بسم الأب والابن والروح القدس الله واحد آمين
كنيسة الشهيد العظيم مارجرجس
عين شمس الشرقية
سيناريو وإخراج
ماجد بطرس سام
احداث هذه المسرحية هى احاث حقيقية حدثت فى حى شبرا بالقاهره فى عام 1958 ، وهى قصة شاب مسيحى اسمه مجدى يسّ عاش فى احضان الكنيسة وتربى بها ثم انحرف الى طريق الخطية وكادت روحه ان تهلك لكن الله امين وصادق لم ينسى محبته الاولى ولم يشاء ان تهلك روحه فارسل اليه رجل قديس هو البطل الحقيقى لهذه القصة هو :-
القديس القمص / ميخائيل ابراهيم
هذا القديس قال عنه قداسة البابا شنوده فى يوم صلاة الجناز على روحه الطاهرة :- (( كان سفيرا من السماء عاش على الارض ثم عاد الى السماء ..................................... )) ثم بكى قداسة البابا ولم يستطيع ان يكمل عظته ،،
ولشدة محبة قداسة البابا لهذا القديس فضل ان يبقى الجسد المقدس لابونا ميخائيل ابراهيم بالكاتدرائية المرقسيه بالعباسية .
الرب يجعل هذا العمل سبب خلاص وبركة لكثيرين بصلوات ام النور العذراء مريم والقديس العظيم مار مرقس الرسول الطاهر وابونا ميخائيل ابراهيم .
ويحفظ لنا وعلينا حياة ابينا الطوباوى القديس البابا شنوده الثالث وشريكه فى الخدمة الرسولية ابونا الاسقف المكرم الانبا تيموثأؤس .
لالهنا كل المجد والكرامة الى الابد امين
المخرج ،،..
{{ ليكن كل عمل يا رب لمجد اسمك القدوس }}
ملحوظة هامة :-
هناك بعض التغييرات الثانوية فى الاسماء والاحداث بما يتناسب مع طبيعه العرض المسرحى ودون الاخلال بالاحداث الاساسيه والمؤثره فى القصة الحقيقية .
المراجع :-
1/ الكتاب المقدس
2/ كتاب (( القمص ميخائيل ابراهيم )) لقداسة البابا شنودة
3/ كتاب (( لقــاء )) للقمص اشعياء ميخائيل
الشخصيات :-
** العذراء مريم
** ابونا ميخائيل ابراهيم
** مجدى يسّ
** الاستاذ/ يسّ صدقى ( والد مجدى )
** والدة مجدى
** مارى ( اخت مجدى الصغرى )
** اصدقاء مجدى {{ سامى (( قائد المجموعة )) & عماد (( امين الصندوق )) & منير }}
** مأمور السجن
** خلف ( شاويش السجن )
** عوضين ( عسكرى فى السجن )
** الاستاذ / فاروق عزيز (( المحامى ))
** القاضى
(( فى معظم مشاهد المسرحية يكون المسرح مقسم الى نصفين (( الجانب الايمن )) & (( الجانب الايسر )) وذلك للتعبير عن احداث مختلفة فى ازمنة مختلفه او احداث مختلفة فى نفس الوقت ومع اختلاف الاماكن
المشهد الاول
تفتح الستارة (( الجانب الايمن )) مشهد غرفة الجلوس لمنزل متوسط الحال يتوسطه صورة للسيده العذراء
(( الجانب الايسر )) ركن فى مقهى به ترابيزه وعدد 4 كراسى ويكون موجود سامى وعماد ومنير
سامى يا جماعة وجود مجدى وسطينا مهم جدا
منير انا مش شايف ايه الاهمية اللى تخلينا نقبل واحد زى مجدى فى الشله معانا
عماد ده حتى واد فافى وخواف ومايعجبنيش
سامى انا عارف كل الكلام ده لكن مجدى طالب ملتزم وسمعته حلوه وبينجح بامتياز كل سنه
منير طيب يا اخى مش خايف علينا نتعدى منه
عماد انا عارف ده حتى الناس تاكل وشنا وتقول علينا – بعد الشر يعنى – اننا بنذاكر
سامى يا جماعة افهمونى احنا سمعتنا بقت زى الزفت وسط الكليه
عماد عادى ايه المشكلة
منير دى حاجه تشرفنا وشهاده نعتز بيها
سامى الناس بقت تخاف مننا ومحدش عاوز يصاحبنا ولو فضلنا كده الكلام ممكن يوصل البيوت عندنا
عماد يا نهار اسود
منير انا مايفرقش معايا لان اساسا مفيش حد فى البيت علشان الكلام يوصله
سامى لكن يفرق معانا احنا
عماد طيب ومجدى ممكن يعمل لنا ايه
سامى مجدى هايحسن الصوره شويه والناس تبطل تتكلم علينا لانهم بيحبوا مجدى ومحدش يقدر يقدر يجيب سيرته بحاجه وحشه
عماد يا سلام على الدماغ المتكلفه تستاهل سيجاره على الكلام الحلو ده (( يضع يده فى جيبه )) .
سامى مش وقته علشان مجدى جه بلاش نخوفه من اولها
( يدخل مجدى ومعه بعض الكتب ))
مجدى مساء الخير
الجميع مساء النور
عماد تعاله جنبى يا قمر
مجدى ( يجلس بجوار عماد ) متشكر
منير انت شايل كتب ليه هو فيه محاضرات بالليل
مجدى لاء بس متفق مع سامى نذاكر عند عماد فى البيت
عماد يا ساتر يارب ليه كده يا مجدى يا حبيبى
سامى مظبوط ، لكن انا عندى مفاجأة ليكم
منير احب المفاجآت
سامى معايا بون باربع تزاكر لسينما مترو بيقولوا فى فيلم جامد جدا ومكسر الدنيا ايه رايكم
منير وعماد موافقين
مجدى والمزاكره يا جماعة
سامى المزاكره مش هاطير ولسه السنه طويله يلا بينا
{{ يقوم الجميع ويخرجوا .................. وبعد لحظات تدخل والدة مجدى وتجلس على احد الكراسى وبعدها والد مجدى }}
يسّ وبعدين معاكى يا ام مجدى هاتفضلى قلقانه كده على مجدى لحد امته ده كبر وبقى راجل
ام مجدى مهما كبر هافضل قلقانه عليه مش ابنى
يسّ ماهو قالك انه سهران يذاكر مع زمايله وهايتاخر
ام مجدى انا قلبى مش مطمن لزمايله دول
يسّ ابنك متربى كويس وابن الكنيسه ماتخافيش عليه
ام مجدى ايوه لكن المعاشرات الرديئة تفسد الاخلاق ألجيده ومن ساعة مجدى ما اتصاحب على اللى اسمه سامى وشلته وهو مش بيروح الكنيسه ومهمل كليته وكمان بقى كل يوم سهر وتاخير
يسّ طيب قومى دلوقتى وانا هابقى اكلمه بعدين وصلى له ربنا يبعد عنه عدو الخير
ام مجدى يارب احرسه ، يا عدرا ماتسيبيهوش انتى عارفه هو بيحبك قد ايه ودايما بيطلب شفاعتك
{ يخرج يسّ وخلفه ام مجدى } ،،،،، { يظلم المسرح لثوانى ويضاء مره اخرى وتدخل الشله كلها ومعهم مجدى فى الجانب الايسر }
مجدى السهره فين النهارده
سامى امين الصندوق يقلنا الميزانيه تسمح نروح فين
عماد الفلوس مقصره جدا واحنا مصاريفنا كتير
مجدى احنا مش اتفقنا اخر مره نقول فى البيت عند كل واحد اننا عاوزين فلوس علشان الدروس والكتب الخارجيه محدش عمل كده غير ولا ايه
منير كلنا جبنا فلوس قد بعض لكن مش عارف بتروح فين
عماد احنا مصاريفنا كتير ، السجاير ، والشرب ، والصرف على البنات ، دى قزازة الخمره تمنها زاد الضعف
منير الناس ما بقاش عندها ضمير
سامى والحل يا جماعة هانعمل ايه دى الاجازه قربت يعنى لا فى دروس ولا كتب
مجدى صحيح يعنى ما فيش حجه ناخد بيها اى مصاريف زياده {{ فترة صمت }}
سامى انا عندى حل لكن صعب شويه
منير ما فيش حاجه صعبه احنا نفوت فى الحديد
سامى فاكرين الفيلم اللى شفناه فى سينما مترو من شهرين لما العصابة سرقت البنك
مجدى عاوزنا نسرق البنك الاهلى
منير لاء بلاش الاهلى نسرق البنك الزمالك
سامى انا مش قصدى نسرق البنك المهم المبداء موافقين ولا لاء {{ فترة صمت }}
عماد انا موافق وعندى المكان
سامى فين
عماد الجيران اللى تحتينا كل صيف بيسافروا اسكندريه عندهم شقه هناك وبيسيبوا مفتاح شقتهم عندنا
لو عملنا نسخه على المفتاح ودخلنا الشقه وهمه مش مسافرين واخدنا حاجه صغيره كده نفك بيها زنقتنا
منير وافرض عرفوا هاتعمل ايه
عماد مش ممكن يعرفوا دول عندهم دهب كتير قوى وانا شفته وعارف مكانه
منير خلاص انا موافق
سامى يعنى محدش سامع صوتك يا مجدى
مجدى العملية مش سهله وفيها خطوره كبيره
سامى بالعكس العمليه مضمونه جدا ومش ممكن حد يشك فينا ، ايه رايك
{{ يشير مجدى بالموافقه براسه دون الكلام }}
سامى ماشى يبقى كلنا موافقين واول ما جيران عماد يسافروا هانفذ الخطه ، وبمناسبه النشاط الجديد للشله انا عازمكوا فى البيت عندى ياللا بينا
{{ يخرج الجميع وبع لحظات يدخل مجدى من الجانب الايمن ويجلس فى هدوء وخلفه تدخل اخته مارى }}
مارى مساء الخير يا مجدى
مجدى مارى ........ مساء النور انت ايه اللى مصحيكى لحد دلوقتى
مارى كنت مستنياك
مجدى خير فى حاجه
مارى اصل ابونا ميخائيل سأل عليك النهارده فى القداس
مجدى ابونا ميخائيل ........................
مارى بيقولك انت ليه بطلت تيجى الكنيسه وتلبس شماش وتتناول
مجدى البس شماس واتناول ............ز
مارى كمان امين خدمة الشباب سالنى عليك وكل اصحابك فى الكنيسة بيقولوا ..............
مجدى بيقولوا ايه كملى كلامك
مارى بيقولوا انك من ساعة ما اتعرفت على الشله اللى انت ماشى معاها وانت اتغيرت ومبقتش تروح الكنيسة ولا الجامعة
مجدى مين اللى قالك الكلام ده
مارى مش مهم مين المهم ان انا كمان ملاحظه انك اتغيرت مش مجدى بتاع زمان اللى كان بيضحك ويهزر معانا وفى اخر اليوم نقرا الكتاب ونصلى مع بعض ايه اللى حصلك يا مجدى انا خايفه عليك
مجدى ما تخافيش روحى نامى لو سمحتى وسيبينى لوحدى
مارى طيب يا مجدى براحتك تصبح على خير
مجدى وانتى من اهله
مارى ياريت تفتكرنى فى صلواتك الامتحانات على الابواب {{ تخرج مارى }}
مجدى صلواتى ............. ابونا ميخائيل سأل عليه ياه ........ الكنيسه وحشتنى قوى لكن اروح الكنيسه ازاى بعد كل اللى باعمله دانا لسه جىّ من .......... وبعدين اروح اتناول ما ينفعش ... ما ينفعش
{{ يخرج مجدى ويظلم المسرح لثوانى }} {{ تظهر الشله كلها من الجانب الايسر وتجلس فى نفس مكانها }}
سامى مش معقول انا حاسس ان الفلوس مركبه جناحات
عماد مصاريفنا كتير جدا
منير الحاجه مبقاش فيها بركة
مجدى والحل هانجيب فلوس منين
عماد احنا لازم نوقف نشاطنا شويه اليومين دول لحد ما الموضوع الاخير يعدى على خير
سامى عندك حق لغاية ما نعرف التحقيقات ها تقول ايه
منير فعلا خاصة وان فى اتنين اتقتلوا اخر مره
مجدى وطى صوتك هاتودينا فى داهيه
سامى فى ايه يا منير انت شارب حاجه
عماد انا عندى امل تتقيد ضد مجهول زى كل مره
مجدى مش بالبساطه دى اللى اتقتلوا فيهم واحد ظابط
سامى بلاش السيره دى شوفوا موضوع الفلوس هادبرها ازاى
منير انا عندى مكان جديد وفى منطقه بعيده وهاديه يعنى العمليه مضمونه ميه فى الميه
مجدى انت متاكد ولا هاتودينا فى داهيه
منير بقولك مضمونه ميه فى الميه
سامى اذا كان كده مافيش مانع
منير بس فى مشكله
عماد من اولها مشاكل وتقولى مضمونه
منير دى مشكله بسيطه كل الموضوع اننا لازم ننفذ العمليه النهارده لانه بعد كده مش هاينفع
مجدى كده على طول من غير ماندرس المسأله ونشوف المكان ونحط الخطه
منير ماتقلقش كل شيء مدروس لكن المهم لازم نتحرك دلوقتى
سامى خلاص ياللا بينا وفى الطريق نتكلم على التفاصيل
{{ يخرج الجميع ويظلم المسرح لحظات & فى الجانب الايمن تدخل ام مجدى مضطربه وخلفها مارى }}
ام مجدى استر يارب .... ياعدرا ماتسيبيناش
مارى يا ماما اهدى اكيد فى غلط فى الموضوع
ام مجدى {{ وهى تجلس }} غلط ازاى يا مارى ده العسكرى جه اخد ابوكى وقال ان مجدى مقبوض عليه يبقى فى الغلط
مارى يمكن خناقه فى الشارع مع اصحابه وهاتعدى انشاء الله
ام مجدى خناقه ..... هو احنا كنا نعرف حاجه اسمها خناقات ولا اقسام بوليس الله يسامح اللى كان السبب
{{ يدخل والد مجدى فى انكساروحزن ثم يجلس دون كلام }}
مارى خير يا بابا ايه الموضوع
ام مجدى فين مجدى مجاش معاك ليه
يسّ علشان هايتعرض على النيابه الصبح وانا عديت على الاستاذ فاروق المحامى علشان يبقى يحضر معاه التحقيق وربنا يستر
ام مجدى {{ وهى تقف من مكانها }} نيابه وتحقيق هو ايه الموضوع
يسّ مجدى اتقبض عليه وهو بيسرق شقه مع اصحابه
{{ تسقط الام مغشيا عليها وتجرى مارى نحوها ...... }}
مارى ماما .........................
ســــــــــــــــــــتار
المشهد الثانى
الســـــــــــــــــــــــجن
{{ تفتح الستار على المسرح مقسم الى نصفين (( فى الجانب الايسر )) الزنزانه وبها يجلس مجدى وحيدا ((الجانب الايمن )) مكتب المأمور غرفه بها مكتب وعدد 2 كرسى
{{ العسكرى يقوم بتنظيف المكتب ويدخل المأمور }}
العسكرى صباح الخير يا افندم
المأمور انت لسه بتنضف فى المكتب
العسكرى خلصت يا افندم
المأمور طيب روح شوف شغلك
العسكرى تمام يا افندم {{ يخرج العسكرى ويدخل الشاويش خلف }}
خلف صباح الخير يا افندم
المأمور خير يا شاويش خلف فيه ايه على الصبح
خلف {{ يقدم له ورقه }} اذن بالزياره للمسجون مجدى يسّ
المأمور مين اللى عاوز يزوره ............ معقول ابونا ميخائيل ابراهيم بنفسه
خلف هوه حضرتك تعرفه
المأمور ومين اللى ميعرفوش خليه يخش بسرعه
خلف تمام يا افندم
{{ يخرج خلف ثم يدخل ومعه ابونا ميخائيل وهم ماسك بالكتاب المقدس فى يده}
المأمور {{ يقف لاستقبال ابونا ميخائيل }} اهلا وسهلا يا ابونا اتفضل
ا/ ميخائيل {{ وهو يجلس والمأمور يجلس امامه على المكتب }} ربنا يباركك يا سيادة المأمور بعد اذن حضرتك ممكن اشوف مجدى يسّ
المأمور مجدى ولد كويس وباين عليه ابن ناس محترمين لكن طيش الشباب بقى
ا/ ميخائيل ربنا قادر يغير حياته للخير
المأمور روح يا شاويش خلف هات مجدى
خلف تمام يا افندم {{ يخرج خلف }}
المأمور الحقيقه يا ابونا انا باسمع عن حضرتك انك راجل بركه وبتحب كل الناس
ا/ ميخائيل ده من زوقك يا سيادة المامور
المأمور كان ليه رجاء عندك يا ابونا
ا/ ميخائيل اتفضل انا تحت امرك
المأمور الحقيقه المدام بتاعتى تعبانه خالص ودخت بيها على الدكتره ومافيش فايده ممكن لو حضرتك تصلى علشانها يبقى كتر خيرك
ا/ ميخائيل اطمئن انشاء الله ربنا هايشفيها لك ويبارك فى حياتكم واولادكم
المأمور متشكر يا ابونا انا متاكد ان ربنا هايسمعلك لانك راجل مبروك
{{ فى اثناء هذا الحوار يظهر الشاويش خلف فى الجانب الايسر فى زنزانة مجدى ويأخذه ثم يدخل به الى المأمور }}
خلف مجدى يسّ يا افندم {{ يقف المأمور ويقف ابونا ميخائيل ايضا }}
المأمور اهلا يا مجدى ازيك
مجدى الحمد لله يا سيادة المامور
المأمور ابسط يا عم ابونا ميخائيل بنفسه جاى يزورك يا بختك يا سيدى {{ يوجه الكلام لابونا ميخائيل }} انا هاسيبكو براحتكم ولما تخلصوا انده للشاويش خلف
ا/ ميخائيل كتر خيرك يا سيادة المأمور
المأمور شاويش خلف خليك على الباب واى حاجه يأمر بيها ابونا تتنفذ فورا وانا هاعمل مرور على السجن
خلف تمام يا افندم
{{ يخرج المأمور وخلفه الشاويش خلف }}
{{ يقف مجدى مكانه دون حركه وهو ناظر الى اسفل }}
ا/ ميخائيل ايه يا مجدى واقف ليه بعيد انت مش عاوز تسلم عليه
مجدى انا مكسوف منك يا ابونا علشان الخطايا الكتير اللى انا عملتها
ا/ ميخائيل كلنا خطاه يا مجدى يا ابنى تعال سلم عليه
{{ يعانق مجدى ابونا وهو يبكى }}
مجدى سامحنى يا ابونا
ا/ميخائيل ربنا يسامحك ويسامحنى انا كمان على خطايايا الكتيره تعال اقعد يا مجدى
{{ يجلس الاثنين فى مقابل بعضهم }}
مجدى انا خلاص يا ابونا ضعت وحياتى انتهت
ا/ ميخائيل قبل اى كلام تعال نقرا الانجيل ونشوف ربنا عاوز يقولنا ايه .... بسم الاب والابن والروح القدس الاله الواحد امين ..........
{{ يقراء ابونا ميخائيل من رساله يوحنا الاولى الاصحاح الاول عدد 6 : 10
شفت ازاى يا مجدى ان ربنا بيحبك وقدم لنا دمه الطاهر لغفران خطايانا ،، ربنا هو اللى بعتنى ليك النهارده علشان افكرك بكلامه انا لم ات لادعو ابرار بل خطاه الى التوبه
مجدى لكن يا ابونا انا عملت خطايا كتير جدا انا ........ شربت سجاير , وخمر , وكدبت وحلفت كتير , و...... كل اللى ممكن تتخيله , انا ... انا .... انا قتلت واحد يا ابونا , انا قاتل قاتل {{ يبكى مجدى }} {{ فى كل خطيه يعترف بها مجدى يرشمه ابونا بعلامة الصليب }}
ا/ ميخائيل المهم يا مجدى تكون ندمان وتايب عن كل اللى عملته تعال نصلى يا مجدى ونطلب رحمة ربنا
{{ يركع الاثنين فى مواجهة الجمهور , يرفع ابونا ميخائيل راسه الى اعلى ومجدى راسه الى اسفل }}
يا من قبل اليه اعتراف اللص اليمين على عود الصليب اقبل اعتراف ابنك مجدى رده لحظيرتك لا يكون لابليس نصيب فيه ولا سلطان على روحه يا مت على الصليب من اجل الخطاه الذين اولهم انا لا ترفضنا من رحمتك بشفاعة ام النور العدرا مريم والشهيد العظيم مارمرقس . امين {{ يقف الاثنين ويقدم ابونا ميخائيل الكتاب المقدس الذى معه لمجدى }}
خد يا مجدى الكتاب المقدس ده خليه معاك واقرا فيه طول اليوم وكلامه هايحفظك ويرشدك وياريت تصلى من اجلى
مجدى انا اصلى من اجلك دانا اللى محتاج يا ابونا تزكرنى دايما فى صلواتك
ا/ ميخائيل انا هاصلى لك لكن مش هامشى الا لما اخد وعد منك انك انت تصلى من اجلى
مجدى حاضر يا ابونا لكن من فضلك حط اسمى على المذبح فى كل قداس وطمن البيت عليه وقلهم مايزعلوش منى
ا/ ميخائيل حاضر يا مجدى عاوز حاجه تانى
مجدى متشكر يا ابونا انا تعبتك معايا
ا/ميخائيل هوه ميعاد الاستئناف امتى
مجدى بعد تلات شهور
ا/ميخائيل هاحاول اجيلك قبل ميعاد الاستئناف مع السلامه يا مجدى {{ يسلم عليه }} ربنا يبارك حياتك
يا شاويش خلف {{ يدخل خلف }}
خلف تحت امرك يا ابونا
ا/ميخائيل اتفضل يا ابنى احنا خلصنا {{ يخرج الجميع }} {{ يظلم المسرح تماما }}
{{ يضاء المسرح على نفس المنظر من ناحية مدى ويكون مجدى ساجد فى الزنزانه يصلى }}
مجدى ياربى يسوع المسيح اشكرك انا غير المستحق انى اكلمك لكن لاجل الدم الذكى الكريم المسفوك على عود الصليب ارحمنى يا الهى ...... انا تركتك واهملت بيتك وكنيستك لكن انت امين وعادل ماسبتنيش لعدو الخير وبعتلى ابونا ميخائيل يرشدنى اقبل يارب توبتى بشفاعة ام النور العدرا مريم والقديس القوى الانبا موسى الاسود اللى تاب ورجع وغفرت له كل خطاياه . امين
{{ ينام مجدى فى مكانه ................ بعد فتره تظهر العذراء مريم له وتحدثه }}
العذراء السلام لك يا مجدى ابنى يسوع المسيح ارسلنى ليك علشان اقولك انه بيحبك ومات من اجلك وانا كنت باصلى علشان ينقذك الهى من طريق الهلاك ويرحمك ....... ماتخفش من الموت وكل اللى يقولك عليه ابونا ميخائيل نفذه بدون تردد ..... وانا هاجى تانى علشان اخدك وتبقى معايا ومع القديسين .... ماتخفش لان ربنا معاك سلام ......سلام ......سلام
{{ يضاء المسرح كله ويفيق مجدى من نومه }}
مجدى معقول اللى انا شفته ده العدرا تظهر لى انا ..... العدرا تظهر لخاطى زى انا ماستهيلش .... لكن دى قالت لى اسمع كلام ابونا ميخائيل يبقى اكيد ظهرت لى بصلواته فى اول زياره هاحكيله على كل اللى حصلى واكيد هايفرح زى ...... يارب اشكرك لانك مش ناسينى
{{ يجلس مجدى ويبداء فى قراءة الكتاب المقدس & يدخل العسكرى عوضين من الناحيه اليمنى ويبداء فى تنظيف المكتب }}
عوضين كل يوم ننضف المكتب والمكتب اساسا بيبرق لكن لازم ننضفه وكمان الكرسى {{ ينظف الكرسى }} علشان سعادة الباشا المأمور يقعد ويتجعص براحته ............................
{{ ينظر حوله ثم يجلس على الكرسى ويضع رجل على رجل }} يعنى اى واحد يدخل دلوقتى مش ممكن يفرق بينى وبين الباشا المأمور {{ يدخل الشاويش خلف }} المفروض يبقى فيه اشتراراكيه بتاع الريس يعنى الباشا المأمور يشتغل عسكرى شويه وانا اشتغل مأمور شويتين تلاته الباشا المأمور وانا نشترك فى الشغل مش هيه دى الاشتراراكيه
{{ يمسكه الشاويش خلف من ملابسه ويشيله من على الكرسى }}
خلف نهارك اسود من القطران يا عسكرى الشوم والندامه انت اتجننت يا واد يا عوضين
عوضين سماح النوبه يا شاويش خلف
خلف عاوز تشتغل مأمور يا وله
عوضين اهو حلم يا شاويش خلف حرام الواحد يحلم
خلف دانا هاخليهولك كابوس اسود فى يوم مهبب على دماغك ، مش خايف المأمور يخش عليك ياوله ويعملك محاكمه عسكريه
عوضين {{ يسحب هدومه من الشاويش ويرد فى ثقه }} لا ماهو مش جاى النهارده
خلف وعرفت منين يا ناصح
عوضين اصل فى حفله النهارده علشان المدام بتاعته قامت بالسلامه وربنا تمم شفاها
خلف شوف ازاى
عوضين ايوه اصل انبارح الباشا بعتنى اشتريت طلبات كتير قوى ووديتها على البيت ، وفى البيت
سمعت المدام بتتكلم فى التليفون وبتعزم ناس كتير قوى علشان الحفله بتاع النهارده
خلف سبحان الله دى مكنتش بتتحرك من السرير فجئه بتعمل حفله
عوضين من ساعه ما ابونا اللى بيجى للمسجون مجدى قال الباشا المأمور اطمن ربنا هايشفيهالك ومن
ساعتها وهى خفت وبطلت كل الادويه كمان
خلف ياوله مش هاتبطل الكدب يكنش الباشا المأمورهوه اللى حكالك
عوضين لاء انا مش باكدب دى المدام هيه اللى حكت كل الكلام ده فى التليفون
خلف ايه ...... وانت كنت واقف تتصنت على مدام الباشا المأمور وهيه بتتكلم فى التليفون نهارك اسود من الليله السوده اللى اتولدت فيها
عوضين مخلاص بقى يا شاويش يا سكره هاروح اعملك كبايه شاى من الشاى بتاع الباشا المأمور ذات نفسه امال وانت اقل منها
خلف استنى ياوله .... ولما انت تشتغل مأمور يبقى اشتغل ايه
عوضين حكمدار مش اقل من حكمدار
{{ يخرج عوضين بسرعه ويتحرك خلف ناحيه الكرسى ويجلس عليه ويضع رجل على رجل }
خلف الواد عوضين ده بيفهم وعنده نظر
{{ يدخل ابونا ميخائيل }}
ا/ ميخائيل صباح الخير يا شاويش خلف
خلف {{ يقف مفزوعا }} صباح الخير يا ابونا اهلا وسهلا اتفضل
ا/ ميخائيل انا معايا تصريح بزيارة مجدى {{ يقدم الورقه للشاويش خلف }}
خلف {{ يرفض ان يأخذها }} سيادتك تيجى فى اى وقت ومن غير تصاريح دى تعليمات سعاده الباشا المأمور
ا/ ميخائيل كتر خيرك يا شاويش خلف ومتشكر للباشا المأمور
خلف حالا هاجيب مجدى
ا/ ميخائيل ربنا يبارك حياتك
{{ يخرج الشاويش خلف ويظهر فى الجانب الاخر وياخذ مجدى ويذهب الى ابونا ميخائيل ويكون ابونا فى هذا الوقت يرنم ..... }}
خلف مجدى يا ابونا ولما تخلص حضرتك انده عليه
ا/ ميخائيل متشكر يا شاويش خلف
{{ يجرى مجدى على ابونا ميخائيل ويحضه ................. }}
مجدى سلام يا ابونا عامل ايه ، وايه اخبار البيت وماما صحتها كويسه اخرمره زارتنى كانت شكلها تعبانه بقت كويسه وبابا ومارى والكنيسه كلها وحشتنى و......
ا/ ميخائيل كلهم بخير وبيسلموا عليك انت ايه اخبارك
مجدى انا كويس جدا الحمد لله انا خلصت قرايت الانجيل اللى ادتهولى قدسك اربع مرات
ا/ ميخائيل {{ يرشمه بعلامة الصليب }} ربنا يبعد عنك عدو الخير
مجدى تصدق يا ابونا العدرا مريم ظهرت لى ظهرت لواحد خاطى زىّ وقالت لى اسمع كل الكلام اللى يقولك عليه ابونا ميخائيل انت راجل قديس يا ابونا
ا/ ميخائيل يا ابنى ربنا بيستخدم الخطاه اللى زىّ لان محبته كبيره لكن انا ماستهلش ان العدرا تذكر اسمى على لسانها
مجدى انا كنت مستنى زيارتك بفارغ الصبر علشان تقلى اعمل ايه علشان خلاص نفسى د
ا/ ميخائيل اللى هاطلبه منك يمكن يكون صعب يا مجدىلكن لازم اذا كنت عاوز تقدم توبه كامله
مجدى انا مستعد لكل اللى تامرنى بيه
ا/ ميخائيل كل الخطايه اللى اعترفت بيها لربنا قدامى لازم كمان تعترف بيها قدام القاضى حتى لوكان فى عقاب لازم تقبله لانك اخطأت ولازم تاخد جزائك
مجدى {{ يقف يتحرك وهو يفكر }} اعترف بيها قدام القاضى
ا/ ميخائيل الكتاب المقدس بيقول لا تخافوا من الذين يقتلون الجسد لكن لازم نخاف على هلاك نفوسنا وارواحنا حتى لو العقاب هو الموت نفسه
مجدى ده نفس كلام العدرا قالتلى ما تخفش من الموت ...... {{ يرجع ليجلس امام ابونا ميخائيل }}
خلاص يا ابونا انا هاعترف قدام القاضى لكن صلى لى ان ربنا يقوينى
ا/ ميخائيل ربنا يسندك بيمينه ويديلك اكليل النصره
ســـــــــــــــــــــتار
المشهد الثالث
المحاكمة
{{ قاعة محكمة :- القاضى فى المنتصف امامه منصة قضاء مجدى داخل السجن بجواره يمين وشمال الشاويش خلف وعوضين المسكرى وعلى اليمين يجلس ابونا ميخائيل واسرة مجدى وفاروق المحامى }}
عوضين محكمة
القاضى نادى على القضية الاولى
عوضين {{ ينادى بورقة فى يده }} قضية مجدى يسّ صدقى
القاضى انت مجدى يس
مجدى ايوه يا سيادة القاضى
القاضى الدفاع يتفضل
ا/ فاروق {{ يقف ويتقدم خطوات }} فاروق عزيز المحامى عن مجدى يس ..... اولا نحن لا نستطيع ان ننكر التهم الموجهة الى موكلى لانه ضبط فى حالة تلبس كما هو مذكور من محضر الشرطه وتحقيقات النيابة وشهادة الشهود ولكننا نطلب من عدالتكم ان تنظروا الى حداثة سن موكلى وتاثير اصدقاء السوء عليه خاصة وانه مذكور فى تحقيقات النيابة ان موكلى يتمتع بسمعة جيده وسط الاهل والجيران وقد شهد جميعهم بذلك كما شهدوا ايضا بتغير طباع وعادات موكلى الى الاسواء بعد التعرف على هذه المجموعة لذلك اناشد فيكم الرحمة ان تنظروا الى مستقبله التعليمى وخاصة ان هذه هى السابقه الاولى لموكلى . هذا وباله التوفيق وشكرا
القاضى شكرا يا استاذ فاروق
مجدى اذا سمحت لى يا سيادة القاضى انا عندى كلام جديد واعتراف لازم اقوله
القاضى خلى بالك يا مجدى كل كلمة هاتقولها هاتتحاسب عليها وهاتتقيد فى محضر الجلسه
مجدى انا عاوز فعلا اتحاسب على كل كلمه هاقولها
القاضى اتفضل اتكلم
مجدى اولا انا باشكر الاستاذ فاروق على تعبه وانا عارف ان اللى هاقوله هايكون مفاجأه لناس كتير لكن
للأسف دى مش اول سابقه ليه يا سيادة القاضى
{{ يحدث هرج وصخب فى المحكمة من الجميع ماعدذ ابونا ميخائيل يكون ناظر الى فوق }}
القاضى هدوء فى قاعة المحكمة احسن ما خرجكوا كلكم بره {{ يصمت الجميع }}
وضح كلامك شويه يا مجدى
مجدى فى حاجات كتير جدا انا عملتها وعلشان مانساش حاجه منها انا كتبتها بخط ايدى وهاقولها واحده واحده قدامكم كلكم ...................................
{{ يخرج مجدى ورقه من جيبه ويبداء فى قرائتها وفى كل اعتراف يقوم ابونا ميخائيل برشم مجدى بعلامة الصليب }}
ده كل اللى انا عملته وماعتقدش انى نسيت حاجه ومستعد لاى عقاب مهما كان
{{ يأخذ خلف ورقة الاعتراف ويقدمها للقاضى }}
القاضى {{ ينظر الى ورقة الاعتراف }} الحكم اخر الجلسة {{ يخرج القاضى }}
ا/ فاروق ايه اللى انت قلته ده انت ضيعت نفسك
مجدى بالعكس يا استاذ فاروق انا لاقيت نفسى اللى كانت ضايعه
يس شايف يا ابونا مجدى بيعمل ايه عاوز يموت نفسه
ا/ ميخائيل مجدى كان ميت ودلوقت عاش
ام مجدى كده برضه يا مجدى انت تعمل كل ده انا مش قادره اسدق {{ تبكى ام مجدى }}
مجدى سامحينى يا امى علشان خاطر العدرا سامحينى يا مارى
مارى ربنا معاك يا مجدى ويقبل توبتك
مجدى يا ابونا ميخائيل انا عملت كل اللى قلت لى عليه ونفذت وصية العدرا لكن انا نفسى اتناول
ا/ ميخائيل فى اول زياره هاجيلك وهاناولك من الاسرار المقدسه
{{ يدخل القاضى }}
عوضين محكمة
{{ يجلس الجميع فى صمت ناظرين الى القاضى }}
القاضى بعد الاضطلاع على مواد القانون وبعد الاعتراف الاخير الذى ادلى به الشاهد امام هيئة المحكمة
والاطمئنان انه قد ادلى باعترافه بمحض ارادته ودون جبرا او اكراه من احد حيث قام بكتابة هذا الاعتراف بخط يده ...............
حكمت المحكمة حضوريا على المتهم مجدى يسّ صدقى بالاعدام شنقا ،، رفعت الجلسة
{{ يقف القاضى ويخرج }}
عوضين محكمة
ام مجدى مجدى .................. {{ تبكى }}
يسّ ابنى .......................
ســـــــــــــــــــــــتار
المشهد الأخير
الإعــــــــــــــدام
{{ فى الجانب الايسر لافته مكتوب عليها غرفة الاعدام وعلى المسرح يوجد ابونا ميخائيل ومجدى والمأمور والشاويش خلف والعسكرى عوضين }}
المأمور نفسك فى حاجه يا مجدى
مجدى الاول عاوز ابارك لحضرتك على الترقيه الجديده
الأمور شكرا يا مجدى .... وثانيا
مجدى ممكن حضرتك تسيبنى مع ابونا عشر دقائق
المأمور اتفضل يا مجدى
{{ يأخذ مجى ابونا الى جانب المسرح ويهمس مجدى فى اذن ابونا م يرشمه ابونا بعلامة الصليب ثم يخرج علبة الذخيره من جيبه ويناول مجدى الاسرار المقدسه }}
ا/ ميخائيل اتفضل يا سيادة المأمور كمل إجراءاتك
{{ يعود مجدى ليقف وسط الشاويش والعسكرى }}
المأمور جاهز يا مجدى
مجدى بنعمة ربنا جاهز اتفضل
المامور {{ يقراء من ورقه فى يده }} حكم باسم الشعب (( حكمت محكمة جنايات وسط القاهره على المتهم مجدى يسّ صدقى بالاعدام شنقا وذلك لقتله الموسيقار كونفلر ووالده ضابط الشرطه وذلك فى يوم 25/2/1956 وقد اعترف المتهم بجريمته كامله وتقدم بالطعن فى الحكم وقد رفض الطعن وتقرر اليوم 4/11/1958 لتنفيذ حكم الاعدام .................. الله ، الوطن
نفسك فى حاجه تانى يا مجدى
مجدى شكرا يا سياده المأمور انا تعبتكم كتير وكنت كريم جدا معايا وكمان تعبت الشاويش خلف وعوضين كتر خيركم كلكم
المأمور شاويش خلف
خلف افندم
المأمور نفذ الحكم
خلف تمام يا افندم
{{ يقوم الشاويش خلف بتلبيس مجدى كيس اسود فوق راسه }}
مجدى يا الهى فى يديك استودع روحى ......... مع السلامه يا ابونا ميخائيل
ا/ ميخائيل مع السلامع يا مجدى
{{ يخرج الجميع ماعدا ابونا ميخائيل يقف فى وسط المسرح
ا/ ميخائيل مع السلامه يا ابنى ماتنساش تذكرنى قدام العرش الالهى وانت فى احضان القديسين
مع السلامه
النهــــــــــــــــــــــــاية
[[ ليكن كل عمل يا رب لمجد اسمك القدوس ]]
سيناريو واخراج الخادم
ماجد بطرس
