسرح الشاهدان .
الشاهد1 :- تفتكر اللى عملناه ده حرام .
الشاهد2 :- ياعمى بلا حرام بلا حلال ...اهم حاجة الفلوس .
الشاهد1 :- حسنة دى كانت طاهرة وعفيفة والناس كلها عارفة اخلاقها وسلوكها .
الشاهد2 :- ياعمى واحنا مالنا ... احنا عبيد المامور ..اخو زوجها عايز كدة احنا مالنا ؟
(يدخل اخو الزوج وهو مبسوط )
اخو الزوج :- يا سلام ..برافو عليكم .
الشاهد1 :- عجبناك ؟
اخو الزوج :- ده انتوا كنتوا ممتازين ..مثلتوا الدور تمام ده انا كنت خلاص هاصدق الحكاية .
الشاهد2 :- ايدك بقى على الفلوس .
اخو الزوج :- خد يا سيدى (وهو يخرجله بعض الاومال).
الشاهد2 :- لا يا حلو شخلل جيبك ..ده احنا لو كنا اتكشفنا كان زمانا بنترجم مكانها .
اخو الزوج :- خد ياسيدى مش خسارة فيكم .
الشاهد1 :- ممكن اسأل سؤال ؟ هو انت ليه عملت فيها كده ؟
اخو الزوج :- اصلها مبتسمعش الكلام ...عاملالى فيها طاهرة وشريفة حاولت معاها بكل الطرق ومش نافع ..ورفضتنى انا يبقى تستاهل ولا لا .
الشاهد :- طبعا تستاهل .
اخو الزوج :- طيب يللا بينا نتفرج عليهم وهم بيرجموها .
ويخرج الجميع ....................ستارة
=====================================
المشهد الثانى
حياة حسنة الجديدة
تعليق :-
- وطلع اهل البلد كلها يرجموا حسنة لحد لما سال دمها
- ولما كان داخل عليهم يوم السبت استعجلوا فى رجم القديسة .
- وتركوها بين حية وميتة وقالوا نسيبها للكلاب والدياب والطيور الجارحة تخلص منها .
- لكن الله الذى عيناه تخترقان الظلام ..كان شايف حسنة وحاسس بالامها وظلمها.
- ودبر صانع الخيرات .. يمر عليها راجل اعرابى عايش فى بلد جنب بلدها .
- شاف حسنة قرب منها لقيها لسة عايشة اتحنن عليها وخدها عنده يداويها .
- وكتب ربنا لحسنة عمر جديد وعاشت عند الرجل د تشتغل خدامة .
- لكن مراة الرجل ده مكانتش بتحب حسنة وحصل بينهم مشاكل كتير .
تعالوا نشوف اي اللى حصل مع قديستنا .
يدخل الرجل الاعرابى وزوجته والخدامة
الزوجة :- خدى يا بت مفتاح الاوضة بتاعتى ...عايزاكى تنضفيها كويس ...وهتلاقى تمثال دهب كبير عايزاكى تلمعيه وتوضبي وتحطيه مكانه . بلا بسرعة .
الخدامة :-حاضر يا ستى (وتخرج)
الزوجة :- بت يا حسنة ..انتى يا بت . (بصوت عالى)
حسنة :- ايوه .. نعم يا ستى .
الزوجة انت يا بت طرشة مبتسمعيش ..انا مش اما انده عليكى من بدرى ..
حسنة :- ابدا يا ستى ...انا اول ما سمعت جيت على طول .
الزوجة :- وكمان بتقاوحى ..طيب ...تروحى دلوقتى توكلى الغنم وتسقى المواشى ..وتكنسى الزريبة ..وترجعى تكملى الغسيل وتكنسى البيت .. وتغسلى الاطباق وتجهزى الاكل يللا بسرعة مستنية ايه .
حسنة :- حاضر يا ستى (وتخرج).
الزوج :- يا شيخة حرام عليكى انتى عايزة تموتى البت .
الزوجة :- ما هو شوف البت حسنة دى مش نازلالى من زور من ساعة ما انت جبتها وانا مش مستريحالها .
الزوج :- حرام عليكى ..دى بنت اخر احترام واخر ادب واخلاق ومن ساعة ما دخلت البيت وهى مش مخلياكى محتاجة حاجة ،وشايلاكى على كفوف الراحة . عمرنا ما شفناها طلعت كلمة وحشة او عملت حاجة غلط زى باقى الخدامين .
الزوجة :- اهى مش عجبانى كده وخلاص ..اللى ما عارفالها اصل ولا فصل ولا عارفة انت جبتها منين !
الزوج :- ماانا حكيتلك الحكاية بدل المرة عشرين ومعذلك احكيا للمرة الواحد والعشرين ..كان ياما كان فى يوم من الايام وانا مروح من الغيط ومعايا البمواشى والاغنام بصيت على اول البلد اللى جنبنا لقيت البت يا حبة عينى مرمية على الطريق وغرقانة فى دمها ..تبصيلها يصعب عليكى .
الزوجة :- (بتريقة) اسمالله !!
الزوج :-فكرتها ميتة قربت منها لقيت لسة فيها النفس ولقيتها بتقولى اعمل معروف خدنى وداوينى وانا اعيش لك خدامة طول عمرى ...انا قلت ميضرش خدامة ببلاش ..غلطت انا ؟
الزوجة :-(بتريقة) لا عداك العيب !!فكرك يعنى الحكاية دى هتخيل على .
الزوج :- انا قلتلك اللى حصلعايزة تصدقى صدقى مش عايزة يبقى انت حرة .
الزوجة :- ما هو بالعقل كدة واحدة زى دى مرمية فى الشارع وغرقانة فى دمها ..لازم يكون فى الموضوع سر .
الزوج :- ما انا قلتلك قبل كدة ان القاضى بتاع البلد امر انها تترجم واهل البلد اللى رجموها ..فكروها ماتت سبوها مرمية للكلاب تنهش فى لحمها ..وى كان لسة فيها النفس .
الزوجة :- والقاضى يامر برجمها ليه اكيد عملت عملة منيلة بنيلة .
الزوج :- حرام عليكى متظنيش فى البت البت عمرنا ما شونا منها حاجة وحشة ...امانة وادب واخلاق .
الزوجة :- بلا ادب بلا اخلاق .. انا بصراحة مش عايزاها فى البيت وخلاص .
الزوج :- قولى ان انت غيرانة منها !!
الزوجة :- انا اغير من واحدة خدامة زى دى ... ليه هي احسن منى ...قول ان انت ميال ليها وبتلف وتدور عليها .
الزوج :- يا ولية حرام عليكى ...دى زى بنتى .
الزوجة :- ياانا يا هي فى البيت ده .. اختارلك حل من الاتنين .
الزوج :- للدرجة دى !! انا نفسى تمسكى عليها غلطة .
+تدخل الخادمة مسرعة .
الخادمة :- ستى يا ستى .
الزوجة :- فيه ايه يابت انت كمان .
الخادمة :- التمثال الدهب يا ستى .
الزوجة :- ماله يا بت .
الخادمة :- مش فى مكانة يا ستى .
الزوجة :- نهارك اسود ...تروحى تقلبى الدنيا عليه .
الخادمة :- ماانا لقيته يا ستى .
الزوجة :- ولما انتى لقيتيه يا مقصوفة الرقبة جاية وعاملة الهيصه دى ليه .
الخادمة :- اصل انا ملقيتهوش فى الاوضة يا ستى .
الزوجة :- ملقيتهوش فى الاوضة .. امال لقيتيه فين .
( تصمت الخادمة )
الزوجة :- متنطقى يا بت لقيتيه فين ؟
الخادمة :- مش هاقدر اقول يا ستى .
الزوجة :- ليه يا ختى ان شاء الله ؟
الخادمة :- اصل انا متعوتش افتن على حد .
الزوجة :- ماتقولى يا بت كان فين ؟
الخادمة :- كان ...كان فى اوضة حسنة يا ستى .
الزوجة :- فين ؟ فى اوضة حسنة .(توجه كلامها لزوجها ) جالك كلامى اهى طلعت حرامية كمان .
الزوج :- انت متاكدة يا بت من الكلام ده ؟
الخادمة :- ايوة يا سيدى .
الزوج :- طيب نستنى نجيب حسنة ونعرف منها الحقيقة .
الزوجة :- ولا حقيقة ولا غيره ... ان ماكنتش تطرد البت دى زى ما جبتها... انا هجيبلك خبرها ...قدامى يا بت لما نشوف المصيبة دى .(وتخرج هى والخادمة )
- يبقى الزوج بمفرده يكلم نفسه
الزوج :- حسنة مش ممكن تعمل كده انا عارفها كويس ...ده اكيد حد من الخدامين عمل معاها كده ...اعمل ايه انا دلوقتى لو خليت حسنة فى البيت مراتى ممكن تموتا ...ولو مشيتها حرام علي .ملهاش حد (ويصمت) حسنة ...يا حسنة . تحضر حسنة مسرعة .
حسنة :- تحت امرك يا سيدى .
الزوج :- صحيح يا حسنة انت اللى سرقتى التمثال .
حسنة :- تمثال !! تمثال ايه يا سيدى .
الزوج :- التمثال بتاع ستك .
حسنة :- انا يا سيدى ... ولا اعرف عنه حاجة .
الزوج :- انا عارف يا حسنة انك عمرك ما تعملى كده . وعارف كمان ان الخدامين فى البيت بيغيروا منك ...وهما اللى دبروا العملية دى علشان نطردك من البيت .
حسنة :- طيب ليه ؟ انا عمرى ما عملت معاهم حاجة وحشة .
الزوج :- انا عارف يا حسنة ... اسمعى يا حسنة ...انا ساعة ما جبتك البيت هنا ...كنت فاكر انى هاساعدك واعمل معاكى معروف ...لكن الظاهر ان قعادك هنا فيه خطورة عليكى ... لو قعدتى هنا مراتى ممكن تموتك .
حسنة :- امال اروح فين ؟ انا مليش حد فى الدنيا دى ... انا ماصدقت لقيت بيت اقعد فيه .
الزوج :- بلاد الله واسعة يا حسنة ... وربنا عمره ما بينسى حد .خدى الفلوس دى وابعدى عن البلد دى خالص دول 30 دينار تقدرى تركبى بيهم سفينة وتسافرى لاى بلد ...يالا معايا دلوقتى تلمى حاجتك قبل ما ستك تيجى ...احسن دى ناويالك على شر .
ويخرجان................................................ستارة
====================================
المشهد الثالث
احزان جديدة
تعليق :-
- وطردوا حسنة من البيت وبقت مش عارفة تعمل ايه ملهاش اهل ولا سكن ولا مال
- ولتانى مرة تحس بالظلم من غير سبب
- ولتانى مرة تحس ان ربنا تركها وان الشر عليها بيزيد .
- وفضلت حسنة ماشية حزينة ...رايحة تركب سفينة ...تاخدها ...تبعدها لمكان بعيد يكون فيه راحة وسلام .
- لكن كانت المشاكل لسة مخلصتش . وكان فى طريق حسنة مشكلة جديدة .
- تعالوا نشوف طريق الالام وصل لغاية فين .
تدخل حسنة الى المسرح بهدوء وتحدث نفسها + موسيقى حزينة .
اروح فين واجى منين ياربى دلوقتى ...مليش بيت ... مليش اهل ... مليش حد يسال علي ...اعمل ايه ياربى دلوقتى ... انا لي بيحصلى ده كله !! ... ايه الذنب اللى عملته علشان يحصلى كده... كل اللى انا عملته انى عايزه اعيش لك يارب عيشة طاهرة ... كل اللى انا عملته انى مش عايزة اغضبك فى اى حاجة ...ليه يحصلى ده ! ليه اللى يعيش معاك دايما يبقى تعبان ، وليه الشرير دايما مطمن ومرتاح البال ... انا لو كنت عملت الشر دلوقتى كان زمانى قاعدة فى بيتى متهنية بدل البهدلة الللى انا فيها دى ... لكن انا مش عايزة كدة ... انا عايزة اعيش حسب وصاياك . مش عايزاك تغضب علي فى اى شيء ... يبقى يحصل كده ! .. ليه يارب ... الى متى يارب تنسانى ... اعيش ازاى واكل منين واسكن فين كل اللى معايا 30 دينار يا دوبك يكفوا اجرة السفر . دبرها يارب انت من عندك ... انا مش هاعول الهم .انا واثقة ان انت ليك حكمة من كل اللى بيحصلى ده ... انت اللى دايما تقول " ادعونى فى يوم الضيق انقذك فتمجدنى " مفيشضيقة اكتر من كده ... دبرها يارب من عندك .. انما الله انتظرى يا نفسى لان من قبله رجائى ... هو صخرتى وخلاصى فلا اتزعزع .
(يدخل رجلان وهما يمسكان رجل مديون ويضربانه )
الرجل :- ها تدفع الفلوس اللى عليك ولا لأ .
المديون :- صدقونى مش معايا ... ارحمونى .
الرجل :- يبقى هنجلدك وبعدين نصلبك يا لص .
المديون :- آه ... حرام عليكم ... طيب ادونى فرصة تانية .
الرجل :- دى تالت فرصة يا حرامى وانت مش عايز تدفع .
+ حسنة تنظر باستغراب وتتقدم لتسأل الرجل +
حسنة :- حرام عليكم اللى بتعملوه د .
الرجل :- وانت مالك انت تحبى تتجلدى مكانه .
حسنة :- وهو عمل ايه علشان ده كله .
الرجل :- عليه فلوس ومش عايز يدفعها .
حسنة :- وعلشان خاطر الفلوس تعملوا فيه كده !!
الرجل :- ان مكانش عاجبك ادفعيم واحنا نسيبه .
حسنة :- هو عليه كام .
الرجل :- عليه 30 دينار ...(وهو يستمر فى ضربه والمديون يتألم)
حسنة :- ( تكلم نفسها ) 30 دينار دى هي اللى حيلتى .ثمن اجرة السفر لو دفعتهم مش هيبقى حيلتى ولا دينار ولا هاعرف اسافر ولا حتى اشترى رغيف عيش ... بس حرام الراجل كده هيموتوه ... انا ادفعهم وربن يدبر (توجه كلامها للرجل) خلاص .. خلاص.سبوه . انا هادفع الفلوس .
الرجل :- طلعى الفلوس الاول .
حسنة :- (تخرج الفلوس) اتفضل .
الرجل :- لولا الست الطيبة دى ...كان زمانك دلوقتى مصلوب . ثم يخرج
المديون :- (يحاول ان يقوم بصعوبة) آه ... آه ... (يتجه لحسنة ويحاول ان يقبل يدها وهي ترفض) انتى انسانه عظيمة ... انتى انقذتى حياتى من الموت ... جميلك ده دين فى رقبتى ... ربنا يساعدنى واردهلك .
حسنة :- انا معملتش حاجة ... لكن هما ليه عملوا معاك كد ه ؟
المديون :- انا تاجر عبيد ...من زمان وانا شغال الشغلانة دى ...الف البلاد اشترى العبيد وابيعهم لتجار تانى ...ودول ناس اشتريت منهم عبيد وبقيتلهم فلوس ... واتعذرت فيها . لكن انت ايه اللى يخليكى تدفعيلى فلوس وانتى متعرفينيش .
حسنة :- ربنا بيقول طوبى لمن يتعطف على المسكين فى يوم الشر ينجيه الرب ... وقال تانى سعيد هو الرجل الذى يتراءف ويقرض ... صدقنى الفلوس اللى انا دفعتهم دول كانوا اخ فلوس معايا وكنت هاسافر بيهم ... لكن انا واثقة ان ربنا هيدبر.
المديون :- يعنى انت دلوقتى معكيش ولا دينار .
حسنة :- خالص .
المديون :- امال هتسافرى ازاى ؟
حسنة :- مش عارفة ربنا يدبر ...
المديون :-(يفكر قليلا) طيب اسمعى ... صاحب السفينة ده راجل معرفة انا ممكن اكلمهلك يوديكى المكان اللى انت عايزاه من غير ما ياخد فلوس .
حسنة :- ده يبقى جميل عمرى ماهانساه ابدا .
المديون :- لأ جميل ايه ... ده جزء من الدين اللى علي .
المديون :- (يشاور لها بعيد) شايفة الراجل اللى جاى هناك ده ..
حسنة :- ايوه .
المديون :- اهه هو ده صاحب السفينة روحى انت اقعدى بعيد وسيبينى معاه اكلمه انا بمعرفتى .
حسنة :- انا مش عارفة اشكرك ازاى !
المديون :- لا تشكرينى ايه ... لا شكر على واجب (وتخرج حسنة)
المديون :-(يكلم نفسه) ده انتى باين عليكى طيبة وعلى نياتك قال اكلملها صاحب السفينة ... ده انا لازم استغل الفرصة ايوه ... الفرصة متجيش غير مرة واحدة بس ... وده رزق جانى لغاية عندى ... يعنى حرام ارفس النعمة ... البت جميلة وهادية يعنى لو اتباعت عبده هتجيب فلوس كتير ... (يدخل صاحب السفينة)
المديون :- صباح الخير يا امير .
صاحب السفينة :- خير ايه يا ابو وش فقرى ... انت بيجى من وراك خير .
المديون :- ليه بس كده يا امير ده انا حتى جايبلك رزق حلو .
صاحب السفينة :- انت بيجى منك حاجة حلوة ابدا .
المديون :- معايا حتة خدامة انما ايه 100\100 ...جمال وادب واخلاق وهادية ومطيعة .
صاحب السفينة :- وجبتها منين يا ابو وش سمح .
المديون :- دى بينى وبينك الخدامة بتاعتى ...اديلها 13 سنة بتخدم عندى ... دى طالعة من عيني والله .
صاحب السفينة :- وها تبيعها ليه يا مرزق ؟
المديون :- معذور ... وربنا ميوقعكش فى ضيقة ...قلت ايه هاتشترى ولا لأ قبل ما السفينة تطلع .
صاحبالسفينة :-مش لما اشوف البضاعة الاول ... اشوف وبعدين احكم .
المديون :- مش هينفع تشوف ؟
صاحب السفينة :- ليه ان شاء الله .
المديون :- اصل انت مش واخد بالك ... البت لو عرفت انى هابيعها مش هتتحمل الصدمة ... ويمكن تروح فيها .
صاحب السفينة :- يا سلام .
المديون :- امال ايه ! اصل انت متعرفش دى بتعزنى قد ايه ... دى 13 سنة ... يعنى عشرة عمر .
صاحب السفينة :- امال هشتريها ازاى انا دلوقتى ؟
المديون :- انا هشاورلك عليها من بعيد كده ... وبعد ما تشتريها هابقى افهمها انا بمعرفتى علشان الصدمة تبقى خفيفة عليها .
صاحب السفينة :- وهي فين ؟
المديون :- (يشاور بعيد) شايف البت اللى قاعدة هناك دى .
صاحب السفينة :- هي دى ؟ انت متاكد ... دى جميلة جدا وباين عليك انك كنت معيشها فى عز . خلاص على بركة الله ... عايز فيها كام دى .
المديون :- من الاخر كده ومن غير فصال وعشان خاطرك عايز 1000 دينار .
صاحب السفينة :- 1000 دينار !! مش كتير
المديون :- كتير ايه يا راجل يا بركة ... ده انا حتى عاملك تخفيض .
صاحب السفينة :- بينى وبينك البت تستاهل ... خد يا سيدى الالف دينار ...ياللا خليها تركب السفينة علشان هنطلع بعد شوية .
المديون :- حاضر بس سيبنى معاها شويه اودعها وافهمها بمعرفتى لحسن دى صعبانة علي قوى .
صاحب السفينة :- ماشى يا عم ... دى عشرة 13 سنة .
(يخرج صاحب السفينة وبعد قليل تدخل حسنة)
حسنة :- هه عملت ايه ؟ كلمته ؟
المديون :- ايوة طبعا كلمته ووافق على طول ... اصله ميقدرش يرفضلى طلب .
حسنة :- انا متشكره ... انا مش عارفة اقولك ايه .
المديون :- لا تقولى ولا تعملى ...انتى عملتى معايا معروف وانا عملت معروف يبقى خالصين ... شوفى يا ستى انا هامشى دلوقتى وانت هاتقعدى هنا فى السفينة دى ... السفينة هتطلع بعد شوية ... عايزك كل اللى يقولك عليه صاحب السفينة تنفذيه بالحرف الواحد ... فاهمة .
حسنة :- حاضر ... ربنا يعوضك ويديك على قد نيتك .
المديون :- مابلاش النية دى ... يالا امش انا بقى ... سلام .
حسنة :- مع الف سلامة ... يا سلام لسة الدنيا فيها ناس طيبين .... اقعد هنا استنى على ما تطلع السفينة .
(تجلس حسنة على اخر المسرح ... وبدخل صاحب السفينة وينده بصوت عال)
صاحب السفينة :- ياللا كل الركاب والعبيد يطلعوا السفينة هنطلع دلوقتى ... ياللا يا بنى انت وهو شدوا الشراع ...واضربوا النفير علشان الناس تركب (صوت النفير + امواج)
(ينظر صاحب السفينة لحسنة ويتجه نحوها فتقف)
صاحب السفينة :- ازيك يا حلوة ... اسمك ايه ؟
حسنة :- اسمى حسنة .
صاحب السفينة :- يا سلام اسم على مسمى يا ترى ابو وش سمح فهمك على كل حاجة .
حسنة :- ايوة فهمنى وقالى لازم تسمعى كلام صاحب السفينة بالحرف الواحد .
صاحب السفينة :- برافو عليكى ... انتى باين تستاهلى الفلوس اللى دفعتها فيكى .
حسنة :- فلوس !! فلوس ايه ؟
صاحب السفينة :- انت عارفة سيدك باعك بكام ؟
حسنة :- سيدى مين ؟ انا حرة مش عبدة .
صاحب السفينة :- (بصوت عالى) حرة ازاى ! ده انا دافع فيكى 1000دينار .
حسنة :- مين اللى خدهم منك .. مين اللى باعنى .
صاحب السفينة :- التاجر اللى كان معاكى ... اللى قضيتى معاه 13 سنة .
حسنة :- مش ممكن ... الراجل ده انا معرفوش ... انا اتعرفت عليه من شويه ... كان مديون ب30 دينار والتجار كانوا بيضربوا فيه ... دفعتله الفلوس ومكانش معايا غيرهم اسافر بيهم قالى متخافيش انا هاكلم صاحب السفينة علشان يوديكى البلد اللى عايزاها من غير فلوس .
صاحب السفينة :- عملها معاكى الندل ... انتى تفكى اسره وهو يبيعك عبده .
حسنة :-(تبكى) ليه يارب كده ... ليه كده ... انا قلت خلاص جه الفرج من عندك ... قوم تزود علي المصايب ... ليه يارب كده ليه ... وانا اللى عطفت عليه وفكرته طيب ... اتارى الدنيا مفهاش طيبين ... انا عملت ايه لده كله ياربى (تبكى).
صاحب السفينة :- بس كفاية يا بنتى متبكيش ... الدنيا لسه بخير ... انت من دلوقتى حرة زى ماانت وربنا يعوض علي فى فلوسى .
حسنة :- (وهى تمسح دموعها ) متشكرة يا عم .
صاحب السفينة :- لكن انتى رايحه فين يا بنتى ؟
حسنة :- اى بلد قريبة الاقى فيها لقمة عيش .
صاحب السفينة :- يعنى انت ملكيش حد تروحيله .
حسنة :- انا مقطوعة من شجرة ومليش حد خالص .
صاحب السفينة :- خلاص يا بنتى ... البلد اللى جاية دى اللى هتقف عليها السفينة تنزلى فيها ... على اول البلد هتلاقى قصر كبير فيه ست طيبة بتعطف على الغلابة والمساكين روحيلها يمكن تقدر تساعدك .
حسنة :- انا مش عارفة اشكرك ازاى ... ربنا يعوضك ويكتر رزقك .
صاحب السفينة :- ربنا يحافظ عليكى ويحميكى يا بنتى ..........................ستارة
===================================
المشهد الرابع
داخل القصر
تعليق :-
- ونزلت حسنة من السفينة تدور على صاحبة القصر يمكن تقدر تساعدها وتخفف عنها احزانها.
- ووصلت حسنة للقصر ... لكن خجلها وعزة نفسها منعتها انها تطلب احسان من حد .
- وفضلت حسنة قاعدة على باب القصر لغاية لما شافتها صاحبة القصر وطلبت تشوفها .
- وفى داخل القصر حصلت احداث عجيبة نكمل ونشوف قصة حسنة وصلت لغاية فين .
+تدخل صاحبة القصر وهى تتوكأ على عكاز وبعدها تدخل الخادمة+
استير الخادمة :- صباح الخير يا ستى ... ازاى صحتك دلوقتى ؟
صاحبة القصر :- صباح الخير يا استير ... الحمد لله ... نشكر ربنا على كل حال ... كل اللى يسمح بيه ربنا كويس ... دى تجربة بسيطة من ربنا علشان يختبر ايمانى ... انا حاسة ان ربنا سمح لي بالمرض ده علشان يختبر ايمانى ... انا حاسة ان ربنا سمح ليه بالمرض ده مخصوص علشان يعلمنى ازاى اتكل عليه هو وحده مش على حاجة تانية... اديكى شايفة انا ساكنة فى قصر كبير قد ايه وعندى اموال وخيرات ملهاش حد لكن الاموال دى منفعتنيش بحاجة ولا خففت امراضى .الحاجة الوحيدة اللى مزعلانى انى مبقتش اقدر زى الاول انزل اشوف الفقراء والالمساكين واقضى حاجتهم .
استير :- ده من ساعة ما انتى تعبتى يا ستى والفقراء والمساكين كل شوية بيجوا يسألوا عليكى .
صاحبة القصر :- فيهم الخير يا استير ... اوعى تكونى زعلتى حد منهم .
استير :- لا ابدا يا ستى ... ده حتى النهارده الصبح كان فيه مجموعة كبيرة من الفقرا على باب القصر ... والا عايزين يقابلوكى وانا اقولهم مينفعش دى تعبانة ونايمة ... ابدا .
صاحبة القصر :- وعملتى معاهم ايه .
استير :- عملت زى ما انت علمتينى بالظبط ... شفت احتياجات كل واحد ايه من اكل وشرب ولبس وخليت الخدامين يودوا الحاجات لكل بيت .
صاحبة القصر :- برافو عليكى يا استير ... اوعى تزعلى حد منهم يا استير ... وافتكرى كويس كل ما ندى اكتر كل ما ربنا يزود خيراته لينا . اللا قوليلى يا استير فيه واحدة قاعدة على باب القصر كل ما ابص من الشباك اشوفها .
استير :- ايوه يا ستى دى بنت غلبانة ... باين عليها غريبة عن البلد .
صاحبة القصر :- انا حاسة ان البنت دى وراها سر غريب .
استير :- دى مجرد شحاتة عادية .
صاحبة القصر :- الشحاتة اللى بتقولى عليها دى بتقعد الليل كله تصلى بقالها دلوقتى 3 ايام ... كل يوم اشوفها بتصلى . بقولك ايه يا استير روحى قوليلها انى انا عايزه اقابلها ... خلينا نعرف حكايتها يمكن نقدر نساعدها .
استير :- اجيبها هنا يا ستى .
صاحبة القصر :- ايوة يا استير .
استير :- حاضر يا ستى . ثم تخرج
+ تدخل استير ومعها حسنة +
استير :- اتفلضى تعالى .
صاحبة القصر :- انت اسمك ايه ؟ وايه حكايتك ؟ (تصمت حسنة) احكيلى متخافيش يمكن اقدر اساعدك. (تنظر حسنة الى استير) طيب اتفضلى انت يا استير انتى حضرى الغدا .(تخرج استير) يلا بقى احكيلى حكايتك بالتفصيل .
حسنة :-انا اسمى حسنة وحكايتى حكاية بسيطة انا انسانة عادية ... عايزة اعيش مع ربنا لكن مش لاقية مكان .
صاحبة القصر :- ربنا ملهوش مكان ... مالك السما والارض .
حسنة :- انا اقصد انى كل ما احاول اعيش مع ربنا الاقى حروب ومشاكل كتيرة من كل ناحية ... عايزة اعيش فى مكان اعبد فيه ربنا من غير مشاكل .
صاحبة القصر :- مش هتلاقى المكان ده ... لازم اللى يعيش مع ربنا هيقابله مشاكل ... لكن عناية ربنا ورعايته مش ممكن تسيبه .
حسنة :- الناس حياتها شريرة ... صعب نعيش وسطيهم من غير ما نتاثر بيهم .
صاحبة القصر :- ابونا يوسف لما كان فى مصرمكانش غيره اللى يعرف ربنا لكن قدر انه يعيش لربنا من غير ما يتاثر بحياة البشر الشريرة . وابونا لوط فى سدوم وعمورة وغيرهم كتير ... اللى عايز يعيش مع ربنا ميهموش اى شىء تانى . انت منين يا بنتى مليه اللى جابك هنا .
حسنة :- انا جاية من بلاد بعيدة ... ومليش حد يسال عنى ، وجوزى سافر واتقطعت اخباره وقالوا انه مات ... واهل بلدى رجمونى لكن ربنا انقذنى ونجانى ... ودلوقتى انا مليش مكان .
صاحبة القصر :- اعتبرى القصر ده قصرك ... انتى من النهارده واحدة من العيلة ... تقدرى تقعدى هنا وتصلى وتعيشى مع ربنا زى ما انت عايزه .
حسنة :- بس ده كتير علي .
صاحبة القصر :- ولا كتير ولا حاجة ... انا ربنا حرمنى من الخلفة .. كان نفسى يكون عندى ابن او بنت زيك الاقيه جنبى بعد ما كبرت وعجزت ... اعتبرى نفسك زى بنتى تمام .
(تبتسم حسنة وتقبل يدها )=تدخل استير .
استير :- الاكل جاهز يا ستى .
صاحبة القصر :- اكيد انتى هتموتى من الجوع ... بقالك 3 ايام معرفش بتاكلى ازاى .
حسنة :-ربنا مبينساش حد .
صاحبة القصر :-طيب ياللا ساعدينى علشان نروح نتغدى .
تتجه حسنة لتحاول ان تقيمها تحس صاحبة القصر بالم شديد...تجرى استير الخادمة نحوها بسرعة .
استير :- ستى ... ستى ... مالك يا ستى .
حسنة :- اشفيها يارب ... اشفيها يارب .
استير :- للاسف مفيش طبيب قريب ... وصحتها متتحملش السفر .
حسنة :-لأ فيه طبيب دايما قريب وهو موجود على طول .
استير :- الحقينا بيه الله يخليكى .
تقف حسنة للصلاة فى صمت +موسيقى .
ويظهر على صاحبة القصر الالم .
بعد ختام الصلاة تشعر بالشفاء وتقف بدون مساعدة.
استير :- مش ممكن ... مش معقول ... ربنا سمع صلاتك انتى قديسة عظيمة .
صاحبة القصر :- انت ربنا بيحبك ... انت بركة كبيرة يا حسنة . انتى من النهارده بنتى وقصرى واملاكى هى املاكك ... وانا هاكتبلك تعهد بكل املاكى واموالى تكون ملك ليكى بعد موتى .
حسنة :- ربنا يديكى الصحة ويطول عمرك .
صاحبة القصر :- ودلوقتى يللا نتغدى وتحكيلنا حكايتك بالتفصيل .
ويخرج الجميع....................................................ستارة
========================================
المشهد الخامس
رجوع الغائب
- وفعلا كتبت صاحبة القصر كل املاكها لحسنة .
- وماتت صاحبة القصر واصبحت حسنة تملك كل الاموال والاملاك بعد ما كانت مش لاقية مكان يآويها .
- واشتهرت حسنة بحبها للفقراء والمساكين .
- وعلشان حبها لربنا وطاعتها ليه . اداها ربنا موهبة الشفاء .وصنع المعجزات .
- وكان قصر حسنة مقصد لكل مريض وتعبان علشان تصليله القديسة ويخف فى الحال .
- وتمر الايام وتشتهر حسنة فى كل البلاد بانها القديسة اللى بتعمل المعجزات .
- وتمر الايام ... ويرجع زوجها من السفر زوجها اللى غيابه طال وقالوا عليه ده مات .
- رجع بيته يدور على حسنة ملقيش حسنة ولقى اخوه اصبح ضرير وكانت الصدمة .
تعالوا نشوف ايه اللى حصل
يدخل ابراهيم زوج القديسة يحمل احمالا تشير الى انه اتى من سفر .
زوج القديسة :- حسنة ... يل حسنة ... يا زوجتى العزيزة . انا رجعت يا حسنة (ينزل الاحمال عن ظهره) ياه 5 سنين ... 5 سنين مشفتش فيهم البيت ده . مشفتش مراتى واخويا ...كان لازم اسافر علشان لقمة العيش ... الحياة بفيت صعبة والبلد هنا مفيهاش رزق ... صحيح انا طولت فى غيابى شوية ... لكن اعمل ايه لازم كده علشان اضمن عيشة كويسة انا ومراتى ... وباذن الله دى تكون اخر سفرية لي . - الله هو مفيش حد منهم هنا ولا ايه ... لا حسنة ولا اخويا اسحق ... لما اروح اشوفهم راحوا فين .
يخرج وهو ينادى يا حسنة يا اسحق يا اخويا
"يدخل بعده اخو الزوج "اسحق" بعد ان صار كفيف"
اخو الزوج :- ايه اللى انا سامعه ده ... مش ممكن ... معقولة يكون هو ... لأ لأ لأ مش هو ... انا باين لى بخرف ... لأ بخرف ازاى ده هو ... معقولة دى ... اخويا رجع ... بعد 5 سنين واحنا اللى كنا فاكرينه مات او مش هيرجع تانى ... صحيح مسير الحى يتلاقى ... بس انا هاعمل ايه دلوقتى لو سالنى حسنة فين هاقوله ايه ... افهمه ازاى ... مش هيصدق كلامى ... ده لو عرف الحقيقة ممكن يموتنى ... انا استاهل كل اللى يجرالى ... ربنا عمانى علشان ذنب المسكينة اللى رجمناها ... اعمل ايه يارب دلوقتى .
يدخل ابراهيم وهو يتجه نحو اخوه الكفيف ليقبله
زوج القديسة :- اخويا حبيبى انت كنت فين انا بادور عليك من بدرى .
اخو الزوج :- اهلا يا خويا حمدا لله على سلامتك ... ايه الغيبة الطويلة دى .
زوج القديسة :- (بعد ان تنبه الى ان اخوه صار اعمى) ايه ده يا خويا مالها عينيك .
اخو الزوج :- دى تجربة من عند ربنا ... ربنا اخد بصرى .
زوج القديسة :- ازاى ده ... مش ممكن ... من امتى الكلام ده .
اخو الزوج :- من سنتين .
زوج القديسة :- متخافش يا خويا انا جاى ومعاى فلوس كتير وهاوديك عند اعظم الاطباء ... وهترجع تشوف تانى .
اخو الزوج :- متتعبش نفسك ... كل الاطباء قالوا مفيش امل .زوج القديسة :- مفيش امل ازاى ... مش ممكن ... انت لازم تشوف . (يصمت قليلا) طب اسمع ... وانا جاى فى السفينة سمعت ناس كانت بتتكلم عن واحدة قديسة ساكنة فى قصر فى بلد جنبينا ... قالوا عليها انها بتعمل معجزاتعظيمة والناس كلها بتطلب صلواتها ... ايه رايك لو آخدك اوديك عندها ... وربنا يشفيك بصلواتها .
اخو الزوج :- ياريت يا خويا ... ده يبقى جميل مش هانساه طول عمرى .
زوج القديسة :- عيب تقول كده يا اسحق يا اخويا ... جميل ايه ... انت متعرفش معزتك عندى قد ايه ... ده كفاية ان انت 5 سنين كاملة متحمل مسؤلية البيت ومسؤلية مراتى حسنة ... امال فين حسنة ... راحت فين .
اخو الزوج :- حسنة .
زوج القديسة :- ايه فيه ايه مالها حسنة ... انت فيه حاجة مخبيها علي ؟
اخو الزوج :- بصراحة يا خويا انا مش عارف اقولك ايه .
زوج القديسة :- ما تقول فيه ايه ... مالها حسنة ؟
اخو الزوج :- حسنة خدت جزاءها .
زوج القديسة :- يعنى ايه خدت جزاءها .
اخو الزوج :- انا عارف انها صدمة عليك لما تعرف ... لكن لازم تعرف .
زوج القديسة :- (بنرفزة) قول .
اخو الزوج :- بصراحة احنا مسكنا حسنة فى خطية زنا .
زوج القديسة :- مستحيل ... حسنة ... مش ممكن ... دى مراتى وانا عارفها ... دى متعرفش حاجة غير ربنا والصلاة ... حتى الكلمة الوحشة مبتطلعهاش طول حياتها عبادة وصوم وعطف على المساكين ... حسنة... زنا... مستحيل .
اخو الزوج :- هو ده اللى حصل ... والقاضى ...القاضى حكم عليها بالرجم .
زوج القديسة :- (بنرفزة) رجموا حسنة ... (موسيقى حزينة) يعنى ايه خلاص البيت اتخرب ... وانا اللى ضيعت عمرى فى الغربة 5 سنين... عشان ايه ... مش عشانها وعشانى ... علشان نعيش عيشة كويسة ... خلاص ... ضاعت كل حاجة ! حسنة ... مش ممكن انت اكيد بتهزر .
اخو الزوج :- صدقنى يل خويا هو ده اللى حصل ولو مش مصدق ممكن تسال اهل البلد او تسال القاضى .
زوج القديسة :- حسنة الملاك ... تعمل كده ؟
اخو الزوج :- بس يا خويا متزعلش نفسك ... الشخص اللى يخونك ميستاهلش تزعل عليه لحظة واحدة .
زوج القديسة :- متقولش عليها كده ... انا مش مصدق ... انا عمرى ما شفت منها حاجة وحشة ... ده انا لما كنت اسافر ... كانت تفضل طول سفرى تصلى وتصوم لغاية ما ارجع .
اخو الزوج :- يا خويا متعملش فى نفسك كده ... خلاص انسى اللى فات بص لحياتك ... بص لتجارتك ...بص لبيتك .
زوج القديسة :- بيتى !! ما خلاص راح البيت ... مفيش غيرك انت اللى باقيلى فى الدنيا ... اخويا حبيبى .
( ياخده بالاحضان ويبكى + موسيقى ناى حزينة )
زوج القديسة :- انا فعلا لازم انسى ... ولازم اخد بالى من بيتى ومنك يا خويا ... انت لازم ترجع تشوف تانى ... انا لازم اعوضك عن سنين الفقر والحرمان والعار اللى انت عشت فيها ... من بكره هنسافر وهاوديك عند القديسة اللى فى القصر ده ... وهترجع تشوف تانى ... ونبدا حيلتنا من جديد ... وننسى اللى فات .
اخو الزوج :- انت فعلا اخ عظيم .
زوج القديسة :- احنا دلوقتى ملناش غير بعض ... انا مش هاسيبك ابدا .
اخو الزوج :- ياللا تعالى ارتاح من السفر ... وبكره يحلها ربنا .
زوج القديسة :- ياللا يا خويا .
ويخرجان.........................................................ستارة
========================================
المشهد السادس
ليس خفى الا ويستعلن
تعليق :-
- ليس خفى الا ويستعلن .... والشر مهما زاد و طال لازم الخير يظهر وينتصر .
- وراح ابراهيم زوج حسنة واخوه للقصر اللى فيه القديسة اللى بتعمل معجزاتوهو مش عارف انه راح يقابل مفاجاة عظيمة .
- اتقابل ابراهيم واخوه مع شخص تانى هتشوفوه هتعرفوه على طول وهتعرفوا هو جاى ليه .
- وقابلتهم القديسة وهى مغطية وشها هى شايفاهم وعرفاهم وهما مش عارفين غير انها قديسة .
- وكان لقاء مليان بمشاعر الحزن والفرح الحزن على العمر اللى فات فى الظلم والالام والفرح للعمر اللى جاى فى سعادة وسلام ...............................تعالوا نكمل .
يدخل زوج القديسة ومعه اخوه الى القصر
زوج القديسة :- تعالى يا خويا ... ادخل على مهلك ... ادينا وصلنا القصر .
اخو الزوج :- هو القصر ده .
زوج القديسة :- ايوه هوه .
اخو الزوج :- امال مفيش حد هنا ولا ايه .
زوج القديسة :- مش عارف ... لما ننده ونشوف ... يا اهل الله ياللى هنا ... يا اهل الدار .
تدخل استير الخادمة
الخادمة :- ايوة عايزين مين .
زوج القديسة :- احنا جايين من بلد بعيدة ... قالولنا ان فيه هنا واحدة قديسة ساكنة فى القصر ده ... قالوا انها بتعمل معجزات بقوة الله ... صح هو ده العنوان ولا احنا تهنا فى العنوان .
الخادمة :- لا هو العنوان مظبوط ... بس القديسة اللى انت بتقول عليها مش هتقابل حد النهارده ... لانها معتكفة فى الاوضة بتاعتها بتصلى ومش هتطلع منها خالص .
زوج القديسة :- اعملى معروف ان احنا جايين من بلد بعيدة واخويا المسكين ده فقد بصره والاطباء احتاروا فى علاجه وقالوا ان مفيش امل ... لكن احنا املنا كبير ان ربنا يتمجد على ايدين القديسة دى ويفتح عنين اخويا ... اعملى معروف قوليلها كده يمكن تحن علينا وتقابلنا .
الخادمة :- حاضر ... انا هاديلها خبر وياريت توافق ...اتفضلوا استريحوا لغاية لما اقولها .
(ثم يقعد هو واخوه على اخر المسرح)
زوج القديسة :- اقعد يا خويا اقعد ... يا سلام شايف القصر جميل ازاى ؟
اخو الزوج :- لأ مش شايف ... (ويضحك)
زوج القديسة :- بقوة رب الجنود هتشوف وهترجع احسن من الاول .
* يدخل عليهم رجل اعرج وهو نفس الرجل الذى دفعت له القديسة 30 دينار وباعها هو كعبده *.
الاعرج :- سلام .
زوج القديسة :- سلام .
الاعرج :- اللا قولى يا اخ ... امال فين القديسة اللى هنا اللى بيقولوا عليها .
زوج القديسة :- انت كمان عايزها .
الاعرج :- هو انتم برضه مستنينها .
زوج القديسة :- ايوه اخويا مريض وجايين علشان تصليله . لكن انت عرفت المكان ده ازاى .
الاعرج :- يوه ... دى سيرة القديسة على كل لسان ... والناس كلها مفيش حكاية عندها غير القديسة اللى بتعمل معجزات وقاعدة فى القصر .
زوج القديسة :- دى باين عليها قديسة عظيمة .
الاعرج :- امال هى فين .
زوج القديسة :- زمانها جايه ... اقعد استريح معانا لغاية ما تيجى .
الاعرج :- وآدى قعده (يجلس الثلاثة على اخر المسرح)
* تدخل حسنة من الناحية التانية للمسرح وتقف تكلم نفسها دون ان يراها احد من الثلاثة *
حسنة :- مين ده ... مش ممكن ... ده حلم ولا علم ... ده جوزى ابراهيم واخوه ... انا كنت واثقة انه هيرجع ... وده مين ده ... ده الراجل اللى انا اقذته وباعنى عبده ... يا ترى عرفوا حكايتى ؟ ... يا ترى عايزين منى ايه . انا هغطى وشى علشان ميعرفونيش ... لما نشوف ايه الحكاية ... (وتغطى وجهها) .
تتقدم القديسة الى منتصف المسرح فيتقدمون نحوها .
زوج القديسة :- اهلا بالقديسة العظيمة . يقبل يدها وكذلك الاعرج .
حسنة :- خير ايه اللى ممكن اقدمهولكم .
زوج القديسة :- اخويا ... اخويا ده فقد بصره والاطباء احتاروا فى علاجه ... مالوش لا طب ولا دوا ... طالبين صلواتك ربنا يتحنن عليه ويشفيه .
الاعرج :- وانا كمان رجلى دى ... مش قادر احركها خالص والاطباء قالولى علاجها الوحيد انها تتبتر عشان متأثرش على باقى جسمى ... لا عارف امشى ولا اشتغل ولا اعمل حاجة .
( تصمت القديسة والكل ينظرلها )
حسنة :- انتوا عايزين ربنا يشفيكم ؟
اخو الزوج + الاعرج :- يا ريت .
حسنة :- يبقى لازم تعترفوا .
اخو الزوج :- نعترف بايه ؟
حسنة :- تعترفوا لربنا بخطاياكم ... كل واحد فيكم عمل خطية كبيرة ... والامراض اللى عندكم دى بسبب خطاياكم ...ولما تعترفوا بيها ربنا هيسامحكم ويشفيكم .
اخو الزوج :- بس انا مش فاكر انى عملت حاجة تغضب ربنا .
حسنة :- لأ افتكر كويس ... زمان ... من 5 سنين .
اخو الزوج :- ياه ... من 5 سنين ... يعنى من ساعة ما سافرت يا ابراهيم يا خويا ... ايوه ايوه افتكرت . بس مقدرش اعترف ... مقدرش .
حسنة :- يبقى مش هتخف .
اخو الزوج :- لأ عايز اشوف .
حسنة :- يبقى لازم تعترف ... العمى اللى عندك نتيجة خطيتك ولازم تعترف .
اخو الزوج :- بس مينفعش... مينفعش اعترف واخويا موجود .
زوج القديسة :- متتكسفش يا خويا ... اعترف علشان ترجع تشوف .
اخو الزوج :- يعنى لو اعترفت هتسامحنى يا خويا .
زوج القديسة :- طبعا هسامحك .
اخو الزوج :- يعنى مش هتزعل ؟
زوج القديسة :- وانا ايه اللى هيزعلنى بس .
اخو الزوج :- طيب انا هعترف بس توعدنى انك متغضبش .
زوج القديسة :- اوعدك يا سيدى ... ياللا اعترف بقى علشان تخف .
اخو الزوج :- فاكر من 5 سنين لما انت سافرت وسبتنى فى البيت مع مراتك .
زوج القديسة :- مراتى الله يرحمها ويسامحها .
اخو الزوج :- مراتك بريئة يا خويا . (موسيقى سريعة---صدمة)
زوج القديسة :- بريئة ... ازاى ؟
اخو الزوج :- (بصوت عالى) سامحنى يارب ... سامحنى يا خويا ... لما يا خويا غيابك طال ... فهمت مراتك انك مت ومش راجع تانى وعرضت عليها الزواج لكن هي كانت امينة ليك وقالت ها ستناه العمر كله ... حاولت اعمل معاها الخطية اكتر من مرة لكنها كانت طاهره وعفيفة ... الشيطان لعب فى دماغى ... رحت خليت شهود زور يشهدوا معايا عند القاضى انهم شافوها بتعمل الخطية ... وفعلا القاضى صدقهم ورجموها .
زوج القديسة :- انت يا خويا تعمل كده ... حرام عليك ... حرام عليك .
اخو الزوج :- سامحنى يا خويا سامحنى ... سامحنى ابوس ايدك ويبكى .
زوج القديسة :- حرام عليك ... انا كنت واثق ان مراتى بريئة .
حسنة :- علشان اعترفت باللى انت عملته ... ربنا يشفيك .
اخو الزوج :- (يحرك يده امام عينه) ايه ده ... انا بشوف ... انا بشوف ... انا بشوف يا خويا ... شكرا ليكى يا قديسة يا عظيمة .
