نص (عفوا لم تسقط الاقنعة )
عفوا لم تسقط الاقنعة
الشخصيات حسب الظهور ( الجنرال – عارف – سعيد – تفيدة – منصور – كيماوي – تيتي – نظمي – سناء – حلاوة – روبابيكيا )
جنرال عاوزك تعرف يا عارف ان الحفلة السنة دى غير اى سنة
عارف عارف يا افندم السنة دى هى الذكرى العاشرة لتولى سيادتك ادارة امور البلاد
جنرال وعلشان كدة يا عارف انا عاوز الحفلة السنة دى يحكوا و يتحاكوا بيها طول الزمان
عارف عارف يا سيادة الجنرال عارف سعادتك
جنرال اوعى حد من الضيوف يمشى .... زعلان ... لو حد طلع برة القصر انت عارف هيحصلك اية لو مكنش مبسوط
عارف احم ... عارف يا افندم ..... اى خدمة تانية
جنرال اة..لا اتفضل ... اة بقولك اية .... انت وزعت الدعاوى على الناس زى ما قولتلك
عارف ايوة سعادتك ... زى ما قولت تمام
جنرال عظيم عظيم ... شكلها هتبقى حفلة تمام
عارف اى خدمة تانية
جنرال لا اتفضل انت ...عارف مش عاوز اوصيك الحفلة تبقى اخر نظام يعنى الغنا و الرقص و المسخرة
عارف عارف يا افندم
جنرال ايوة .... لازم يكونوا اخر نظام انا راجل احب حتى المسخرة بنظام
عارف اى خدمة تانية
جنرال لا .... اتفضل .... عارف ... بقولك اية انا اللى همشى دلوقت وخليك انت هنا علشان تستقبل الضيوف
عارف حاضر يا سيادة الجنرال ..... آة شكلة كدة هيبقى يوم هلاك يا عارف بس معلش كلة يهون فى سبيل اسعاد الجنرال و شعب المدينة
سعيد يا سلام يا بنت يا تفتف الواحد مش مصدق انة جوة قصر الجنرال
تفيدة قصر ... قصر مين يااخويا دة جنة بحالها
سعيد شوفتى يا بنت يا تفتف الجنينة اللى برة
تفيدة قطيعة يا اخويا دى فيها بركة كنت هاقع فيها ..... يوة هم بيطلعوا امتى دول ... يوة هو بيعمل اية دة
سعيد يمكن بيدور على حاجة ضاعت
تفيدة يوة ... حابس حابس ... انت مين يا جدع انت وبتعمل اية هنا
عارف انتوا اللى مين وبتعملوا اية هنا
سعيد انا
تفيدة استنى انت هتقولة كدة على طول مش لما نعرف هو مين بسلامتة
عارف انا .. انا بقى ابقى عارف كبير امناء قصر الجنرال رفيع رئيس المدينة
تفيدة هى هى خدام يعنى
سعيد هى وقال اية كنت فاكرك صاحب القصر
عارف ممكن اعرف بقى حضراتكوا تبقوا مين وبتعملوا اية هنا
سعيد انا سعيد .. سعيد سعادة حلاق صحة الجماهير ودى بقى تبقى تفتف ... تفيدة حرمى المصون
عارف تشرفنا ممكن اعرف بقى اية اللى جابكوا هنا
تفيدة اية هو دة اللى كل شوية اية اللى جابكوا هنا ...قوللى هنا يا اخويا مش دة قصر الجنرال بتاعك سى رفيع
عارف سى رفيع .... ماشى يا ستى هو دة قصر الجنرال ممكن بقى اعرف
تفيدة اية اللى جابكوا هنا
عارف كويس انكوا عارفين
سعيد احنا هنا بصفتنا مدعوين
عارف اية مدعوين على اية بالظبط
سعيد على الحفلة وريلة يا تفتف الدعوة
تفيدة خد اياكش الحمار يفهم
عارف احترمى نفسك حضرتك
تفيدة هى هى .. حضرتك ... حضرتك مين يا نوغة لا خد بالك و شوف انت بتكلم مين
سعيد اديلة اديلة يا تفتف .... خلية يعرف مقامة
تفيدة لا شوف نفسك و اعرفها و اقف قدام مرايتك و نضفها
عارف اقف قدام مرايتى ..... لا دة كتير
جنرال اية فى اية يا عارف
عارف الحقنى ...... الحقنى يا افندم الراجل الحلاق دة و الست الشرشوحة دى دخلوا هنا ازاى معرفش
تفيدة شرشوحة ...... شرشوحة مين يا.............. انا شرشوحة يا مبتدا من غير خبر ياللى لو نفخت فيك كل عضمك يتكسر
سعيد اديلة يا تفتف فشفشيلة عضمة
جنرال ممكن اعرف حضراتكوا مين و بتعملوا اية هنا
تفيدة تف.. تف ..تف ... خضيتنى يا اسمك اية الحقنى يا سعيد
سعيد سلامتك من الخضة يا حبى
جنرال ما تقف عدل انت و هى انتوا عارفين انتوا بتكلموا مين
تفيدة هنكون بنكلم مين يعنى ابو الهول ولا ام الهول
سعيد لا يا تفتف يا حبيبتى دة باينة الهول نفسة
جنرال احترم نفسك منك ليها ............... انا الجنرال رفيع رئيس المدينة
سعيد تمام يا افندم .. ل .. لمؤاخذة يا افندم اللى ما يعرفك يجهلك و مراتى تفتف جاهلة .. ايوة صدقنى جاهلة ما بتعرفش تقرا .. اية فى اية
تفيدة يعنى هو انت اللى بتعرف تقرا
سعيد اسكتى يا ولية انتى عاوزة تقللى من منظرى قدامة
جنرال طيب ممكن اعرف انتوا دخلتوا هنا لية
عارف حرامية يا افندم ..... اكيد حرامية
تفيدة قطع لسانك و لسان اللى مشغلك ..... يوة ولمؤاخذة يابية .... لكن يابية احنا مش حرامية
جنرال ايوة صحيح دة مش منظر حرامية ..... يبقوا شحاتين
سعيد هى هى حلوة يا افندم
عارف دول يا افندم لا منظر حرامية ولا شحاتين دول مش منظر خالص
جنرال امال دول اية يا عارف
عارف دول بيقولوا ان معاهم دعوة للحفلة
جنرال دعوة ....ازاى
سعيد اهى يا بية
جنرال ايوة صحيح وصلتكوا ازاى دى
سعيد بالبوسطة يا افندم ايوة صدقنى بالبوسطة ..... حاكم الواد البوسطجى دة لزقة ما انت عارفة يا باشا واد لزقة وغتت وعمر ما حد حبة قا معدى على وانا بحلق لزبون بس انما اية زبون سقع كان كل مرة يدينى على قفاى .... المرة دى بقى كنت عامل احتياطاتى .... مش قاعد على الدكة لاسمح اللة دة انا طول عمرى لاعيب و لاعيب قديم .... ايوة طبعا ما الكورة اجوان وانا يا جبت اجوان لولا بس الاصابة
جنرال اصابة ..... اصابة اية ....ياعم انتامال تجيبنا وتودينا عاوز اية
سعيد انتوا اللى عاوزين .... انتوا ولمؤاخذة اللى باعتين الدعوة
عارف ياافندم الدعوة اكيد مزورة ....انا عارف
جنرال لا يا عارف الدعوة سليمة
عارف سليمة يعنى اية
جنرال يعنى الضيوف دول هيقعدوا معززين مكرمين
عارف آة يبقى اتخرب بيتك النهاردة يا عارف
جنرال عارف مش عاوز اوصيك ... مش عاوز حد من الضيوف يزعل
عارف عارف ياافندم عارف .... بقولك اية انت وهى انا قدامى حفلة طويلة عريضة اقعدوا ساكتين كدة فى ركن احسن لكم ... ايوة شاطرين ..... يارب عدى الليلة دى على خير
منصور اية ياعم بقولك هدخل يعنى هدخل
عارف يا منصور بية بالراحة الجنرال بيرتاح ومش عاوزين نزعجة
منصور خش قولة منصور زفت قطران جة
عارف يا افندم ما يصحش كدة سعادتة نايم
منصور اخش اصحية
عارف تعال بس يا افندم تصحية مين
منصور ما هو يا انت تصحية يا ...انا ....انا ....انا ااية .... اة انا انيمة ..... لالالالا ..... انا افهمة ..... لا مش دى كمان .... اة انا اقتلة .... يوة المهم خش انت لة
عارف حاضر .... حاضر ..,... حاضر
منصور اللة .... اخيرا .... اخيرا جيت هنا ........ فى ال... فى ال.... هو انا فين بالضبط
تفيدة يوة ودة مين دة كمان
سعيد انا اقولك يا ستى ....دا .....دا ...دا .. الاستاذ سكران
تفيدة سكران ...... يوة يا ندامة اكيد مراتة مطلعة عنية فى البيت
منصور مرات مين يا ولية يا سكرانة انتى ...... ما تقفى على بعضك و انتى بتكلمينى ...... انتى عمالة تتمايلى يمين و شمال زى الغوازى
تفيدة غوازى .... هى هى ..... انا غوازى يا ابن الذى والتى ....... طب وحياة جوزى لاوريك
سعيد ايوة ... ايوة اديلة خشى علية كمان ..................... بيب بيب تفتف
تفيدة اية يا هانم فى اية ... فى اية يا استاذ
سعيد سعادة الجنرال
جنرال اية فى اية ..... فى اية يا منصور بية
منصور اهلا اهلا حبيبى الجنرال رفيع .... ارفع جنرال فى البلاد شانا و مكانة
جنرال متشكر يا منصور بية
منصور يرضيك عارف يمنعنى من الدخول و امتى النهاردة يوم العيد .... يرضيك يا سيادة الجنرال
جنرال لالا ميصحش .... ميصحش يا عارف عملت كدة لية ..... خلاص رضيت يا منصور بية
منصور لا لسة
جنرال طب اعمل اية .... اطردة علشان ترتاح
عارف تطردنى لية
منصور لا برضة لا
جنرال امال اعمل اية
منصور اربطة فى ديل حصان جامح فى الصحراء وخلية يجرى بية
عارف جامح مين
جنرال لالالا يا منصور بية ميرضكش دة عارف دة طيب
عارف ايوة يا افندم طيب
جنرال وبعدين انت قلبك طول عمرة حنين ..... يا عارف شوف طلبات منصور بية كلها
عارف حاضر يا افندم ............. وصل الان يا حضرات سعادة الدكتور الكبير كيماوى و معة الغادة الحسناء مدام تيتى ممثلة التليفزيون المشهورة
جنرال اهلا اهلا دكتور كيماوى شرفتنا النهاردة ............ لالالالالا اية الجمال دة كلة يا مدام تيتى النهاردةزى ما اكون لسة بشوفك على التليفزيون من 40 سنة
تيتى احم
جنرال 30....20.....10..... يا عارف شوف البهوات يشربوا اية
منصور اهلا اهلا دكتور كيماوى ..... سمع هس ... دكتور كيماوى يعنى الدكترة ... يعنى جايزة نوبل ... يعنى احسن واحد يخترع حاجات ملهاش لازمة .... ها ها ها
تيتى بقولك اية يا دكتور شيل البنى ادم دة من هنا احسن اعصابى مش طايقاة
منصور و مين دى يا اخواننا اقدملكم مدام تيتى ممثلة التليفزيون المشهورة اللى اديلها 15 سنة ممثلتش دور واحد و قاعدة فى البيت
تيتى لا ......... دة انسان لا يطاق
كيماوى يا منصور بية ما يصحش دول برضة ضيوف الجنرال
منصور بس انت مش هتعرفنى اعمل اية
كيماوى يا منصور بية بعدين الجنرال يزعل و انت عارف زعلة
منصور هة
تيتى انا مش عارفة اية الاشكال دى و ازاى الجنرال يجيبها حفلة زى دى
كيماوى معلش يا ستى قدرنا .... احنا الكبار لازم نستحمل هفوات الشعب
سعيد عارفة يا بت مين اللى هناك دول
تفيدة مين يا اخويا
سعيد اللى هناك دة ...... يبقى .... الممثلة تيتى
تفيدة و مين دى كمان اللى معاة يا اخويا
سعيد هة ... ما تيجى نخش عليهم ......... اهلا اهلا يا باشا ... صدقينى يا هانم ......... صدقينى اااا.... يللا بقى المدام تكملك
تفيدة ازيك ياختى و ازى عيالك انشالة يكونوا بخير
تيتى اية دة .... اية يا ست انت
جنرال اية فى اية يا ست ....... دة احنا الجمهور ......فى حد يعامل الجمهور بتاعة كدة
سعيد بقولك اية يا مدام ممكن ناخد صورة
تيتى اوف اذا كان على صورة مفيش مانع .... ياللا
سعيد كمان صورة
تيتى صورة تانى
عارف وصل الان الاستاذ نظمى كامل خادم الكنيسة و استاذ الكلية الاكليريكية و حرمة مدام هيفاء .....اية ... اة مدام سناء
نظمى سامحنى يارب انت عارف ان الاماكن دى بتعملى عسرة .... لكن اعمل اية كلة فى سبيل الخدمة
سناء سي نظمى ياسي نظمى
نظمى خير ....... خير يا حياتى
سناء هو انت تعرف الجنرال منين يا اخويا
نظمى اعرف الجنرال منين ......... دة انتى غلبانة .... دا انا الاب الروحى و المرشد للجنرال ... يعنى اقدر اقولك وبلا فخر انة ميقدرش يخطى خطوة من غير ما يقولى
سناء يا سلام يا اخويا على كدة بقى انت مهم
نظمى للاسف يا زوجتى العزيزة انتى مش مقدرانى ..... مش مقدرة ان غيابى عن الكنيسة النهاردة معناة ان عمود الكنيسة مش موجود ... و الكنيسة من غير عمود ملهاش وجود
تيتى ها ها ... دة انت ظريف خالص يا استاذ ... قلتلى اسمك اية
سعيد اسمى سعيد وهكون اسعد لو شرفتينى فى محل عملى
تيتى هو انت شغال اية
تفيدة حلاق ياختى ............. تحبى تحلقى بقى شعر ولا دقن
سعيد لمواخذة يا هانم اصلها كدة دايما مدب ............ دى تفتف مراتى وانا عارفها
تيتى لا ما جراش حاجة ...... اللة مين اللى هناك دة ..... اة الاستاذ نظمى كامل .......... طب عن اذنكوا ثانية
سعيد انتى لازم كدة تطفشى كل زبون ..... دة انا مصدقت ان رجليها جت وقلت المحل هيشتغل على حسها
تفيدة وانت لازم تبصبص يا سي سعيد
سعيد ياتفتف يا حبيبتى ابصبص مين دى منظر ............... طب دى احلى ..... دى اجمل ...... دى . ... منك ..... اللة ياما
تيتى لالالا انا زعلانة منك قوى يا استا نظمى
نظمى لية بس يا هانم انا عملت اية
تيتى كلامك
نظمى ينقطع لسانى
تيتى بقى برضة يرضيك تقول على انا وباقى الممثلات ادوات عسرة فى ايد الشيطان
نظمى فشر دة انت عسرة على عسرة
اهلا ازيك .... ازيك يا استاذ نظمى استاذ الاخلاق و الدين
نظمى هة
منصور ايوة بكلمك انت ........ مش انت اللى قعدت تقولى يا منصور بية انت ما بتعملش حاجة غلط .... وخمرا لاجل معدتك و اسقامك
نظمى انا......انا
منصور انت منافق .....ايوة منافق ......... وانتى يا ست هانم شايفة جوزك عمال يبصبص وسايباة
سناء طب وهعملة اية يعنى
نظمى لو سمحت يا منصور بية متتدخلش بينى وبين مراتى .....انا
منصور انت ولا حاجة ...... وانتى ولا حاجة ....كلكم ولا حاجة .... وانا ....هة ... برضة ولا حاجة
عارف ولا حاجة ازاى دى حفلة الجنرال ..... استنى هنا .... استنى
حلاوة اوعى من قدامى ..... هو غين الجنرال ..... فين اللى واكل حقوق الشعب
جنرال اية ... فى اية يا عارف ... مين دى كمان
حلاوة انا الشعب يا جنرال
جنرال مين دى يا عارف
عارف يا فندم دى واحدة كدة دخلت وعمالة تتخانق و مصرة انها تحضر الحغلة
تيتى مصرة .... يعنى اية ...... هو اى حد يدخل كدة
حلاوة اة طبعا ..هو انت مش رئيس الشعب والحفلة دى داعى فيها كل طبقات الشعب
جنرال اة طبعا .... كل الناس هنا البية والعالم والممثلة والحلاق و ال.... , ما علينا كل الناس هنا
حلاوة وانا هنا بصفتى المعارضة
تفيدة معارضة اية
حلاوة مش اى حكومة ليها معارضة..... انا بقى المعرضة
كيماوى طب بتعترضى على اية حضرتك
حلاوة معرفش بس قولوا حاجة وانا اعترض عليها
جنرال انتى مش عاوزة تحضرى الحفلة .......... خلاص خليكى
حلاوة لا مش هقعد
الكل خلاص امشى
حلاوة لا مش همشى
جنرال انتى لا عاجبك كدة ولا كدة ....طيب .... يا عارف فى كام واحد هنا فى القصر دلوقتى
عارف 10 يافندم
جنرال عظيم خالص اقفل الباب
سناء اقفل الباب ... هو فى اية بالظبط
نظمى مش عارف
تفيدة اقفل الباب ... لايا اخويا اصحى انتوا جايبيننا هنا تقلبونا ولا اية ...لا اصحى دة مش كل جردل يندلق ولا كل جيب ينسرق
حلاوة اة احنا بنعترض
جنرال اسمعوا بس احنا هنقعد هنا اصحاب مع بعضينا ومش عاوزين حد تانى معانا
الكل لية
جنرال علشان نبدا الحفلة... الحفلة و العيد السنة دى غير اى سنة الحفلة السنة دى كل واحد فيها هينسى شوية شخصيتة ويعيش اى شخصية تانى تعجبة
سعيد يعنى اية
جنرال يعنى يتحرر من القيود اللى علية واللى فرضتها علية شخصيتة
كلهم ازاى
جنرال انا مثلا مكدبش عليكوا زهقت من كونى جنرال بيصدر الاوامر لدة ودى ..... زهقت ان الناس كلها ما بتحبنيش ....بتخاف منى ايوة بس ما بتحبنيش
سعيد بالعكس يا فندم دة كلنا بنحبك صدقنى و اولهم تفتف ... حتى اسالها
جنرال شكرا ... انا عارف ... بس دايما اسال نفسى لية الناس بتحب لاعيبة الكورة و الممثلين و المجرمين اكتر منى ..... لية ميكونش
تيتى ليه ميكونش في حياتي سلام ... اصحى الصبح من غير اضواء .. ولا اخبار ولا اعول هم بكره همثل ولا لأ هيحطوا اسمي على الافيش ازاي مين هي اللي بتنافسني وقالت عني ايه
سناء يا ست تيتي هو حد يكره الشهرة والاضواء
تيتى عارف يا عارف الوسط ده مليان كره ونفاق ومؤامرات وفلوس تكره ريحتها لان ريحتها فيها موت لكن في برضه جانب سلبي
نظمي يا خبر امال اللي فات كان ايه
تيتى دا ميجيش نقطة ف بحر
تفيدة بحر واسع وانا تايهه فيه
كيماوي دا ايه ده
سعيد انت اتجننت يا حبيبتي
تفيدة الدنيا دي يا خونا بحر كبير وانا عاملة زي مركب ورق صغيرة تايهه
سعيد لا دي تفتف حبيبتي طلعت دماغها دي حكاية
سناء حكايتي انا زي اي بنت حبت واحد وحبها واهلها مرضوش بيه
منصور دارت الدنيا واتجوزت اول واحد اتقدملها
نظمى عريس مناسب .. متدين .. معاه فلوس .. يعني من الاخر جاهز
سناء حياتي بقى مبقتش فارقة لى رأى ماليش ميهمنيش المهم اعيش
نظمى يا سلام ايه الشعر ده عاملة لى فيها شاعرة .. هه يا سلام ولما انت فصيحة كده منكده على عيشتي ليه
سناء انا
نظمى ايوه يا ختي اتمسكني واعملي شهيدة قدام الناس .. دا انا لولا الجوازة الشؤم دي كان زماني بعمة
سعيد اذا كان على اعمة البسها لك انا
كيماوي انا طول عمري انسان ملتزم من وانا صغير ... اسمع الكلام يا كيماوي .. حاضر .. ذاكر يا كيماوي ... حاضر ...عاوزينك تطلع دكتور يا كيماوي .. حاضر ... البلد كلها معتمدة عليك وعايزاك تاخدجايزة نوبل ... حاضر حاضر . طول عمري بقول حاضر ... لكن نفسي مرة واحدة
سعيد مرة واحدة اتخانقت فيها في الملجأ كانوا اللي عاوزين يضربوني كتير طلعت اجري .. وهما ورايا مسكت المقص ف ايدي ومدريتش بنفسي غير وانا حالق لأول واحد ... نعيما ... طول عمري بحكي لده ولده كلام فاضي كلام مليان ميهمش .. المهم لازم اسلي الزبون نفسي مرة اقول كلام
نظمى كلام كلام .. حكم ومواعظ ومفيش فايدة الناس مش عاوزة تتوب ... بيني وبينكم احسن .. اه احسن ما هم لو كلهم تابوا هنبقى كلنا زي بعض .. كلامي مبقاش له تأثير على حد نفسى اقول كلمة يكون ليها وزنها الناس
حلاوة الناس كلها اي كلام
سناء اي كلام
تيتي وانت مين اصلا علشان تحكمي على الناس
حلاوة انا حلاوة البت الشقية بتاعت السيرك اللي كل الناس مبسوطة بيها عال يا حلاوة احسن يا حلاوة انت احسن لاعبة اكروبات انت اتخلقت علشان السيرك .. لكن لا انا خلقت لاعترض .. اعترضت على كل الناس وكل القواعد وهربت من السيرك لان مش دي حلاوة اللي اتمنيتها مش دي حلاوة اللي المفروض تكون
منصور ياه يا خونا دا انتوا كلكم مشاكل وانا اللي كنت فاكر ان انا لوحدي اللي مليان مشاكل
كيماوي واظاهر ان مشاكلنا ملهاش حل
جنرال لأ ليها حل
عارف ازاي
جنرال زي ما قولتلكوا في الاول الحفلة اسمها يعني كل واحد يخلع شخصيته ويلبس قناع الشخصية اللي هو عاوزها
تفتف من النهاردة هنختار شخصياتنا بأدينا
سعيد محدش هيفرض علينا نكون ايه
حلاوة هنكون احنا .. احنا وبس
جنرال يالا دوروا حواليكوا بصوا على القناع اللي انتوا عاوزينه يمكن جنبكوا يمكن وراكوا يمكن تحت رجليكوا .. دوروا كويس والبسوا الاقنعة ( فلاشير لخلع ولبس الاقنعة ) ستـــــــــــــــــــــــــــــــــــــــــــــار
المشهد الثاني
يدخل نظمى وكيماوى وعارف ومنصور يتقدمهم سعيد ممسكا بالكتاب المقدس خلفهم النسوة لابسين السواد وهم يولولون
سناء اه يا غالى.. ياللي كنت راعب ناموس الكفر
حلاوة اه ياللي ياما هددتنا وياما بهدلتنا
سعيد لو سمحتوا.. لو سمحتوا يا جماعة هدوء... خلونا نتقف نصلي لربنا ونفتكر دايما ان اللي مات ده كلب وراح .. اقصد ان اللي مات ده طول عمره كان بلسم يتحط على الدقن يسيح .. قصدي على الجرح يطيب
تفتف بلسم مين دا كان بلطجي ونوري وعمره ماورانا يوم حلو قال على راي المثل الجنازة حارة والميت ... اوه سوري انا اسفة نسيت نفسي
سعيد احم . خلونا نقف نصلي
تيتي يا اخي نصلي مين اف انا حرانة .. ايه الحر الفظيع ده
عارف احم يا فندم متنسيش ان انت العمدة
تيتي اه صحيح يا شيخ الغفر .. اديني الشنب
عارف اتفضلي ... قصدي اتفضل
حلاوة يا خونا خلونا نخلص انا ورايا ابحاثي وتجاربي ومعملي انا مش سايبة الزريبة وجاية علشان خاطر كلمتين فاضيين
نظمي يا خونا يا خونا لازم تقدروا قيمة الوقت انا نايم في البرطمان ... قصدي نايب في البرلمان
تيتي ياجماعة احنا لازم ولابد نتفق احنا بعد ما خلصنا من رفيع البلطجي ده هندفنه فين
سعيد يا سيدي في اي مكان المهم ان احنا نصلي
تفتف نصلي مين هو انا فاضية
كيماوي وبعدين انتوا مضايقين نفسكوا ليه لو كان على دفنه ندفنه عند العمده
تيتي ايه مين ليه عمده مين ياواد منك ليه
كيماوي ايه ياعمدة جرا ايه مش عاوز تتحمل مسؤلياتك ليه
تيتي هه عشنا وشوفنا كمان الحريم بتتكلم ..ما تلم حريمك يا سيادة النائب
نظمي اسكتي يا ولية هضحكي علينا الخلق
كيماوي خلاص يا خويا يا جوزي يا حبيبي انت تأمر
نظمي بس بقى يا وليه اتهدي لما نروح البيت
عارف احم .. ما تحترم نفسك منك ليها انتوا هنا ف دوار العمدة
تفتف جرا ايه يا خويا منك ليه انتوا هتقعوا ترطوا كده طول النهار لا
سعيد احم
تفتف سوري يا جماعة ... معلش انجزوا انا ورايا تصوير
حلاوة اعزائي المشاهدين معنا اليوم فنانة الجيل وكل جيل فاتنة الشاشة الفنانة تفتف
تفتف ميرسي يا روحي
حلاوة نحب نعرف من حضرتك ليه حضرتك هنا النهاردة
تفتف انا طبعا زي ما المشاهدين عارفين بنت بلد واحب اقعد مع اهل بلدي وخصوصا النهاردة يوم ما مات البلطجي رفيع اللي كان راعبنا كلنا
حلاوة نفهم من كده انه كان بيهددك
تفتف اه طبعا دا حتى امبارح قبل ما يموت بعتلي جواب
تيتي مين دول يا شيخ الغفر
عارف دول باين عليهم التليفزيون يا عمدة
تيتي الله الشهرة و الاضواء انا هنا يا جماعة
عارف اهي ما تمسك نفسك شوية يا عمدة ما تفضحناش
حلاوة ومعنا اليوم جناب الخادم الاكليريكي الكبير الاستاذ سعيد .. نحب نعرف من سيادتك ايه رايك في اللي حصل لرفيع
سعيد هو بصراحة زي ما بيقول الكتاب ان كل ظالم وله نهاية طيب تصدقي انت ان رفيع ده مات بسبب شعره زي ابشالوم ابن داود.. ايوه صدقيني نعمل ايه ماهو مفيش حلاق محترم في البلد دي
تيتي ايه هو ده اللي بيحصل اجري يا واد خد الكاميرا
حلاوة ليه بس في ايه
تيتي في ايه .. في ان انا العمدة ومفيش تصريحات هتطلع من غير ما اقول
نظمي وه وهو انا برضه رحت فين يا عمدة
تيتي مظبوط مكانك موجود يا حضرة النايب
حلاوة والان مع التصريح الرسمي للعمدة المحترم تيتي
تيتي ميرسي يا حبيبتي
عارف هاع... الشنب يا عمدة
تيتي ايوه صحيح يا وله ... احم هو بصي حضرتك اللي حصل دا كله كان بتدبير مني انا شخصيا .. ايوه امال ما انا العمدة انا اللي خططت ودبرت للقبض على السفاح ده اللي اسمه رفيع
نظمي كلام ايه اللي بتقوله ده يا عمده امال انا عملت ايه
تيتي سيبك منه دا ولا يعرف حاجة اساليني انا
كيماوي انا اول ما شوفت رفيع جاي من عالترعة قلت اكيد في مصيبة
تيتي قمت سألته انت ايه اللي جابك حدانا الساعة
كيماوي قام رد وقال انا اجي وقت ما احب
تيتي الدم طار في نفوخي قلت له اتادب يا واد ورد كويس
كيماوي قال انتوا مش هتعرفوني اعمل ايه وراح
تيتي مطلع المسدس بتاعة من جيبة
كيماوي ساعتها كله طلع يجري حتى
تيتي حتى اساليهم ... مفضلش حد واقف قدامه
كيماوي غيري انا اللي شوفته
تيتي ورحت بسرعة رافع البلطة وهوب
كيماوي البلطة نزلت في نفوخه
عارف يعيش العمدة رجل الشجاعة
كلهم يعيش العمدة رجل الشجاعة
عارف يعيش العمدة الفارس الجسور
كلهم يعيش العمدة الفارس الجسور
عارف بيب بيب عمدتنا "يرددون"
نظمي بس خلاص منك ليها اذا كنت عاوزه تعرفي الحكاية الحقيقية يا ست فتعرفيها مني انا
سناء ليه بقى واشمعنى انت
سعيد لا الحكاية الصح مني انا ..انا كنت اقرب واحد للحادثة
تفتف ليه بقى وليه مقولش انا
جنرال ولا انت ولا هي انا اللي هقول الحكاية
سناء مين سي رفيع
كيماوي يا مصيبتي
نظمي سلامتك يا حبيبتي من الخضة قومي قومي
تفتف هو انت سعادتك .. احم .. لسه مموتش
جنرال لا لسه حد عنده اعتراض
سعيد لا يا فندم محدش عنده اعتراض
تيتي انا عن نفسى معنديش أي اعتراض يمكن عارف عنده اعتراض ولا حاجة
عارف اعتراض مين انت عاوز توديني في داهية
جنرال خلاص انت وهو وهي اتكتموا
سناء احم .. ومعنا اليوم اعزائي المشاهدات والمستمعات
جنرال ليه هو مفيش رجالة
تيتي " تخلع تيتي الشنب " اديك شايف
سناء معنا اليوم المجرم الخطير
جنرال بس متقوليش مجرم
سناء البلطجي
جنرال متقوليش بلطجي
سناء البطل المغوار والفارس الجسور رفيع
جنرال اهلا يا اختي
سناء نحب نعرف من سيادتك انت كنت ميت وقمت ازاي
جنرال هو انا اولا مكنتش ميت
سناء نعم ازاي
جنرال اه كانت لعبة
كلهم لعبة
جنرال اه علشان اختبركم اعرف مين اللي بيحبني من اللي لمؤخذه بيكرهني
تيتي احم احم انا مش هنا يا جماعة
سناء نحب نعرف ازاي الحادثة دي حصلتلك
جنرال هو انا فكرت وقولت يا واد يا رفيع يا ابو الرفع الناس دي بتحبك ولا
حلاوة المهم
جنرال قمت ماشي على الترعة
كيماوي البحر بيضحك ليه وانا نازلة اتدل دل دل
حلاوة تدلدلى ايه يا بت
كيماوي اتدلدل
تفتف ايه في ايه
كيماوي سي سي رفيع
حلاوة رفيع يا مصيبة سودا الحقونا الحقونا يا كفر غيتونا
عارف خير في ايه يا بت منك ليها في ايه
حلاوة سي رف رف
سعيد رف رف مين يا بت
تفتف رفيع
نظمي ماله سي قندله
جنرال ها
نظمي ها ها لمؤخذة يا حضرة
تيتي هي هي خير يا سي رفيع ايه اللي جابك الساعة دي .. انا قصدي مش الاتاوة بتدفع بانتظام
جنرال انا اجي وقت ما احب
عارف تيجي وقت ما تحب ازاي هي بلدك يا خويا
تيتي اتادب يا واد ورد كويس.. لمؤخذة لمؤخذة يا باشا ماتخدش عليه دا واد اهبل ودايما كده مدب
نظمي عاجبك كده كنت هتودينا في داهية
جنرال خلاص خلصنا
تفتف احنا قصدنا نعرف انت جاي بزيارتك الكريمة لية
سعيد اه احنا خايفين عليك لا الحكومة تمسكك مش صح كده
حلاوة ايوه كده
جنرال بس منك ليها انتوا مش هتعرفوني اعمل ايه
كيماوي جرا ايه يا جدع انت الناس كلها عامله تحايل فيك وانت مش نافع معاك حاجة ايه طايح في الخلق ليه
جنرال مين دي
نظمي يا باشا دي مرتي يا باشا هبلة صدقني هبلة
جنرال هبلة .. يبقى تنقتل ونريح البلد من هبلها " يخرج المسدس "
عارف اجري يا واد منك ليه .. اجري يا عمدة
جنرال هه جبنا .. زي ما اتوقعت تمام ودلوقت انفذ الجزء التاني من الخطة " يذهب ناحية الشجرة ويجذب فرعها فيقع عليه البلطة "
سناء امال يا عمدة عاملنا فيها الفارس الجسور والبطل المغوار وانت محصلتش الفار
تيتي يا ستي ابقي شليها في المونتاج
سناء لا ابدا
تيتي يا ستي اعتذر
سناء الاعتذار مش كفاية
منصور مش كفاية انتوا بقى لعب العيال بتاعكوا ده يا عالم فوقوا اديلكوا اسبوع من ساعة الحفلة الهباب دي وانتوا مش راضيين ترجعوا لشخصياتكوا الحقيقية
تيتي انت ايه اللي جابك دلوقت انت مش طول عمرك سكران وعايش في دنيا تانية
منصور انا مش عاوزكوا تخيبوا خيبتي
كيماوي ملكش دعوة بينا
تفتف احنا راضيين بحياتنا
جنرال ومبسوطين بشخصياتنا الجديدة
سعيد كفاية ان احنا اللي اخترناها
حلاوة ومحدش فرضها علينا
روبابيكيا يعني معنى كده مش عاوزين شاخصياتكوا القديمة تاني
نظمي انت مين انت كمان
روبايبكيا انا بتاع الروبا
سناء روبا ايه
روبايبكيا روبا بيكيا ... بيكيا ... كله للبيكيا تعال ياللي قاعد بيع أي حاجة وانا اشتري
كيماوي ودا ايه اللي جابه
عارف انا يا فندم لما لقيتكوا مش عاوزين شخصياتكوا القديمة قلت نبيعها واهو نطلع لنا منها بسبوبة
جنرال سبوبة
روبايبكيا ها قولتوا ايه
تفتف قولنا ايه في ايه
روبايبكيا هتبيعوا
كلهم هنبيع
روبايبكيا جايز تندموا
كلهم مالكش دعوة
روبايبكيا جايز شخصياتكوا الجديدة متعجبكوش
سعيد انت مالك
تيتي انت عليك تشتري وبس
روبايبكيا طب عاوزين كام
نظمي مش عاوزين حاجة
روبايبكيا يعني ايه مش فاهم
حلاوة يعني هنبيع الغالي بالرخيص
جنرال هنبيع ببلاش
روبايبكيا ببلاش ...على العموم انتوا احرار. دي بيعة مفيش احسن منها
يالا يا صاحبي انت وهو بيع لي حياتك برة وجوه
بيع لى حياتك وشخصياتك بيع لي ماضيك يالا واهدافك
بعلي بسرعة وبلاش بعلي بسرعة متستناش
المشهد الثالث
نظمي كيمي
كيماوي نظمي
نظمي كيمي
كيماوي نظمي
نظمي وحشتيني قوي يا بت
كيماوي اختشي بقى يا سي نظمي
نظمي يا بت بقولك وحشتيني
كيماوي وانا بقولك اختشي
نظمي لو ماكنتش ايدك تقيلة ... عارفة يا كيمي وانا قاعد في البرلمان والناس حوالي عمالة تخطب وتهلل بفكر في ايه
كيماوي في ايه
نظمي في حلة المكرونة اللي هتعملي هالي يا ترى هتبقى بالشطة ولا بالخلطة
كيماوي بقى بتفكر في المكرونة يا دني
نظمي اهدي اهدي بس .. اسمعي بس متطيريش كلمتين الحب اللي بفكر فيهم
كيماوي طب يالا قول ... ها بسرعة خلص
نظمي احم ... كيمي
كيماوي ها
نظمي منك لله يا شيخة ضيعتي كل الرومانسية
كيماوي لا بص الحكاية دي مش نافعة
نظمي طب استني هقولك كلمتين غيرهم
كيماوي لا يا عم نظمي انا زهقت
نظمي زهقتي .. زهقتي مني لا يبقى شايفالك شوفة تانية .. مين هو يا بت
كيماوي يا اخي انا بتكلم جد
نظمي جد ازاي
كيماوي انا زهقت من دور الست ده خلاص قرفت منه .... عاوز ارجع لطبيعتي تاني ... الدكتور كيماوي
نظمي ايه الدكتور كيماوي .. انت لسه فاكر
كيماوي طبعا فاكر وانت ايه نسيت الاستاذ نظمي الواعظ المشهور
نظمي ياه يا كيماوي من زمان .. ياه اكني بسمع الكلام ده عن حد تاني
كيماوي عارف يا نظمي انا وحشني قوي معملي وتجاربي .. وحشني قوي نظرة الناس لي الدكتور الكئيب اللي مبيتكلمش كلمتين على بعض .. انت كمان موحشتكش حياتك القديمة
نظمي حياتي القديمة
كيماوي اه موحشتكش الكنيسة والخدام والمخدومين .. موحشكش الكتاب المقدس
نظمي الكتاب المقدس .. ياه .. تصور يا كيماوي مع ان شخصيتي الجديدة المفروض انها نائب مسيحي في البرلمان لكن مفكرتش اقرا مرة في الكتاب
كيماوي ليه
نظمي تقول مشغوليات مسئوليات ... مش عارف
كيماوي وبعدين هنعمل ايه
نظمي مش عارف .. بس انت ايه اللي خلاك يعني تحن قوي للموضوع القديم ده
كيماوي رجولتي
نظمي نعم
كيماوي اصل انا مكدبش عليك انا بعد الغسيل والمسح والكنس والغرميات دي بقيت بحس ب .. ب
نظمي بايه
كيماوي بحاجات غريبة كده بتحصلي
نظمي ها ها مبروك طب وولي العهد جاي امتى
كيماوي انت هتقل ادبك ولا ايه
نظمي لا اصل الموقف مضحك قوي
جنرال ما تضحكونا معاكوا
نظمي ابدا يا سيدي دا ..هاها ..دا هاها
جنرال ايه
نظمي دا كيماوي زهق من شخصية الست
جنرال انا برضه زهقت من دور البلطجي عاوز ارجع الجنرال اللي الناس كلها بتحترمه
نظمي يا عم ايه اليوم النكد ده هي شوطة ودارت في الكل
جنرال صدقني يا نظمي الحياة اللي كنا عايشينها قبل كده اهون ميت مرة من اللي عايشينها دلوقت
نظمي الابن الضال
سعيد بس من غير تريقة
تيتي احنا فعلا الابن الضال
نظمي اهلا هلو هلو انتوا كمان زهقتوا من شخصياتكوا ولا ايه
تيتي ايوه
كيماوي ايه ده هو الموضوع بقى جماعي كده
سعيد اه
جنرال ويا ترى انتوا ايه اللي فكركوا بشخصياتكوا انتوا كمان
تيتي تفتكر حكاية الشنب دي لذيذة لوحدة نجمة زيي
جنرال ما انت اللي اخترت
تيتي غلطت ايه محدش بيغلط
كيماوي يا ستي اعتبري نفسك بتمثلي مسلسل ولا مسرحية
تيتي بس ليها اخر ومسيري يوم هرجع لشخصيتي .. لكن انا دلوقت لما بلبس العباية والشنب مببقاش عارفة انا مين العمدة ولا تيتي
نظمي ايه انت كمان بتحسي بحاجات غريبة بتحصلك .." يضربه كيماوي " يا عم خلاص بهزر بهزر
جنرال وانت بقى يا سي سعيد مش مبسوط من انك الخادم الكبير سعيد
سعيد مش انا ... جربت ومعرفتش .. قاقول مثل عن المسيح اقول مثل الزارع الشعر .. كل ما اجي اقول معجزة اقول عن حلاقة ابنة يايرس
نظمي ايه هو اللي بتقوله ده انت هتهرطق
سعيد يا جماعة اعذروني ما الشخصية دي مش راكبة علي خالص .. وبعدين بيني وبينكم تفتف وحشتني اينعم هي ايديها تقيلة حبتين وكل شوية تبهدلني .. لكن معلش هو الراجل ليه مين غير مراته تبهدله
تفتف خير ايه في ايه سامعة اسمي الفني بيتقال في الاوساط ال...
جنرال ال الايه يا ست تفيدة
تفتف تفيدة ايه الاسم البلدي ده
تيتي بلدي الله يرحم الشبشب الزنوبة
تفتف انا البس زنوبة انت مش عارفة السابوه ده جابياه منين
سعيد سيبك منهم يا تفتف يا حبيبتي .. انت بجد وحشتيني قوي
تفتف ايه ده اف وسع كده وحط برفان قبل ماتكلمني
سعيد " يشم نفسه " يا خونا انا لسه مستحمي
كيماوي المهم دلوقتي احنا اتجمعنا هنا علشان نشوف هنرجع شخصياتنا القديمة ازاي
تفتف نرجع ايه انتوا اتجننتوا
سعيد ايه يا تفتف يا حبيبتي منفسكيش ترجعي تنوري المحل تاني
تفتف اف محل ايه يا بني بقى انا تفتف الممثلة المشهورة ترجع تقف في محل حلاق
تيتي يعني ايه انت هاتخدي شخصيتي كده على طول
تفتف لو سمحتي متجيش جنبي .. وبعدين انا مخدتش شخصيتك منك انت اللي بعتيها للروبابيكيا بكامل ارادتك
تيتي اخ يا
نظمي الحقوناالحقونا يا خلق
حلاوة ايه في ايه
كيماوي الحقونا هيموتوا بعض
سناء فرصة سبق صحفي واعلامي محصلش
جنرال سبق ايه انت عاوزة جنازة وتشبعي فيها لطم
حلاوة ايه اللي حصل
سعيد العمدة .. قصدي العمدة تيتي .. يوه المهم الست دي عاوزة ترجع شخصيتها
نظمي وتفتف مش عاوزة ترجعهالها
حلاوة هي حرة
كيماوي يعني ايه
حلاوة يعني محدش ضربها على ايديها علشان تبيع
جنرال الله انت معاها ولا معانا
حلاوة انا مع الحق
سناء يعني انت موقفك ايه
حلاوة انا شايفة ان رايها صح
كيماوي صح .. داهية لتكوني كمان انت مش عاوزة ترجعي شخصيتك
حلاوة مظبوط
كيماوي مظبوط مظبوط ازاي .. يعني ايه انا اتحبست في شخصية الست دي ولا ايه
حلاوة بصراحة دي مشكلتك انت
كيماوي يعني ايه دانا اصور فيها قتيل
حلاوة حيلك حيلك انت نسيت انا مين
جنرال يا جماعة اهدوا اهدوا مش كده
كيماوي اهدي ازاي انت مش شايف بتقول ايه
تيتي طب خلاص اهدي انت وخليكي انت الاحسن
حلاوة طبعا انا الاحسن انا الدكتورة حلاوة
كيماوي انت هتغظيني
سعيد يوه انتوا هتبدأو تاني ما تهدوهم يا جماعة
منصور هاها زي ما اتوقعت تمام مسكوا في بعض
كيماوي انت ايه اللي جابك يا وش المصايب
منصور انا وش المصايب الله يسامحكوا طب دانا قولتلكوا على اللي هيحصل من الاول
نظمي قولتلنا ايه
منصور قولتلوا هتندموا .. اقتنعوا بشخصياتكوا ربنا خلقوا كده حسنوها بس متغيروهاش
تفتف بدأنا بقى في كلام الحم والمواعظ اللي لا يودي ولا يجيب
منصور لا لا انا طول عمري كلامي لا يودي ولا يجيب بس المرة دي الكلام هيصيب
حلاوة ياعم انت بدل ما توعظنا اوعظ نفسك وفوق من اللي انت فيه
منصور ما هو هو ده سبب اللي انا فيه انا مين انا انا ولا انا اللي عاوزه اكون انا
تيتي انت فاهمة حاجة
تفتف ابدا يا اختي يقطعني
منصور انا عاوز اقول انتوا لما حبيتوا تاخدوا الشخصية الجديدة ختوها كلها على بعضيها
سعيد بعبلها يعني
منصور بعبلها معرفتوش ايه الوحش فيها علشان تبعدوا عنه
جنرال وانت
منصور انا برضه عجبني دور السكران .. عايش في ملكوته ولا همه أي حد ومحدش بياخد على كلامه .. اهو سكران
نظمي وبعدين
منصور لما عزت ارجع ....... منفعش .... فين روبا بيكيا انا عاوز روبابيكيا هاتولي روبابيكيا " يخرج "
سعيد منه لله نكد علينا البعيد
كيماوي انا ماليش دعوة انا عاوز شخصيتي
حلاوة ابقى تعالى خدها من على قبري
كيماوي يبق انت اللي حكمتي على نفسك
جنرال يا جماعة يا جماعة عاوزين الحل وبعدين شوفوا مين عاوز يرجع لشخصيته القديمة
سناء ومين بقى اللي عاوز يحتفظ بشخصيته الجديدة
حلاوة يعني ايه
كيماوي يعني لازم نلاقي روبابيكيا
تيتي وده نجيبه منين
كيماوي مش عارف
جنرال عارف صح هو عارف
عارف خير بتجيبوا في سيرتي ليه
نظمي عارف كويس انك جيت
تيتي انت الامل الوحيد
جنرال انت المنقذ لينا يا عارف
عارف لخصوا عاوزين ايه
سناء روبا بيكيا
عارف وبعدين
كيماوي مالكش دعوة انت
عارف ان كان على روبا بيكيا اديه قدامكوا
تيتي روبا بيكيا جيت في وقتك
روبا بيكيا خير
سعيد عاوزين شخصياتنا القديمة
روبا بيكيا ليه
جنرال ايه اللي ليه شخصياتنا وعاوزينها
روبا بيكيا ما انا قولتلكوا هتندموا
تيتي خلاص يا عم عرفنا غلطنا وندمنا
كيماوي احنا خلاص توبنا
روبا بيكيا مينفعش
نظمي هو ايه اللي مينفعش
روبا بيكيا مينفعش ارد لكم شخصياتكوا القديمة
سعيد نعم ليه
كيماوي دا انا كنت اقتلك
روبا بيكيا حيللك حيلك بالراحة ... شخصياتكوا القديمة ملك صاحبها الجديد وه وحده صاحب التصرف فيه دلوقت
سناء ودا مين ده
عارف انا
جنرال انت يا عارف
عارف اه انا
تيتي طب وليه
عارف حاجة قديمة ورمتوها ومبقتوش عاوزينها ليه مخدهاش انا
كيماوي يعني ايه
عارف يعني الحاجة دي ملكي دلوقت
تيتي جدع يا عارف
سناء الله يخليك يا عارف
جنرال ربنا يطولك يا عارف
عارف خلاص خلاص انا هارجعلكم شخصياتكوا تاني بس لي شرط
كلهم ايه هو
عارف هاحتفظ بشخصية واحدة لي
شخصية ايه
عارف " يرتدي الشخصية " انا الجنرال عارف
ستــــــــــــــــــــــــــــــــــــار
