صوت خارجي الاوفرتيره
تفتح الستارة على منظر القصر الملكي
فى سالف العصر والزمان كان فيه ملك.... ملك عظيم.... بيحكم مملكه الحب....
وكان كل شعب المملكة بيحبه...... الملك ده كان ليه ابن وحيد..... ابنه اللى كان
بيحبه من كل قلبه... وقرر الملك انه يدى ابنه كل حاجه فى المملكة..............
وعاشت المملكة فى أفراح.... لكن عدو الخير كان بيكرهه الملك وابنه..........
وكان بيحاول يعمل اى حاجه عشان..............................................
الملك ها ها ها .... ياه كل ده حصل....
وزير واكتر من كده يا مولاى ....
شومان ماتتصورش يا مولاى كلنا بنحبه قد ايه .؟
وزير ياه يا مولاى لو شفته امبارح فى حفل الأمراء كان حاجه هايله خالص .
الملك ياه ماتتخيلوش كلامكم ده بيفرحنى قد ايه... كل ما اسمع عنه او أشوفه عمل حاجه حلوة ببقى طاير من الفرح .
شومان بس يا مولاى .
الملك بس ايه يا شومان .
شومان انا شايف انك مدلعه شويتين .
الملك وهو انا ليه غيره يا شومان ما أنتوا عارفين أنى كنت قاعد قد ايه من غير أولاد لحد ماجه أبنى الأمير .
شومان ايوه جه و لهف كل حاجه .
الملك بتقول ايه يا شومان .
شومان بقول انه جه ونور المملكة .
الملك أنا عارف برضه انك متغاظ منه عشان هو اللى ها يورث كل حاجه من بعدى .
شومان أنا بالعكس يا مولاى... دانا بحبه خالص .
الوزير يا مولاى شومان برضه حافظ عهدك معاه وها يفضل خادمك المطيع ولابنك الامير كمان مش كده يا شومان .
شومان هه طبعا يا مولاى الوزير بيقول اللى فى قلبى واللى كان على لسانى .
الملك طيب وهو الأمير فين دلوقت .
الوزير زمانه مع أصحابه فى درس المبارزة يا مولاى .
شومان افتكر يا مولاى انى شفته قبل ما اجى رايح إسطبل الخيل القبلى .
الملك الإسطبل القبلى .... ازاى .
الوزير فى ايه يا مولاى .
الملك أكيد رايح للحصان الأسود .
شومان وفيها ايه... ما هو شباب و عايز برضه يتمتع بشبابه .
الملك الحصان ده خطير و انا قلتله يبعد عنه .
الوزير يا مولاى الامير عاقل برضه ايه اللى ها يخليه يروح للحصان ده بالذات .... أكيد ها يشوفله حصان تانى .
الملك انا مش مطمن روح يا وزيرى وانت كمان يا شومان شوفوه و طمنونى عليه .
(2)
و & ش حاضر يا مولاى . ( يخرجان )
الملك انا خايف عليه مش مطمن ... مع انى قلتله ويا ما حذرته قدامك الخيل كله لكن الحصان الأسود لا لا ... مش عارف اعمل ايه... مش عارف.... ( يدخل شومان والوزير )
الملك خير الامير بخير .
الوزير بخير يا مولاى بخير .
الملك أمال فى ايه... طمنونى ايه اللى حصل .
الوزير مش عارف بس يا ربى أقول ايه .
شومان قول الحقيقة وأخلص .
الوزير ها تبقى صعبه عليه .
شومان ما هو لازم ها يعرفها... كده كده ها يعرفها .
الملك ايه هو اللى اعرفه أتكلموا .
الوزير الامير يا مولاى .
الملك ماله الامير انتم مش قلتوا انه بخير....
الوزير اصله..
الملك اصله ايه... انطقوا ماله الامير .
شومان ابدا يا مولاى مفيش غير حاجه بسيطه جدا.
الملك ايه هى .
شومان هوه يدوب مش بيسمع ولا يشوف ولا يتكلم ولا حتى يقدر يتحرك بالاختصار يا مولاى وللأسف الشديد بقى مشلول مش عارف يعمل حاجه .
الملك ايه ازاى ده حصل ...
الوزير هدى نفسك يا مولاى... الزعل مش كويس على صحتك .
شومان ايوه يا مولاى صحتك غالية علينا... أحنا مش عايزين نخسرك انت والأمير مرة واحدة يا مولاى .
الملك وازاى أهدى ولا ارتاح وأبنى الوحيد مشلول مش قادر يتحرك ولا يعمل حاجه ازاى ... بس لو اعرف مين اللى كبر الفكرة دى فى دماغه .
الوزير وانت تفتكر يا مولاى إن فى حد ممكن يكون هو اللى قاله على الفكرة دى .
الملك أكيد.. ابنى الامير كمان دايما مطيع ماكانش يرضى يعمل اى حاجه تزعلنى ابدا .
الوزير والواحد ده أكيد من جوه القصر يا جلاله الملك .
شومان تقصد ايه يا وزير .
الوزير أكيد الواحد ده من جوه القصر وعارف مواطن الضعف عند الأمير عشان كده قدر يأثر عليه .
الملك تقصد مين يا وزير أتكلم .
الوزير منور يا شومان .
شومان هه ... دا نورك يا وزير .
الملك قلت مين يا وزير .
الوزير مش متأكد يا مولاى ومقدر ش اتهم حد من غير دليل لكن...
شومان لكن... أحنا فى ايه ولا ايه... أحنا المهم لينا دلوقت صحة الامير .
الملك ايوه مضبوط يا شومان... دلوقت شوفولى اكبر حكماء واكبر أطباء المملكة عشان نشوف دواء للأمير .
(3)
شومان يا مولاى اسمح لى .
الملك فى ايه يا شومان .
شومان انا شايف إن أحنا ها نصرف فلوس على الفاضى وها تتعب من غير فايده .
الملك قصدك ايه يا شومان انت مش عايز الامير يخف .
شومان يا ريت.. دانا أديله روحي لو ينفع لكن .
الملك لكن ايه يا شومان .
شومان يا مولاى... يا مولاى ما انت عارف إن ده مرض مالوش دواء وياما أطباء وحكماء حالوا لكن مافيش فايده .
الملك مفيش حاجه اسمها مفيش فايده... أكيد فى حل... يا وزير..
الوزير أمر مولاى .
الملك أصدر أمر ملكى لكل الأطباء والحكماء فى المملكة إنهم يجتمعوا عندى فى القصر النهارده ده ضرورى عشان نشوف علاج الأمير .
الوزير أمر مولاى .
الملك وكمان أأمر بمكافأة كبيرة وسخية لأي حد يعرف دواء الأمير.
الوزير أمر مولاى . (يخرج )
شومان على فين يا مولاى .
الملك ها روح أشوف الأمير وأطمن عليه ... يمكن يكون محتاج لى .
شومان ها ها .. يا فرحتك يا شومان ابن الملك عيان .. الأمير تعبان ... النهارده .. النهارده أتحققت احلامى... تعب السنين وسهر الليالي ... كل العز هايرجعلى تانى ... انا شومان ... انا عدو الأمير الأعيان ... مفيش حد يقدر يتحدى مكرى وخبثى انا ... انا أغريته بركون الحصان... الحصان قوى وأنت شباب الحصان قوى وانت شباب... مستنى ايه بلا على الباب طلع الحصان وأمسك اللجام وطير زى الرهوان .... ها هاها..... يبقى يقابلنى بقى الملك لو لقى ليه علاج ... ولا هيبقى فاضى للمملكة ولا حتى ليه مزاج .. الكل هنا هيخضع لى الكل هنا ها يكون تحت امرى .
دلوقت لازم تمسك نفسك يا شومان لا يبان أنك فرحان وخصوصا أن الامير عيان. أحسن لك تعمل زعلان... وعلى علاج الأمير حيران... ومفيش مانع لو نزلت دمعتين ... على حال الامير المسكين .
الوزير بتعمل ايه يا شومان .
شومان بادعى .
الوزير بتدعى لمين .
شومان بادعى أن الامير يقوم بالسلامة ويخف ويرجع يملا المملكة أفراح وسعادة .
الوزير بتدعيله ولا بتدعى عليه .
شومان قصدك ايه يا وزير الهم والغم .
الوزير قصدى انت عارفه يا شومان وكل اللى فى المملكة عارفين حتى الملك عارف أنك مش بتحب ابنه الامير لكن اوعى تفتكر انه غافل لا ... ده صاحى جدا .
شومان صاحى مين ... ده زمانه لايص فى علاج الامير .
الوزير بتقول ايه يا شومان .
شومان بقول طبعا إن الملك صاحى جدا .
الوزير ويكون فى علمك أنى لو أتأكدت انك أنت اللى ورا حكاية الحصان دى محدش هاينجيك من ايدى ابدا .
شومان أوعى تنسى نفسك يا وزير متنساش أنى انا كنت وانت كنت حارس حقير .
(4)
الوزير لكن بحبى للملك وأخلاصى له أصبحت وزير .
شومان مش ها يدوم يا وزير . مش ها يدوم العز اللى انت فيه .. الأمير هيموت وأصبح انا أمير هاشيلك من
الوزارة وترجع تانى حارس فقير .
الوزير مش ها يحصل يا شومان ... الأطباء والحكما بره .. ومستنين الأذن بالدخول وأكيد ها يلاقوا دواء للأمير .
شومان أبقى قابلنى يا وزير .
الوزير ها يحصل يا شومان ... ها يحصل وأنت ها ترجع تانى حيران .
شومان صدقني يا وزير مرض الأمير ده مرض خطير وكل اللى مرضوا بيه ماتوا برضه بيه .
الوزير لكن الأمير هايصحى .. ده برضه ابن الملك والملك مش ها يعز على علاجه اى شى كان .
شومان من بقك لباب السما يا وزير ... ( يدخل الملك )
الملك ها ... ها يا وزير جمعت الحكما والاطبا .
شومان كلهم بره مستنين إذنك يا مولاى .
الملك صحيح يا وزير .
الوزير ايوه يا مولاى .
الملك خلاص مستنين ايه أأمر بدخولهم فورا للأمير .
الوزير أمر مولاى...... ( يخرج )
شومان ها يا مولاى طمنى على سيدى الأمير هو مش الحمد لله بخير .
الملك لا يا شومان الأمير تعبان وأنا كل ما أشوفه تعبان بحس .. بتعبه ..بألمه..بآهاته .
شومان يعيني عليه الامير ربنا يشفيه او يريحه .
الملك انا خايف جدا يا شومان .
شومان ما تخافش يا مولاى ... الأطباء والحكما بره بيشوفوا الأمير وأكيد ها يلاقوا علاج ..
الملك يا ريت يا شومان ... يا ريت ..
شومان ما تخافش يا مولاى ده الوزير كمان معاهم وحاكم ده انا عارفه لو دخل فى موضوع يبقى لازم ينهيه .
الملك يا ما نفسى أن الأمير يقوم بالسلامة يا شومان .
شومان بأذن الله يا مولاى ... بأذن الله .
الملك انت عارف لو ده حصل يا شومان انا ... انا ها علن الأفراح فى المملكة ... وها وزع.........
الوزير مولاى ...
الملك ها يا وزير ... والاطبا والحكما عرفوا دوا الامير .
شومان مالك يا وزير ... أتكلم يا وزير .
الوزير للأسف يا مولاى الأطباء والحكما عجزوا أنهم يلاقوا دوا للأمير .
الملك بتقول ايه ازاى .
الوزير بيقولوا إن مرض الأمير ده مرض خطير وعلاجه ده سر فى بير .
شومان مش معقول انا عقلى ها يطير .
الملك أبعت لكل بلد هات لى كل سفير قلهم أنى عايز الأمير يخف وأى حد يشفيه ليه اللى يطلبه مهما أن كان طلبه كبير .
شومان يا مولاى ده شى خطير .. كل النصابين والطمعانين ها يقولوا إن عندهم دوا الأمير..
الملك ميهمنيش يا شومان ... أنا عايز الأمير يخف ويبقى تمام يرجع تانى لحصنى وأعيش معاه فرحان ..وأديله...........
شومان يا ريت يا مولاى .. لو كان بأيدى كنت أديله حياتى وروحى .
(5)
الملك لو كان بأيدى كنت عطيته حياتى انا وروحى وكل ما أملك .
الوزير العفو يا مولاى نفسى فداك انت والأمير .
الملك ودلوقت يا وزير أعلن فى كل بلد أن اللى يجيب دوا الأمير او حتى يعرفه ليه اى شى يطلبه حتى نص المملكة .
الوزير يا مولاى أنا رهن إشارتك .. حالا يكون الأمر فى كل البلاد . ( يخرج )
الملك أعمل أية يا شومان حتى الأطباء والحكماء عجزوا عن علاج الأمير .
شومان قلبى معاك يا مولاى .
الملك بس لو ألاقى دوا الأمير .
شومان هنلاقيه يا مولاى أكيد ده شى أكيد ها يخلى المملكة فى يوم عيد وكل إنسان ها يبقى سعيد...
الوزير مولاى ...
الملك فى ايه تانى يا وزير .
الوزير خبر سعيد يا مولاى .
الملك خبر سعيد ... ايه هو قول بسرعة .
شومان مصيبة ليكون الأمير قام .
الوزير فى واحد بره يا مولاى طالب مقابلتك بخصوص مرض الأمير .
شومان مولاى النصابين والطماعين بدوا يا مولاى .
الوزير لا يا مولاى دا راجل سنه كبير وبيقول أن معاه دوا الأمير .
الملك مستنى إيه دخله بسرعة يا وزير .
شومان انا شايف يا مولاى أن أحنا منحسسوش إننا مدلوقين عليه لحسن يطمع فينا ويغالى فى طلباته .
الملك ميهمنيش طلباته... المهم عندى الأمير .
الوزير مولاى الملك... الحكيم على الباب يا مولاى .
الملك دخله بسرعة ...
شومان زى ما قلتلك يا مولاى... متنساش .
الحكيم السلام والتحية لملك مملكة المحبة .
الملك السلام ليك يا حكيم... عرفت أن معاك دوا الأمير مش كده .
الحكيم مش بالضبط يا مولاى .
الوزير يعنى ايه... معاك الدوا ولا لا .
الحكيم الحقيقة أن الدوا مش معايا لكن .
شومان لكن ايه... مش قلت لك يا مولاى النصابين والطماعين عرفوا طريقهم لينا .
الحكيم النصابين والطماعين أنت عارفهم كويس يا شومان لكنى انا جاى هنا بخصوص دوا الأمير .
الوزير ازاى يا حكيم أنت مش بتقول أن الدوا مش معاك .
الحكيم مش معاى ايوه... لكنى اعرف مكان الدوا .
الملك تعرف مكانه .
الوزير طب هو فين .
الملك قلنا عليه وأحنا نروح نجيبه بسرعة .
شومان أنا مش مصدق ده أكيد نصاب .
الوزير أتكلم يا حكيم ... أتكلم بسرعة وألا .
(6)
الحكيم أستنى يا وزير ماتتسرعش ... دى حكايه صعبة وشرحها يطول ... ودوا الأمير مش سهل .
الملك مهما كان الأمر صعب مهما كانت المخاطر ها جيب الدوا .
الوزير متنساش يا حكيم أنك بتتكلم الملك يعنى مفيش حاجة تصعب عليه .
شومان ثم أحنا عندنا مين أغلى من الأمير... اللى عشان خاطره يهون كل الصعب .
الملك مادام الموضوع كده... يبقى ها قولكم على مكان .
الحكيم الدوا.. الدوا موجود فى مكان واحد بس يا جلالة الملك .
الملك مكان فين هوده المكان ده... قولى عليه ومهما كان بعيد هوصله .
الوزير دى حياه الأمير... وصحة ولى عهد المملكة .
الملك حياه أبنى أغلى عندى من أى شى ويهون عشانه كل الصعب .
الوزير ويطلع فين المكان ده يا حكيم... فى بلاد بعيده ولا بلدنا السعيدة .
الحكيم المكان مش بعيد لكن فى وسط وادى العبيد .
الملك وادى العبيد .
شومان أنت أكيد أتجننت .
الوزير ازاى يا حكيم دوا الأمير يكون فى وسط وادى العبيد .
الحكيم الدوا موجود هناك ولو مش مصدقين خلاص أمشى وخليكوا انتم قاعدين على دوا الأمير حيرانين .
الملك طيب وهو فين الدوا بالضبط فى وادى العبيد وأحنا نروح نجيبه .
شومان مولاى دا اللى ناقص ناس من مملكة الحب يروحوا لوادى العبيد..............
الوزير عشان خاطر الأمير نروح اى مكان يا شومان .
شومان أنا مقلتش حاجه يا وزير دا أنا افديه بروحي وحياتي عليه مش كتير .
الوزير عشان كده أسمح لى أخد كتيبه من الجنود ونروح لوادى العبيد نجيب الدوا للأمير .
الحكيم لحظه يا وزير .
الوزير فيه ايه تانى يا حكيم .
الحكيم كلام الوزير مش سليم .
الوزير هو ايه اللى مش سليم وضح كلامك يا حكيم .
الحكيم الدوا ده لازم تجيبه أنت بنفسك يا مولاى .
شومان أدى اللى ناقص كمان .
الوزير ملك المحبة ينزل وادى العبيد ده طلب غريب وبعيد .
الحكيم عشان ينقذ ابنه الوحيد لازم ينزل وادى العبيد .
الملك شوفلنا حل تانى يا حكيم وما تخافش ها كون معاك كريم .
الحكيم يا مولاى الحكاية مش حكايه فلوس. أنا غرضى الأمير يصحى وتهدى النفوس .
شومان الراجل ده أكيد ملحوس . عايزنا نصدق إن الحل الوحيد أن الملك ينزل لوادى العبيد طب ليه .
الوزير عندك حق يا شومان ليه مأنزلش أنا وأنقذ الأمير العيان .
الحكيم لان الطريق صعب مليان مخاطر ومصاعب وأهوال ومحدش ها يحتمل الطريق بأى حال إلا
أبوه مش حد تانى نشتريه بالمال .
الوزير عندنا أشجع الشجعان عندنا كتيبه فرسان تنزل وادى العبيد وتعدى من المصاعب وتجيلنا بالخبر الأكيد .
شومان يا مولاى متصدقهوش.. دا أكيد جاسوس أو راجل مهبوش .
(7)
الملك أستنى بس يا شومان نسمع كلام حكيم الزمان
شومان يا مولاى صدقنى ده أكيد جاسوس عايزك تنزل وادى العبيد وتروح مننا ونقعد هنا وحدينا من غير ملك .
الوزير عندك حق يا شومان . الراجل ده مخه تعبان
الملك وليه يا حكيم ... أنزل أنا وما ينزلش أشجع الشجعان او حتى فارس من الفرسان .
الحكيم زى ما قولت يا مولاى مفيش حد بيحب الأمير اكتر منك ومفيش حد مستعد يضحى بحياته عشان ابنك إلا انت
الوزير قصدك ايه يعنى أحنا مش بنحب الملك الأمير
شومان يا وزير ده كلام خطير ..... الراجل ده لازم رأسه تطير .
الملك أسكت يا شومان ... خلينا نسمع حكيم الزمان
الحكيم مولاى أنت الوحيد اللى بتحب الأمير بدون مقابل أو حتى كلمة شكر ... بتحبه حب أبوي حب ميعرفش حدود الزمان والمكان مش زى الوزير أو حتى شومان .
الملك ولو نزلت ها جيب الدوا ازاى
الحكيم الطريق زى ما قولتلك يا مولاى طريق صعب ومش سهل كله مصاعب ومتاعب لكن طول ما انت مصر على شفاء الأمير هتقدر تعدى وتجيب الدوا رغم كل المصاعب والمتاعب والأهوال
الوزير أهوال وايه هى الأهوال .
شومان تقدر تقولنا حتى حاجه واحدة من الأهوال .
الحكيم يا جلالة الملك أول ما تنزل وادى العبيد هتلاقى بوابة عليها حارس هيطلب طلب تنفذه ... لو قدرت على تنفيذه
ها يديلك المفتاح .. ها تعدى على طول من غير ما ترتاح .
الوزير بوابه هى دى كل الأهوال .
الحكيم دى بوابه واحدة من خمس بوابات يا وزير .
الوزير هو لسه فى تانى
الحكيم أكيد الخمس بوابات دول لازم يعديهم الملك وحديه وينفذ طلبات الحراس .
شومان وبعد ما ينفذ الطلبات هيلاقى الدوا فين
الحكيم عند البوابة الخامسة ... لكن خلى بالك يا مولاى لازم تكون وحدك من غير فرسان
الملك أمرك يا حكيم الزمان
الحكيم ومتخافش يا مولاى انا على طول ها كون جنبك
الملك طب أنا عايز أسال سؤال
الحكيم كل اللى عندى قلته يا مولاى
شومان الله الدنيا اسودت ليه
الوزير ايه اللى حصل
شومان مولاى ايه اللى حصل ده
الملك الله فين الحكيم
الوزير الحكيم اختفى فى غمضة عين
شومان ده أكيد ساحر لعين
الملك وليه مايكونش صديق معين
الوزير ده حتى المكأفاة مستناش لحد ما يخدها.
شومان يا مولاى... انت مصدق برضه أن دوا الأمير فى وادى العبيد
(
الملك وفيها ايه بس لو جربنا وشوفنا.
شومان ازاى يا مولاى... أتكلم يا وزير
الوزير مولاى عارف الصح فين
شومان حتى انت يا وزير... انت أكيد متآمر مع الحكيم عشان تخلوا الملك يروح فى خبر كان
الوزير احفظ نفسك يا شومان
شومان يا مولاى صدقنى الحكيم ده راجل خطير
الملك بس انا عايز دوا الأمير
شومان خلاص يروح يجيبه الوزير
الملك لا انت ولا الوزير.. انا اللى ها جيبه
الملك برضه مصر يا مولاى
الملك خلاص يا شومان الكلام انتهى والوقت حان وسفرى خلاص ده شى أكيد هاسيب عرشى وانزل وادى العبيد
شومان طيب مولاى اسمح لى أروح أشوف الأمير قبل السفر
الملك أتفضل يا شومان
الوزير كويس أن بقينا وحدنا يا مولاى
الملك فى ايه تانى يا وزير
الوزير برغم من حبى الكبير لمولاى الأمير إلا انى مش مطمن وكلام ألحكيم شى يجنن
الملك دا انا كنت فاكرك موافق يا وزير
الوزير انا قلت كده قدام شومان عشان ما يفتكرش أنى جاى معاه ضدك يا مولاى
الملك وغرضك ايه يا وزير أتكلم باختصار انا ورأيا سفر ومهمة صعبة مش هزار
الوزير أنا شايف يا مولاى أنى اروح معاك وأفديك بحياتى لو لزم الأمر
الملك كلام الحكيم واضح يا وزير.. لازم أكون وحدى من غير تابع او رفيق
الوزير مولاى أنا خايف عليك من الطريق
الملك ما تخفش يا وزير ها ستحمل كل الصعاب والمتاعب والعذاب عشان خاطر أجيب دوا الأمير
الوزير خلاص يا مولاى عشان خاطر الأمير ولو أنى مش مستريح وحاسس أن المصاعب والمتاعب هاتكون ملهاش مثيل.
الملك متنساش كمان يا وزير أنك هنا بدالى فى المملكة
الوزير أزاى يا مولاى
الملك ولا انت عايز شومان. يكون بغيابي فرحان. ويملا المملكة فساد وهلاك
الوزير العفو يا مولاى محدش يقدر يعمل كده سواء جلالتك موجود او مسافر لأقصى الحدود
الملك إذن وجودك هنا لابد يكون... وسفرى شى محتوم
الوزير ياه يا مولاى قد ايه حبك لابنك الأمير تسافر وتنزل لوادى العبيد عشان تعيده تانى للحياة وترجعه تانى لحضنك.. دا أكيد حب كبير حب غالى من غير مقابل أو تبرير. حب أكيد مالوش تفسير. غير انك أب حقيقي حنون ومفيش عندك أغلى من ابنك الأمير
الملك أكيد.. أكيد يا وزير.. ابنى الأمير هو نور عينى اللى يمسه يمس حدقة عينى وازاى أشوفه بيقاسى ومقاسيش عشانه انا ملك صحيح لكن حبى لابنى ها يخلينى أعمل اى حاجه حتى أنى انزل عن عرشى, انزل تحت لوادى العبيد. اللى مش عارف ايه هاتكون نتيجة السفر لكن. لازم أسافر. لازم أسافر.
شومان مولاى.
(9)
الملك انت جيت يا شومان.
شومان خدامك ورهن إشارتك.
الملك يا وزير حضر الخيل والزاد والميه
الوزير أمرك يا مولاى ( يخرج )
شومان برضه مصمم يا مولاى
الملك الموضوع انتهى يا شومان
شومان خلاص يا مولاى بس اسمح لى أحذرك من العبيد أنا عارفهم... دول ناس حاقدين.. الغل مالى قلوبهم
الملك ميهمنيش شى يا شومان
شومان حتى لو عرفت إنهم بيكرهوا مملكة الحب
الملك يعنى ايه يا شومان
شومان يعنى بالاختصار يا مولاى دول ناس بيكرهوك وأول متعرفهم ويعرفوك على طول هاينتهزوا الفرصة ويحاولوا يذلوك
الملك ميهمنيش يا شومان
الوزير مولاى الحق الأمير حالته بتسوء
الملك مفيش وقت نضيعه. على وادى العبيد بسرعة ها روح. وانت يا وزير. خليك هنا مع الأمير
الوزير أمر مولاى
الملك وانت يا شومان بحذرك إياك تنتهز فرصه غيابى... وأنا راجع تانى
شومان بالسلامة يا مولاى بالسلامة
الوزير أظن سمعت يا شومان
شومان يا أخى سيبنى انت كمان
الوزير انا ها روح اطمن على الامير
شومان مع السلامة يا وزير ... وبعدين يا شومان لو الملك جاب الدواء... مع السلامة ها روح فى الهوا والسلطة ترجع تانى للأمير. وارجع انا شومان الفقير لكن لا.. لا يمكن يجيب الدواء. ها عمل اى حاجه تمنعه أنه يجى تانى هنا.. لكن ازاى.ازاى .. ايوه لقيتها أحسن طريقة أنى اروح الحق الملك فى وادى العبيد وبأى طريقة امنعه حتى لو ادى الأمر أنى اقتله لكن ما يجيش الدوا مش كل تعبى يروح فى الهوا... ودلوقتى ها تبدأ حربى معاك أيها الملك العنيد مش هنا لكن هناك فى وادى العبيد
( ستار )
(10)
المشهد الثاني
الملك ياه أخيرا وصلت وادى العبيد . كان طريق صعب وخطير لكن كله يهون عشان ابنى الأمير ... ياه لو تعرف يا ابنى أنا مستعد اعمل ايه عشانك ... ياه لو تعرف قد ايه تعبان عشانك . وآه لو تعرف قد ايه مشتاق لكلامك . كل متاعبى وآلامي تهون . بس ترجع لى تانى وتنور على الكون . ترجع تملى حياتى أفراح . تصحى من علتك وتلتئم الجراح .
حـ(1) أنت مين يا راجل أنت وايه اللى جايبك هنا
الملك انت مش عارفنى
حـ(1) تطلع مين يعنى هنا الكل بيتساوى ملك كان أو عبد
الملك انا فعلا ملك
حـ(1) ها ها ها .... ملك وجلالتك ملك مملكة ايه ؟
الملك أنا ملك مملكة الحب
حـ(1) ايه ملك مملكة الحب . أنت أتجننت يا جدع أنت
الملك أنا فعلا ملك مملكة الحب . مش مصدقنى حتى شوف اللبس الملوكية اللى انا لابسه وخاتم الملك اللى فى أيدى وأفخر الطعام اللى معايا
حـ(1) الله أظاهر صحيح أنك ملك ... لبسك .. كلامك .. مشيتك ... بس ده شى غريب وعجيب .. ملك المحبة ينزل وادى العبيد ده شى حقيقى مريب.
الملك متخافش أنا مش جاى لأجل شى وحش ليكوا بالعكس انا محتاج ليكوا .
حـ(1) ده شى ولا فى الخيال ملك المحبة يحتاج من العبيد مال
الملك أنا مش طالب مال انا لى سؤال
حـ(1) أتفضل أسال باختصار أنا ورايا شغل مش هزار
الملك مش هاطول عليك فى الحوار بس عايز تريحنى وتبعد عنى المرار وتقولى إذا كان عندكوا دوا الأمير
حـ(1) أبنك الأمير ... ها .. ها .. سلامته هو مش بخير
الملك ابنى الأمير عيان .. راقد فى السرير تعبان
حـ(1) وأنت طالب علاجه الأكيد
الملك أرجوك دلنى عليه ومهما كان بعيد وأنا أجيبه بسرعة وأرجع للأمير سعيد
حـ(1) الدوا هنا مش بعيد الدوا موجود وسط وادى العبيد
الملك قالوللى انى أقدر أجيبه بعد ما أعدى الخمس بوابات
حـ(1) ويا ترى تقدر على الطلبات
الملك هانفذها مهما كانت صعبة
حـ(1) الحكايه بجد مش لعبة
الملك انا موافق على اللى تقوله
حـ(1) شوف يا ملك المحبة عشان تعدى من أول بوابة اللى أنا حارس عليها عليك تنفذلى طلبى
الملك قول وانا رهن أشارتك
حـ(1) أولا تخلى ذاتك وتبيع أرادتك .
الملك مش فاهم الكلام وضح شويه كمان
حـ(1) يعنى تسيب فلوسك وردائك تسيب قوتك وغذائك
الملك واعيش ازاى
(11)
حـ(1) مادمت عايز تدخل وادى العبيد يبقى لازم تبقى زى العبيد
الملك أنت مش شايف أن طلبك ده كبير
حـ(1) هو ده طلبى ومش ها تنازل عنه مهما أن كان كبير ومادمت عايز تصحى الأمير يبقى تنفذ من غير شروط أو تبرير .
الملك بس...
حـ(1) من غير بس أنا عايز رد حاسم أما تقبل وتدخل وإما ترجع وتسيب ابنك يواجه مصيره المحتوم .
الملك موافق .. موافق .. هاسيب ملابس الملوكية ... هاسيب أكلى وشربى
حـ(1) هتستحمل الجوع والعطش
الملك عشان ابنى هاستحمل
حـ(1) أذن
شومان استنى ... استنى يا مولاى
حـ(1) مين ده كمان
الملك ده رئيس الديوان شومان
شومان كويس أنى لحقتك يا مولاى
الملك فى ايه يا شومان ... الأمير جرا لله حاجه
شومان الأمير لسه تعبان ... لكن
الملك لكن ايه
شومان جلالتك يا مولاى كنت هاتغلط غلطة كبيرة
الملك ليه يا شومان
شومان جلالتك يا مولاى ملك ابن ملوك وجسمك مش متعود على الجوع والعطش والبرد
الملك عشان ابنى ها ستحمل يا شومان
شومان صدقنى مش هاتقدر يا مولاى .. دى حياة قاسية صعبة ميقدرش عليها غير العبيد .
الملك عشان ابنى الأمير أستحمل أى شى
شومان مولاى صدقنى مش ها تقدر... طاوعنى كان غيرك اشطر
الملك متحاولش تثنينى عن عزمى ... انا ساكن فى حبى لابنى
شومان ومين قال غير كده يا مولاى ... بس التضحية صعبة وغالية
الملك عشان ابنى يهون كل الصعب . عشان ابنى كل شى غالى يرخص .
حـ(1) قلت ايه يا ملك
الملك انا موافق على كل شى
حـ(1) يعنى موافق أنك تخلى ذاتك وتاخد صورة العبد
الملك موافق
حـ(1) موافق انك تستحمل الجوع والعطش والبرد
الملك موافق
حـ(1) موافق تعيش عيشة العبيد وتتجرح زى العبيد
الملك موافق
حـ(1) وكلام الأشراف وتريقة العبيد
الملك ميهمنيش اى شى المهم ابنى الأمير
(12)
حـ(1) أذن .. ألان .. اخلع ثيابك الملوكية والبس الخيش رمز العبودية
الملك عشانك يا ابنى سبت ملكى ومجدى ورضيت بالذل والعبودية ( يخلع رداءه ويرتدى الخيش )
حـ(1) ودلوقت سيب أكلك وشربك واستعد للجوع والعطش واستحمل الحر والمطر
الملك عشان ابنى هاستحمل
شومان مش ممكن يا مولاى راجع نفسك .... راجع نفسك
حـ(1) خلاص الأمير ثم ... ودلوقتى يا
شومان شومان ... أنا رئيس الديوان شومان
حـ(1) ودلوقتى يا شومان ملكك أصبح واحد من العبيد وعلى وادى العبيد ها يدخل على طول من غير راحة يكمل الرحلة
الملك انا موافق على كل شى
حـ(1) افتح بواباتك يا وادى العبيد ليدخل إليك عبد جديد
الملك أدى أول بوابه وعديتها ... يا رب سهل الباقيين على خير
شومان مولاى ... انت راضى باللى عملته
الملك راضى يا شومان
شومان مش حاسس بالذل والمهانة
الملك حاسس يا شومان
شومان ارجع يا مولاى اللى جاى أصعب
الملك مفيش رجوع . أنا حاطط هدف قدامى لازم أحققه
شومان الهدف صعب يا مولاى وتحقيقه مستحيل
حـ(2) أنت مين ياللى هناك
الملك أنا ملك مملكة المحبة
حـ(2) ملك المحبة عندنا فى وادى العبيد . ده شى حقيقى غريب
الملك أنا سبت عرشى وتاجى وصرت واحد من العبيد عشان ابنى يقوم من علته ويخف ويقوم
حـ(2) ابنك مين
الملك ابنى الأمير .. ابنى بقى مشلول
حـ(2) وعايز ايه يا ابو الأمير
الملك عايز أوصل للبوابة الخامسة واخذ دوا ابنى
حـ(2) آه و عايز تعدى من البوابة التانيه
الملك أكيد
حـ(2) وانت عارف انى لكل بوابة طلبات
الملك ايوه عارف ونفذت طلبات حارس البوابة الأولى
حـ(2) انا طلباتى مش كتير أنا لى طلب واحد
الملك ها نفذه مهما أن كان خطير ومرير .
حـ(2) مش لما تعرفه مش جايز متقدرش عليه او ترفض تنفذه
الملك لازم هنفذه عشان خاطر الأمير ها نفذه
حـ(2) بالرغم من كرهى ليك إلا انى معجب بيك ...يا ترى أى حب ده اللى يخليك ترضى بأى شى مهما كان صعب
الملك حبى لابنى حب كبير ... يمكن هو مش حاسس بيه لكنى عشانه استحمل العذاب أدوق المر واستحمل الحراب .
(13)
حـ(2) وطلبى أمر من المر واقسى من الحراب
الملك وايه طلبك
حـ(2) تخلع نعليك ... وتمشى حافى من هنا لحد البوابة
الملك أخلع نعلى .... وامشى حافى لحد البوابة
حـ(2) ايه صعب عليك .. ولا خايف على رجليك
الملك عشان ابنى يهون الصعب
حـ(2) دمك هاينزف ... موافق
الملك موافق
حـ(2) ها تحس بآلام فظيعة ... موافق
الملك موافق
حـ(2) ممكن تقع فى اليكة وكل الشوك يدخل فى جسمك ... موافق
الملك موافق
حـ(2) أذن .. الان يا ملك المحبة أمشى على الشوك ودوق العذاب والالم وحس باهات البشر وشارك العبيد عذابهم
الملك اه ....اه ....اه
حـ(2) مش قلتلك طريقك مليان اشواك ... ده طريق مليان دمار وهلاك
الملك عشانك يا ابنى امشى على الأشواك ... واعدى فى الهلاك
حـ(2) ياه على شجاعتك يا ملك المحبة ... دى شجاعة اشجع الشجعان .. شجاعة ميقدرش عليها انسان .
الملك دى حب اقوى من قلبى الكبير . اعدى فى الشوك والألم المرير
الملك مهما كانت الصعاب هاعدى وافتح الباب
شومان مولاى الحارس جاى من بعيد ... طاوعنى وسيب وادى العبيد
الملك مفيش فايدة من الكلام يا شومان .. انا قربت اوصل للدوا وأرجع للأمير فرحان
حـ(3) أنت مين ياللى هناك
الملك انا ملك المحبة اللى جاى اجيب الدوا لابنى الامير من عندكوا
حـ(3) أه .. ملك المحبة عرفت من شجاعتك ومحبتك لأبنك من حراس البوابتين الاولنيين
الملك محبتى لابنى من غير حدود .... محبتى لابنى تكسر السدود .
حـ(3) طلبى عليك غالى مش هاتقدر تنفذه فى الوقت الحالى .
الملك مهما أن كان غالى هانفذه مهما كان صعب هاتحمله .
حـ(3) متتسرعش يا ملك المحبة يا لابس خيش العبيد .
الملك مهما حاولت تذلنى مفيش حاجة تهزنى أنا لازم أرجع بالدوا الأكيد
شومان مولاى باين على البوابة دى صعبة وقاسية ... باين عليها مليانة تعب ومرارة . أمر من المر وأقسى من الحجارة .
الملك مش هارجع يا شومان إلا فى حالة واحدة بس
شومان ايه هى يا مولاى .؟
الملك لما ألاقى الدوا هارجع للأمير
شومان الأمير مش حاسس بألمك وتعبك هو فى القصر نايم على السرير
الملك مش مهم يحس بى المهم احس بيه
حـ(3) وقررت ايه يا ملك المحبة
(14)
الملك مستعد لطلبك وجاهز للتنفيذ .
حـ(3) يبدو ان الأمر هايكون لذيذ وخصوصا لو عرف أن طلبى عليه عزيز .
الملك أطلب وطلبك بسرعة قول ... أنا لازم أوصل للباب على طول .
حـ(3) طيب متستعجلش .... بص يا جلالة الملك على طول الطريق من هنا للبوابة هبون الطريق مليان ضرب واهانة .
شومان ضرب وأهانة .. لا يمكن أنا أقبل أن مولاى ملك المحبة ينضرب او يتهان .
الملك بس انا راضى يا شومان .
شومان مولاى راضى ازاى ... ده شى فظيع ... امتحان مريع وقرارك يا مولاى اسمح لى كان قرار سريع .
الملك انا راضى بكل شى عشان ادى الأمير حياة تانية .
شومان تدى الأمير حياة تانية مالأمير عايش فى دنيا تانية نايم على السرير ومش حاسس بحاجة وانت هنا بتطلب الدوا .
الملك متحاولش تعطلنى عن هدفى .
شومان يعنى ده قرارك الأخير يا مولاى .
الملك ايوه يا شومان .
شومان هاتنفذه وأنت مش ندمان
الملك لا هانفذه وانا فرحان
شومان أذن كلامى انتهى يا مولاى وكلام الحارس لابد يكتمل
حـ(3) ودلوقت يا ملك المحبة هتتعرض للضرب والمهانة
الملك ومين دول اللى هناك متهيالى شفتهم قبل كده
حـ(3) أكيد دول الناس اللى أتعاطفوا معاك حراس البوابتين الاولنيين
الملك طب وايه اللى جابهم هنا
حـ(3) مهما دول اللى هيستركوا فى ضربك وأهانتك
الملك الناس اللى أعجبوا بمحبتي لابنى واتعاطفو معايا هما الناس اللى هيضربونى ويهنونى .... ازاى
حـ(3) متتعجبش ... هى دى طبيعة العبيد
الملك ياه دى طبيعة قاسية
حـ(3) قلت ايه يا ملك المحبة موافق انك تنضرب
الملك موافق
حـ(3) موافق انك عشان ابنك تتهان
الملك موافق
حـ(3) أذن عليك دلوقت أنك تمشى من هنا للبوابة ولو وصلت هتفتحها وتدخل على الرابعة على طول .
الملك وانا موافق
حـ(3) أذن أمشى فى طريق الألأم والمهانة والأحزان ( يبدوا بضربه )
حـ(1) ها ها ها .. ملك المحبة عندنا .. أحنا خدامك وعبيدك
حـ(2) ملك المحبة لابس الخيش .. ها ها
حـ(3) اسجدوا لملك المحبة
حـ(1) يا ملكنا من ضربك
حـ(2) اسكتوا .. اسكتوا .. لحسن يغضب عليكوا ... ها .. ها..
حـ(3) يعينى شوفوا أزاى مسكين مهان
(15)
حـ(1) عشان ينقذ ابنه العيان
حـ(2) يعينى عليه الملك ... عرشه ومجده ترك
حـ(3) مش قادر تضربنا
حـ(1) ولا انت ملك عالفاضى
حـ(2) فين تاجك ... فين ردائك
حـ(3) فين اكلك .. فين شربك .
حـ(1) فين خدامك وعبيدك
حـ(2) فين تهديدك ووعيدك
حـ(3) كل ده راح انت هنا مليان جراح
حـ(1) أنت هنا عبد من العبيد وده هو الشى الأكيد
حـ(2) أنت هنا عبد ذليل والضرب ده هو الدليل
الملك لكنى وصلت للباب وعديت من المهانة والإذلال
حـ(3) مبروك يا ملك على الباب الرابع رحلتك
الملك رحلتي قربت تنتهي لكن حبى مش هاينتهى
حـ(4) مبروك عليك يا ملك المحبة وصلت هنا للبوابة الرابعة
الملك يا حارس البوابة ممكن تسمح لى براحة
حـ(4) لا يمكن إذا كنت عاوز ترتاح يبقى هترجع من الأول .... قلت ايه
الملك قلت هأكمل
حـ(4) من غير راحة
الملك من غير راحة
شومان مولاى سيبنى أنا اعدى البوابة دى انا خدامك ورهن أشارتك
الملك لا يمكن يا شومان أنا لازم استحمل وأتهان عشان اصحى ابنى الأمير التعبان
شومان مش ممكن يا مولاى نفسى فداك
الملك متشكر يا شومان لكنى مصر على انى أعدى البوابة دى بنفسي
شومان مولاى دا انا عرفت ان الطلب صعب
الملك وأيه هو الطلب يا حارس
حـ(4) تتجلد يا ملك المحبة
شومان شوفت يا مولاى تتجلد ... جسمك الملوكى مش ها يتحمل الجلد ... أفتكر يا مولاى عظمتك ومجدك وجلالك
الملك عظمتى ومجدى هايزيدوا مع كل ضربة من كرباج الجلاد
شومان مولاى ازاى لملك المحبة يتجلد من العبيد
الملك عشان الأمير يرجع لحضنى سعيد
حـ(4) يا ملك المحبة هاتقدر تستحمل 39 جلدة
شومان 39 جلدة لا يمكن .... لا يمكن
الملك 39 جلدة ده أمر قاسى ومرير
شومان مش قلتلك يا مولاى وأبو الامير
الملك لكنى ها ستحمل
(16)
شومان مش ها تقدر تتحمل
الملك عشان ابنى ها ستحمل
شومان الجلد قاسى والجلاد اقسى
الملك مهما كانت القسوة
شومان مولاى دمك هايسيل
الملك دمى فدى ابنى
شومان جسمك ها يتقطع
الملك جسمى يهون عشان ابنى
شومان كرامتك هاتتهان
الملك كرامتى تروح ويرجع ابنى
شومان يا مولاى الطلب غالى
الملك مفيش حاجة تغلى على ابنى
شومان كفاية .... كفاية .... نفذ الحكم يا جلاد
حـ(4) اركع يا ملك المحبة واستعد لجلادات السوط القاسي ( يجلده )
شومان قلتلك يا مولاى ... أرجع يا مولاى قوم يا مولاى .. ارفض الركوع يا مولاى ... أرجع ... ارفض الاستسلام
الملك حبى لابنى يمنعنى من انى أقاوم
شومان لازم تقاوم .....لازم تقول لا ..لا ...لا ...
حـ(4) الجلادات كملت والبوابة تقدر تعديها
الملك وأخيرا وصلت للبوابة الخامسة والأخيرة
شومان أنا حاسس انها الموت يا مولاى
الملك ولو كان فيها موتى بس ابنى يقوم
شومان مولاى صدقنى كل اللى شفته قبل كده ميجيش نقطة فى بحر اللى جاى
الملك ميهمش اللى جاى انا فاضل لى خطوة وأوصل لدوا الأمير
شومان طب أرجع شوف يمكن يكون بخير
الملك لازم اتمم اللى اتقال
شومان كلام الحكيم كلام خيال أو كلام محتال
الملك ده حتى مرضيش بالمال
شومان لكن رضى بمهانتك والإذلال
الملك متحاولش تخلينى أرجع أنت المفروض لكلامى تسمع
شومان طيب أشرب ده يا مولاى
الملك ايه ده يا شومان
شومان ده خل مركز يا مولاى تو ما تشربه مش هاتحس بأى الم وتقدر تعدى البوابة بسلام
الملك عايز تخدرنى عشان محسش بالالام .... انا شاكك فيك من زمان
شومان انا ليه يا مولاى
الملك من بداية الرحلة وانت عايز تعطلنى
شومان أنا ياموولاى ... دانا هدفى انك تعيش فى سعادة انت والأمير
(17)
الملك وكان عندى شك ان انت سبب مرض الأمير
شومان انا يا مولاى ده ظلم
الملك الظلم انى كنت أحكم عليك وأنا مش متاكد لكنى دلوقت أتاكدت
شومان مولاى ..... مولاى
الملك وكمان فى شى محيرنى انت ازاى قدرت تدخل وادى العبيد من غير حراس ولا بوابات
شومان ها ها .... دلوقت لسه بتسال يا ملك المحبة ... كنت مستنى سؤالك من زمان ... انا شومان ملك وادى العبيد رئيس مملكة الهوا
الملك انت شومان عدوى اللدود اللى بدور عليه من زمان . كنت متاكد أنك أنت الخبيث الثعبان .
شومان ها ..ها .. انا اغريت ابنك بركوب الحصان أنا الأمير شومان .
الملك حاولت تعطلنى عن أنى اجيب الدوا لابنى
شومان كل ده واكتر .... البوابات انا اللى عاملها الطلبات انا اللى طالبها .. الحراس دول اللى قدامك خدامى واتباعى
الملك آه يا خبيث يا ابن الأفاعي .
شومان لكنك دلوقت هاتخسر يا ملك المحبة مش هاتقدر على طلبى الأخير .
الملك وأيه هو طلبك الأخير هانفذه مهما كان مرير
شومان طلبى انك تضحى بنفسك ... طلبى انك يتسفك دمك
الملك والدوا
الحكيم الدوا ... هو دمك يا ملك المحبة
الملك الحكيم ....... أنت معاه ولا ايه
الحكيم أنت ناسى أنى قلتلك انى هاكون معاك فى كل خطوة
الملك طب ازاى دمى هو الدوا
الحكيم دمك هو اللى هيطهر ابنك الأمير من علته .
شومان اظن صعب عليك تسفك دمك الملكى دمك وحياتك وكرامتك فى كفة ودوا ابنك فى كفة تانيه
الحكيم يا ملك المحبة ... أنت عديت كل الصعاب والأبواب أتشدد .. وخليك قوى عدى العقبة الأخيرة
الملك بدون أى أرشاد أو كلام من حد ها عديها بأرادتى ها عديها بحبي لأبنى ها عديها عشانك يا بنى ها سفك دمى عشانك يا ابنى ها ضحى بحياتى و نفسى
شومان ودلوقت أصلبوه وع الخشبة علقوه .
الحكيم كل نقطة دم بتنزف منك بتطهر ابنك المريض
شومان برغم من كرهى ليك وأمنيتى أنك تموت لكن ما كنتش أحب انك تموت بالشكل ده
الحكيم دمك اللى بينزف دلوقت طهر ابنك من علته ... مش بس كده ده دمك صار الدوا لابنك ولأولاده من بعده
شومان دمك صار مانع بين وبين ابنك وبين المرض دمك طهر ابنك من علته
الحكيم دمك صار الدوا
شومان الصليب بعد ما كان علامة عار وهزيمة صار علامة عارى أنا وهزيمتى أنا
الحكيم صليبك يا ملك المحبة صار رمز الفخر من دلوقت رمز العار بقى رمز الفخار
شومان مش قادر استحمل
الحكيم صليبك صار رمز هزيمة شومان
شومان كفاية ... كفاية
(18)
الحكيم دمك الغالى صار الدوا لابنك العيان
شومان كفاية ...... كفاية
الحكيم موتك عطي حياة جديدة لابنك التعبان
شومان كنت فاكر أنى غلبتك لما صلبتك لكنى انهزمت وصليبك علامتك .
الحكيم والدم
شومان الدم صار الدوا ..... الدم صار الدوا
( ترنيمة للصلب ..او موسيقى حزينة مع تسليط البروجكتور على الملك مصلوب )
شومان انا صحيح أتغلبت لكن مش دى نهاية المعركة انا لسه موجود والأمير لى هيعود .
طب والعمل يا شومان ابن الملك مابقاش تعبان الأمير أصبح فرحان
مش ها يدوم ..مش ها يدوم .
ها تعمل ايه يا شومان
ها شوف اى طريقة تفسد على الملك فرحته . اى حاجة ترجع للأمير علته .
زى ايه يا شومان ... زى ايه يا شومان
ها ها ... لقيتها
ابن الملك ها يبقى خاتم فى صباعى ... هيبقى هو الخروف وأنا الراعي .. لكن راعى عن راعى يختلف ... الملك كان راعى بيحب الخروف ... لكن أنا الراعى اللى هيدبح الخروف أنا اللى هوديه للهلاك بأيدى أنا
طب وازاى يا شومان
الطريقة سهلة واللعبة أسهل .. أروح للأمير وأتصاحب عليه وحيلي القديمة ها غيرها ها لبس قناع الحب والود ها لهيه عن الملك وأبعده عنه لحد ما يصدق أنى صاحبه ويمشى ورايا وميقولش لا لا
وبكده احزن قلبك يا ملك المحبة أخليك تدوق من الحزن والمرارة اللى عيشتنى فيهم من ساعة الصليب والمعركة بينى وبينك يا ملك المحبة ..........
وهنشوف مين اللى ينتصر ويكسب الأمير
الملك ها ها ... متتصورش يا وزير فرحتى بالأمير قد ايه
الوزير ربنا يخليك يا مولاى ويخليلنا الأمير
الملك تعرف يا وزير
الوزير ايه يا مولاى
الملك كل الالام والمتاعب والمخاطر اللى شفتها فى رحلتى مكنتش حاسس بيها
الوزير ايه يا مولاى ... ازاى ده
الملك كان حبى لابنى مخلينى أدوس على الالام وانا فرحان اقبل المخاطر وانا مش زعلان
الوزير وفشل الخبيث شومان
الملك كان فاكر انى هاضعف قدام الجلد والاهانة والصلب لكن اللى انتصر هو الامل والحب
الوزير أكيد يا مولاى وأحسن شى عملته بعد ما رجعت لينا المملكة أنك أمرت بطرد شومان
الملك ولو انى قلقان
الوزير خايف على الأمير من حيل شومان
الوزير ماتخفش يا مولاى متخفش الأمير صحى وأتعلم الدرس
الملك تفتكر يكون بيعمل ايه دلوقت
(19)
الوزير أكيد بيتفسح فى الجناين والغيطان
الملك طب روح ناديه وعلى هنا هاته بسرعة
الوزير امر مولاى ( يخرج )
الملك ياه يا ابنى قد ايه أنا مشتاق لك مشتاق اشوفك وأندهلك . مشتاق ترجع تانى فى حضنى تشكى لى همك وتشاركنى فرحى ... اه لو تعرف قاسيت عشانك قد ايه ... لكن ميهمش كله عشانك يهون .
الوزير مولاى .... مولاى
الملك فى ايه يا وزير
الوزير امر عظيم وخطير
الملك فسر يا وزير أنا محتاج تفسير
الوزير نبا حزين هروب الأمير
الملك كده من غير سبب او تبرير
الوزير أتصاحب عليه اللئيم شومان .... أفتكره صاحبه حقيقى ....... وبقى معاه فرحان
الملك ده شى ولا فى الاحلام ..... لكن دى عمايل اللئام
الوزير مولاى ... وايه الحل يا مولاى
الملك مش عارف يا وزير .. كل شى اديتهوله كل حياتى اديتهاله .....حتى دمى سفكته عشانه .... الامى احزانى ..... كله قدمته ليه عشان يبقى فى حضنى لكن هو نسينى وراح لعدوى وترك حضنى
الوزير مولاى
الملك انا حزين يا وزير .... أعمل أيه للأمير .. أعمل ايه اسمع يا وزير
الوزير امر مولاى
الملك روح دور ع الأمير فى كل مكان ,وقوله ابوك مستنيك ترجع لحضنه من تانى قبل ما يفوت الاوان وميبقلوش غير الندم والمرارة
( ستار )
تفتح الستارة على منظر القصر الملكي
فى سالف العصر والزمان كان فيه ملك.... ملك عظيم.... بيحكم مملكه الحب....
وكان كل شعب المملكة بيحبه...... الملك ده كان ليه ابن وحيد..... ابنه اللى كان
بيحبه من كل قلبه... وقرر الملك انه يدى ابنه كل حاجه فى المملكة..............
وعاشت المملكة فى أفراح.... لكن عدو الخير كان بيكرهه الملك وابنه..........
وكان بيحاول يعمل اى حاجه عشان..............................................
الملك ها ها ها .... ياه كل ده حصل....
وزير واكتر من كده يا مولاى ....
شومان ماتتصورش يا مولاى كلنا بنحبه قد ايه .؟
وزير ياه يا مولاى لو شفته امبارح فى حفل الأمراء كان حاجه هايله خالص .
الملك ياه ماتتخيلوش كلامكم ده بيفرحنى قد ايه... كل ما اسمع عنه او أشوفه عمل حاجه حلوة ببقى طاير من الفرح .
شومان بس يا مولاى .
الملك بس ايه يا شومان .
شومان انا شايف انك مدلعه شويتين .
الملك وهو انا ليه غيره يا شومان ما أنتوا عارفين أنى كنت قاعد قد ايه من غير أولاد لحد ماجه أبنى الأمير .
شومان ايوه جه و لهف كل حاجه .
الملك بتقول ايه يا شومان .
شومان بقول انه جه ونور المملكة .
الملك أنا عارف برضه انك متغاظ منه عشان هو اللى ها يورث كل حاجه من بعدى .
شومان أنا بالعكس يا مولاى... دانا بحبه خالص .
الوزير يا مولاى شومان برضه حافظ عهدك معاه وها يفضل خادمك المطيع ولابنك الامير كمان مش كده يا شومان .
شومان هه طبعا يا مولاى الوزير بيقول اللى فى قلبى واللى كان على لسانى .
الملك طيب وهو الأمير فين دلوقت .
الوزير زمانه مع أصحابه فى درس المبارزة يا مولاى .
شومان افتكر يا مولاى انى شفته قبل ما اجى رايح إسطبل الخيل القبلى .
الملك الإسطبل القبلى .... ازاى .
الوزير فى ايه يا مولاى .
الملك أكيد رايح للحصان الأسود .
شومان وفيها ايه... ما هو شباب و عايز برضه يتمتع بشبابه .
الملك الحصان ده خطير و انا قلتله يبعد عنه .
الوزير يا مولاى الامير عاقل برضه ايه اللى ها يخليه يروح للحصان ده بالذات .... أكيد ها يشوفله حصان تانى .
الملك انا مش مطمن روح يا وزيرى وانت كمان يا شومان شوفوه و طمنونى عليه .
(2)
و & ش حاضر يا مولاى . ( يخرجان )
الملك انا خايف عليه مش مطمن ... مع انى قلتله ويا ما حذرته قدامك الخيل كله لكن الحصان الأسود لا لا ... مش عارف اعمل ايه... مش عارف.... ( يدخل شومان والوزير )
الملك خير الامير بخير .
الوزير بخير يا مولاى بخير .
الملك أمال فى ايه... طمنونى ايه اللى حصل .
الوزير مش عارف بس يا ربى أقول ايه .
شومان قول الحقيقة وأخلص .
الوزير ها تبقى صعبه عليه .
شومان ما هو لازم ها يعرفها... كده كده ها يعرفها .
الملك ايه هو اللى اعرفه أتكلموا .
الوزير الامير يا مولاى .
الملك ماله الامير انتم مش قلتوا انه بخير....
الوزير اصله..
الملك اصله ايه... انطقوا ماله الامير .
شومان ابدا يا مولاى مفيش غير حاجه بسيطه جدا.
الملك ايه هى .
شومان هوه يدوب مش بيسمع ولا يشوف ولا يتكلم ولا حتى يقدر يتحرك بالاختصار يا مولاى وللأسف الشديد بقى مشلول مش عارف يعمل حاجه .
الملك ايه ازاى ده حصل ...
الوزير هدى نفسك يا مولاى... الزعل مش كويس على صحتك .
شومان ايوه يا مولاى صحتك غالية علينا... أحنا مش عايزين نخسرك انت والأمير مرة واحدة يا مولاى .
الملك وازاى أهدى ولا ارتاح وأبنى الوحيد مشلول مش قادر يتحرك ولا يعمل حاجه ازاى ... بس لو اعرف مين اللى كبر الفكرة دى فى دماغه .
الوزير وانت تفتكر يا مولاى إن فى حد ممكن يكون هو اللى قاله على الفكرة دى .
الملك أكيد.. ابنى الامير كمان دايما مطيع ماكانش يرضى يعمل اى حاجه تزعلنى ابدا .
الوزير والواحد ده أكيد من جوه القصر يا جلاله الملك .
شومان تقصد ايه يا وزير .
الوزير أكيد الواحد ده من جوه القصر وعارف مواطن الضعف عند الأمير عشان كده قدر يأثر عليه .
الملك تقصد مين يا وزير أتكلم .
الوزير منور يا شومان .
شومان هه ... دا نورك يا وزير .
الملك قلت مين يا وزير .
الوزير مش متأكد يا مولاى ومقدر ش اتهم حد من غير دليل لكن...
شومان لكن... أحنا فى ايه ولا ايه... أحنا المهم لينا دلوقت صحة الامير .
الملك ايوه مضبوط يا شومان... دلوقت شوفولى اكبر حكماء واكبر أطباء المملكة عشان نشوف دواء للأمير .
(3)
شومان يا مولاى اسمح لى .
الملك فى ايه يا شومان .
شومان انا شايف إن أحنا ها نصرف فلوس على الفاضى وها تتعب من غير فايده .
الملك قصدك ايه يا شومان انت مش عايز الامير يخف .
شومان يا ريت.. دانا أديله روحي لو ينفع لكن .
الملك لكن ايه يا شومان .
شومان يا مولاى... يا مولاى ما انت عارف إن ده مرض مالوش دواء وياما أطباء وحكماء حالوا لكن مافيش فايده .
الملك مفيش حاجه اسمها مفيش فايده... أكيد فى حل... يا وزير..
الوزير أمر مولاى .
الملك أصدر أمر ملكى لكل الأطباء والحكماء فى المملكة إنهم يجتمعوا عندى فى القصر النهارده ده ضرورى عشان نشوف علاج الأمير .
الوزير أمر مولاى .
الملك وكمان أأمر بمكافأة كبيرة وسخية لأي حد يعرف دواء الأمير.
الوزير أمر مولاى . (يخرج )
شومان على فين يا مولاى .
الملك ها روح أشوف الأمير وأطمن عليه ... يمكن يكون محتاج لى .
شومان ها ها .. يا فرحتك يا شومان ابن الملك عيان .. الأمير تعبان ... النهارده .. النهارده أتحققت احلامى... تعب السنين وسهر الليالي ... كل العز هايرجعلى تانى ... انا شومان ... انا عدو الأمير الأعيان ... مفيش حد يقدر يتحدى مكرى وخبثى انا ... انا أغريته بركون الحصان... الحصان قوى وأنت شباب الحصان قوى وانت شباب... مستنى ايه بلا على الباب طلع الحصان وأمسك اللجام وطير زى الرهوان .... ها هاها..... يبقى يقابلنى بقى الملك لو لقى ليه علاج ... ولا هيبقى فاضى للمملكة ولا حتى ليه مزاج .. الكل هنا هيخضع لى الكل هنا ها يكون تحت امرى .
دلوقت لازم تمسك نفسك يا شومان لا يبان أنك فرحان وخصوصا أن الامير عيان. أحسن لك تعمل زعلان... وعلى علاج الأمير حيران... ومفيش مانع لو نزلت دمعتين ... على حال الامير المسكين .
الوزير بتعمل ايه يا شومان .
شومان بادعى .
الوزير بتدعى لمين .
شومان بادعى أن الامير يقوم بالسلامة ويخف ويرجع يملا المملكة أفراح وسعادة .
الوزير بتدعيله ولا بتدعى عليه .
شومان قصدك ايه يا وزير الهم والغم .
الوزير قصدى انت عارفه يا شومان وكل اللى فى المملكة عارفين حتى الملك عارف أنك مش بتحب ابنه الامير لكن اوعى تفتكر انه غافل لا ... ده صاحى جدا .
شومان صاحى مين ... ده زمانه لايص فى علاج الامير .
الوزير بتقول ايه يا شومان .
شومان بقول طبعا إن الملك صاحى جدا .
الوزير ويكون فى علمك أنى لو أتأكدت انك أنت اللى ورا حكاية الحصان دى محدش هاينجيك من ايدى ابدا .
شومان أوعى تنسى نفسك يا وزير متنساش أنى انا كنت وانت كنت حارس حقير .
(4)
الوزير لكن بحبى للملك وأخلاصى له أصبحت وزير .
شومان مش ها يدوم يا وزير . مش ها يدوم العز اللى انت فيه .. الأمير هيموت وأصبح انا أمير هاشيلك من
الوزارة وترجع تانى حارس فقير .
الوزير مش ها يحصل يا شومان ... الأطباء والحكما بره .. ومستنين الأذن بالدخول وأكيد ها يلاقوا دواء للأمير .
شومان أبقى قابلنى يا وزير .
الوزير ها يحصل يا شومان ... ها يحصل وأنت ها ترجع تانى حيران .
شومان صدقني يا وزير مرض الأمير ده مرض خطير وكل اللى مرضوا بيه ماتوا برضه بيه .
الوزير لكن الأمير هايصحى .. ده برضه ابن الملك والملك مش ها يعز على علاجه اى شى كان .
شومان من بقك لباب السما يا وزير ... ( يدخل الملك )
الملك ها ... ها يا وزير جمعت الحكما والاطبا .
شومان كلهم بره مستنين إذنك يا مولاى .
الملك صحيح يا وزير .
الوزير ايوه يا مولاى .
الملك خلاص مستنين ايه أأمر بدخولهم فورا للأمير .
الوزير أمر مولاى...... ( يخرج )
شومان ها يا مولاى طمنى على سيدى الأمير هو مش الحمد لله بخير .
الملك لا يا شومان الأمير تعبان وأنا كل ما أشوفه تعبان بحس .. بتعبه ..بألمه..بآهاته .
شومان يعيني عليه الامير ربنا يشفيه او يريحه .
الملك انا خايف جدا يا شومان .
شومان ما تخافش يا مولاى ... الأطباء والحكما بره بيشوفوا الأمير وأكيد ها يلاقوا علاج ..
الملك يا ريت يا شومان ... يا ريت ..
شومان ما تخافش يا مولاى ده الوزير كمان معاهم وحاكم ده انا عارفه لو دخل فى موضوع يبقى لازم ينهيه .
الملك يا ما نفسى أن الأمير يقوم بالسلامة يا شومان .
شومان بأذن الله يا مولاى ... بأذن الله .
الملك انت عارف لو ده حصل يا شومان انا ... انا ها علن الأفراح فى المملكة ... وها وزع.........
الوزير مولاى ...
الملك ها يا وزير ... والاطبا والحكما عرفوا دوا الامير .
شومان مالك يا وزير ... أتكلم يا وزير .
الوزير للأسف يا مولاى الأطباء والحكما عجزوا أنهم يلاقوا دوا للأمير .
الملك بتقول ايه ازاى .
الوزير بيقولوا إن مرض الأمير ده مرض خطير وعلاجه ده سر فى بير .
شومان مش معقول انا عقلى ها يطير .
الملك أبعت لكل بلد هات لى كل سفير قلهم أنى عايز الأمير يخف وأى حد يشفيه ليه اللى يطلبه مهما أن كان طلبه كبير .
شومان يا مولاى ده شى خطير .. كل النصابين والطمعانين ها يقولوا إن عندهم دوا الأمير..
الملك ميهمنيش يا شومان ... أنا عايز الأمير يخف ويبقى تمام يرجع تانى لحصنى وأعيش معاه فرحان ..وأديله...........
شومان يا ريت يا مولاى .. لو كان بأيدى كنت أديله حياتى وروحى .
(5)
الملك لو كان بأيدى كنت عطيته حياتى انا وروحى وكل ما أملك .
الوزير العفو يا مولاى نفسى فداك انت والأمير .
الملك ودلوقت يا وزير أعلن فى كل بلد أن اللى يجيب دوا الأمير او حتى يعرفه ليه اى شى يطلبه حتى نص المملكة .
الوزير يا مولاى أنا رهن إشارتك .. حالا يكون الأمر فى كل البلاد . ( يخرج )
الملك أعمل أية يا شومان حتى الأطباء والحكماء عجزوا عن علاج الأمير .
شومان قلبى معاك يا مولاى .
الملك بس لو ألاقى دوا الأمير .
شومان هنلاقيه يا مولاى أكيد ده شى أكيد ها يخلى المملكة فى يوم عيد وكل إنسان ها يبقى سعيد...
الوزير مولاى ...
الملك فى ايه تانى يا وزير .
الوزير خبر سعيد يا مولاى .
الملك خبر سعيد ... ايه هو قول بسرعة .
شومان مصيبة ليكون الأمير قام .
الوزير فى واحد بره يا مولاى طالب مقابلتك بخصوص مرض الأمير .
شومان مولاى النصابين والطماعين بدوا يا مولاى .
الوزير لا يا مولاى دا راجل سنه كبير وبيقول أن معاه دوا الأمير .
الملك مستنى إيه دخله بسرعة يا وزير .
شومان انا شايف يا مولاى أن أحنا منحسسوش إننا مدلوقين عليه لحسن يطمع فينا ويغالى فى طلباته .
الملك ميهمنيش طلباته... المهم عندى الأمير .
الوزير مولاى الملك... الحكيم على الباب يا مولاى .
الملك دخله بسرعة ...
شومان زى ما قلتلك يا مولاى... متنساش .
الحكيم السلام والتحية لملك مملكة المحبة .
الملك السلام ليك يا حكيم... عرفت أن معاك دوا الأمير مش كده .
الحكيم مش بالضبط يا مولاى .
الوزير يعنى ايه... معاك الدوا ولا لا .
الحكيم الحقيقة أن الدوا مش معايا لكن .
شومان لكن ايه... مش قلت لك يا مولاى النصابين والطماعين عرفوا طريقهم لينا .
الحكيم النصابين والطماعين أنت عارفهم كويس يا شومان لكنى انا جاى هنا بخصوص دوا الأمير .
الوزير ازاى يا حكيم أنت مش بتقول أن الدوا مش معاك .
الحكيم مش معاى ايوه... لكنى اعرف مكان الدوا .
الملك تعرف مكانه .
الوزير طب هو فين .
الملك قلنا عليه وأحنا نروح نجيبه بسرعة .
شومان أنا مش مصدق ده أكيد نصاب .
الوزير أتكلم يا حكيم ... أتكلم بسرعة وألا .
(6)
الحكيم أستنى يا وزير ماتتسرعش ... دى حكايه صعبة وشرحها يطول ... ودوا الأمير مش سهل .
الملك مهما كان الأمر صعب مهما كانت المخاطر ها جيب الدوا .
الوزير متنساش يا حكيم أنك بتتكلم الملك يعنى مفيش حاجة تصعب عليه .
شومان ثم أحنا عندنا مين أغلى من الأمير... اللى عشان خاطره يهون كل الصعب .
الملك مادام الموضوع كده... يبقى ها قولكم على مكان .
الحكيم الدوا.. الدوا موجود فى مكان واحد بس يا جلالة الملك .
الملك مكان فين هوده المكان ده... قولى عليه ومهما كان بعيد هوصله .
الوزير دى حياه الأمير... وصحة ولى عهد المملكة .
الملك حياه أبنى أغلى عندى من أى شى ويهون عشانه كل الصعب .
الوزير ويطلع فين المكان ده يا حكيم... فى بلاد بعيده ولا بلدنا السعيدة .
الحكيم المكان مش بعيد لكن فى وسط وادى العبيد .
الملك وادى العبيد .
شومان أنت أكيد أتجننت .
الوزير ازاى يا حكيم دوا الأمير يكون فى وسط وادى العبيد .
الحكيم الدوا موجود هناك ولو مش مصدقين خلاص أمشى وخليكوا انتم قاعدين على دوا الأمير حيرانين .
الملك طيب وهو فين الدوا بالضبط فى وادى العبيد وأحنا نروح نجيبه .
شومان مولاى دا اللى ناقص ناس من مملكة الحب يروحوا لوادى العبيد..............
الوزير عشان خاطر الأمير نروح اى مكان يا شومان .
شومان أنا مقلتش حاجه يا وزير دا أنا افديه بروحي وحياتي عليه مش كتير .
الوزير عشان كده أسمح لى أخد كتيبه من الجنود ونروح لوادى العبيد نجيب الدوا للأمير .
الحكيم لحظه يا وزير .
الوزير فيه ايه تانى يا حكيم .
الحكيم كلام الوزير مش سليم .
الوزير هو ايه اللى مش سليم وضح كلامك يا حكيم .
الحكيم الدوا ده لازم تجيبه أنت بنفسك يا مولاى .
شومان أدى اللى ناقص كمان .
الوزير ملك المحبة ينزل وادى العبيد ده طلب غريب وبعيد .
الحكيم عشان ينقذ ابنه الوحيد لازم ينزل وادى العبيد .
الملك شوفلنا حل تانى يا حكيم وما تخافش ها كون معاك كريم .
الحكيم يا مولاى الحكاية مش حكايه فلوس. أنا غرضى الأمير يصحى وتهدى النفوس .
شومان الراجل ده أكيد ملحوس . عايزنا نصدق إن الحل الوحيد أن الملك ينزل لوادى العبيد طب ليه .
الوزير عندك حق يا شومان ليه مأنزلش أنا وأنقذ الأمير العيان .
الحكيم لان الطريق صعب مليان مخاطر ومصاعب وأهوال ومحدش ها يحتمل الطريق بأى حال إلا
أبوه مش حد تانى نشتريه بالمال .
الوزير عندنا أشجع الشجعان عندنا كتيبه فرسان تنزل وادى العبيد وتعدى من المصاعب وتجيلنا بالخبر الأكيد .
شومان يا مولاى متصدقهوش.. دا أكيد جاسوس أو راجل مهبوش .
(7)
الملك أستنى بس يا شومان نسمع كلام حكيم الزمان
شومان يا مولاى صدقنى ده أكيد جاسوس عايزك تنزل وادى العبيد وتروح مننا ونقعد هنا وحدينا من غير ملك .
الوزير عندك حق يا شومان . الراجل ده مخه تعبان
الملك وليه يا حكيم ... أنزل أنا وما ينزلش أشجع الشجعان او حتى فارس من الفرسان .
الحكيم زى ما قولت يا مولاى مفيش حد بيحب الأمير اكتر منك ومفيش حد مستعد يضحى بحياته عشان ابنك إلا انت
الوزير قصدك ايه يعنى أحنا مش بنحب الملك الأمير
شومان يا وزير ده كلام خطير ..... الراجل ده لازم رأسه تطير .
الملك أسكت يا شومان ... خلينا نسمع حكيم الزمان
الحكيم مولاى أنت الوحيد اللى بتحب الأمير بدون مقابل أو حتى كلمة شكر ... بتحبه حب أبوي حب ميعرفش حدود الزمان والمكان مش زى الوزير أو حتى شومان .
الملك ولو نزلت ها جيب الدوا ازاى
الحكيم الطريق زى ما قولتلك يا مولاى طريق صعب ومش سهل كله مصاعب ومتاعب لكن طول ما انت مصر على شفاء الأمير هتقدر تعدى وتجيب الدوا رغم كل المصاعب والمتاعب والأهوال
الوزير أهوال وايه هى الأهوال .
شومان تقدر تقولنا حتى حاجه واحدة من الأهوال .
الحكيم يا جلالة الملك أول ما تنزل وادى العبيد هتلاقى بوابة عليها حارس هيطلب طلب تنفذه ... لو قدرت على تنفيذه
ها يديلك المفتاح .. ها تعدى على طول من غير ما ترتاح .
الوزير بوابه هى دى كل الأهوال .
الحكيم دى بوابه واحدة من خمس بوابات يا وزير .
الوزير هو لسه فى تانى
الحكيم أكيد الخمس بوابات دول لازم يعديهم الملك وحديه وينفذ طلبات الحراس .
شومان وبعد ما ينفذ الطلبات هيلاقى الدوا فين
الحكيم عند البوابة الخامسة ... لكن خلى بالك يا مولاى لازم تكون وحدك من غير فرسان
الملك أمرك يا حكيم الزمان
الحكيم ومتخافش يا مولاى انا على طول ها كون جنبك
الملك طب أنا عايز أسال سؤال
الحكيم كل اللى عندى قلته يا مولاى
شومان الله الدنيا اسودت ليه
الوزير ايه اللى حصل
شومان مولاى ايه اللى حصل ده
الملك الله فين الحكيم
الوزير الحكيم اختفى فى غمضة عين
شومان ده أكيد ساحر لعين
الملك وليه مايكونش صديق معين
الوزير ده حتى المكأفاة مستناش لحد ما يخدها.
شومان يا مولاى... انت مصدق برضه أن دوا الأمير فى وادى العبيد
(
الملك وفيها ايه بس لو جربنا وشوفنا.
شومان ازاى يا مولاى... أتكلم يا وزير
الوزير مولاى عارف الصح فين
شومان حتى انت يا وزير... انت أكيد متآمر مع الحكيم عشان تخلوا الملك يروح فى خبر كان
الوزير احفظ نفسك يا شومان
شومان يا مولاى صدقنى الحكيم ده راجل خطير
الملك بس انا عايز دوا الأمير
شومان خلاص يروح يجيبه الوزير
الملك لا انت ولا الوزير.. انا اللى ها جيبه
الملك برضه مصر يا مولاى
الملك خلاص يا شومان الكلام انتهى والوقت حان وسفرى خلاص ده شى أكيد هاسيب عرشى وانزل وادى العبيد
شومان طيب مولاى اسمح لى أروح أشوف الأمير قبل السفر
الملك أتفضل يا شومان
الوزير كويس أن بقينا وحدنا يا مولاى
الملك فى ايه تانى يا وزير
الوزير برغم من حبى الكبير لمولاى الأمير إلا انى مش مطمن وكلام ألحكيم شى يجنن
الملك دا انا كنت فاكرك موافق يا وزير
الوزير انا قلت كده قدام شومان عشان ما يفتكرش أنى جاى معاه ضدك يا مولاى
الملك وغرضك ايه يا وزير أتكلم باختصار انا ورأيا سفر ومهمة صعبة مش هزار
الوزير أنا شايف يا مولاى أنى اروح معاك وأفديك بحياتى لو لزم الأمر
الملك كلام الحكيم واضح يا وزير.. لازم أكون وحدى من غير تابع او رفيق
الوزير مولاى أنا خايف عليك من الطريق
الملك ما تخفش يا وزير ها ستحمل كل الصعاب والمتاعب والعذاب عشان خاطر أجيب دوا الأمير
الوزير خلاص يا مولاى عشان خاطر الأمير ولو أنى مش مستريح وحاسس أن المصاعب والمتاعب هاتكون ملهاش مثيل.
الملك متنساش كمان يا وزير أنك هنا بدالى فى المملكة
الوزير أزاى يا مولاى
الملك ولا انت عايز شومان. يكون بغيابي فرحان. ويملا المملكة فساد وهلاك
الوزير العفو يا مولاى محدش يقدر يعمل كده سواء جلالتك موجود او مسافر لأقصى الحدود
الملك إذن وجودك هنا لابد يكون... وسفرى شى محتوم
الوزير ياه يا مولاى قد ايه حبك لابنك الأمير تسافر وتنزل لوادى العبيد عشان تعيده تانى للحياة وترجعه تانى لحضنك.. دا أكيد حب كبير حب غالى من غير مقابل أو تبرير. حب أكيد مالوش تفسير. غير انك أب حقيقي حنون ومفيش عندك أغلى من ابنك الأمير
الملك أكيد.. أكيد يا وزير.. ابنى الأمير هو نور عينى اللى يمسه يمس حدقة عينى وازاى أشوفه بيقاسى ومقاسيش عشانه انا ملك صحيح لكن حبى لابنى ها يخلينى أعمل اى حاجه حتى أنى انزل عن عرشى, انزل تحت لوادى العبيد. اللى مش عارف ايه هاتكون نتيجة السفر لكن. لازم أسافر. لازم أسافر.
شومان مولاى.
(9)
الملك انت جيت يا شومان.
شومان خدامك ورهن إشارتك.
الملك يا وزير حضر الخيل والزاد والميه
الوزير أمرك يا مولاى ( يخرج )
شومان برضه مصمم يا مولاى
الملك الموضوع انتهى يا شومان
شومان خلاص يا مولاى بس اسمح لى أحذرك من العبيد أنا عارفهم... دول ناس حاقدين.. الغل مالى قلوبهم
الملك ميهمنيش شى يا شومان
شومان حتى لو عرفت إنهم بيكرهوا مملكة الحب
الملك يعنى ايه يا شومان
شومان يعنى بالاختصار يا مولاى دول ناس بيكرهوك وأول متعرفهم ويعرفوك على طول هاينتهزوا الفرصة ويحاولوا يذلوك
الملك ميهمنيش يا شومان
الوزير مولاى الحق الأمير حالته بتسوء
الملك مفيش وقت نضيعه. على وادى العبيد بسرعة ها روح. وانت يا وزير. خليك هنا مع الأمير
الوزير أمر مولاى
الملك وانت يا شومان بحذرك إياك تنتهز فرصه غيابى... وأنا راجع تانى
شومان بالسلامة يا مولاى بالسلامة
الوزير أظن سمعت يا شومان
شومان يا أخى سيبنى انت كمان
الوزير انا ها روح اطمن على الامير
شومان مع السلامة يا وزير ... وبعدين يا شومان لو الملك جاب الدواء... مع السلامة ها روح فى الهوا والسلطة ترجع تانى للأمير. وارجع انا شومان الفقير لكن لا.. لا يمكن يجيب الدواء. ها عمل اى حاجه تمنعه أنه يجى تانى هنا.. لكن ازاى.ازاى .. ايوه لقيتها أحسن طريقة أنى اروح الحق الملك فى وادى العبيد وبأى طريقة امنعه حتى لو ادى الأمر أنى اقتله لكن ما يجيش الدوا مش كل تعبى يروح فى الهوا... ودلوقتى ها تبدأ حربى معاك أيها الملك العنيد مش هنا لكن هناك فى وادى العبيد
( ستار )
(10)
المشهد الثاني
الملك ياه أخيرا وصلت وادى العبيد . كان طريق صعب وخطير لكن كله يهون عشان ابنى الأمير ... ياه لو تعرف يا ابنى أنا مستعد اعمل ايه عشانك ... ياه لو تعرف قد ايه تعبان عشانك . وآه لو تعرف قد ايه مشتاق لكلامك . كل متاعبى وآلامي تهون . بس ترجع لى تانى وتنور على الكون . ترجع تملى حياتى أفراح . تصحى من علتك وتلتئم الجراح .
حـ(1) أنت مين يا راجل أنت وايه اللى جايبك هنا
الملك انت مش عارفنى
حـ(1) تطلع مين يعنى هنا الكل بيتساوى ملك كان أو عبد
الملك انا فعلا ملك
حـ(1) ها ها ها .... ملك وجلالتك ملك مملكة ايه ؟
الملك أنا ملك مملكة الحب
حـ(1) ايه ملك مملكة الحب . أنت أتجننت يا جدع أنت
الملك أنا فعلا ملك مملكة الحب . مش مصدقنى حتى شوف اللبس الملوكية اللى انا لابسه وخاتم الملك اللى فى أيدى وأفخر الطعام اللى معايا
حـ(1) الله أظاهر صحيح أنك ملك ... لبسك .. كلامك .. مشيتك ... بس ده شى غريب وعجيب .. ملك المحبة ينزل وادى العبيد ده شى حقيقى مريب.
الملك متخافش أنا مش جاى لأجل شى وحش ليكوا بالعكس انا محتاج ليكوا .
حـ(1) ده شى ولا فى الخيال ملك المحبة يحتاج من العبيد مال
الملك أنا مش طالب مال انا لى سؤال
حـ(1) أتفضل أسال باختصار أنا ورايا شغل مش هزار
الملك مش هاطول عليك فى الحوار بس عايز تريحنى وتبعد عنى المرار وتقولى إذا كان عندكوا دوا الأمير
حـ(1) أبنك الأمير ... ها .. ها .. سلامته هو مش بخير
الملك ابنى الأمير عيان .. راقد فى السرير تعبان
حـ(1) وأنت طالب علاجه الأكيد
الملك أرجوك دلنى عليه ومهما كان بعيد وأنا أجيبه بسرعة وأرجع للأمير سعيد
حـ(1) الدوا هنا مش بعيد الدوا موجود وسط وادى العبيد
الملك قالوللى انى أقدر أجيبه بعد ما أعدى الخمس بوابات
حـ(1) ويا ترى تقدر على الطلبات
الملك هانفذها مهما كانت صعبة
حـ(1) الحكايه بجد مش لعبة
الملك انا موافق على اللى تقوله
حـ(1) شوف يا ملك المحبة عشان تعدى من أول بوابة اللى أنا حارس عليها عليك تنفذلى طلبى
الملك قول وانا رهن أشارتك
حـ(1) أولا تخلى ذاتك وتبيع أرادتك .
الملك مش فاهم الكلام وضح شويه كمان
حـ(1) يعنى تسيب فلوسك وردائك تسيب قوتك وغذائك
الملك واعيش ازاى
(11)
حـ(1) مادمت عايز تدخل وادى العبيد يبقى لازم تبقى زى العبيد
الملك أنت مش شايف أن طلبك ده كبير
حـ(1) هو ده طلبى ومش ها تنازل عنه مهما أن كان كبير ومادمت عايز تصحى الأمير يبقى تنفذ من غير شروط أو تبرير .
الملك بس...
حـ(1) من غير بس أنا عايز رد حاسم أما تقبل وتدخل وإما ترجع وتسيب ابنك يواجه مصيره المحتوم .
الملك موافق .. موافق .. هاسيب ملابس الملوكية ... هاسيب أكلى وشربى
حـ(1) هتستحمل الجوع والعطش
الملك عشان ابنى هاستحمل
حـ(1) أذن
شومان استنى ... استنى يا مولاى
حـ(1) مين ده كمان
الملك ده رئيس الديوان شومان
شومان كويس أنى لحقتك يا مولاى
الملك فى ايه يا شومان ... الأمير جرا لله حاجه
شومان الأمير لسه تعبان ... لكن
الملك لكن ايه
شومان جلالتك يا مولاى كنت هاتغلط غلطة كبيرة
الملك ليه يا شومان
شومان جلالتك يا مولاى ملك ابن ملوك وجسمك مش متعود على الجوع والعطش والبرد
الملك عشان ابنى ها ستحمل يا شومان
شومان صدقنى مش هاتقدر يا مولاى .. دى حياة قاسية صعبة ميقدرش عليها غير العبيد .
الملك عشان ابنى الأمير أستحمل أى شى
شومان مولاى صدقنى مش ها تقدر... طاوعنى كان غيرك اشطر
الملك متحاولش تثنينى عن عزمى ... انا ساكن فى حبى لابنى
شومان ومين قال غير كده يا مولاى ... بس التضحية صعبة وغالية
الملك عشان ابنى يهون كل الصعب . عشان ابنى كل شى غالى يرخص .
حـ(1) قلت ايه يا ملك
الملك انا موافق على كل شى
حـ(1) يعنى موافق أنك تخلى ذاتك وتاخد صورة العبد
الملك موافق
حـ(1) موافق انك تستحمل الجوع والعطش والبرد
الملك موافق
حـ(1) موافق تعيش عيشة العبيد وتتجرح زى العبيد
الملك موافق
حـ(1) وكلام الأشراف وتريقة العبيد
الملك ميهمنيش اى شى المهم ابنى الأمير
(12)
حـ(1) أذن .. ألان .. اخلع ثيابك الملوكية والبس الخيش رمز العبودية
الملك عشانك يا ابنى سبت ملكى ومجدى ورضيت بالذل والعبودية ( يخلع رداءه ويرتدى الخيش )
حـ(1) ودلوقت سيب أكلك وشربك واستعد للجوع والعطش واستحمل الحر والمطر
الملك عشان ابنى هاستحمل
شومان مش ممكن يا مولاى راجع نفسك .... راجع نفسك
حـ(1) خلاص الأمير ثم ... ودلوقتى يا
شومان شومان ... أنا رئيس الديوان شومان
حـ(1) ودلوقتى يا شومان ملكك أصبح واحد من العبيد وعلى وادى العبيد ها يدخل على طول من غير راحة يكمل الرحلة
الملك انا موافق على كل شى
حـ(1) افتح بواباتك يا وادى العبيد ليدخل إليك عبد جديد
الملك أدى أول بوابه وعديتها ... يا رب سهل الباقيين على خير
شومان مولاى ... انت راضى باللى عملته
الملك راضى يا شومان
شومان مش حاسس بالذل والمهانة
الملك حاسس يا شومان
شومان ارجع يا مولاى اللى جاى أصعب
الملك مفيش رجوع . أنا حاطط هدف قدامى لازم أحققه
شومان الهدف صعب يا مولاى وتحقيقه مستحيل
حـ(2) أنت مين ياللى هناك
الملك أنا ملك مملكة المحبة
حـ(2) ملك المحبة عندنا فى وادى العبيد . ده شى حقيقى غريب
الملك أنا سبت عرشى وتاجى وصرت واحد من العبيد عشان ابنى يقوم من علته ويخف ويقوم
حـ(2) ابنك مين
الملك ابنى الأمير .. ابنى بقى مشلول
حـ(2) وعايز ايه يا ابو الأمير
الملك عايز أوصل للبوابة الخامسة واخذ دوا ابنى
حـ(2) آه و عايز تعدى من البوابة التانيه
الملك أكيد
حـ(2) وانت عارف انى لكل بوابة طلبات
الملك ايوه عارف ونفذت طلبات حارس البوابة الأولى
حـ(2) انا طلباتى مش كتير أنا لى طلب واحد
الملك ها نفذه مهما أن كان خطير ومرير .
حـ(2) مش لما تعرفه مش جايز متقدرش عليه او ترفض تنفذه
الملك لازم هنفذه عشان خاطر الأمير ها نفذه
حـ(2) بالرغم من كرهى ليك إلا انى معجب بيك ...يا ترى أى حب ده اللى يخليك ترضى بأى شى مهما كان صعب
الملك حبى لابنى حب كبير ... يمكن هو مش حاسس بيه لكنى عشانه استحمل العذاب أدوق المر واستحمل الحراب .
(13)
حـ(2) وطلبى أمر من المر واقسى من الحراب
الملك وايه طلبك
حـ(2) تخلع نعليك ... وتمشى حافى من هنا لحد البوابة
الملك أخلع نعلى .... وامشى حافى لحد البوابة
حـ(2) ايه صعب عليك .. ولا خايف على رجليك
الملك عشان ابنى يهون الصعب
حـ(2) دمك هاينزف ... موافق
الملك موافق
حـ(2) ها تحس بآلام فظيعة ... موافق
الملك موافق
حـ(2) ممكن تقع فى اليكة وكل الشوك يدخل فى جسمك ... موافق
الملك موافق
حـ(2) أذن .. الان يا ملك المحبة أمشى على الشوك ودوق العذاب والالم وحس باهات البشر وشارك العبيد عذابهم
الملك اه ....اه ....اه
حـ(2) مش قلتلك طريقك مليان اشواك ... ده طريق مليان دمار وهلاك
الملك عشانك يا ابنى امشى على الأشواك ... واعدى فى الهلاك
حـ(2) ياه على شجاعتك يا ملك المحبة ... دى شجاعة اشجع الشجعان .. شجاعة ميقدرش عليها انسان .
الملك دى حب اقوى من قلبى الكبير . اعدى فى الشوك والألم المرير
الملك مهما كانت الصعاب هاعدى وافتح الباب
شومان مولاى الحارس جاى من بعيد ... طاوعنى وسيب وادى العبيد
الملك مفيش فايدة من الكلام يا شومان .. انا قربت اوصل للدوا وأرجع للأمير فرحان
حـ(3) أنت مين ياللى هناك
الملك انا ملك المحبة اللى جاى اجيب الدوا لابنى الامير من عندكوا
حـ(3) أه .. ملك المحبة عرفت من شجاعتك ومحبتك لأبنك من حراس البوابتين الاولنيين
الملك محبتى لابنى من غير حدود .... محبتى لابنى تكسر السدود .
حـ(3) طلبى عليك غالى مش هاتقدر تنفذه فى الوقت الحالى .
الملك مهما أن كان غالى هانفذه مهما كان صعب هاتحمله .
حـ(3) متتسرعش يا ملك المحبة يا لابس خيش العبيد .
الملك مهما حاولت تذلنى مفيش حاجة تهزنى أنا لازم أرجع بالدوا الأكيد
شومان مولاى باين على البوابة دى صعبة وقاسية ... باين عليها مليانة تعب ومرارة . أمر من المر وأقسى من الحجارة .
الملك مش هارجع يا شومان إلا فى حالة واحدة بس
شومان ايه هى يا مولاى .؟
الملك لما ألاقى الدوا هارجع للأمير
شومان الأمير مش حاسس بألمك وتعبك هو فى القصر نايم على السرير
الملك مش مهم يحس بى المهم احس بيه
حـ(3) وقررت ايه يا ملك المحبة
(14)
الملك مستعد لطلبك وجاهز للتنفيذ .
حـ(3) يبدو ان الأمر هايكون لذيذ وخصوصا لو عرف أن طلبى عليه عزيز .
الملك أطلب وطلبك بسرعة قول ... أنا لازم أوصل للباب على طول .
حـ(3) طيب متستعجلش .... بص يا جلالة الملك على طول الطريق من هنا للبوابة هبون الطريق مليان ضرب واهانة .
شومان ضرب وأهانة .. لا يمكن أنا أقبل أن مولاى ملك المحبة ينضرب او يتهان .
الملك بس انا راضى يا شومان .
شومان مولاى راضى ازاى ... ده شى فظيع ... امتحان مريع وقرارك يا مولاى اسمح لى كان قرار سريع .
الملك انا راضى بكل شى عشان ادى الأمير حياة تانية .
شومان تدى الأمير حياة تانية مالأمير عايش فى دنيا تانية نايم على السرير ومش حاسس بحاجة وانت هنا بتطلب الدوا .
الملك متحاولش تعطلنى عن هدفى .
شومان يعنى ده قرارك الأخير يا مولاى .
الملك ايوه يا شومان .
شومان هاتنفذه وأنت مش ندمان
الملك لا هانفذه وانا فرحان
شومان أذن كلامى انتهى يا مولاى وكلام الحارس لابد يكتمل
حـ(3) ودلوقت يا ملك المحبة هتتعرض للضرب والمهانة
الملك ومين دول اللى هناك متهيالى شفتهم قبل كده
حـ(3) أكيد دول الناس اللى أتعاطفوا معاك حراس البوابتين الاولنيين
الملك طب وايه اللى جابهم هنا
حـ(3) مهما دول اللى هيستركوا فى ضربك وأهانتك
الملك الناس اللى أعجبوا بمحبتي لابنى واتعاطفو معايا هما الناس اللى هيضربونى ويهنونى .... ازاى
حـ(3) متتعجبش ... هى دى طبيعة العبيد
الملك ياه دى طبيعة قاسية
حـ(3) قلت ايه يا ملك المحبة موافق انك تنضرب
الملك موافق
حـ(3) موافق انك عشان ابنك تتهان
الملك موافق
حـ(3) أذن عليك دلوقت أنك تمشى من هنا للبوابة ولو وصلت هتفتحها وتدخل على الرابعة على طول .
الملك وانا موافق
حـ(3) أذن أمشى فى طريق الألأم والمهانة والأحزان ( يبدوا بضربه )
حـ(1) ها ها ها .. ملك المحبة عندنا .. أحنا خدامك وعبيدك
حـ(2) ملك المحبة لابس الخيش .. ها ها
حـ(3) اسجدوا لملك المحبة
حـ(1) يا ملكنا من ضربك
حـ(2) اسكتوا .. اسكتوا .. لحسن يغضب عليكوا ... ها .. ها..
حـ(3) يعينى شوفوا أزاى مسكين مهان
(15)
حـ(1) عشان ينقذ ابنه العيان
حـ(2) يعينى عليه الملك ... عرشه ومجده ترك
حـ(3) مش قادر تضربنا
حـ(1) ولا انت ملك عالفاضى
حـ(2) فين تاجك ... فين ردائك
حـ(3) فين اكلك .. فين شربك .
حـ(1) فين خدامك وعبيدك
حـ(2) فين تهديدك ووعيدك
حـ(3) كل ده راح انت هنا مليان جراح
حـ(1) أنت هنا عبد من العبيد وده هو الشى الأكيد
حـ(2) أنت هنا عبد ذليل والضرب ده هو الدليل
الملك لكنى وصلت للباب وعديت من المهانة والإذلال
حـ(3) مبروك يا ملك على الباب الرابع رحلتك
الملك رحلتي قربت تنتهي لكن حبى مش هاينتهى
حـ(4) مبروك عليك يا ملك المحبة وصلت هنا للبوابة الرابعة
الملك يا حارس البوابة ممكن تسمح لى براحة
حـ(4) لا يمكن إذا كنت عاوز ترتاح يبقى هترجع من الأول .... قلت ايه
الملك قلت هأكمل
حـ(4) من غير راحة
الملك من غير راحة
شومان مولاى سيبنى أنا اعدى البوابة دى انا خدامك ورهن أشارتك
الملك لا يمكن يا شومان أنا لازم استحمل وأتهان عشان اصحى ابنى الأمير التعبان
شومان مش ممكن يا مولاى نفسى فداك
الملك متشكر يا شومان لكنى مصر على انى أعدى البوابة دى بنفسي
شومان مولاى دا انا عرفت ان الطلب صعب
الملك وأيه هو الطلب يا حارس
حـ(4) تتجلد يا ملك المحبة
شومان شوفت يا مولاى تتجلد ... جسمك الملوكى مش ها يتحمل الجلد ... أفتكر يا مولاى عظمتك ومجدك وجلالك
الملك عظمتى ومجدى هايزيدوا مع كل ضربة من كرباج الجلاد
شومان مولاى ازاى لملك المحبة يتجلد من العبيد
الملك عشان الأمير يرجع لحضنى سعيد
حـ(4) يا ملك المحبة هاتقدر تستحمل 39 جلدة
شومان 39 جلدة لا يمكن .... لا يمكن
الملك 39 جلدة ده أمر قاسى ومرير
شومان مش قلتلك يا مولاى وأبو الامير
الملك لكنى ها ستحمل
(16)
شومان مش ها تقدر تتحمل
الملك عشان ابنى ها ستحمل
شومان الجلد قاسى والجلاد اقسى
الملك مهما كانت القسوة
شومان مولاى دمك هايسيل
الملك دمى فدى ابنى
شومان جسمك ها يتقطع
الملك جسمى يهون عشان ابنى
شومان كرامتك هاتتهان
الملك كرامتى تروح ويرجع ابنى
شومان يا مولاى الطلب غالى
الملك مفيش حاجة تغلى على ابنى
شومان كفاية .... كفاية .... نفذ الحكم يا جلاد
حـ(4) اركع يا ملك المحبة واستعد لجلادات السوط القاسي ( يجلده )
شومان قلتلك يا مولاى ... أرجع يا مولاى قوم يا مولاى .. ارفض الركوع يا مولاى ... أرجع ... ارفض الاستسلام
الملك حبى لابنى يمنعنى من انى أقاوم
شومان لازم تقاوم .....لازم تقول لا ..لا ...لا ...
حـ(4) الجلادات كملت والبوابة تقدر تعديها
الملك وأخيرا وصلت للبوابة الخامسة والأخيرة
شومان أنا حاسس انها الموت يا مولاى
الملك ولو كان فيها موتى بس ابنى يقوم
شومان مولاى صدقنى كل اللى شفته قبل كده ميجيش نقطة فى بحر اللى جاى
الملك ميهمش اللى جاى انا فاضل لى خطوة وأوصل لدوا الأمير
شومان طب أرجع شوف يمكن يكون بخير
الملك لازم اتمم اللى اتقال
شومان كلام الحكيم كلام خيال أو كلام محتال
الملك ده حتى مرضيش بالمال
شومان لكن رضى بمهانتك والإذلال
الملك متحاولش تخلينى أرجع أنت المفروض لكلامى تسمع
شومان طيب أشرب ده يا مولاى
الملك ايه ده يا شومان
شومان ده خل مركز يا مولاى تو ما تشربه مش هاتحس بأى الم وتقدر تعدى البوابة بسلام
الملك عايز تخدرنى عشان محسش بالالام .... انا شاكك فيك من زمان
شومان انا ليه يا مولاى
الملك من بداية الرحلة وانت عايز تعطلنى
شومان أنا ياموولاى ... دانا هدفى انك تعيش فى سعادة انت والأمير
(17)
الملك وكان عندى شك ان انت سبب مرض الأمير
شومان انا يا مولاى ده ظلم
الملك الظلم انى كنت أحكم عليك وأنا مش متاكد لكنى دلوقت أتاكدت
شومان مولاى ..... مولاى
الملك وكمان فى شى محيرنى انت ازاى قدرت تدخل وادى العبيد من غير حراس ولا بوابات
شومان ها ها .... دلوقت لسه بتسال يا ملك المحبة ... كنت مستنى سؤالك من زمان ... انا شومان ملك وادى العبيد رئيس مملكة الهوا
الملك انت شومان عدوى اللدود اللى بدور عليه من زمان . كنت متاكد أنك أنت الخبيث الثعبان .
شومان ها ..ها .. انا اغريت ابنك بركوب الحصان أنا الأمير شومان .
الملك حاولت تعطلنى عن أنى اجيب الدوا لابنى
شومان كل ده واكتر .... البوابات انا اللى عاملها الطلبات انا اللى طالبها .. الحراس دول اللى قدامك خدامى واتباعى
الملك آه يا خبيث يا ابن الأفاعي .
شومان لكنك دلوقت هاتخسر يا ملك المحبة مش هاتقدر على طلبى الأخير .
الملك وأيه هو طلبك الأخير هانفذه مهما كان مرير
شومان طلبى انك تضحى بنفسك ... طلبى انك يتسفك دمك
الملك والدوا
الحكيم الدوا ... هو دمك يا ملك المحبة
الملك الحكيم ....... أنت معاه ولا ايه
الحكيم أنت ناسى أنى قلتلك انى هاكون معاك فى كل خطوة
الملك طب ازاى دمى هو الدوا
الحكيم دمك هو اللى هيطهر ابنك الأمير من علته .
شومان اظن صعب عليك تسفك دمك الملكى دمك وحياتك وكرامتك فى كفة ودوا ابنك فى كفة تانيه
الحكيم يا ملك المحبة ... أنت عديت كل الصعاب والأبواب أتشدد .. وخليك قوى عدى العقبة الأخيرة
الملك بدون أى أرشاد أو كلام من حد ها عديها بأرادتى ها عديها بحبي لأبنى ها عديها عشانك يا بنى ها سفك دمى عشانك يا ابنى ها ضحى بحياتى و نفسى
شومان ودلوقت أصلبوه وع الخشبة علقوه .
الحكيم كل نقطة دم بتنزف منك بتطهر ابنك المريض
شومان برغم من كرهى ليك وأمنيتى أنك تموت لكن ما كنتش أحب انك تموت بالشكل ده
الحكيم دمك اللى بينزف دلوقت طهر ابنك من علته ... مش بس كده ده دمك صار الدوا لابنك ولأولاده من بعده
شومان دمك صار مانع بين وبين ابنك وبين المرض دمك طهر ابنك من علته
الحكيم دمك صار الدوا
شومان الصليب بعد ما كان علامة عار وهزيمة صار علامة عارى أنا وهزيمتى أنا
الحكيم صليبك يا ملك المحبة صار رمز الفخر من دلوقت رمز العار بقى رمز الفخار
شومان مش قادر استحمل
الحكيم صليبك صار رمز هزيمة شومان
شومان كفاية ... كفاية
(18)
الحكيم دمك الغالى صار الدوا لابنك العيان
شومان كفاية ...... كفاية
الحكيم موتك عطي حياة جديدة لابنك التعبان
شومان كنت فاكر أنى غلبتك لما صلبتك لكنى انهزمت وصليبك علامتك .
الحكيم والدم
شومان الدم صار الدوا ..... الدم صار الدوا
( ترنيمة للصلب ..او موسيقى حزينة مع تسليط البروجكتور على الملك مصلوب )
شومان انا صحيح أتغلبت لكن مش دى نهاية المعركة انا لسه موجود والأمير لى هيعود .
طب والعمل يا شومان ابن الملك مابقاش تعبان الأمير أصبح فرحان
مش ها يدوم ..مش ها يدوم .
ها تعمل ايه يا شومان
ها شوف اى طريقة تفسد على الملك فرحته . اى حاجة ترجع للأمير علته .
زى ايه يا شومان ... زى ايه يا شومان
ها ها ... لقيتها
ابن الملك ها يبقى خاتم فى صباعى ... هيبقى هو الخروف وأنا الراعي .. لكن راعى عن راعى يختلف ... الملك كان راعى بيحب الخروف ... لكن أنا الراعى اللى هيدبح الخروف أنا اللى هوديه للهلاك بأيدى أنا
طب وازاى يا شومان
الطريقة سهلة واللعبة أسهل .. أروح للأمير وأتصاحب عليه وحيلي القديمة ها غيرها ها لبس قناع الحب والود ها لهيه عن الملك وأبعده عنه لحد ما يصدق أنى صاحبه ويمشى ورايا وميقولش لا لا
وبكده احزن قلبك يا ملك المحبة أخليك تدوق من الحزن والمرارة اللى عيشتنى فيهم من ساعة الصليب والمعركة بينى وبينك يا ملك المحبة ..........
وهنشوف مين اللى ينتصر ويكسب الأمير
الملك ها ها ... متتصورش يا وزير فرحتى بالأمير قد ايه
الوزير ربنا يخليك يا مولاى ويخليلنا الأمير
الملك تعرف يا وزير
الوزير ايه يا مولاى
الملك كل الالام والمتاعب والمخاطر اللى شفتها فى رحلتى مكنتش حاسس بيها
الوزير ايه يا مولاى ... ازاى ده
الملك كان حبى لابنى مخلينى أدوس على الالام وانا فرحان اقبل المخاطر وانا مش زعلان
الوزير وفشل الخبيث شومان
الملك كان فاكر انى هاضعف قدام الجلد والاهانة والصلب لكن اللى انتصر هو الامل والحب
الوزير أكيد يا مولاى وأحسن شى عملته بعد ما رجعت لينا المملكة أنك أمرت بطرد شومان
الملك ولو انى قلقان
الوزير خايف على الأمير من حيل شومان
الوزير ماتخفش يا مولاى متخفش الأمير صحى وأتعلم الدرس
الملك تفتكر يكون بيعمل ايه دلوقت
(19)
الوزير أكيد بيتفسح فى الجناين والغيطان
الملك طب روح ناديه وعلى هنا هاته بسرعة
الوزير امر مولاى ( يخرج )
الملك ياه يا ابنى قد ايه أنا مشتاق لك مشتاق اشوفك وأندهلك . مشتاق ترجع تانى فى حضنى تشكى لى همك وتشاركنى فرحى ... اه لو تعرف قاسيت عشانك قد ايه ... لكن ميهمش كله عشانك يهون .
الوزير مولاى .... مولاى
الملك فى ايه يا وزير
الوزير امر عظيم وخطير
الملك فسر يا وزير أنا محتاج تفسير
الوزير نبا حزين هروب الأمير
الملك كده من غير سبب او تبرير
الوزير أتصاحب عليه اللئيم شومان .... أفتكره صاحبه حقيقى ....... وبقى معاه فرحان
الملك ده شى ولا فى الاحلام ..... لكن دى عمايل اللئام
الوزير مولاى ... وايه الحل يا مولاى
الملك مش عارف يا وزير .. كل شى اديتهوله كل حياتى اديتهاله .....حتى دمى سفكته عشانه .... الامى احزانى ..... كله قدمته ليه عشان يبقى فى حضنى لكن هو نسينى وراح لعدوى وترك حضنى
الوزير مولاى
الملك انا حزين يا وزير .... أعمل أيه للأمير .. أعمل ايه اسمع يا وزير
الوزير امر مولاى
الملك روح دور ع الأمير فى كل مكان ,وقوله ابوك مستنيك ترجع لحضنه من تانى قبل ما يفوت الاوان وميبقلوش غير الندم والمرارة
( ستار )
