مسرحيه
زكي فنان عرائس الماريونت
تصنيف النص
المكـــــــان :
ورشة عمل لفنان الماريونت " مطرود "
الزمـــــــان :
ليلة شم النسيم فى احد الاعوام
الشخصيات
شخصيات بشرية :
مــــــطرود :
لاعب عرائس الماريونت يناهز الخمسين من عمـــــــــــــــــــــره
ذكـــــــــــى :
شاب فى العشرين من عمره يساعد مطرود فى صناعة العرائس
شخصيات ماريونت :
سليم افنــــــــدى
خـــــفير النقطـة
فتوة الـــــــمولد
بائع العرقسوس
الــــــــــــــغازية
الزمــــــــــــــــار
ورشة عمل لفنان الماريونت " مطرود " فى ساعة متاخرة من ساعات الليل . حالة الفوضى التى سيطرت على الورشة من قطع قماش ملقاه هنا وهناك وبعض الاخشاب وعدم تنسيق فىاثاث الورشة " مطرود " ملقى على سريره فى منتصف المسرح وقد غط فى نوم عميق . يتحرك حركات لاارادية وكانه ينازع كابوس فظيع . ثم يهداء ..... ثم تتكرر المرحلة السابقة عدة مرات
.
تدب الحركة فجأءة فى عرائس الماريونت .
سليم افندى : قدرنا نعيش فى زريبة مع فنان همجى .... مش قادر ينظم اودته
خفير النقطة : اما انك عليك كلام .... فنان وهمجى طب ازاى اوزنها انت
سليم افندى : بس بس انت مش فاهم اى حاجة
" فى جانب اخر من المسرح "
بائع العرقسوس : يااخى وسع كده .... ياباى على التباتة والرزالة
فتوة المولد : ماهو لولا اننا معملوين من خشبة واحدة ... كنت كسرت مفصلاتك
بائع العرقسوس : ماشى ... لما مطرود يصحى ... والله لا اقوله يودينى فى حكاية تانية ... مش عايز ابقى انا وانت فى حكاية واحدة يارزل .. هى تلاقيح جتت
فتوة المولد : لا ... الموضوع مش كده ... انت بس اللى زهقت من بيع العرقسوس ... اصلها مش مناسبة تعليم جنابك ... عايز تروح للمغنى والرقص والمسخرة مع دكهما
بائع العرقسوس : لا ... ايه رايك بقا انى مش بس حبيع عرقسوس ده انا حفتحها سبيل .... بس مش معاك . وحفضحك .... حقول ان ريحة شرابك وحشة
" فى جانب اخر من المسرح "
الزمار : عالم فاضية .... هو مطرود ينام من هنا .... وهما يتعاركوا من هنا
الغازية : ياعم احنا مالنا .... خلينا احنا فى اللى كنا بنقوله .... حفضت دورك فى الرواية الجديدة
الزمار : ايوة ياقشطة انتى حفضته
" يبداء الزمار فى العزف والغازية فى الرقص مع الغناء "
الغازية: ياوابور الساعة 12 ياللى مقبل ع الصعيد
" يفتح باب الورشة ليدخل ذكى "
ذكى : تانى ياعم مطرود ... عملتا تانى .. كده تنام وانا جايب لك العشا القصد .... اصحيه دلوقتى ولا ايه ... مانا لو صحيته حيقعد يزعق لى وعقبال مااهديه حيكون الاكل برد .... ولو كلت لوحدى حيزعل وبرده حيزعق لى لما يصحى الصبح ..... وبعدين بقا فى الحيرة ده ... ماعلينا ... يالانفسى .... اعمل له ايه ... ماقلت له استنانى لما اأجى ... هو اللى طاحن نفسه فى الشغل ليل نهار واول مايحط جسمه على السرير يبقى زى القتيل ماليش دعوة ....." مشيرا للغازية "... اه لو كنتى بتسمعى وتحسى زينا ... انا كنت عملت اجمل عروسة فى العالم على مزاجى ولما ازهق منها اكسرها واعمل غيرها ......بسم الصليب.... انت حتخرف ولا ايه ياذكى .... الخلق ده بتاع ربنا وبس ....
" يبداء فى الاكل "
" تخفت الاضاءة على ذكى وتسلط على العرائس "
بائع العرقسوس : انا جعان
فتوة المولد : انا اكتر منك
بائع العرقسوس : ماتكلمه يجيب حتة فطيرة بالسدق
فتوة المولد : قوله انت مش انا ريحة شرابى وحشة
بائع العرقسوس : ماانت حتاكل معايا يااخى
فتوة المولد : اقولك .... استنى لما يمشى .. يروح المطبخ يروح الحمام
بائع العرقسوس : لا لا ... انا مش قادر استنى انا حروح اخطف منه الاكل
فتوة المولد : استنى هنا ماتوديناش فى داهية.... يفكرك معفرت ويكسرك
بائع العرقسوس : طب اعمل ايه ياعالم جعان
فتوة المولد : وانا كمان
" جانب اخر من المسرح "
سليم افندى : الحوش الدون ... شوف الكلب بيعزم على ا واحنا لا .... اه عماليين ياكلوا ياكلوا واحنا من يوم مااتصنعنا محطناش لقمة فى جوفنا
خفير النقطة : اما انك عليك كلام يااخى ... ماتتكلم عن نفسك بس
" جانب اخر من المسرح "
الزمار : الحقى ... دول اتعاركوا تانى
الغازية : واحنا مالنا .... انت كده علطول تسيبنى وتروح لغيرى ... خليك معايا ... يالا رقصنى على الزمارة ... حافض دورك فى الرواية اللى فاتت
الزمار : ايوة ياقشطة
" يبداء الزمار فى العزف والغازية ترقص وهى تغنى "
الغازية : قولوا لعين الشمس ماتحماش ... ده حبيبى صابح فى الضحا ماشى
" ترجع الاضاءة لذكى "
ذكى : الف حمد والف شكر ليك يارب .... ياااه الواحد كان جعان جوع ... صحيح الجوع ده كافر ....
" يمسك بالاطباق ويخرج "
" تتجمع العرائس على ماتبقى من طعام وتأكل بشراهة .... ثم تتوجه الى مطرود النائم فى سريره مرددين بصوت متواحد "
العرائس : جياع جياع جياع .... ياويل من اشبع بطنه ونحن جياع .... ياويل من اهملنا لكل ضياع ..... جياع جياع جياع .... هبنا ناكل من لحم الظالم .... حتى لو كان بطعم المر .... دعنا ناكل من لحم وجهه ... حتى يصبح وجهه يصر .
" يبداون فى الهجوم على مطرود الذى يصرخ فزعا .. فترجع العرائس الى اماكنها "
مطرود : بسم الصليب ........ ايه دا... كان كابوس فظيع
" يدخل ذكى مسرعا "
ذكى : مالك ياعم مطرود
مطرود : مفيش .... كابوس وراح لحالها ..... هات كوباية ماية اشرب
" يناوله ذكى كوب الماء "
ذكى : اهدى بس ياعم مطرود .... ايه بس اللى حصل
مطرود : كابوس فظيع ياذكى ..... خلاص ياابنى راح لحاله
ذكى : تانى .... تانى ياعم مطرود .. هو كل يوم كابوس فظيع
مطرود : المرة ده افظع من اللى قابله ياذكى
ذكى : ماانت بس لو بتسمع الكلام .... قولن لك ريح شوية مش راضى تسمع كلامى
مطرود : ماانت بتقول كده علشان مش حاسس بالمشكلة اللى ممكن اقع فيها لو العرض مااتقدمش فى ميعاده
ذكى : لا والله حاسس ياعم مطرود ... عارف انها ممكن تسبب لك مشكلة كبيرة كمان ..... بس مش كده ياعم مطرود .... مش كده ... حبه حبه
مطرود : ده شيكات بمائة الف ياذكى ..... يعنى لو باعونى انا وانت والعرائس فى السوق السوداء ... مش حنجيب ميت الف سحتوت حته
ذكى : طب وتبعونى انا ليه ... وانا مالى .... هههههههه روق كده ياعم مطرود ... بس ماتزعلش منى انت الغلطان ... بقا ياراجل فى حد يكتب شرط جزائى ميت الف فى عقد بعشرين الف
مطرود : اصلك متعرفش المسرح ده كنت بحلم بيه اد ايه ... كان حلم حياتى انى اقدم فيه ولو عرض واحد .... واهه جت الفرصه على طبق من دهب
ذكى : قصدك طبق من طين .... ماتزعلش منى يعنى ياعم مطرود ... اينعم انت اللى مربينى ومعلمنى . وانت اللى حببتنى فى الماريونت والعرائس ... بس برده ياعمى ... ماخاب من استشار ... كنت خدت رائيى
مطرود : اهه اللى حصل ياذكى ياابنى ... المهم اننا لازم نقدم العرض فى ميعاده
ذكى : من الناحية ده اطمئن .... بس انا عايزك تريح كده وماتشغلش دماغك بحاجة
مطرود : ماينفعش ياذكى
ذكى : وايه اللى قل نفعه
مطرود : ومين بس اللى حيشتغل لما انا اريح
ذكى : امال انا بعمل ايه ... يعنى سايب بيتى واهلى وشغلى وجاى عامل لجوء فنى عندك هنا ... علشان اسمع منك البوةقين دول
مطرود : ياابنى انت لسه عضمك طرى
ذكى : حلو ... طرى يعنى اعافر ولا ينكسر .... ماتشلش هم ... اشرب ... اشرب
" يناوله كوب الماء "
ذكى : ها بقا ياسيدى .... كابوس النهاردة كان ايه ..... كوميدى .... ولا تراجيدى .... ولا فنتازيا ولا ايه
مطرود : " ضاحكا " يخرب بيت شيطانك ياذكى .... دائما كده بتحب تهزر
ذكى : كان ايه
مطرود : كان مأساوى .... اكبر من مأساى شكسبير
ذكى : ليه .... حلمت ان تيتانيا كانت بتطاردك فى حلم ليلة صيف
مطرود : العن ... ده كان كابوس ليلة صيف ... ياريتها كانت ملكة جن واحدة كانت تبقى سهلة ... انا حلمت ياذكى ... ان كل عرائس الماريونت بتاعتى بتطاردنى .... حلمت انهم حاسين بالظلم .... حلمت انهم بيتهمونى انى ظالمهم
ذكى : تحب افسر لك حلمك
مطرود : تعرف تفسر احلام ياذكى
ذكى : من واقع خبرتى فى عالم تفسير الاحلام .... اقدر اقولك ان الحلم بتاعك ده ملوش غير تفسير واحد
مطرود : ايه هو ياعم ذكى
ذكى : انك ليل نهار قاعد وسط عرايسك مش بتشوف غير خيوط الماريونت ... مش بتشم غير ريحة البوية .... مش بتسمع غير صوت طقطقة الخشب ... عايز تشوف حلم ايه وانت فى الحالة ده .... انا لو منك اخرج شوية .. اشم شوية هوا ... اتفسح .. اعلق بنت ... هى ده الحياة ... عيشها من قلبك ... اصلك مش حتعيش غير مرة واحدة ... ياتعيشها كما يجب ياما بلاها
مطرود : عندك حق والله ياذكى .... بس اخرج ازاى وانا ورايا شغل متلتل ... بقولك لو معرضتش فى ميعادى حدفع ميت الف
ذكى : والله انت حيرتنى معاك ياعم مطرود .... وكمان تعالى هنا ... مش انا قايلك استنانى لما ارجع .... يعنى انزل اجيب لك اكل ارجع الاقيك نايم
مطرود : والله كنت تعبان ياذكى ... المهم فين الاكل اللى جبته
" يتجه ذكى مكان بقايا الطعام "
ذكى : انا اكلت ... بصراحة كنت جعان ... بس سبت لك منابك ... كنت سايبه هنا " يلاحظ اختفائه " الله .... الله ... هو راح فين
مطرود : " يقف مذعورا " دور كويس ياابنى
ذكى : انا متاكد انى كنت سايبه هنا جنب ماكينة الخياطة
مطرود : شوفه طيب يكون وقع تحت الماكينة ولا حاجة
ذكى : مفيش حاجة ياعم مطرود .... انا حاطه هنا بنفسى
مطرود : ياخبر ابيض لو يكون اللى فى دماغى صح ... معقولة يكونوا هما
ذكى : يمكن تكون قطة دخلت اكلته ولا حاجة
مطرود : لا مش القطة ... انا عارف كويس انها مش القطة
ذكى : قصدك ايه ياعم مطرود .... لا لا ياراجل ازاى تفترض فيا سوء النية كده ... قولت لك سبت لك منابك
مطرود : ولا قصدى عليك انت كمان
ذكى : قصدك يكون ..... لا لا لا ياعم مطرود ... احنا فى العاشر .. يعنى لا يمكن يكون حرامى قدر يطلع لنا
مطرود : حقولك ايه انت مش حتفهم
ذكى : على اى حال ملحوقة ..... انا حنزل اجيب لك اكل تانى ... بس اوعى ارجع الاقيك نايم
مطرود : لا استنى .... متسبنيش لوحدى
ذكى : دقايق وجاى ياعم مطرود
" يخرج ذكى "
مطرود : استنى ياذكى .... ماتسبنيش لوحدى ... مشى .... ايه يامطرود انت حتصدق الخزعبلات ده برضه ... ده كان حلم ياراجل ... حلم ايه ... انا متاكد انى شفت بعينى ... بس انا كنت نايم ... هو فى حد بيشوف وهو نايم ومين اللى اكد لك انك كنت نايم ... مش جايز من التعب مقدرتش تعرف ان كنت نائم ولا صاحى .... لا بس انا كنت نائم ... وده كان حلم ... استر يارب ... امال الاكل راح فين ... يمكن زى ذكى مابيقول قطة .... استر يارب
" يتحرك مطرود فيسقط احد الاشياء على الارض فيفزع "
مطرود : وبعدين بقا .... انا بقالى عشرين سنة فى الشقة ده .. عمر ماحصل معايا حاجة زى ده ... ولا عمرى حسيت ... ده انا حتى عمرى مافكرت ان يكون فى حاجة اسمها كده
" يتفحص العرائس "
مطرود : استهدى بالله كده يامطرود .... انت حتعمل زى العيال الصغيرة وتقول عفاريت .... يجعل كلامنا خفيف عليهم .... لا ياعم مابدهاش
انا اول مايجيى بتاع الروبابكيا .. حبيع له العرائس ده .... طب والميت الف ... وبعدين بقا
سليم افندى : مش قلت لك همجى ومعفن كمان .... عايز يبعنا لولا الفلوس
خفير النقطة : اما انك عليك كلام يااخى .... طب ماانا عارف انه معفن
مطرود : مين اللى بيتكلم .... مين اللى بيتكلم
" يتحرك ناحية سليم افندى والغفير فيتحرك خلفه الغازية والزمار ... ينتبه الى الغازية والزمار "
مطرود : " يتفحص الغازية " مين اللى بيحرك العرائس
الغازية : ايدك ... جاك كسر ايدك ... ممنوع اللمس ياريس
مطرود : يانهار ابيض ... انا باين عليا تعبان قوى النهاردة .... تعبان ايه ... والله العظيم العروسة ده اتحركت واتكلمت
العرائس : جياع جياع جياع ... ياويل من اشبع بطنه ونحن جياع ... ياويل من اهملنا لكل ضياع .... جياع جياع جياع .... هبنا ناكل من لحم الظالم .... حتى لو كان بطعم المر ....
" تهجم العرائس على مطرود الذى يصرخ "
مطرود : الحقنى ياذكى
" اظـــــــــــــــــــــــــــــــــــــــــــــــــــــــلام "
" نفس التكوين " مطرود " مقيد على كرسيه والعرائس تتفقد المكان "
------------------------------------------------------------
مطرود : انت رحت فين ياذكى ..... تعالى شوف اللى حصل لعمك مطرود .... العفاريت خلت العرائس تكتف عمك مطرود ياذكى ...... يجعل كلامنا خفيف عليهم .
سليم افندى : طب وبعدين .... كتفناه وبعدين
خفير النقطة : اما انك عليك كلام يااخى ... احنا نسحبه ع النقطة مش عايزة كلام
سليم افندى : يووووه ... انت مش فاهم اى حاجة
" فى جانب اخر من المسرح "
بائع العرقسوس : ده ريحة شرابه العن من ريحة شرابك .... انا خلاص مش حكلمه ياصاحبى مش حخليه ينقلنى فى حكاية جديدة
فتوة المولد : ايه العطف اللى نزل عليك ده
بائع العرقسوس : قدرى بقا .... وكمان ريحة شرابك ارحم
" جانب اخر "
الزمار : هما عملوا فى استاذ مطرود كده ليه
الغازية : الجدع ابو نضارات الحليوة
اللى هناك ده " مشيرة الى سليم افندى " بيقول كده اسمها ثروة
الزمار : ايوة ايوة قصدك ثورة
الغازية : ايوة هى ثورة ده .... احنا مالنا .... بقولك
الزمار : قولى
الغازية : ماترقصنى .... وسطنى وجعنى من العطلة ... حافض دورك فى رواية العمدة
الزمار: ايوة
" يبداء الزمار فى العزف والغازية تغنى وهى ترقص "
الغازية : ياحضرة العمدة .. ابنك حميدة ضربنى بالسفندية .... وقعت على صدرى ضحكوا عليا زملاته الافندية
الزمار : سلامتك يا قشطه
مطرود : انا بس لو اعرف .... انتم عايزين منى ايه
سليم افندى : هش ... اسكت خالص .... دلوقتعى تعرف كل حاجة
مطرود : طب حاسب حاسب ... القماش ده جديد
خفير النقطة : اما انك عليك كلام ياجدع .... قماش ايه بقا حد يبقى مزنوق زنقتك ده ويقول قماش
بائع العرقسوس : ياجماعة عايزين نخلص قبل ذكى مايرجع
فتوة المولد : ايوة .. صح ... ساعات بتعرف تفكر
سليم افندى : احنا مش بنخاف من حد .... ذكى كمان حيدخل ضمن اهداف الثورة
مطرود : ثورة .... ثورة ايه ؟
الزمار : هو ده السؤال اللى نفسى اعرفه .... هى ثروة ولا ثورة
الغازية : بتسال ليه ... اه يابختى المنيل ... واحنا مالنا
الزمار : الله ... ماانا معاكى اهه ياقشطة
الغازية : طب رقصنى ... حافض دورك فى اول رواية عملناها سوا
الزمار : امال
" يبداء الزمار فى العزف والغازية تغنى وهى ترقص "
الغازية: ياتجيب لى شيكولاته لا بلاش ياولا .... روح رجع البطاطة لا بلاش ياولا
مطرود : ثورة ايه ده
بائع العرقسوس : حالا .... حنتلى عليك بيان الثورة
سليم افندى : هو مين اللى حيتلى
بائع العرقسوس : انا
سليم افندى : ياسلام ... وبعد كده تبقى الريس على الجاهز
بائع العرقسوس : وماابقاش الريس ليه بقا ان شاء الله ... مؤهل عالى ومثقف ... غيرش بس انا اللى مش لاقى شغل فسرحت بعرقسوس
سليم افندى : يااخ بائع العرقسوس ... انا معنديش اعتراض على شغلتك ... بس انا الىل مخطط
بائع العرقسوس : ياسلام لوحدك
خفير النقطة : ايه ياجماعة .... اما انكم عليكم كلام .... ريس مسن وبتاع مين ... كلنا هذا الرجل
الزمار : الحقى ... دول اتخانقوا تانى
الغازية : يالهوى ياما ... واحنا مالنا
الزمار : مالنا ازاى .... دول بيقوموا بثورة
الغازية : ياخويا قوم انت بثورة معايا الاول ورقصنى وبعدين شوف ثورتهم ..... يالا رقصنى على نشيد وطنى بمناسبة الثورة
" يبداء الزمار فى العرزف والغازية ترقص وهى تغنى "
الغازية : خلى السلاح صاحى صاحى صاحى .... لو نامت الدنيا صاحى مع سلاحى
مطرود : انتم باين عليكم بتهرجوا .... ولا الظاهر انا نايم وبحلم
فتوة المولد : بيقولك بيهرجوا .... تهريج ايه ياعم انت احنا مش بتوع تهريج
خفير النقطة : اما انك عليك كلام .... تهريج ايه واحنا برده بتوع تهريج ياعم الحاج .... بقولك ايه ... معاك بطاقة
بائع العرقسوس : خلصونا ياجماعة مين حيتلى بيان الثورة
سليم افندى : انا
بائع العرقسوس : وليه مااكنش انا
فتوة المولد : لا انت ولا هو .... انا
خفير النقطة : اما انكم عليكم كلام .... طب ماتجربونى انا
الزمار : انا صوتى حلو
الغازية : انا صوتى احلى ... على الاقل البيان يطلع متلى طرى كده
سليم افندى : قرعة .... زن .... نعمل قرعة
" يجتمعون فى منتصف المسرح "
العرائس : زن حلاوة بترن
سليم افندى : انا الطالع
بائع العرقسوس : ده كوسة
فتوة المولد : باطل باطل
خفير النقطة : اما انك عليك كلام يااخى ... انت الطالع مين ده كوسة بقا
سليم افندى : هل تشكون فى نزهتي الانتخابية
بائع العرقسوس : بصراحة بقا اه .... احنا بنطعن بالتزوير .... القرعة ده مش نزيهة بالمرة
سليم افندى : لقد قال القدر كلمته .... وانا اللى حتلى بيان الثورة
بائع العرقسوس : طيب ياعم اتلهى
مطرود : والله ماانا فاهم حاجة ..... يالهوى يااما ... طب فكونى فكونى علشان اعرف اخد وادى معاكم كده فى الكلام
بائع العرقسوس : منقدرش يااخ مطرود ... فحسب قانون الطوارىء ... لازم نحطك تحت الحراسة .... حطه تحت الحراسة ياخفير
سليم افندى : بيان الثورة
" الكل يستمع باهتمام مبالغ فيه "
سليم افندى : بعد ايام عصيبة عشنا فيها كلعبة فى ايادى الغير ... نتحرك وقت ما شاؤا .. نجوع وقت ما شائوا ...ونشبع وقت ماشائوا .... بعد ايام من الذل والمهانة وقلة الحيلة .... قررنا التغيير ... قررنا نحن عرائس الماريونت .. ان نكون احرار فى هذا العالم ان نقطع كل احبال التحكم فينا ان نعيش احرار بدون قيود او سجون .... قررنا ان يكون لنا الحق فى اختيار حكايانا كى نحافظ على تاريخ الماريونت من ايدى العابثين .... هذا وبالله التوفيق
مطرود : طب وانا ذنبى ايه
بائع العرقسوس : ازاى يامطرود ذنبك ايه .... ده انت الذنب كله
خفير النقطة : اما انك عليك كلام يااخى ..... ذنبك ايه ازاى انت من ضمن العابثين
مطرود : انا
فتوة المولد : ايوة ... مش بس كده ... ده انت كمان بتقدمنا للعبث بايدك .... مش عايز كلام كتير احسن حخلى الخفير يعسفك
مطرود : انا مش فاهم حاجة
الزمار : امن ياعم مطرود .... ولا انا
الغازية : ملناش دعوة احنا ..... ده سياسة عليا .... حافض دورك فى رواية قبل عمونل
الزمار : ايوة
الغازية : طب رقصنى ....
" يبداء الزمار بالعزف والغازية ترقص وهى تغنى ط
الغازية : حبيبى ولا على باله شوقه اليه ولا شاغل باله انادى عليه وليالى كتير افكر فيه واحن اليه ولا دارى .... حبيبى ايهاب توفيق ده
مطرود : هو ده جزاتى .... جزاتى انى بصنعكم ... بجمعكم من بواقى الخشب .... جزاتى انى بخليكم تقفوا على افخم مسارح .... وتحكوا اعرق الحكايات
سليم افندى : اخ مطرود .... تقدر من النهاردة تنسى الماريونت وعمايله .... وانصحك تشوف لك شغلة تانية
مطرود : الماريونت ..... الماريونت ده فن وانت فنانين
بائع العرقسوس : يووووه ... شبعنا من الكلام الفاضى ده .... كلها شعارات شعارات
مطرود : طب مش انتم خلاص تليتم بيان الثورة .... فكونى بقا
خفير النقطة : نفكوا ياريس " لسليم افندى "
سليم افندى : فكوه
بائع العرقسوس : استنى استنى .... هو مين اللى ريس
خفير النقطة : سليم افندى
بائع العرقسوس : تتلى البيان ده اه .... لكن ريس لسه فيها كلام
سليم افندى : مش انا فزت فى القرعة
بائع العرقسوس : لا ياحبيبى القرعة ده كانت علشان البيان
سليم افندى : ماهو معروف اللى يتلى البيان يبقى الريس
بائع العرقسوس : مش شرط
مطرود : طب فكونى .... حرام عليكم حيجيلى الضغط
خفير النقطة : اما انك عليك كلام ..... مش شايفهم فرشوا لبعض الملاية .... حد يفكر فى الضغط دلوقتى
سليم افندى : فكوه
مطرود : ايوة كده .... كده نقدر ناخد وندى فى الكلام والقعدة تحلى
سليم افندى : اخ مطرود .... لازم تعرف انك دلوقتى مبقتش مطرود فنان الماريونت ولا احنا بقينا عرايس الماريونت اللى بتلاعبهم .... احنا بقينا احرار زيك تمام يعنى انت حر واحنا احرار
مطرود : ياجماعة لا .... انتم فاهمين غلط .... كل ماهنالك ان لازم كل واحد ياخد دوره فى اللعبة انا اللى بعمل العرائس وانتم العرائس .... ادى كل الحكاية ... ولازم اللى بيعمل العرائس .... هو اللى يحرك العرائس
خفير النقطة : اما انك عليك كلام يااخى ..... انا مش عارف انت بتتكلم ياما ليه
بائع العرقسوس : خلاص .... انسى اننا عرائس .... احنا بنرفض نتحرك من تحت ايديك
فتوة المولد : ولازم تعرف اننا من النهاردة احرار
مطرود : ياعالم نفوحى حينفجر .... انا فى حلم ولا فى علم ياربى
الزمار : لا حلم ولا فليم .... ده حقيقة والله حقيقة
الغازية : ياابنى حتودى نفسك فى داهية .... انا قلت لك ايه ... رقصنى
الزمار : ارقصك ازاى ... والعرائس فى حالة طوارى
الغازية : ياحسرة اللى مارقصتنى والعرائس فى حالة روقان
مطرود : طب وهو انا يعنى كنت مسيطر عليكم فى ايه .... ده شغل ياجماعة وبره الشغل انتم احرار
بائع العرقسوس : افهمه اهداف الثورة
سليم افندى : ولو انها من اختصاص قائد الثورة بس يالا
بائع العرقسوس : بص يااخ مطرود .... احنا مش زعلانين منك لاسمح الله ... ولا بنعلن عليك العصيان .... بس كل ماهنالك ... اننا زهقنا من وضعنا .... من اسمنا ... من شغلنا ... من حالنا ... من مالنا .... فقررنا التغيير وقامت الثورة
مطرود : طب وانا ذنبى ايه ... هى الثورة بتيجى على الغلابة برده ... الكلام ده لو كنت حاكم عليكم ... ان كنت سالب قوتكم .... ان كنت سارقكم .... لكن انا والله غلبان
غفير النقطة : اما انك عليك كلام يامطرود .... ده غبى بقا ولا بيتغابا ..... نفهموه ازاى ده بس يااخوانا
سليم افندى : احنا غلطانين من الاول اننا اتكلمنا معاه ... كان المفروض نعلن التمرد ونكسر القيود ونقطع القيود من غيبر كلام
بائع العرقسوس : ازاى الكلام ده .... ده بقا مش ديمقراطية .. لازم يعرف كل فرد اللى ليه واللى عليه احنا ثورتنا تدعو الى الديمقراطية وتسوية الرؤؤس
الغازية : " تزرغد " يسلم فمك ويخليك لامك اهه ده الكلام والا فلا ... ياحلاوتك ياجمالك ... ماتيجى
بائع العرقسوس : اجى فين ياولية
الغازية : ترقصنى
بائع العرقسوس : اوعى كده ... خليك معايا انا يامطرود ... ايه مفهوم الثورة فى نظرك ... غضب ... تصفية حسابات ... رغبة فى التغيير ... انتفاضة ... هتافات
مطرود : الثورة .... الثورة لما قامت رجعنا احرار ... كان هدفنا فيها التغيير
سليم افندى : واحنا هنا يامطرود مش بنثور عليك لانك حاكمنا لا.... الثورة مش للحاكم بس .... كل حى داخله ثورة ... ثورة على نفسه ... ثورة على كل غلط فى حياته ... ثورة على كل قيد .... على كل سجن .... على كل كابوس بيطارد حلمه .... هى ده الثورة
الغازية : " تزرغد " ايوة كده .... انت عاجبنى من الصبح بنضاراتك ده .... ماتيجى انت ترقصنى
الزمار : كده ياقشطة .... ماشى ده اخرت مشيي معاكي
مطرود : على كل قيد ... على كل سجن ... على كل كابوس بيطارد حلمى ... ثورة
سليم افندى : احنا اسفين يااخ مطرود .... مش حنقدر نحقق حلمك ونعرض على مسرح كان نفسك تعرض عليه .... بس اوعى تعتبرنا كابوس بيطارد حلمك .... دور على كابوسك وثور عليه
" تختفى العرائس بينما يقف مطرود شاردا "
مطرود : اثور .... على كل قيد ... على كل سجن ... على كل كابوس بيطارد حلمى .... على كل قيد ... على كل سجن ... على كل كابوس بيطارد حلمى
" يظلم المسرح لبرهة ... ويفتح باب الورشة ليدخل ذكى حاملا لفافات الطعام ومطرود ملقى على سريره مغط فى نوم عميق والعرائس واقفة فى اماكنها "
ذكى : يالهوى يااما ..... تانى ياعم مطرود .... تانى كل مرة تعملها فيا .... انزل اجيب الاكل وارجع الاقيك نائم ... القصد ... اصحيه دلوقتى ولا ايه .... ماانا لو صحيته حيقعد يزعق لى .... وعقبال مااهديه .. حيكون الاكل برد ... ولو مصحتهوش ... حيزعل منى وحيزعق معايا برضه لما يصحى .... وبعدين فى الحيرة ده بقا .... ياعم مطرود .... انت ياعم مطرود .... اصحى ياعم مطرود
مطرود: " يصحو فزعا " خير......خير.... فيه ايه
ذكى : اهدى اهدى ياعم مطرود ..... انا مش قايل استنى لما ارجع ياعم مطرود
مطرود : هو انا نمت
ذكى : وشخرت كمان
مطرود : " يتامل العرائس ويضحك "
ذكى : كويس انك صاحى فايق .... يالا كل
مطرود : الاكل !؟
ذكى : بدل اللى القطة اكلته .... انا شفتها على السلم .. واخدة الكيس ونازلة ... يالا بالهنا والشفاء ... حلال عليها رزقها
مطرود : القطة اكلت الاكل
ذكى : ايوة .... حتيجى تاكل ولا اكل انا لوحد بينى وبينك ... انا جعت من نزول وطلوع ومرواح ومجى .... جبت لنفسى فطيرة انا كمان .... جعان ياعم مطرود
مطرود : وجبت فلوس زيادة منين
ذكى : خدت من فلوسك ونبقى نتحاسب
مطرود : من غير ماتقولى
ذكى : جعت ياعم مطرود
مطرود : كنت لازم تستاذن
ذكى : كنت حتقولى لا
مطرود : تقوم تخطف حقك
ذكى : ماهو برده حقى ياعم مطرود .... احنا مش حنتحاسب اخر العرض
مطرود : برافو عليك ياذكى ...... هى ده الـ.......
ذكى : المفروض النهاردة تريح بدرى ... مع انك نايم طول اليوم ....... ورانا شغل متلتل بكره
مطرود : بكره ..... بكره شم النسيم ياذكى ... بيكون الجو لطيف ... والفسحة فى اليوم ده ما تتعوضش ... ايه رايك ... نخرج ... نتفسح ... نعلق لنا مزتين .... هى ده الحياة
ذكى : طب والشغل ياعم مطرود
مطرود : الدنيا ماطرتش ياذكى ... الدنيا ماطرتش .... وبعدين يااخى يستنوا شوية ... كده كده العرض حيطلع فى ميعاده .... كل حاجة معمول حسابها ياذكى .... لزمتها ايه شدة الاعصاب والتوتر والقلق ... اسمع ياذكى ... انت دلوقتى تنزل تجيب لنا بصل وبيض وفسيخ ..... بكره لازم ننطلق ياذكى
" يرجع ذكى بظهره خارجا من باب الورشة غير مصدقا "
مطرود : عيش ياابن ادم مش ماريونت .... عيش من غير قيود ولا سجن ... ارفض خيوط تحركك ... ارفض ايادى تقل راحتك .... طب هما اهون ... هما عارفين انهم ماريونت .... لكن انت عارف انت ايه
ســـــــــــــــــــتار